རྒྱ་ནག་གི་དམ་དྲག་འོག་བོད་ནང་གི་དངོས་ཡོད་གནས་སྟངས་ཞུ་གཏུགས་བྱེད་པར་དཀའ་ངལ་འཕྲད་ཀྱིན་འདུག

རྒྱ་གཞུང་གིས་བོད་ནང་དུ་དམ་དྲག་ཤུགས་ཆེན་བྱས་དང་བྱེད་མུས་ཡིན་པར་བརྟེན། བོད་ནང་གི་བོད་མི་ཚོའི་གནས་སྟངས་རྒྱལ་ཚོགས་སོགས་སུ་ཞུ་གཏུགས་བྱེད་པར་ཆོག་མཆན་ཐོབ་ཁག་པོ་ཡིན་པའི་དཀའ་ངལ་འཕྲད་ཀྱིན་ཡོད་འདུག

ཉེ་ལམ་མཉམ་འབྲེལ་རྒྱལ་ཚོགས་ཀྱི་ཁོར་ཡུག་དང་འགྲོ་བ་མིའི་ཐོབ་ཐང་སྲུང་སྐྱོབ་ཚན་པའི་དམིགས་བསལ་རྟོག་ཞིབ་པ་མེ་རི་ལོ་ལར་ (Mary Lawlor) ལགས་ཀྱིས་འཛམ་གླིང་ནང་ལ་འགྲོ་བ་མིའི་ཐོབ་ཐང་དང་ཁོར་ཡུག་སྲུང་སྐྱོབ་པར་དྲག་གནོན་ཐེབས་པའི་གནས་ཚུལ་མཁོ་སྤྲོད་ཡོང་བའི་གསལ་བསྒྲགས་ཤིག་སྤེལ་འདུག་པ་ལྟར། བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་ཁྲིམས་དོན་ལས་བྱེད་ཕུར་བུ་སྒྲོལ་མ་ལགས་ཀྱིས་བོད་ནང་དུ་རྒྱ་ནག་གཞུང་གི་གནོན་ཤུགས་ཆེན་པོ་ཡོད་པའི་རྐྱེན་གྱིས་མི་སྒེར་དང་ནང་མིའི་ཆོག་མཆན་ཐོབ་ཀྱི་མེད་པར་བརྟེན། མཉམ་འབྲེལ་རྒྱལ་ཚོགས་ལ་ཞུ་གཏུགས་བྱེད་ཁག་པོ་ཡོད་སྐོར་བརྗོད་བྱུང་།

དེ་རིང་འདི་གའི་གསར་འགོད་པས་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་ཁྲིམས་དོན་ལས་བྱེད་ཕུར་བུ་སྒྲོལ་མ་ལགས་སུ་བོད་ནང་གི་འགྲོ་བ་མིའི་ཐོབ་ཐང་དང་ཁོར་ཡུག་སྲུང་སྐྱོབ་པར་དྲག་གནོན་ཐེབས་པའི་གནད་དོན་མཉམ་འབྲེལ་རྒྱལ་ཚོགས་ལ་ཞུ་གཏུགས་བྱེད་ཐུབ་ཡོད་མེད་དྲིས་པར། ཁོང་མོས། ཉེ་ལམ་མཉམ་འབྲེལ་རྒྱལ་ཚོགས་ཀྱི་ཁོར་ཡུག་དང་འགྲོ་བ་མིའི་ཐོབ་ཐང་སྲུང་སྐྱོབ་པའི་དམིགས་བསལ་རྟོག་ཞིབ་པ་མེ་རི་ལོ་ལར་ལགས་ཀྱིས་གསལ་བསྒྲགས་སྤེལ་བ་མཐོང་སོང་། འོན་ཀྱང་། དེའི་ནང་མཉམ་ཞུགས་བྱེད་ཐུབ་མ་སོང་། རྒྱུ་མཚན་ནི་མཉམ་འབྲེལ་རྒྱལ་ཚོགས་ཀྱི་ངོས་ནས་འགྲོ་བ་མིའི་ཐོབ་ཐང་སྲུང་སྐྱོབ་པའམ་ཁོང་གི་ནང་མིའི་ངོས་ནས་མི་དེའི་མིང་བཀོལ་སྤྱོད་བྱ་ཆོག་པའི་ཆོག་མཆན་ངེས་པར་དུ་དགོས་པའི་གསལ་བསྒྲགས་སྤེལ་ཡོད་པར་བརྟེན། རྒྱ་ནག་གིས་བོད་ནང་དུ་དམ་དྲག་ཤུགས་ཆེན་བྱེད་ཀྱི་ཡོད་པའི་རྐྱེན་གྱིས་ནང་མི་དང་སྤུན་མཆེད་སོགས་ལས་ཆོག་མཆན་ཐོབ་དཀའ་བ་མ་ཟད། སྲུང་སྐྱོབ་པའི་ཚེ་སྲོག་ལའང་ཉེན་ཁ་འབྱུང་ཉེན་ཡོད་པ་དང་། དེའི་ནང་མི་སྤུན་གཉེན་སོགས་གང་བྱུང་འཛིན་བཟུང་དང་བཙོན་འཇུག འགྲོ་འདུག་སྤྱོད་གསུམ་ལ་སོ་ལྟ་དང་བུ་ཕྲུག་སློབ་གྲྭར་འགྲོ་མི་ཆོག་པ་སོགས་དམ་དྲག་ཤུགས་ཆེན་བྱས་དང་བྱེད་མུས་ཡིན་པས། གནས་ཚུལ་དེ་དག་མཁོ་སྤྲོད་བྱེད་མི་ཐུབ་པའི་དཀའ་ངལ་འཕྲད་པ་དང་། དམིགས་བསལ་མིང་བཀོལ་སྤྱོད་བྱེད་ཆོག་པའི་ཆོག་མཆན་ངེས་པར་དུ་དགོས་པ་སོགས་ལ་བརྟེན་ནས་ད་ལན་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ཚན་པ་ལ་གནས་ཚུལ་གང་ཡང་ཕུལ་མེད། ཅེས་འགྲེལ་བརྗོད་གནང་བྱུང་།

ད་བར་མཉམ་འབྲེལ་རྒྱལ་ཚོགས་ལ་བོད་ནང་གི་བོད་མིའི་གནས་སྟངས་དང་འབྲེལ་བའི་གནས་ཚུལ་མཁོ་སྤྲོད་ཇི་ཙམ་གནང་ཡོད་མེད་ཐད་ཕུར་བུ་སྒྲོལ་མ་ལགས་ཀྱིས། སྤྱིར་བཏང་ལྟེ་གནས་ཁང་གི་ངོས་ནས་ལོ་ལྟར་མཉམ་འབྲེལ་རྒྱལ་ཚོགས་ལ་དམིགས་བསལ་བརྒྱུད་རིམ་ (Special Procedure) ༤༦ ཡོད་པ་ལྟར། ང་ཚོའི་ལྟེ་གནས་ཁང་གི་ངོས་ནས་ཟླ་རེར་ཛ་དྲག་གི་གནས་ཚུལ་ཆེ་འབྲིང་ཆུང་གསུམ་གང་ཡིན་པ་རྣམས་གལ་ཆེར་བཟུང་སྟེ། མཉམ་འབྲེལ་རྒྱལ་ཚོགས་ལ་ཞུ་གཏུགས་དང་སྙན་གསེང་ཞུ་ཡི་ཡོད། སྐབས་འགར་བོད་ནང་གི་ཆབ་སྲིད་བཙོན་ཟུར་དང་འགྲོ་བ་མིའི་ཐོབ་ཐང་གི་གནས་སྟངས་དང་འབྲེལ་བའི་གནས་ཚུལ་ཁ་གསལ་དང་ཆ་ཚང་བ་མེད་པའི་རྐྱེན་གྱིས་རྒྱལ་ཚོགས་ལ་གནས་ཚུལ་མཁོ་སྤྲོད་བྱེད་པར་དཀའ་ཁག་ཡོང་གི་འདུག ཕྱི་ལོ་ ༢༠༢༣ ནས་འདི་ལོའི་ཕྱི་ཟླ་ ༡༠ བར་རྒྱ་གཞུང་གིས་བདེན་པའི་འཐབ་རྩོད་པ་མགོན་པོ་སྐྱིད་ལགས་དང་། གླུ་བ་དཔལ་ལྡན་ལགས་སོགས་ཚུད་པའི་བོད་ནང་གི་འགྲོ་བ་མིའི་ཐོབ་ཐང་སྲུང་སྐྱོབ་པ་ ༢༠ ལྷག་འཛིན་བཟུང་བཙོན་འཇུག་བྱས་པའི་གནས་ཚུལ་རྣམས་མཉམ་འབྲེལ་རྒྱལ་ཚོགས་ལ་མཁོ་སྤྲོད་བྱས་ཡོད་ལ། ད་བར་རྒྱ་ནག་གཞུང་གིས་གནད་དོན་དེ་དང་འབྲེལ་ནས་ལན་འདེབས་ཁ་གསལ་སྤྲད་མེད་ཅིང་། ལན་འདེབས་འབྱོར་བ་ཁག་ཅིག་ནང་ཆབ་སྲིད་བཙོན་པ་དེ་འདྲ་མེད་པའི་རྫུན་གཏམ་བཤད་དེ་འཁྱོག་བརྗོད་བྱེད་ཀྱི་འདུག ཅེས་དང་། ལྟེ་གནས་ཁང་གིས་བོད་ནང་ཛ་དྲག་གི་གནས་སྟངས་དེ་གཙིགས་ཆེན་དུ་བཟུང་བའི་ཐོག་ནས། ད་དུང་མུ་མཐུད་དུ་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་དང་འབྲེལ་བའི་གནས་ཚུལ་གང་མང་མཁོ་སྒྲུབ་ཀྱིས་མཉམ་འབྲེལ་རྒྱལ་ཚོགས་ལ་ཞུ་གཏུགས་བྱེད་ཀྱི་ཡིན་སྐོར་སོགས་བརྗོད་བྱུང་།

ཡང་ཕུར་བུ་སྒྲོལ་མ་ལགས་ཀྱིས། དེ་སྔ་ནས་འཛམ་གླིང་མཉམ་འབྲེལ་རྒྱལ་ཚོགས་ཀྱིས་འགྲོ་བ་མིའི་ཐོབ་ཐང་དང་ཆོས་དད་རང་དབང་། དེ་བཞིན་བོད་ཀྱི་སྐད་ཡིག་ཐོབ་ཐང་རྩོད་ལེན་པ། གྲངས་ཉུང་མི་རིགས་དང་ཁོར་ཡུག་སྲུང་སྐྱོབ་པ་སོགས་ཀྱི་གནས་སྟངས་དང་འབྲེལ་ནས་གནས་ཚུལ་མཁོ་སྤྲོད་གནང་རྒྱུའི་གསལ་བསྒྲགས་སྤེལ་ཡོད་པ་མ་ཟད། མཉམ་འབྲེལ་རྒྱལ་ཚོགས་ནས་མི་སྒེར་དང་ཚོགས་པ་སུ་རུང་གིས་འགྲོ་བ་མིའི་ཐོབ་ཐང་སོགས་ཀྱི་གནས་སྟངས་དང་འབྲེལ་ནས་གནས་ཚུལ་མཁོ་སྤྲོད་བྱ་རྒྱུའི་སྡིངས་ཆ་ཞིག་བསྐྲུན་ཡོད་པ་ལྟ་བུ་རེད། དེ་ཡང་ལོ་ལྟར་གནད་དོན་ཁག་ཅིག་ལ་དམིགས་ཏེ་གནས་ཚུལ་མཁོ་སྒྲུབ་གང་མང་བྱས་ཏེ། དེ་དང་འབྲེལ་ནས་རྒྱུས་ལོན་གང་མང་གནང་རྗེས། ལན་འདེབས་གང་འབྱོར་བ་རྣམས་གཞུང་འབྲེལ་གྱི་སྤྱི་ཚོགས་དྲ་རྒྱའི་སྟེང་ཁྱབ་སྤེལ་བྱེད་ཀྱི་ཡོད་སྐོར་སོགས་འགྲེལ་བརྗོད་གནང་བྱུང་།

ཟླ་འདིའི་ཕྱི་ཚེས་ ༩ ཉིན་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་དང་ཁོར་ཡུག་སྲུང་སྐྱོབ་པའི་དམིགས་བསལ་རྟོག་ཞིབ་པ་མེ་རི་ལོ་ལར་ (Mary Lawlor) ལགས་ཀྱིས་སྒེར་གྱི་སྤྱི་ཚོགས་དྲ་རྒྱ་ཨེག་སི་ (X) སྟེང་། འདས་པའི་ལོ་བཅུ་ཕྲག་མང་པོའི་ནང་བོད་ནང་གི་འགྲོ་བ་མིའི་ཐོབ་ཐང་རྩོད་ལེན་པས་རྒྱ་ནག་གིས་བོད་ནང་གཏེར་ཁ་སྔོག་འདོན་དང་། ཆུ་རགས་གསར་རྒྱག་སོགས་འཛུགས་སྐྲུན་གྱི་ལས་གཞི་མང་པོ་སྤེལ་ཏེ་བོད་ཀྱི་ཁོར་ཡུག་དང་སྐྱེ་ཁམས་ཁོར་ཡུག་དང་སྲོག་ཆགས་སོགས་ལ་གནོད་འཚེ་གཏོང་གི་ཡོད་པར་བརྟེན། འགྲོ་བ་མིའི་ཐོབ་ཐང་རྩོད་ལེན་པས་རྒྱ་ནག་གཞུང་ལ་ངོ་རྒོལ་གྱི་ལས་འགུལ་མང་པོ་སྤེལ་ཡོད། འདི་ལོའི་མགོ་སྟོད་དུ་རྒྱ་ནག་གཞུང་གིས་འབྲི་ཆུར་ཆུ་རགས་གསར་རྒྱག་བྱས་པའི་རྐྱེན་གྱིས་ཁོར་ཡུག་གཏོར་བཤིག་དང་། དགོན་སྡེ་ཁག་དང་ཁུལ་དེའི་མི་མང་རྣམས་བཙན་གྱིས་ས་གནས་གཞན་དུ་གནས་སྤོར་བཅུག་པ་སོགས་ལ་ངོ་རྒོལ་གྱི་ལས་འགུལ་སྤེལ་ཡོད་པ་ཐེར་འདོན་དང་། རྒྱ་ནག་གི་དཔོན་རིགས་ཀྱིས་འགྲོ་བ་མིའི་ཐོབ་ཐང་རྩོད་ལེན་པ་རྣམས་ཀྱིས་ངོ་རྒོལ་ལས་འགུལ་སྤེལ་སྐབས་འཛིན་བཟུང་དང་བཙོན་འཇུག་སོགས་བྱས་ཏེ། ཁག་ཅིག་ལ་ལོ་ ༡༠ ལྷག་རིང་བཙོན་འཇུག་གི་ཁྲིམས་ཐག་བཅད་ཡོད་འདུག ཅེས་བཀོད་འདུག

འདི་ལོའི་ཕྱི་ཟླ་ ༩ ཚེས་ ༡༣ ཉིན་འགྲོ་བ་མིའི་ཐོབ་ཐང་དང་ཁོར་ཡུག་སྲུང་སྐྱོབ་པའི་དམིགས་བསལ་རྟོག་ཞིབ་པ་མེ་རི་ལགས་ཀྱིས་གསལ་བསྒྲགས་སྤེལ་བའི་ནང་། ཟླ་འདིའི་ཕྱི་ཚེས་ ༣༡ བར་བཀག་རྒྱ་ཆེ་བའི་ས་ཁུལ་དུ་ཡོད་པའི་འགྲོ་བ་མིའི་ཐོབ་ཐང་སྲུང་སྐྱོབ་པར་དྲག་གནོན་ཐེབས་པའི་གནས་ཚུལ་མཁོ་སྤྲོད་ཡོང་བའི་གསལ་བསྒྲགས་སྤེལ་ཡོད་འདུག་ལ། ཕྱི་ལོ་ ༢༠༢༥ ཟླ་ ༣ པའི་ནང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༥༨ པའི་ནང་སྙན་ཐོ་འདོན་སྤེལ་བྱ་རྒྱུ་ཡིན་འདུག

གསར་འགོད་པ། བསྟན་འཛིན་ཕུར་བུ།