རྒྱ་གར་གྱི་ཕྱི་སྲིད་དྲུང་ཆེས་རྒྱ་དཀར་ནག་གཉིས་ཀྱིས་ལ་དྭགས་ཤར་ཁུལ་གྱི་ས་མཚམས་སུ་མཐའ་སྲུང་དམག་མི་འགྲེམས་འཇོག་གིས་སྐོར་སྲུང་བྱ་རྒྱུའི་ཐད་མོས་མཐུན་བྱུང་ཡོད་སྐོར་བསྒྲགས་འདུག
དེ་རིང་རྒྱ་གར་གྱི་གསར་འགྱུར་བརྒྱུད་ལམ་ཁག་ཏུ་གནས་ཚུལ་ཐོན་པའི་ནང་། རྒྱ་གར་གྱི་ཕྱི་སྲིད་དྲུང་ཆེ་མི་སི་རི་ (Vikram Misri) ལགས་ཀྱིས་གསར་འགོད་གསལ་བསྒྲགས་སྟེང་། ཉེ་ལམ་རྒྱ་གར་དང་རྒྱ་ནག་གཉིས་ཀྱིས་ཧིན་བོད་ས་མཚམས་རྩོད་རྙོག་དང་འབྲེལ་ནས་གླེང་སློང་ཐེངས་མང་བྱས་རྗེས། རྒྱལ་ཁབ་གཉིས་ཀས་ལ་དྭགས་ཤར་ཕྱོགས་ཁུལ་གྱི་ས་མཚམས་སུ་དམག་མི་སྐོར་སྲུང་བྱེད་ཕྱོགས་ཐད་ལ་མོས་མཐུན་བྱུང་བ་མ་ཟད། དེའི་རྐྱེན་གྱིས་ཕྱི་ལོ་ ༢༠༢༠ ནས་རྒྱ་དཀར་ནག་གི་ས་མཚམས་རྩོད་རྙོག་དང་འབྲེལ་བའི་གནད་དོན་དེ་དག་ཞི་འགྲིག་བྱུང་ཡོད། ཅེས་སོགས་བརྗོད་འདུག
དེ་འབྲེལ་རྒྱ་གར་གྱི་ཕྱི་སྲིད་བློན་ཆེན་རྗེ་ཤང་ཀཱར་ (Jaishankar) ལགས་ཀྱིས། ཕྱི་ལོ་ ༢༠༢༠ ཟླ་ ༩ པ་ནས་བཟུང་རྒྱ་གར་དང་རྒྱ་ནག་གཉིས་དབར་ས་མཚམས་རྩོད་རྙོག་སྐོར་ལ་གྲོས་མོལ་ཐེངས་མང་བྱས་པར་བརྟེན། ཕྱོགས་གཉིས་ནས་ས་མཚམས་ཁུལ་དུ་ཞི་བདེ་བརྟན་རླིང་དང་འགྲིག་འཇགས་ཡོང་རྒྱུའི་ཐག་གཅོད་བྱས་ཡོད་པ་ལྟར། ད་ལྟའི་ཆར་རྒྱ་དཀར་ནག་གཉིས་ཀས་ལ་དྭགས་ཀྱི་ས་མཚམས་ཁུལ་དུ་མཐའ་སྲུང་དམག་མི་འཇོག་རྒྱུའི་ཐད་མོས་མཐུན་བྱུང་ཡོད་པ་ནི་དོན་འབྲས་བཟང་པོ་ཞིག་ཡིན་པ་མ་ཟད། ས་མཚམས་ཁུལ་དུ་ཞི་འཇམ་ཡོང་རྒྱུའི་གཞི་རྩ་ཞིག་བསྐྲུན་ཡོད། ཅེས་བརྗོད་འདུག
འདི་ལོའི་ཕྱི་ཟླ་ ༨ པའི་ནང་། འདས་པའི་ལོ་ངོ་བཞིའི་རིང་རྒྱ་གར་དང་རྒྱ་ནག་གཉིས་ཀྱིས་ས་མཚམས་དཀའ་རྙོག་སྐོར་ལ་གྲོས་མོལ་བྱས་ཏེ། ཕྱོགས་གཉིས་ནས་གནད་ཡོད་མི་སྣ་དང་དམག་དོན་དང་འབྲེལ་ནས་གྲོས་མོལ་བྱས་ཏེ་རྒྱལ་ཁབ་གཉིས་ཀྱི་འབྲེལ་ལམ་མུ་མཐུད་བྱ་རྒྱུའི་ཐག་གཅོད་དང་། རྩོད་རྙོག་ཞི་འགྲིག་དང་ས་མཚམས་སུ་ཞི་བདེ་བསྐྲུན་རྒྱུའི་མོས་མཐུན་བྱུང་ཡོད་པ་ལྟར། ཕྱི་ཟླ་ ༩ ཚེས་ ༡༣ ཉིན་རྒྱ་ནག་ཕྱི་སྲིད་ལས་ཁུངས་ཀྱིས། རྒྱ་ནག་གིས་གྷལ་ཝན་ལུང་གཞུང་ཚུད་པའི་ལ་དྭགས་ཤར་ཕྱོགས་ཁུལ་གྱི་ས་མཚམས་ཁག་བཞིའི་ནང་ཡོད་པའི་དམག་དཔུང་ཕྱིར་འཐེན་བྱས་ཡོད་ཚུལ་བསྒྲགས་པ་དང་། རྒྱ་དཀར་ནག་གཉིས་ཀྱིས་ཕྱོགས་གཉིས་ཀྱི་འབྲེལ་ལམ་ཡར་རྒྱས་ཡོང་རྒྱུའི་ཐད་མཉམ་ལས་བྱ་རྒྱུའི་ཐག་གཅོད་བྱས་ཡོད་ཚུལ་སོགས་བརྗོད་འདུག
ཕྱི་ལོ་ ༢༠༢༠ ཟླ་ ༦ ཚེས་ ༡༥ ཉིན་བོད་དང་རྒྱ་གར་གྱི་ས་མཚམས་སུ་ཁེལ་བའི་གྷལ་ཝན་ལུང་གཞུང་དུ་རྒྱ་དཀར་ནག་གཉིས་ཀྱི་དམག་མིའི་བར་དྲག་པོའི་འཁྲུག་འཛིང་ཤོར་ཏེ། རྒྱ་གར་གྱི་མཐའ་སྲུང་དམག་མི་ ༢༠ དང་ཉུང་མཐར་རྒྱ་ནག་གི་མཐའ་སྲུང་དམག་མི་ ༤ ཡི་ཚེ་སྲོག་ཤོར་ཡོད་པའི་གནས་ཚུལ་ཐོན་ཡོད་པ་རེད། སྐབས་ཐོག་དེར་རྒྱ་ནག་ཕྱོགས་ནས་ཤི་རྨས་ཀྱི་གྲངས་འབོར་གསང་བ་བྱས་ཡོད་ཀྱང་ཕྱིས་སུ་རྒྱ་དམག་ཀྱང་གང་ཙམ་ཤི་རྨས་བྱུང་ཡོད་པའི་གནས་ཚུལ་ཐོན་ཡོད་ཀྱང་། རྒྱ་ནག་གཞུང་ཕྱོགས་ནས་གནས་ཚུལ་དེ་རིགས་རྫུན་མ་ཡིན་སྐོར་བརྗོད་ནས་ཕྱིར་བསྒྲགས་བྱས་མེད་པ་རེད། དེ་དང་འབྲེལ་ནས་རྒྱ་གར་གྱིས་རྒྱ་ནག་གི་ཁ་པར་མཉེན་ཆས་མང་པོ་བཀག་འགོག་དང་། རྒྱ་ནག་གི་ཚོང་ཟོག་བཙོང་མཚམས་འཇོག་པ། རྒྱ་ནག་གི་རྒྱ་གར་ནང་ཡོད་པའི་སྤྱི་གཉེར་ཁང་སོགས་རྒྱ་གར་གྱི་གཞུང་ལམ་དང་འཛུགས་སྐྲུན་ཆེ་ཁག་གི་ནང་དུ་ཞུགས་མི་ཆོག་པ་སོགས་ཀྱི་ལས་འགུལ་རིམ་པར་སྤེལ་ཡོད་པ་མ་ཟད། རྒྱ་དཀར་ནག་གི་གདོང་ཐུག་དང་འབྲེལ་ནས་རྒྱ་གར་ནང་བོད་དོན་གླེང་སློང་དང་རྒྱ་གར་གྱིས་རྒྱ་ནག་གཅིག་གི་སྲིད་ཇུས་རྩིས་མེད་གཏོང་དགོས་པའི་བསམ་ཚུལ་ཤུགས་ཆེན་ཡོང་ཡོད་འདུག་ལ། ཕྱོགས་གཉིས་བར་ཐེངས་མང་པོར་གྲོས་མོལ་བྱས་ཡོད་ཀྱང་དོན་འབྲས་དེ་ཙམ་ཐོན་མེད་པར་བརྟེན། དམར་འཛིང་དེ་བྱུང་བ་ནས་བཟུང་བསྐྱར་དུ་རྒྱ་དཀར་ནག་གཉིས་བར་འཁོན་འཛིན་ཆེ་རུ་ཕྱིན་ཡོད་པ་མ་ཟད། ཕྱོགས་གཉིས་ནས་མཐའ་མཚམས་བརྟན་སྲུང་ཆེད་གཞུང་ལམ་དང་དམག་དོན་ལྟེ་གནས་སྔར་ལས་མང་པོ་འཛུགས་སྐྲུན་བྱས་ཏེ་དམག་དོན་ནུས་པ་གོང་སྤེལ་དུ་གཏོང་བཞིན་ཡོད་པ་རེད།
གསར་འགོད་པ། བསྟན་འཛིན་ཕུར་བུ།
རྩྱ་དཀར་ནག་གཉིས་ཞི་བའི་གྲོས་མཐུན་བཞག་པའི་དོན་ཚན་གཅིག་ཀྱང་ལབ་མེད་པ་དེར་དོགས་པ་དང་སེམས་ཁྲལ་འདུག་ཨང་།