མགོ་ལོག་གླུ་བ་དཔལ་ལྡན་ལགས་ཀློད་གྲོལ་བཏང་འདུག

འདས་ལོའི་ཕྱི་ཟླ་ ༡༡ ནང་རྒྱ་ནག་གཞུང་གིས་ལོ་གསུམ་གྱི་བཙོན་འཇུག་ཁྲིམས་ཐག་བཅད་པའི་མགོ་ལོག་གླུ་བ་དཔལ་ལྡན་ལགས་བཙོན་འཇུག་གི་དུས་ཡུན་མ་ཚང་གོང་ནས་ཀློད་གྲོལ་བཏང་འདུག

རྒྱ་ནག་གཞུང་གིས་མགོ་ལོག་པདྨ་རྫོང་དྷི་མདའ་ཡུལ་ཚོའི་ཡོ་སྟག་སྡེ་བ་ནས་ཡིན་པའི་བོད་ཀྱི་ན་གཞོན་གླུ་བ་མགོ་ལོག་དཔལ་ལྡན་ལགས་དུས་ཡུན་གང་འཚམ་ཞིག་འཛིན་བཟུང་བཀག་ཉར་བྱས་རྗེས། འདས་ལོའི་ཕྱི་ཟླ་ ༡༡ ནང་ཁོང་གིས་ལ་རྒྱའི་གླུ་ཞིག་བླངས་བར་ཁ་གཡར་ནས་གསང་བའི་ཐོག་ནས་ལོ་གསུམ་གྱི་བཙོན་འཇུག་ཁྲིམས་ཐག་བཅད་ཡོད་ཀྱང་། འདི་ལོའི་ཕྱི་ཟླ་ ༩ ཚེས་ ༢༥ ཉིན་དཔལ་ལྡན་ལགས་བཙོན་འཇུག་དུས་ཡུན་མ་ཚང་གོང་ནས་ཀློད་གྲོལ་བཏང་ཡོད་ནའང་། མུ་མཐུད་ལྟ་རྟོག་དང་རྗེས་ཕྱོགས་ལ་རྒྱའི་གླུ་གཞས་རིགས་བླང་མི་ཆོག་པའི་ཉེན་བརྡ་བཏང་ཡོད་འདུག

འབྲེལ་ཡོད་བོད་མི་ཞིག་གིས་འདི་གའི་གསར་འགོད་པར། ཉེ་ལམ་རྒྱ་ནག་གཞུང་གིས་ཁོང་གི་ནང་མི་རྣམས་ལ་བརྡ་ལན་གང་ཡང་མ་སྤྲད་པར། གསང་བའི་ཐོག་ནས་མགོ་ལོག་གླུ་བ་དཔལ་ལྡན་ལགས་ཀློད་གྲོལ་བྱས་ཡོད་ཅིང་། སྤྱིར་ན་བཙོན་འཇུག་གི་དུས་ཡུན་རྫོགས་མེད་པས་གློ་བུར་དུ་ཀློད་གྲོལ་བྱེད་དོན་གང་ཡིན་གསལ་པོ་མི་ཤེས་ནའང་། མུ་མཐུད་དུ་ཁོང་གི་འགྲོ་འདུག་སྤྱོད་གསུམ་ལ་ལྟ་རྟོག་བྱེད་མུས་ཡིན་པའི་ཁར། གསང་བའི་ཐོག་ནས་རྗེས་འདེད་བྱེད་མུས་ཡིན་སྐོར་སོགས་བརྗོད་སོང་།

རྒྱ་ནག་གཞུང་གིས་བཙོན་འཇུག་དུས་ཡུན་མ་ཚང་གོང་ནས་ཀློད་གྲོལ་བྱས་པ་ཕལ་མོ་ཆེའི་འཕྲོད་བསྟེན་གྱི་གནས་སྟངས་ཡག་པོ་མེད་པ་མ་ཟད་མང་པོ་ཞིག་ནད་པ་ཆགས་ཀྱི་ཡོད་སྟབས། འདི་གའི་གསར་འགོད་པས་གླུ་བ་དཔལ་ལྡན་ལགས་ཀྱི་འཕྲོད་བསྟེན་གྱི་གནས་སྟངས་སྐོར་དྲིས་པར། རྒྱ་ནག་གཞུང་གིས་ཉེ་ལམ་དཔལ་ལྡན་ལགས་གྲོང་མི་སོགས་དང་ཐུག་འཕྲད་བྱེད་བཅུག་གི་མེད་པ་མ་ཟད། རྒྱ་ནག་གིས་གསང་བ་བྱས་པའི་དབང་གིས་ཁོང་ཀློད་གྲོལ་བྱས་པའི་གནད་དོན་ཡང་མི་མང་པོ་ཞིག་གིས་ཤེས་རྟོགས་བྱུང་མེད་ཅིང་། ཕྱི་ཚུལ་ནས་བལྟས་ན་འཕྲོད་བསྟེན་གྱི་དཀའ་ངལ་མེད་པ་འདྲ་བོ་ཞིག་འདུག་ཀྱང་། ད་ལྟ་དོན་དངོས་ཐོག་འཕྲོད་བསྟེན་གྱི་གནས་བབ་གང་འདྲ་ཡོད་མེད་ཤེས་རྟོགས་གསལ་པོ་ཞིག་མེད་པ་རེད་ལ། ཁོང་གིས་ལ་རྒྱ་དང་འབྲེལ་བའི་གླུ་དབྱངས་རིགས་བསྐྱར་དུ་བླངས་ཚེ། འཛིན་བཟུང་བཙོན་འཇུག་བྱ་རྒྱུ་ཡིན་པའི་ཉེན་བརྡ་བཏང་ཡོད་སྐོར་བརྗོད་སོང་།

གླུ་བ་མགོ་ལོག་དཔལ་ལྡན་ལགས་ནི་མགོ་ལོག་པདྨ་རྫོང་དྷི་མདའ་ཡུལ་ཚོའི་ཡོ་སྟག་སྡེ་བ་ནས་ཡིན་ཞིང་། ཁོང་རྒྱུན་དུ་ནས་རྡུང་ལེན་སོགས་ལེན་རྒྱུར་དགའ་པོ་ཡོད་ལ། ཕྱི་ལོ་ ༢༠༢༢ ལོར་སྨིན་ཐང་གསེར་མོ་འཚོས་གཙོ་སྒྲུབ་བྱས་པའི་རྡུང་ལེན་འགྲན་སྡུར་ཁྲོད་ཨང་རིམ་དྲུག་པ་བླངས་ནས། ཁོང་གི་ལྷད་མེད་པའི་མི་གཤིས་དྭངས་མ་དེར་བོད་ཁམས་སུ་བསྔགས་བརྗོད་བྱེད་མཁན་མང་དག་ཅིག་བྱུང་ཡོད་ལ། ཕྱི་ལོ་ ༢༠༢༢ ལོར་ཁོང་གིས་ཨ་མ་དྲན་གླུ་ཞེས་པའི་རྡུང་ལེན་བརྩམས་ཆོས་ཤིག་ཀྱང་དྲ་ལམ་དུ་བཀྲམ་ཡོད་པ་རེད། ད་ལྟ་གླུ་བ་དཔལ་ལྡན་ལགས་ཀྱི་མགྱོགས་འཕྲིན་ལ་རྗེས་འདེད་བྱེད་མཁན་མི་གྲངས་ ༩༨༠༠༠།༥ ལྷག་ཡོད་འདུག་ལ། དེ་སྔ་ཁོང་གིས་དྲ་ལམ་དུ་གླུ་བ་ནམ་མཁས་བླངས་པའི་ང་ནི་བཙན་པོའི་ཕོ་ཉ་ཡིན་ཞེས་པའི་གླུ་དབྱངས་བླངས་རྐྱེན་འཛིན་བཟུང་བཙན་ཁྲིད་བྱས་པ་རེད།