༧གོང་ས་རྒྱལ་བ་རིན་པོ་ཆེ་མཆོག་ནས་རྒྱ་གར་གྱིས་གཅིག་རྟེན་དུ་གྱུར་བའི་འཛམ་གླིང་ནང་གྲོས་མོལ་དང་ཞི་བདེ་བསྐྲུན་པར་ཞབས་འདེགས་སྒྲུབ་པའི་ནུས་པ་གལ་ཆེན་ཡོད་པ་གསུངས་འདུག
དེ་རིང་༧གོང་ས་རྒྱལ་བ་རིན་པོ་ཆེ་མཆོག་གིས་རྒྱ་གར་གྱི་སྲིད་བློན་མུ་དྷི་མཆོག་དགུང་གྲངས་ ༧༤ ཕེབས་པའི་འཁྲུངས་སྐར་ལ་འཚམས་འཕྲིན་བསྩལ་ཡོད་པ་དང་། ༧གོང་ས་མཆོག་གི་འཚམས་འཕྲིན་ནང་། རྒྱ་གར་གྱི་འཚེ་མེད་ཞི་བ་དང་སྙིང་རྗེའི་སྲོལ་རྒྱུན་གྱིས་འཛམ་གླིང་ཡོངས་ལ་མིག་དཔེ་བསྟན་ཡོད། དེ་བཞིན་རྒྱ་གར་ནི་ནུས་པ་ལྡན་པའི་དམངས་གཙོའི་རྒྱལ་ཁབ་སྟོབས་ཆེན་ཞིག་ཡིན་པ་དང་། རྒྱལ་སྤྱིའི་སྟེང་ཤུགས་རྐྱེན་ཆེན་པོ་ཡོད་པར་བརྟེན། རྒྱ་གར་གྱིས་ཕན་ཚུན་གཅིག་ལ་གཅིག་རྟེན་དུ་གྱུར་བའི་འཛམ་གླིང་ནང་ཞི་བདེ་དང་གྲོས་མོལ་ཡོང་བར་ཞབས་འདེགས་སྒྲུབ་པའི་ནུས་པ་གལ་ཆེན་ཡོད། དེ་བཞིན་ངོས་ཀྱིས་གོ་སྐབས་འདི་བརྒྱུད་ནས་ལོ་ངོ་དྲུག་ཅུ་རེ་ལྔའི་རིང་རྒྱ་གར་གཞུང་དམངས་གཉིས་ཀྱིས་ངོས་དང་བཙན་བྱོལ་བོད་མི་རྣམས་ལ་མཐུན་འགྱུར་རོགས་རམ་གནང་བར་བཀའ་དྲིན་ཆེ་ཞུ་རྒྱུ་ཡིན། ཞེས་གསལ་འདུག
མཇུག་ཏུ་༧གོང་ས་མཆོག་ནས། ཁྱེད་ཀྱི་སྐུ་གཟུགས་གསལ་ཐང་དང་། རྒྱ་གར་རྒྱལ་ཁབ་ཆེན་པོའི་མི་མང་གི་རེ་བ་དང་མངོན་འདོད་འགྲུབ་པ་མ་ཟད། བྱམས་བརྩེ་དང་ཞི་བདེའི་འཛམ་གླིང་བསྐྲུན་པར་ཞབས་འདེགས་བསྒྲུབ་ཐུབ་པའི་སྨོན་འདུན་ཞུ་རྒྱུ་ཡིན། ཞེས་གསུངས་འདུག
སྲིད་བློན་ནཱ་རན་ཌ་མུ་དྷི་མཆོག་ནི་རྒྱ་གར་གྱི་སྲིད་བློན་གྱི་རྒྱལ་ཁ་ཐོབ་པ་ཐེངས་གསུམ་པ་དེ་ཡིན་ལ། ཁོང་ནི་གྷོ་ཇི་རཱ་ཊིའི་མེ་འཁོར་ཐབ་ཚང་ནང་ལས་ཀ་བྱེད་མཁན་ཞིག་ནས་ལྡི་ལི་མཐོ་སློབ་ནས་སྲིད་དོན་ཚན་རིག་གི་རིག་གནས་རབ་འབྱམས་པའི་ལག་འཁྱེར་བླངས་བ་དང་། གྷོ་ཇི་རཱ་ཊིའི་གཙུག་ལག་སློབ་ཆེན་ནས་སྲིད་དོན་ཚན་རིག་གི་གཙུག་ལག་རབ་འབྱམས་པའི་ལག་འཁྱེར་བླངས་ཡོད་འདུག ཕྱི་ལོ་ ༡༩༩༥ ལོར་བྷི་ཇི་པི་སྲིད་དོན་ཚོགས་པའི་དྲུང་ཆེར་བདམས་ཐོན་བྱུང་སྟེ། ཧི་མ་ཅལ་དང་ཧར་ཡ་ན་མངའ་སྡེའི་ནང་སྲིད་དོན་གྱི་ཕྱག་ལས་གནང་། ཕྱི་ལོ་ ༡༩༩༨ ལོར་གྷོ་ཇི་རཱ་ཊིའི་གྲོས་ཚོགས་འཐུས་མིར་བདམས། ཕྱི་ལོ་ ༢༠༠༡ ལོ་ནས་བཟུང་གྷོ་ཇི་རཱ་ཊི་མངའ་སྡེའི་སྤྱི་ཁྱབ་བློན་ཆེན་གྱི་ཕྱག་ལས་གནང་ཞིང་། ཕྱི་ལོ་ ༢༠༡༠ ལོར་༧གོང་ས་རྒྱལ་བ་རིན་པོ་ཆེ་མཆོག་དང་མཇལ་མོལ་གནང་ཡོད་པ་རེད། ཕྱི་ལོ་ ༢༠༡༤ ལོ་ནས་ཁོང་རྒྱ་གར་གྱི་སྲིད་བློན་དུ་འདེམས་ཐོན་བྱུང་ཡོད་པ་རེད།
གསར་འགོད་པ། བྱམས་པ་ཚེ་རིང་། རྩོམ་སྒྲིག་པ། སྐལ་བཟང་སྦྱིན་པ།
