ཨོ་གླིང་དུ་གཞིས་སྤོར་གྱི་ལས་གཞི་སླར་གསོ་ཐུབ་འདུག 

ཆབ་སྲིད་བཙོན་པ་དང་འབྲེལ་ཡོད། འབྲེལ་ཆགས་རྣམས་ཨོ་གླིང་དུ་གཏོང་བའི་ལས་གཞི་སླར་གསོ་ཐུབ་ནས་གང་མགྱོགས་ལས་དོན་གཉེར་ཐབས་གནང་རྒྱུ་ཡིན་སྐོར་སོགས་བརྗོད་སོང་། 

དེ་རིང་གྲོས་ཚོགས་ཚོགས་དུས་བརྒྱད་པའི་ལས་ཉིན་དྲུག་པའི་ཉིན། དབུས་བོད་མིའི་སྒྲིག་འཛུགས་བདེ་སྲུང་ལས་ཁུངས་ཀྱི་ལས་ཁུངས་མ་ལག་དང་བཅས་པའི་རྩིས་ལོ ༢༠༢༣ དང་༢༠༢༤ ལོའི་ལོ་འཁོར་ལས་བསྡོམས་སྙན་སྒྲོན་དང་། འཛིན་སྐྱོང་བཀའ་ཤག་གི་ལན་འདེབས་གསལ་བཤད་སྐབས། ༧གོང་ས་རྒྱལ་བ་རིན་པོ་ཆེ་མཆོག་གི་སྐུ་ཕྱྭ་དང་། ཆབ་སྲིད་བཙོན་པ་དང་། འབྲེལ་ཡོད། འབྲེལ་ཆགས་ཀྱི་ཨོ་གླིང་གཞིས་སྤོར་ལས་གཞི་སོགས་ཀྱི་ཐད་ལ་གླེང་སློང་གནང་སོང་། 

སྐབས་དེར་བོད་མི་མང་སྤྱི་འཐུས་བཀྲ་ཤིས་དོན་གྲུབ་ལགས་དང་། རིག་འཛིན་ལྷུན་འགྲུབ་ལགས། མི་འགྱུར་རྡོ་རྗེ་ལགས། དེ་བཞིན་མཁན་པོ་འཇམ་དཔལ་བསྟན་འཛིན་ལགས་སོགས་ཀྱིས་བདེ་སྲུང་ལས་ཁུངས་དང་། རྒྱ་གར་དབུས་ས་གཉིས་སོགས་ཀྱིས་མུ་མཐུད་དུ་༧གོང་ས་རྒྱལ་བ་རིན་པོ་ཆེ་མཆོག་གི་སྐུ་ཕྱྭའི་ཐད་ལ་ཞབས་འདེགས་དང་སྲི་ཞུ་བསྒྲུབ་དགོས་པའི་སྐོར་དང་། དེང་གི་ཆར་སྤྱི་ཚོགས་དྲ་ལམ་ཁག་ཏུ་༧གོང་ས་རྒྱལ་བ་རིན་པོ་ཆེ་མཆོག་ལ་མངོན་སུམ་འཛེམ་མེད་ཀྱི་ཐོག་ནས་མཚན་སྨད་ཞུ་མཁན་དེ་དག་རྒྱལ་ཁབ་སོ་སོའི་ཡུལ་ཁྲིམས་དང་མཐུན་པའི་ཐོག་ནས་རྟོག་ཞིབ་དང་འཐེར་འདོན་བྱ་དགོས་པའི་སྐོར་ལ་གླེང་སློང་ཤུགས་ཆེན་གནང་བ་མ་ཟད། བདེ་སྲུང་ལས་ཁུངས་ངོས་ནས་མཚན་སྨད་ཞུ་མཁན་རྩད་གཅོད་གནང་སྟེ། འབྲེལ་ཡོད་སྐུ་ཚབ་དོན་གཅོད་ཁང་ལ་བཀོད་མངགས་གནང་ཟིན་ཞིང་། འདས་པའི་ལོ་ཤས་རིང་འགག་པའི་ཨོ་གླིང་གཞིས་སྤོར་གྱི་ལས་གཞི་དེ་སླར་གསོ་ཐུབ་པ་དང་འབྲེལ། བདེ་སྲུང་བཀའ་བློན་རྒྱ་རི་སྒྲོལ་མ་མཆོག་གིས།  ཨོ་གླིང་གི་གཞིས་སྤོར་དེ་དང་འབྲེལ་ནས་ཨོ་གླིང་གཞུང་ལ་ཐུགས་རྗེ་ཞུ་རྒྱུ་དང་། ལས་གཞི་དེ་འགག་ནས་གང་ཙམ་ཕྱིན་ཡོད་ཀྱང་། བོད་མི་རྣམས་ཀྱིས་འདས་པའི་ལས་དོན་ལ་བསྔགས་བརྗོད་བྱས་པ་ལས་རྙོག་གྲ་གང་ཡང་བཟོས་མེད་སྟབས། ཨོ་གླིང་གཞུང་གིས་བོད་མི་རྣམས་ལ་བསྔགས་བརྗོད་བྱས་ཡོད་པའི་ཁར། བདེ་སྲུང་ལས་ཁུངས་ཀྱིས་མུ་མཐུད་དུ་ལས་གཞི་དེ་གང་མགྱོགས་མགོ་བཙུགས་ཐུབ་སླད། ཕྱི་འབྲེལ་ལས་ཁུངས་དང་དོན་གཅོད་སོགས་ཕན་ཚུན་འབྲེལ་བ་གནང་མུས་ཡིན་པས། གནད་དོན་དེའི་ཐད་ཡོངས་གྲགས་ཀྱི་ཐོག་ནས་གླེང་སློང་ཤུགས་ཆེན་གནང་རྒྱུ་མིན། ཞེས་གསུངས་སོང་། 

གནད་དོན་དེའི་ཐད་བོད་མིའི་སྒྲིག་འཛུགས་བདེ་སྲུང་ལས་ཁུངས་མ་ལག་དང་བཅས་པའི་ཕྱི་ལོ་ ༢༠༢༣ ཟླ་ ༤ ཚེས་ ༡ ནས་ཕྱི་ལོ་ ༢༠༢༤ ཟླ་ ༣ ཚེས་ ༣༡ བར་གྱི་ལོ་འཁོར་ལས་བསྡོམས་རྒྱས་པར་སྤྱི་འཐུས་རྒྱུན་ལས་ནས་གཟིགས་ཞིབ་ཀྱིས་དོགས་འདྲི་ཁག་ལ་གསལ་བཤད་གནང་བའི་ཁྲོད། བདེ་སྲུང་ལས་ཁུངས་ནས་ངོས་བཞེས་ཟིན་པའི་ཆབ་སྲིད་བཙོན་ཟུར། འབྲེལ་ཡོད། འབྲེལ་ཆགས་རྣམས་ལ་ཕན་ཐོགས་ཆེ་བའི་ཨོ་གླིང་གཞིས་སྤོའི་ལས་གཞི་དེ་དག་ཨོ་གླིང་གཞུང་གི་སྤྱི་ཡོངས་གཞིས་སྤོ་ཁྲིམས་ཡིག་དང་དེ་འབྲེལ་ལས་དོན་བྱེད་ཕྱོགས་ཁག་ཅིག་ལ་འགྱུར་བ་ཕྱིན་པར་བརྟེན། འདི་གའི་བོད་མིའི་གཞིས་སྤོའི་ལས་གཞི་ལའང་དོ་ཕོག་ཤུགས་ཆེར་སོང་ཡོད་པས། ཨོ་གླིང་སྐུ་ཚབ་དོན་གཅོད་ལས་ཁུངས་ནས་འགན་རྐང་བཞེས་ཐོག་ཕྱོགས་ཡོངས་ནས་ཐབས་འཚོལ་དང་འབད་བརྩོན་ཞུ་འབྲས་སུ་ཉེ་ལམ་ཨོ་གླིང་གཞུང་གི་དགོངས་པ་ཆེ་བཞེས་ཀྱིས་ལས་གཞི་འདི་ཉིད་སླར་གསོ་བྱུང་ཡོད་སྐོར་འབྲེལ་ཡོད་སྐུ་ཚབ་དོན་གཅོད་ལས་ཁུངས་ནས་སྙན་གསན་བྱུང༌། ཞེས་འཁོད་འདུག 

བདེ་སྲུང་ལས་ཁུངས་ཀྱི་ལས་བསྡོམས་ལྟར་ན། ཕྱི་ལོ་ ༢༠༡༤ ནས ༢༠༢༤ བར་ཆབ་སྲིད་བཙོན་ཟུར་དང་། འབྲེལ་ཡོད། འབྲེལ་ཆགས་སོགས་ཀྱི་སྙན་ཞུ་འབུལ་མཁན་གྲངས་ ༡༩༦༧ བྱུང་བའི་ཁྲོད། ཞིབ་འཇུག་བྱས་ཟིན་པའི་གྲངས་ ༡༤༩༢ དང་ཞིབ་འཇུག་བྱ་རྒྱུ་ལྷག་པའི་སྙན་ཞུ་གྲངས་ ༣༧༥ ཡོད་འདུག་ལ། འདས་པའི་ལོ་ཤས་གོང་ནས་རྒྱན་ཐོབ་ཟིན་ནའང་ཨོ་གླིང་དུ་བསྐྱོད་མ་ཐུབ་པའི་མི་གྲངས་ ༡༣ ཡོད་འདུག དེ་བཞིན་སྤྱི་འཐུས་རྒྱུན་ལས་ཀྱིས་ལས་བསྡོམས་ལ་གཟིགས་ཞིབ་གནང་རྗེས་དོགས་འདྲི་ཁག་ལ་བདེ་སྲུང་ལས་ཁུངས་ནས་ལན་འདེབས་བྱས་པའི་ཁྲོད། བདེ་སྲུང་ལས་ཁུངས་ནས་བོད་མི་ཆབ་སྲིད་བཙོན་ཟུར་དང་། འབྲེལ་ཡོད། འབྲེལ་ཆགས་ངོས་བཞེས་ཀྱིས་ཨོ་གླིང་དུ་གཞུང་འབྲེལ་ཆེད་གཏོང་གནང་ཟིན་པའི་ཁོངས་ནས་བོད་དུ་ཕྱིར་ལོག་གནང་མཁན་ཤེས་རྟོགས་བྱུང་བ་གྲངས་ ༡ ཡོད། གནས་ཚུལ་འདིའི་རིགས་སྒེར་གྱི་ཁེ་ཕན་ལ་མ་ལྟོས་པར་བོད་ཀྱི་ཡུལ་མིའི་ལས་འགན་སྒྲུབ་དགོས་མིན་བོད་དུ་ཕྱིར་ལོག་གནང་མཁན་དོ་བདག་སོ་སོ་ནས་དགོངས་དཔྱད་གནང་དགོས་པ་ཞིག་ཡིན། ཞེས་གསལ་འདུག

གསར་འགོད་པ། བསྟན་འཛིན་ཕུར་བུ། དཔལ་ལྡན། རྩོམ་སྒྲིག་པ། སྐལ་བཟང་སྦྱིན་པ།