བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་ཉི་ཧོང་གི་སྲིད་བློན་ཤི་གྷེ་རུ་ཨི་ཤི་བྷ་མཆོག་ལ་འཚམས་འདྲི་གནང་བ་དང་སྦྲགས་ཁོང་གི་སྣེ་ཁྲིད་འོག་བོད་མི་རྣམས་ལ་རྒྱབ་སྐྱོར་མུ་མཐུད་གནང་བའི་འབོད་སྐུལ་གནང་སོང་།
ཟླ་འདིའི་ཕྱི་ཚེས་ ༡ ཉིན་ཉི་ཧོང་གི་སྲིད་བློན་ཤི་གྷེ་རུ་ཨི་ཤི་བྷ་མཆོག་གིས་ལས་ཁུར་མགོ་བཙུགས་ཡོད་པ་ལྟར། ཁ་སང་ཕྱི་ཚེས་ ༣ ཉིན་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་ཉི་ཧོང་གི་སྲིད་བློན་གསར་པ་ཤི་གྷེ་རུ་ཨི་ཤི་བྷ་མཆོག་དང་། ཁོང་གི་གུ་ཡངས་དམངས་གཙོ་ཚོགས་པར་འོས་བསྡུའི་རྒྱལ་ཁ་ཐོབ་པར་བོད་མིའི་སྒྲིག་འཛུགས་དང་བོད་མི་ཡོངས་ཀྱི་ཚབ་ཞུས་ཏེ་འཚམས་འདྲི་གནང་འདུག
སྲིད་སྐྱོང་མཆོག་གིས་འཚམས་འཕྲིན་གནང་བའི་ནང་། ༧གོང་ས་རྒྱལ་བ་རིན་པོ་ཆེ་མཆོག་རྒྱ་གར་དུ་བཙན་བྱོལ་ལ་ཕེབས་ནས་ཡུན་རིང་མ་སོང་བར་ཕྱི་ལོ་ ༡༩༦༧ ལོར་ཉི་ཧོང་དུ་ཆིབས་བསྒྱུར་བསྐྱངས་གནང་མཛད་པ་ནས་བཟུང་། ཉི་ཧོང་གཞུང་མང་གཉིས་ནས་༧མགོན་པོ་གང་ཉིད་མཆོག་དང་བོད་མི་རྣམས་ལ་སྣེ་ལེན་དང་མཐུན་འགྱུར་གང་ཡོང་གནང་ཡོད། འདས་པའི་ལོ་ངོ་འདི་དག་གི་རིང་ལ་ཉི་ཧོང་ནས་༧གོང་ས་རྒྱལ་བ་རིན་པོ་ཆེ་མཆོག་ལ་དད་གུས་གཙིགས་ཆེར་འཛིན་པ་མ་ཟད། དུས་ཆེན་འདྲ་མིན་དང་བསྟུན་ནས་༧མགོན་པོ་གང་ཉིད་ཡུལ་དེར་གདན་ཞུས་གནང་ཡོད་པ་རེད། ཅེས་གསུངས།
ཡང་འཚམས་འཕྲིན་ནང་། ཉི་ཧོང་གིས་རང་དབང་དང་དམངས་གཙོ། ཁྲིམས་སྒྲིག་ཁག་གཡོ་བ་མེད་པའི་ཐོག་ནས་བརྩི་སྲུང་དང་། བོད་གཙོ་བོར་གྱུར་བའི་ཤར་ཊུར་ཀི་སི་ཐན་དང་ལྷོ་སོག་སོགས་ཀྱི་འགྲོ་བ་མིའི་ཐོབ་ཐང་དང་འབྲེལ་ནས་རྒྱ་ནག་གཞུང་ལ་གདོང་ལེན་གནང་ཡོད་པ་མ་ཟད། ཉི་ཧོང་གིས་སྲིད་དབང་སྒེར་སྤྱོད་རིང་ལུགས་ལ་ངོ་རྒོལ་དང་ཐེར་འདོན་གནང་བ་དེས་རྒྱལ་སྤྱིའི་སྟེང་མིག་ལྟོས་བཟང་པོ་ཞིག་བསྟན་ཡོད། ཅེས་དང་། ཉི་ཧོང་རྒྱལ་ཡོངས་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ནང་ཚོགས་མི་བརྒྱ་ལྷག་ཡོད་པ་དེ་ནི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པ་ཆེ་ཤོས་གྲས་ཤིག་ཡིན་པས། དེས་གཞིས་བྱེས་བོད་མིའི་འཐབ་རྩོད་ལ་རེ་བ་སྦྱིན་གྱི་ཡོད་པ་རེད། སྲིད་བློན་གསར་པའི་སྣེ་ཁྲིད་འོག་མུ་མཐུད་དུ་བོད་དང་བོད་མིར་རྒྱབ་སྐྱོར་ཡོང་བའི་རེ་སྐུལ་དང་། ཁོང་ཉིད་ཀྱི་ལས་ཡུན་མཐའ་དག་ལམ་ལྷོངས་ཡོང་བའི་སྨོན་འདུན་ཡོད། ཅེས་གསུངས་འདུག
ཤི་གྷེ་རུ་ཨི་ཤི་བྷ་ལགས་ནི་ཕྱི་ལོ་ ༡༩༥༧ ཟླ་ ༢ ཚེས་ ༤ ཉིན་ཉི་ཧོང་གི་ཆི་ཡོ་ཌ་ (Chiyoda) གྲོང་ཁྱེར་དུ་སྐྱེས། ཉི་ཧོང་གི་གྲོང་ཁྱེར་མཱི་ན་ཏོ་ (Minato) རུ་རྟེན་གཞི་བྱས་པའི་ཀིའོ་མཐོ་རིམ་སློབ་གཉེར་ཁང་ (Kieo University) ནས་སློབ་མཐར་ཕྱིན་རྗེས་དངུལ་ཁང་གི་ལས་ཀ་བྱས། ཕྱི་ལོ་ ༡༩༨༦ ལོར་ཁོང་ཉི་ཧོང་གི་གྲོས་ཚོགས་འོག་མའི་འཐུས་མིར་བདམས་ཐོན་བྱུང་། ཕྱི་ལོ་ ༢༠༠༧ ནས་ ༢༠༠༨ བར་རྒྱལ་སྲུང་བློན་ཆེན་དང་། ༢༠༡༢ ནས་ ༢༠༡༤ བར་ཉི་ཧོང་གི་གུ་ཡངས་དམངས་གཙོའི་ཆབ་སྲིད་ཚོགས་པའི་སྤྱི་ཁྱབ་དྲུང་ཆེའི་ལས་དོན་གཉེར། འདི་ལོར་ཨི་ཤི་བྷ་མཆོག་ཉི་ཧོང་གི་གུ་ཡངས་དམངས་གཙོ་ཚོགས་པའི་སྲིད་འཛིན་དང་ཉི་ཧོང་གི་སྲིད་བློན་ཐེངས་ ༦༥ པའང་ཡིན་པ་རེད།
གསར་འགོད་པ། བསྟན་འཛིན་ཕུར་བུ།
