རྒྱ་གཞུང་གིས་ཐའེ་ཝན་གྱི་གནད་ཡོད་མི་སྣ་གཉིས་ལ་ཉེས་ཆད་བཏང་ཡོད་ཟེར།

ཁ་སང་རྒྱ་ནག་གིས་ས་མཚོ་གནམ་གསུམ་གྱི་ཐོག་ནས་ཐའེ་ཝན་ལ་འཇིགས་སྐུལ་བྱས་པ་མ་ཟད། ཐའེ་ཝན་གྱི་ཕྱུག་བདག་ཚའོ་ཞིན་ཁྲིན་དང་གྲོས་ཚོགས་འཐུས་མི་ཧྲིན་པའོ་ཡང་གཉིས་ལ་ཐའེ་ཝན་རང་བཙན་གྱི་ལས་འགུལ་སྤེལ་བཞིན་པ་ནི་ནག་ཉེས་ཡིན་པའི་ངོས་འཛིན་འོག་ཉེས་ཆད་བཏང་ཡོད་འདུག

ཁ་སང་ཕྱི་ཚེས་ ༡༤ ཉིན་རྒྱ་ནག་གཞུང་གིས་ཐའེ་ཝན་གྱི་ཕྱུག་བདག་ཆེན་མོ་ཚའོ་ཞིན་ཁྲིན་དང་ཁྲིམས་བཟོ་ལྷན་ཚོགས་ཀྱི་འཐུས་མི་ཧྲིན་པའོ་ཡང་གཉིས་ལ་ཐའེ་ཝན་རང་བཙན་གྱི་ལས་འགུལ་སྤེལ་བའི་སྐྱོན་འཛུགས་བྱས་ཏེ། ཁོང་གཉིས་ཀྱི་ནང་མི་བུ་ཕྲུག་རྣམས་རྒྱ་ནག་དང་། ཧོང་ཀོང་། ཨའོ་མན་བཅས་ཀྱི་ནང་དུ་འགྲོ་བསྐྱོད་བཀག་སྡོམ་བྱས་ཡོད་པ་མ་ཟད། ས་ཁུལ་དེ་དག་ཏུ་རྒྱུ་དངོས་དང་ཚོང་འབྲེལ་གྱི་ལས་དོན་རིགས་ཅི་ཡང་བྱ་མི་ཆོག་པའི་གསལ་བསྒྲགས་བྱས་ཡོད་འདུག

རྒྱ་ནག་གི་ཐའེ་ཝན་ལས་དོན་ཁང་གི་མགྲིན་ཚབ་པ་ཁྲིན་པིན་ཧྭས། དོམ་ནག་སློབ་གཉེར་ཁང་གསར་འཛུགས་བྱེད་མཁན་ཚའོ་ཞིན་ཁྲིན་དང་ཁོང་གི་ལས་གྲོགས་ཧྲིན་པའོ་ཡང་གཉིས་ཀྱིས་སློབ་གཉེར་ཁང་དུ་ཤེས་ཡོན་དང་འབྲེལ་བའི་གཏམ་བཤད་དང་། ཟབ་སྦྱོང་། ཁྱིམ་ཚང་གི་བྱེད་སྒོ་སོགས་ཀྱི་ལས་དོན་ལ་ཁ་གཡར་ཏེ། ཐའེ་ཝན་ནང་དུ་རང་བཙན་གྱི་ལས་འགུལ་མི་སྣ་མངོན་གསལ་དོད་པོའི་ཐོག་ནས་གསོ་སྐྱོང་བྱེད་བཞིན་ཡོད་པ་མ་ཟད། ཁ་བྲལ་རིང་ལུགས་ཀྱི་དྲག་པོའི་བྱ་སྤྱོད་སྤེལ་མུས་ཡིན། ཐའེ་ཝན་དམངས་གཙོ་ཡར་ཐོན་ཚོགས་པ་དང་ཕྱི་རྒྱལ་གྱི་ཤུགས་རྐྱེན་ལ་བརྟེན་ནས། སློབ་གཉེར་ཁང་དེས་རྒྱ་ནག་དང་ཐའེ་ཝན་བར་གྱི་བརྟན་ལྷིང་ལ་གནོད་སྐྱོན་བཟོས་ཡོད། ཅེས་བཤད་འདུག

ཐའེ་ཝན་གྱི་གྲོས་ཚོགས་འཐུས་མི་ཧྲན་པའོ་ཡང་ལགས་ཀྱིས། རྒྱ་ནག་གཞུང་གིས་ཐའེ་ཝན་ནང་ངན་སྐུལ་བྱེད་ཀྱི་ཡོད་པ་ལས། ཐའེ་ཝན་མི་མང་སྲུང་སྐྱོབ་བྱེད་པའི་ཆེད་དུ་སོགས་གང་ཡང་མ་རེད། རྒྱ་ནག་གཞུང་གིས་དཔལ་འབྱོར་གྱི་ཉེས་ཆད་གཏོང་བའི་འཇིགས་སྐུལ་ལ་བརྟེན་ནས། མ་འོངས་བར་ཐའེ་ཝན་ནང་ཡང་བསྐྱར་ཐལ་མདོག་གི་དམག་འཁྲུག་རྒྱག་གཏན་འཁེལ་ཡོད། ཅེས་བརྗོད་འདུག

ཐའེ་ཝན་གྱི་ཕྱུག་བདག་ཆེན་མོ་ཚའོ་ཞིན་ཁྲིན་ལགས་ཀྱིས། སློབ་གཉེར་ཁང་དེའི་ལས་འཆར་གྱིས་མི་མང་ས་ཡ་མང་པོའི་འཚོ་གནས་དང་། བདེ་འཇགས། འཕྲུལ་རིགས། དམག་དོན་སོགས་ཀྱི་ཐད་ཕན་ཐོགས་པའི་རེ་བ་བྱེད་བཞིན་ཡོད། ཅེས་དང་། རྒྱ་ནག་གི་དཔལ་འབྱོར་ཉམས་རྒུད་འགྲོ་བའི་མཚམས་སུ་སླེབས་ཡོད་པ་དེར་ཨ་རི་དང་། ཡུ་རོབ། ཉི་ཧོང་བཅས་ཀྱིས་མཐོང་བཞིན་ཡོད་པ་རེད། རྒྱ་གཞུང་གིས་ཐའེ་ཝན་ཐོག་དྲག་སྤྱོད་བྱས་ཚེ་རང་ཉིད་ལ་བཟོད་ཐབས་བྲལ་བའི་འབྲས་བུ་ཞིག་འབྱུང་རྒྱུ་ཡིན་པ་ཤེས་ཀྱི་ཡོད། ཅེས་བརྗོད་འདུག

ཟླ་འདིའི་ཕྱི་ཚེས་ ༡༠ ཉིན་ཐའེ་ཝན་གྱི་རྒྱལ་སྟོན་དུས་ཆེན་སྲུང་གཙིའི་ཉིན་མོར་ཐའེ་ཝན་གྱི་སྲིད་འཛིན་ལེ་ཆིན་ཏི་མཆོག་གིས། ཐའེ་ཝན་གྱི་རང་དབང་དང་དམངས་གཙོར་སུས་ཀྱང་དྲག་གནོན་དང་ཐེ་གཏོགས་སོགས་བྱེད་མི་ཆོག་ཅེས་ནན་བརྗོད་བྱས་རྗེས། རྒྱ་ནག་ཕྱི་འབྲེལ་ལྷན་ཁང་གི་མགྲིན་ཚབ་པ་མའོ་ཉིང་གིས། ལེ་ཆིན་ཏིའི་གཏམ་བཤད་ནང་ངོགས་གཉིས་ཀྱི་ལོ་རྒྱུས་ཀྱི་འབྲེལ་བ་རྐང་བཙུགས་ནས་མེད་པར་བཟོས་པ་དང་། ཕན་ཚུན་གཅིག་ཁོངས་གཅིག་ཏུ་མི་གཏོགས་པ་དང་། བདག་དབང་མཐའ་འཁྱོངས་སོགས་ཀྱི་བཤད་ཚུལ་སླར་ཡང་གླེང་ནས། ཐའེ་ཝན་རང་བཙན་གྱི་གཏམ་འཆལ་འདྲ་མིན་སྣ་ཚོགས་སྤེལ་བ་དེས། ཁོ་པ་ཚོའི་ཆབ་སྲིད་ཀྱི་སྒེར་ཕན་དོན་དུ་གཉེར་ཆེད། འཛེམ་བག་མེད་པར་ངོགས་གཉིས་ཀྱི་གནས་བབ་ཛ་དྲག་ཇེ་ཆེར་གཏོང་བའི་མ་རུངས་ཁོག་བཅངས་དམར་རྗེན་དུ་མངོན་ཡོད།

འཛམ་གླིང་ཐོག་ཀྲུང་གོ་གཅིག་ལས་མེད་ཅིང་། ཐའེ་ཝན་ནི་ཀྲུང་གོའི་མངའ་ཁོངས་ཀྱི་ཁ་བྲལ་ཐབས་མེད་པའི་ཆ་ཤས་ཤིག་ཡིན་པ་དང་། ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་སྲིད་གཞུང་ནི་ཀྲུང་གོ་ཡོངས་ཀྱི་ཚབ་བྱེད་པའི་ཁྲིམས་མཐུན་སྲིད་གཞུང་གཅིག་པུ་དེ་ཡིན། ལེ་ཆིན་ཏི་དབང་འཛིན་ལས་ཁུངས་ཀྱིས་གང་བཤད་པ་དང་གང་ཞིག་བྱས་ཀྱང་ངོགས་གཉིས་ཀྲུང་གོ་གཅིག་ཡིན་པའི་ཕྱི་རོལ་ཡུལ་གྱི་དོན་དངོས་ལ་འགྱུར་ལྡོག་གཏོང་མི་ཐུབ་ལ། ཀྲུང་གོ་གཅིག་གྱུར་ཡོང་ངེས་དང་མཐར་གཅིག་གྱུར་ཡོང་ངེས་ཡིན་པའི་ལོ་རྒྱུས་ཀྱི་འཕེལ་ཕྱོགས་ཆེན་པོ་དེ་བས་བཀག་འགོག་བྱེད་མི་ཐུབ། ཐའེ་ཝན་རང་བཙན་གྱི་འཁྲུག་རྐྱེན་སློང་བ་ནི་འཆི་ལམ་གཅིག་པུ་རེད། ཅེས་བཤད་འདུག

ཡང་ཁ་སང་གཅིག་པུར་རྒྱ་ནག་གིས་ཐའེ་ཝན་མཚོ་འགག་ཁུལ་དུ། ས་མཚོ་གནམ་གསུམ་གྱི་ཐོག་ནས་གནམ་གྲུ་དང་མཚོ་གྲུ་སོགས་ ༡༥༠ ལྷག་མངགས་གཏོང་བྱས་ཏེ། དམག་སྦྱོང་ཟེར་བའི་མིང་འོག་ནས་ཐའེ་ཝན་ལ་འཇིགས་སྐུལ་བྱས་ཡོད་ཅིང་། འདི་ལོའི་ཕྱི་ཟླ ༨ ཚེས་ ༨ ཉིན་གཅིག་པུར་ཐའེ་ཝན་གྱི་མཁའ་ཁུལ་དུ་གནམ་གྲུ་ ༢༧ དང་མཚོ་གྲུ་ ༨ མངགས་གཏོང་བྱས་པའི་ཁྲོད། དམག་དོན་གནམ་གྲུ་ ༡༨ ཙམ་གྱིས་རྒྱལ་ཁབ་གཉིས་ཀྱི་ས་ཐིག་ལས་བརྒལ་ནས། ཐའེ་ཝན་གྱི་མཁའ་དབྱིངས་སུ་དམག་དོན་ལས་འགུལ་མང་དག་ཅིག་སྤེལ་ཡོད་པ་རེད། དེ་བཞིན་ཕྱི་ཟླ་ ༧ ཚེས་ ༣༠ ཉིན་རྒྱ་ནག་གི་དམག་དོན་གནམ་གྲུ་ ༡༤ དང་མཚོ་གྲུ་ ༩ ཐའེ་ཝན་ས་ཁོངས་སུ་འཛུལ་ནས་ཡུལ་དེའི་ནུབ་རྒྱུད་དུ་དམག་དོན་ལས་དོན་སྤེལ་ནས། རྒྱ་ནག་བཅིངས་གྲོལ་དམག་མི་ཟེར་བས་དུས་ནས་དུས་སུ་ཐའེ་ཝན་མངའ་ཁུལ་དུ་སུན་གཙེར་ཡང་ཡང་བཟོ་ཡི་ཡོད་པ་རེད།

གནད་དོན་དབྱེ་ཞིབ་པ་རྣམས་ཀྱིས། རྒྱ་ནག་གིས་མི་གྲངས་ས་ཡ་ ༢༣ ལྷག་ལས་མེད་པའི་ཐའེ་ཝན་མཚོ་འགག་ཏུ་སྟོབས་ཤུགས་རྒྱ་སྐྱེད་ཐུབ་ཚེ། ནུབ་ཞི་བདེ་རྒྱ་མཚོའི་ཁུལ་དུ་སྟབས་བདེ་བོའི་ཐོག་ནས་འགུལ་སྐྱོད་བྱེད་ཐུབ་པ་མ་ཟད།  ནུབ་ཞི་བདེ་རྒྱ་མཚོའི་ཁུལ་དུ་ཡོད་པའི་གྷུ་ཝམ (Guam ) མཚོ་གླིང་དང་ཨ་རིའི་ཧཱ་ཝའེ་( Hawaii) མངའ་སྡེར་ཡོད་པའི་ཨ་རིའི་དམག་སྒར་ལ་འཇིགས་སྐུལ་བྱེད་སྲིད་སྐོར་བརྗོད་ཀྱི་འདུག

རྒྱ་ནག་གིས་ཐའེ་ཝན་མཚོ་འགག་ཁུལ་དུ་དྲག་པོའི་དམག་དོན་གྱི་ལས་འགུལ་མང་པོ་ཞིག་སྤེལ་མུས་ཡིན་པར། ཨ་རི་དང་། ཨོ་གླིང་། ཉི་ཧོང་བཅས་ཀྱིས་རྒྱ་ནག་གཞུང་གིས་ཐའེ་ཝན་གཞུང་མང་གཉིས་ཀྱི་བདེ་འཇགས་ལ་གནོད་པའི་དམག་དོན་ལས་འགུལ་སྤེལ་མཚམས་འཇོག་དགོས་པའི་ཉེན་བརྡ་གཏོང་མུས་ཡིན་ལ། ཨ་རིའི་མཐུན་ཕྱོགས་རྒྱལ་ཁབ་དེ་གཉིས་ཀྱིས་ཨ་རི་དང་མཉམ་དུ་ཐའེ་ཝན་གྱི་མཚོ་འགག་བདེ་འཇགས་ཡོང་བར་མཉམ་ལས་བྱ་རྒྱུ་ཡིན་སྐོར་གསལ་བསྒྲགས་བྱས་ཡོད་ལ། ལྷག་པར་ཕྱི་ལོ་ ༢༠༢༠ ལོ་ཙམ་ནས་རྒྱ་གར་གྱིས་ཁོ་ཝ་ཊི་ (Quad) ནང་འཛུལ་ཞུགས་བྱས་ཏེ། ཨེ་ཤ་ཡའི་ཁུལ་དུ་རྒྱ་ནག་གཞུང་གི་དབང་ཤུགས་ལ་འགོག་རྒོལ་དང་། རྒྱ་གར་ཞི་བདེ་རྒྱ་མཚོའི་ཁུལ་དུ་བརྟན་སྲུང་བྱེད་ཐབས་ཀྱི་མཉམ་འབྲེལ་དམག་སྦྱོང་སྤེལ་གྱིན་ཡོད་པ་རེད།

གསར་འགོད་པ། བྱམས་པ་ཚེ་རིང་།