བོད་ཀྱི་ལུས་རྩལ་པ་གཉིས་ལ་གསེར་གྱི་རྟགས་མ་ཐོབ།

ཕྱི་ལོ་ ༢༠༢༤ ལོའི་རྒྱ་ནག་རྒྱལ་ཡོངས་འགྲན་རྒྱུག་ཁྲོད་བོད་ཀྱི་ལུས་རྩལ་པ་ཚེ་རིང་མཚོ་མོ་དང་གཡང་འཛིན་ལྷ་མོ་གཉིས་ལ་གསེར་གྱི་རྟགས་མ་ཐོབ་འདུག

ཉེ་ལམ་རྒྱ་ནག་ཨན་ཧེ་ཞིང་ཆེན་ཧོང་ཧྲན་གྲོང་ཁྱེར་དུ། ཕྱི་ལོ་ ༢༠༢༤ ལོའི་རྒྱ་ནག་རྒྱལ་ཡོངས་ཀྱི་ས་ཚིགས་དང་པོའི་མུ་འབྲེལ་རྒྱང་རྒྱུག་འགྲན་ཚོགས་བསྡུས་ཡོད་ཅིང་། ཐེངས་འདིའི་ལུས་རྩལ་འགྲན་ཚོགས་ཐོག་རྒྱ་ནག་རྒྱལ་ཡོངས་ཀྱི་ཞིང་ཆེན་དང་གྲོང་ཁྱེར་ཁག་ནས་ཡོང་བའི་ལུས་རྩལ་པ་ ༡༧༨ མཉམ་ཞུགས་བྱས་ཡོད་པའི་ཁྲོད། བོད་པའི་ལུས་རྩལ་པ་ཚེ་རིང་མཚོ་མོར་བུད་མེད་ཚོགས་ཆུང་གི་སྤྱི་ལེ་བཅུའི་འགྲན་རྒྱུག་ནང་གསེར་གྱི་རྟགས་མ་ཐོབ་ཡོད་པ་དང་། ལུས་རྩལ་པ་བཀྲ་ཤིས་རྡོ་རྗེ་དང་བཀྲ་ཤིས་ཚེ་རིང་གཉིས་ལ་སྐྱེས་པའི་ཚོགས་ཆུང་གི་སྤྱི་ལེ་བཅུའི་འགྲན་རྒྱུག་ཁྲོད་ཨང་བདུན་པ་དང་བརྒྱད་པ་ཐོབ་ཡོད་འདུག

དེ་བཞིན་ཁྲང་ཧྲ་འགྲན་ཁུལ་གྱི་ས་ཚིགས་བཞི་པའི་ལམ་ཕྱེད་རྒྱང་རྒྱུག་འགྲན་སྡུར་ནང་རྒྱ་ནག་རྒྱལ་ཡོངས་ཀྱི་ལུས་རྩལ་ ༤༨ འགྲན་ཞུགས་བྱས་ཡོད་པའི་ཁྲོད། བུད་མེད་ཚོགས་ཆུང་གི་འགྲན་སྡུར་ནང་བོད་པའི་ལུས་རྩལ་པ་གཡང་འཛིན་ལྷ་མོས་ཆུ་ཚོད་ ༡ དང་། སྐར་མ་ ༡༧། སྐར་ཆ་ ༢༦ ། གྱི་གྲུབ་འབྲས་བླངས་ཏེ་གསེར་གྱི་རྟགས་མ་ཐོབ་ཡོད་པ་དང་། དོན་གྲུབ་ཚེ་རིང་ལ་སྐྱེས་པའི་ཚོགས་ཆུང་གི་ཨང་གཉིས་པ། བཀྲ་ཤིས་ཆོས་སྐྱིད་ལ་བུད་མེད་ཚོགས་ཆུང་གི་ཨང་ལྔ་པ་བཅས་ཐོབ་ཡོད་འདུག

ད་ལན་གྱི་གསེར་གྱི་རྟགས་མ་འདི་ནི་བོད་ཀྱི་རྒྱུག་རྩལ་བ་ཚེ་རིང་མཚོ་མོ་ལགས་ལ་འདི་ལོར་གསེར་གྱི་གཟེངས་རྟགས་ཐོབ་པ་ཐེངས་གསུམ་པ་དེ་ཡིན་པ་རེད། ཕྱི་ཟླ་ ༩ ཚེས་ ༢༢ ཉིན་རྒྱ་ནག་ཧོ་པེ་ཞིང་ཆེན་ཧིང་ཧྲུས་གྲོང་ཁྱེར་དུ། ཕྱི་ལོ་ ༢༠༢༤ ལོའི་རྒྱ་ནག་རྒྱལ་ཡོངས་ཀྱི་ས་ཚིགས་གཉིས་པའི་རྒྱང་རྒྱུག་འགྲན་སྡུར་ཁྲོད། ཚེ་རིང་མཚོ་མོས་ཆུ་ཚོད་ ༢ དང་། སྐར་མ་ ༢༦། སྐར་ཆ་ ༤༧ ། གྱི་གྲུབ་འབྲས་བླངས་ཏེ་གསེར་གྱི་རྟགས་མ་ཐོབ་ཡོད་པ་དང་།  དེ་ནི་རྒྱ་ནག་རྒྱལ་ཡོངས་བུད་མེད་རུ་ཁག་འགྲན་སྡུར་གྱི་ཟིན་ཐོ་གསར་བ་བཏོད་ཡོད་འདུག

དེ་བཞིན་འདི་ལོའི་ཕྱི་ཟླ་ ༦ ཚེས་ ༢༨ ནས་ ༣༠ ཉིན་གྲངས་གསུམ་རིང་རྒྱ་ནག་ཧྲན་ཏུང་ཞིང་ཆེན་རི་ཀྲའོ་གྲོང་ཁྱེར་དུ། ཕྱི་ལོ་ ༢༠༢༤ ལོའི་རྒྱ་ནག་རྒྱལ་ཡོངས་ཀྱི་མཆོང་རྒྱུག་འཕེན་གསུམ་གྱི་རྟིང་རྩོད་འགྲན་སྡུར་ཁྲོད། རྒྱ་ནག་རྒྱལ་ཡོངས་ཀྱི་ལུས་རྩལ་པ་གྲངས་ ༩༠༠ ལྷག་གིས་འགྲན་སྡུར་བྱས་ཡོད་པའི་ཁྲོད།  བོད་ཀྱི་ལུས་རྩལ་པ་ཚེ་རིང་མཚོ་མོས་བུད་མེད་ཀྱི་འགྲན་རྒྱུག་སྨི་ ༥༠༠༠ ལས་སྐར་མ་ ༡༥ དང་སྐར་ཆ་ ༣༨ ། གྲངས་ཆུང་ ༧༢ ཀྱི་གྲུབ་འབྲས་བླངས་ཏེ་གསེར་གྱི་རྟགས་མ་ཐོབ་ཡོད་འདུག

ཕྱི་ཟླ་ ༤ ཚེས་ ༡༣ ཉིན་ནས་ཉིན་གཉིས་རིང་རྒྱ་ནག་ཀྲེ་ཅང་ཧང་ཀྲོའུ་གྲོང་ཁྱེར་དུ། རྒྱ་ནག་རྒྱལ་ཡོངས་ཀྱི་མཆོང་རྒྱུག་འཕེན་གསུམ་གྱི་བྱ་དགའ་ཆེན་མོའི་འགྲན་སྡུར་ནང་།  རྒྱ་ནག་གི་ཞིང་ཆེན་དང་གྲོང་ཁྱེར་ ༣༡ ནས་ཡོང་བའི་ཆེད་ལས་ལུས་རྩལ་པ་ ༡༠༠༠ ལྷག་འགྲན་ཞུགས་བྱས་ཡོད་པའི་ཁྲོད། བོད་རང་སྐྱོང་ལྗོངས་ཟེར་བ་ནས་ལུས་རྩལ་པ་ ༡༩ འགྲན་ཞུགས་ཡོད་ཅིང་། སྐབས་དེར་བོད་ཀྱི་ལུས་རྩལ་པ་ཚེ་རིང་མཚོ་མོས་བུད་མེད་ཀྱི་སྨི་ ༡༠༠༠༠ གི་འགྲན་སྡུར་ནང་སྐར་མ་༣༢ དང་སྐར་ཆ་ ༤༥ ། གྲངས་ཆུང་ ༤༩ གྲུབ་འབྲས་བླངས་ཏེ་ཨང་གཉིས་པ་ཐོབ་ཡོད་འདུག

བོད་ཀྱི་ལུས་རྩལ་པ་ཚེ་རིང་མཚོ་མོ་ནི་ཕྱི་ལོ་ ༡༩༩༧ ལོར་བོད་གཞིས་ཀ་རྩེ་གྲོང་ཁྱེར་རྣམ་གླིང་རྫོང་དུ་སྐྱེས་ཡོད་ཅིང་། ཕྱི་ལོ་ ༢༠༡༡ ལོར་བོད་རང་སྐྱོང་ལྗོངས་ཟེར་བའི་ལུས་རྩལ་ལག་རྩལ་སློབ་གླིང་གི་རྒྱང་རྒྱུག་འབྲིང་བའི་སྡེ་ཁག་ནས་སྦྱོང་བརྡར་བྱས་ཏེ། ཁུལ་དེའི་འབྲིང་རྒྱུག་རུ་ཁག་གི་རྐང་འཛིན་པ་དང་བུད་མེད་རུ་ཁག་གི་རུ་དཔོན་གྱི་འགན་འཁུར་ཡོད་ཅིང་། བུད་མེད་རྒྱང་རྒྱུག་སྨི་ ༥༠༠༠ དང་སྨི་ ༡༠༠༠༠ ཡི་ཟིན་ཐོ་འཁོད་འདུག ཕྱི་ལོ་ ༢༠༡༧ ལོར་རྒྱ་ནག་རྒྱལ་ཡོངས་མཆོང་རྒྱུག་འཕེན་གསུམ་གྱི་བུད་མེད་ཀྱི་རྒྱང་རྒྱུག་སྨི་ ༥༠༠༠ གི་འགྲན་སྡུར་ནང་སྐར་མ་ ༡༦ དང་སྐར་ཆ་ ༣༦ ། གྲངས་ཆུང་ ༨༣ གྲུབ་འབྲས་བླངས་ཏེ་རྒྱལ་ཁ་ཐོབ་ཡོད་འདུག

གསར་འགོད་པ། བྱམས་པ་ཚེ་རིང་།