རྒྱ་ནག་གཞུང་གིས་བོད་དང་བལ་ཡུལ་གྱི་ས་མཚམས་ཀོ་ར་ལ་རུ་གནས་སྤོར་ཞིབ་བཤེར་ལས་ཁུངས་ཤིག་གསར་འཛུགས་བྱས་ཏེ་མི་འགྱངས་པར་དངོས་སུ་ལས་ཁུངས་སྒོ་འབྱེད་བྱ་རྒྱུ་ཡིན་འདུག
ཉེ་ལམ་ཀ་ཐི་མན་ཌུའི་ཆ་འཕྲིན་ (Kathmandu Post) གསར་ཁང་གིས་གནས་ཚུལ་སྤེལ་བ་ལྟར་ན། རྒྱ་ནག་གཞུང་གིས་བལ་བོད་ས་མཚམས་ལས་གློ་སྨོན་ཐང་གི་ཀོ་ར་ལའི་ (Korala) ས་ཁུལ་དུ་གནས་སྤོར་ཞིབ་བཤེར་ལས་ཁུངས་ཤིག་གསར་འཛུགས་ཀྱིས་སྒོ་འབྱེད་བྱེད་ལ་ཉེ་ཞིང་། གློ་སྨོན་ཐང་རྫོང་འཛིན་སྐྱོང་ལས་ཁུངས་ཀྱིས། འདི་ལོའི་ཕྱི་ཟླ་ ༡༠ པའི་ནང་བལ་ཡུལ་གཞུང་གིས་ཧིན་རྡུ་ཆོས་ལུགས་ཀྱི་དུས་ཆེན་ (Dashain) གོང་དུ་གནས་སྤོར་ཞིབ་བཤེར་ལས་ཁུངས་གསར་པ་དེ་སྒོ་འབྱེད་བྱ་འཆར་ཡོད་ལུགས་བསྒྲགས་འདུག
དེ་འབྲེལ་གློ་སྨོན་ཐང་གི་རྫོང་དཔོན་ཇཱ་ནག་ (Janak Raj Panta) གིས། ཀོ་ར་ལ་ས་མཚམས་སུ་འཛུགས་སྐྲུན་བྱེད་བཞིན་པའི་གནས་སྤོ་ལས་ཁུངས་ཀྱི་ལས་གཞི་མཇུག་སྒྲིལ་ཉེ་ཡོད་པ་མ་ཟད། ལས་ཁུངས་སུ་གློག་དང་དྲ་རྒྱ་སོགས་དགོས་ངེས་ཀྱི་མཐུན་རྐྱེན་སྦྱོར་མུས་ཡིན་སྐོར་དང་། ལས་གཞི་དེར་འབྲེལ་ཡོད་བལ་ཡུལ་གྱི་ནང་སྲིད་བློན་ཆེན་ལས་ཁུངས་ཀྱིས་མཐའ་མའི་རྟོག་ཞིབ་བྱས་རྗེས་ལས་དོན་དངོས་སུ་མགོ་འཛུགས་ཀྱི་ཡོད་པ་མ་ཟད། བལ་ཡུལ་མི་སེར་རྣམས་གནས་སྤོ་ལས་ཁུངས་ཀྱི་ཆོག་མཆན་འོག་འགྲིམ་འགྲུལ་བྱེད་ཆོག་གི་ཡོད་སྐོར། དེ་བཞིན། བལ་ཡུལ་མི་སེར་རྣམས་གནས་སྤོ་ལས་ཁུངས་དེ་ནས་འགྲོ་འོང་དང་ཚོང་འབྲེལ་གྱི་ཆོག་མཆན་ཡིག་ཆ་རག་རྗེས་རྒྱ་བལ་གཉིས་ནང་ཚོང་འབྲེལ་དང་འགྲོ་འོང་གི་རང་དབང་ཡོད་སྐོར་བརྗོད་འདུག རྒྱ་ནག་གིས་བོད་ཁུལ་དུ་ཡོད་པའི་ཀོ་ར་ལ་ས་མཚམས་ཁུལ་དུ་གནས་སྤོ་ལས་ཁུངས་གསར་འཛུགས་དང་འབྲེལ་ནས་རྨང་གཞིའི་འཛུགས་སྐྲུན་བྱས་ཟིན་འདུག་ལ། ད་ལྟའི་ཆར་ལས་ཁུངས་སུ་ལས་ཤག་དང་བདེ་འཇགས་ཞིབ་བཤེར་ས་ཚིགས། མཛོད་ཁང་། ཟུར་འཇོག་ཁང་སོགས་གསར་འཛུགས་བྱས་ཟིན་པའི་གནས་ཚུལ་འཐོན་བཞིན་འདུག
ཕྱི་ལོ་ ༢༠༢༠ ཟླ་ ༡ པོའི་ནས་བཟུང་འཛམ་གླིང་ཡོངས་ལ་ཏོག་དབྱིབས་གཉན་རིམས་ཁྱབ་གདལ་ཤུགས་ཆེན་ཕྱིན་པར་བརྟེན། རྒྱ་ནག་གིས་བལ་བོད་ས་མཚམས་སྒོ་བརྒྱབ་པར་བརྟེན་ནས། བལ་ཡུལ་ལས་བོད་ཕྱོགས་སུ་བརྟེན་པའི་བལ་ཡུལ་གྱི་ཀོ་ར་ལའི་རི་ཁུལ་དུ་ཡོད་པའི་གྲོང་གསེབ་ཀྱི་མི་མང་གི་ཉིན་རེའི་འཚོ་བར་དོ་ཕོག་ཤུགས་ཆེན་ཐེབས་ཡོད་པ་རེད། འདས་ལོའི་ཕྱི་ཟླ་ ༡༡ ནས་བཟུང་རྒྱ་བལ་གཉིས་མཉམ་འབྲེལ་གྱིས་ཀོ་ར་ལ་ས་མཚམས་བསྐྱར་དུ་སྒོ་ཕྱེས་ཏེ། ས་ཁུལ་དེར་གནས་སྡོད་མི་མང་དང་ཚོང་པ་ཁག་གི་འཚོ་བའི་མཐུན་རྐྱེན་ཉོ་སྒྲུབ་སོགས་སླ་རུ་ཕྱིན་ཡོད་འདུག
གློ་སྨོན་ཐང་ནི་དེ་སྔ་བོད་ཀྱི་ས་ཁོངས་ཡིན་པས་ས་ཁུལ་དེར་བོད་ཀྱི་རིག་གནས་ཕུན་སུམ་ཚོགས་པ་ཡོད་ཅིང་། ད་ལྟའི་ཆར་བལ་ཡུལ་གྱི་གྷན་དྷ་ཀི་ (Gandaki) མངའ་སྡེའི་ཁོངས་གཏོགས་ཡིན་པ་རེད། བལ་བོད་ས་མཚམས་ལས་ད་རེས་ཀོ་ར་ལ་ས་མཚམས་སུ་གནས་སྤོར་ཞིབ་བཤེར་ལས་ཁུངས་བཙུགས་པ་དེ་ནི། རྒྱ་ནག་གིས་ཏོག་དབྱིབས་གཉན་རིམས་རྗེས། བལ་བོད་མཐའ་མཚམས་བསྐྱར་དུ་སྒོ་འབྱེད་བྱས་པའི་ས་ཚིགས་བཞི་པ་ཆགས་ཀྱི་ཡོད་འདུག་ལ། ད་སྔ་རྒྱ་ནག་གིས་སྐྱིད་རོང་ནས་ར་སོ་ཝ་དང་། སྤུ་ཧྲང་ནས་ཧམ་ལ། གཏིང་སྐྱེས་རྫོང་གི་རི་བོ་ནས་ཝ་ལུང་། ལྷུ་རྩེ་ནས་གློ་སྨོན་ཐང་། འགྲམ་དང་འདྲེན་ཐང་སོགས་ས་མཚམས་ཁག་བདུན་འདུག
ཕྱི་ལོ་ ༢༠༡༦ ལོར་བལ་ཡུལ་དང་རྒྱ་ནག་གཉིས་ཀྱིས་ཚོང་འབྲེལ་དང་ཐོངས་མཆན་གྱི་གྲོས་མཐུན་བཞག་ཡོད་འདུག་ལ། གྲོས་མཐུན་ལྟར་ན་མི་སུ་ཡིན་རུང་རྒྱ་ནག་དང་བལ་ཡུལ་ནང་འགྲོ་འོང་བྱེད་ཆོག་ཀྱང་། ད་ལྟའི་ཆར་གློ་སྨོན་ཐང་དུ་གནས་སྡོད་ཡུལ་མི་ཁོ་ན་བོད་དང་རྒྱ་ནག་ཏུ་འགྲོ་འོང་བྱས་པར་གློ་སྨོན་ཐང་རྫོང་ཁོངས་ཀྱི་འཛིན་སྐྱོང་ལས་ཁུངས་ནས་ཆོག་མཆན་ཡིག་ཆ་ངེས་པར་དུ་དགོས་པ་རེད།
གསར་འགོད་པ། བསྟན་འཛིན་ཕུར་བུ།
