དྷ་ས་རྒྱལ་སྤྱིའི་གློག་བརྙན་དུས་སྟོན་སྟེང་བོད་ནང་གི་གློག་བརྙན་སྟོན་པའི་ཆོག་མཆན་སྤྲད་མེད་པ་རེད།

དྷ་ས་རྒྱལ་སྤྱིའི་གློག་བརྙན་དུས་སྟོན་ཐོག་༧གོང་ས་མཆོག་གི་མཛད་རྣམ་བདེ་སྐྱིད་ཀྱི་ཤེས་རབ་དང་། བོད་པ་རང་ཉིད་ཀྱིས་བཟོ་སྐྲུན་བྱས་པའི་གློག་བརྙན་གསུམ་བཅས་སྟོན་འཆར་འདུག

ཟླ་འདིའི་ཕྱི་ཚེས་ ༢༦ ཉིན་དྷ་རམ་ས་ལའི་ཀ་ཅཱ་རི་རྫོང་དཔོན་ལས་ཁུངས་ཀྱི་ཚོགས་ཁང་དུ། ཁྲུང་ཁྲུང་དཀར་མོ་སྒྱུ་རྩལ་ཐེབས་རྩ་ཁང་གི་འགན་འཛིན་བསྟན་འཛིན་བསོད་ནམས་ལགས་དང་། ཁོང་གི་བཟའ་ཟླ་རི་ཏུ་ས་རིན་(Ritu Sarin)ལགས་གཉིས་ཀྱིས། ཕྱི་ཟླ་ ༡༡ ཚེས་ ༧ ནས་ ༡༠ ཉིན་བཞིའི་རིང་དྷ་སྟེང་བོད་ཕྲུག་ཁྱིམ་སྡེ་རུ། ཕྱི་ལོ་ ༢༠༢༤ ལོའི་དྷ་རམ་ས་ལའི་རྒྱལ་སྤྱིའི་གློག་བརྙན་དུས་སྟོན་(DIFF) ཐེངས་ ༡༣ པ་འཚོག་རྒྱུ་ཡིན་པའི་གསལ་བསྒྲགས་གནང་སོང་བ་དང་། ཐེངས་འདིའི་གློག་བརྙན་དུས་སྟོན་ཐོག་འཛམ་གླིང་རྒྱལ་ཁབ་འདྲ་མིན་ ༢༨  ལྷག་ནས་ཐོན་པའི་གློག་བརྙན་རིང་གྲས་དང་ཐུང་གྲས་ཁྱོན་བསྡོམས་ ༩༡ སྟོན་འཆར་ཡོད་འདུག

དེ་རིང་འདི་གའི་གསར་འགོད་པར་ཐེངས་འདིའི་གློག་བརྙན་དུས་སྟོན་སྐོར་ལ་གོ་སྒྲིག་པ་བསྟན་འཛིན་བསོད་ནམས་ལགས་ཀྱིས། ད་ལོའི་དྷ་རམ་ས་ལའི་རྒྱལ་སྤྱིའི་གློག་བརྙན་དུས་སྟོན་དྷ་སྟེང་བོད་ཕྲུག་ཁྱིམ་སྡེ་རུ་འཚོག་རྒྱུ་ཡིན། དེ་རུ་འཚོག་དགོས་པའི་རྒྱུ་མཚན་ནི་དྷ་སྟེང་བོད་ཕྲུག་ཁྱིམ་སྡེར་ས་ཆ་ཆེན་པོ་ཡོད་པ་དང་། ད་ལོ་ང་ཚོས་གློག་བརྙན་སྟོན་སའི་ཚོགས་ཁང་ལྔ་གོ་སྒྲིག་ཞུ་བཞིན་ཡོད། ད་ལོའི་དྷ་རམ་ས་ལའི་རྒྱལ་སྤྱིའི་གློག་བརྙན་དུས་སྟོན་ཐོག་འཛམ་གླིང་རྒྱལ་ཁབ་འདྲ་མིན་ ༢༨ ལྷག་ནས་ཐོན་པའི་གློག་བརྙན་རིང་གྲས་དང་ཐུང་གྲས་ཁྱོན་བསྡོམས་ ༩༡ སྟོན་རྒྱུ་ཡིན་ཞིང་། གློག་བརྙན་བཟོ་སྐྲུན་པ་དང་མཉམ་དུ་བགྲོ་གླེང་ཡང་བྱ་རྒྱུ་ཡིན། ཞེས་འགྲེལ་བརྗོད་གནང་བྱུང་།

གསར་འགོད་པས་ཐེངས་འདིའི་དུས་སྟོན་ཐོག་བོད་ཀྱི་གློག་བརྙན་ཅི་ཙམ་ཡོད་མེད་དྲིས་པར་བསྟན་འཛིན་བསོད་ནམས་ལགས་ཀྱིས། ཐེངས་འདིའི་གློག་བརྙན་དུས་སྟོན་ཐོག་བོད་ཀྱི་གློག་བརྙན་གསུམ་ཡོད། དེའི་ཁྲོད་ཀྱི་གློག་བརྙན་རིང་པོ་གཅིག་ནི་ས་མཐའི་ལས་དབང་ཞེས་པ་དེ་ཡིན། ཕལ་ཆེ་བ་དྷ་རམ་ས་ལའི་བོད་ཀྱི་གློག་བརྙན་བཟོ་མཁན་རེད། དེ་ནི་གློག་བརྙན་ཐུང་བ་བཞི་མཉམ་དུ་གློག་བརྙན་གཅིག་བཟོས་པ་ཞིག་རེད། ཉེ་ལམ་ལྷོ་ཀོ་རི་ཡའི་པུ་སིན་གློག་བརྙན་དུས་སྟོན་སྟེང་ཐོག་མར་གཟིགས་འབུལ་ཞུས་ཡོད་ཅིང་། རྒྱ་གར་དུ་དྷ་ས་རྒྱལ་སྤྱིའི་གློག་བརྙན་དུས་སྟོན་ཐོག་ཐེངས་དང་པོ་སྟོན་རྒྱུ་ཡིན། གློག་བརྙན་འདི་ནི་བོད་པའི་སྤྱི་ཚོགས་ནང་གལ་ཆེན་པོ་མཐོང་གི་འདུག གློག་བརྙན་འདིའི་བཟོ་སྐྲུན་པ་དང་། འཁྲབ་སྟོན་པ། ལས་ཀ་བྱེད་མཁན་བོད་པ་ཡིན་པ་མ་ཟད། ཕལ་ཆེ་བ་དྷ་རམ་ས་ལར་སྡོད་མཁན་དང་བོད་ཕྲུག་ཁྱིམ་སྡེ་ནས་སློབ་སྦྱོང་ཐོན་མཁན་རེད། ད་ལན་གྱི་གློག་བརྙན་དུས་སྟོན་ཐོག་སྟོན་ཐུབ་པར་ཧ་ཅང་དགའ་བོ་བྱུང་། དྷ་སའི་ཉེ་འཁྲིས་སྦིར་གནས་སྡོད་བོད་ཀྱི་གཞོན་སྐྱེས་འཇམ་དབྱངས་ཕུན་ཚོགས་དང་། ཨ་རིའི་ནེའུ་ཡོག་གནས་སྡོད་ཀུན་དགའ་ཆོས་འཕེལ་གྱིས་བཟོས་པའི་གློག་བརྙན་གཉིས་བཅས་ཡོད། གློག་བརྙན་དེ་གསུམ་ནི་བོད་པ་རང་ཉིད་ཀྱིས་བཟོས་པའི་གློག་བརྙན་ཡིན། དེ་བཞིན་བོད་དང་འབྲེལ་བ་ཡོད་པའི་གློག་བརྙན་ནི་༧གོང་ས་མཆོག་གི་མཛད་རྣམ་དངོས་བྱུང་གློག་བརྙན་བདེ་སྐྱིད་ཀྱི་ཤེས་རབ་ཅེས་པ་དེ་ཡིན། ཨེ་ཤ་ཡའི་ནང་ཐོག་མར་སྟོན་ས་དྷ་སའི་གློག་བརྙན་དུས་སྟོན་ཆགས་ཀྱི་ཡོད། གློག་བརྙན་ནང་དུ་༧གོང་ས་མཆོག་གིས་བཀའ་སློབ་གནང་ཡོད་པ་མ་ཟད། གློག་བརྙན་ཡང་ཧ་ཅང་ཡག་པོ་བཟོས་ཡོད་པས། ཐེངས་འདིར་༧གོང་ས་མཆོག་གི་མཛད་རྣམ་གློག་བརྙན་གཟིགས་འབུལ་ཞུ་ཐུབ་པར་ཧ་ཅང་དགའ་བོ་བྱུང་། ཞེས་འགྲེལ་བརྗོད་གནང་བྱུང་།

ཡང་ཐེངས་འདིའི་དུས་སྟོན་ཐོག་བོད་ནང་ནས་བཟོ་སྐྲུན་བྱས་པའི་གློག་བརྙན་ཡོད་མེད་དྲིས་པར་ཁོང་གིས། ད་ལོའི་གློག་བརྙན་དུས་སྟོན་ཐོག་བོད་ནང་གི་གློག་བརྙན་བཟོ་སྐྲུན་པ་གྲགས་ཅན་འདས་པོ་པདྨ་ཚེ་བརྟན་ལགས་ཀྱི་གློག་བརྙན་གསའ་སྟོན་པར་ཐབས་ཤེས་མང་པོ་བྱས་ཡིན།  འདས་པོ་ཁོང་གི་གློག་བརྙན་ཚོང་འབྲེལ་བྱེད་མཁན་གྱི་ཚོགས་པར་འབྲེལ་བ་མང་པོ་བྱས་ཏེ། ཐོག་མར་ང་ཚོར་གློག་བརྙན་སྟོན་ཆོག་པའི་ཆོག་མཆན་སྤྲད་པས། ང་ཚོས་ཀྱང་གློག་བརྙན་དུས་སྟོན་ཐོག་སྟོན་རྒྱུའི་འཆར་གཞི་ཡོད། མཐའ་མར་ང་ཚོས་ཕར་ཚུར་འབྲེལ་བ་བྱེད་སྐབས། གློ་བུར་བརྡ་ལན་འབྱོར་ནས་གློག་བརྙན་སྟོན་པའི་བཀའ་འཁྲོལ་རག་མ་སོང་། དྷ་རམ་ས་ལར་གློག་བརྙན་འདི་སྟོན་ཆོག་གི་མ་རེད་ཟེར།  དེ་ནི་ཡིད་མ་ཆེས་པ་ཞིག་རེད། འདས་ལོར་རྒྱ་གར་གྷོ་ཝའི་གློག་བརྙན་དུས་སྟོན་ཐོག་གློག་བརྙན་དེ་བསྟན་ཟིན་པ་རེད། གློག་བརྙན་གསའ་རྒྱ་གར་ནང་དུ་སྟོན་མ་ཆོག་པས་མ་རེད། གློག་བརྙན་དུས་སྟོན་འཚོགས་ས་དྷ་རམ་ས་ལར་འཚོག་བཞིན་ཡོད་པས། ཁོང་ཚོས་དམིགས་བསལ་མ་འདྲ་བ་ཞིག་བསམ་གྱི་འདུག དེར་བརྟེན་འདས་པོ་པདྨ་ཚེ་བརྟན་ལགས་ཀྱི་གློག་བརྙན་གསའ་སྟོན་པའི་ཆོག་མཆན་རག་མ་བྱུང་།  ཐེངས་འདིའི་གློག་བརྙན་དུས་སྟོན་ཐོག་སྟོན་ཐུབ་ན་བསམ་ཡང་བསྟན་ཐུབ་མ་སོང་། ཧ་ཅང་བློ་ཕམ་བྱུང་། ཞེས་འགྲེལ་བརྗོད་གནང་སོང་།

གློག་བརྙན་དུས་སྟོན་གྱི་གལ་གནད་སྐོར་ལ་ཁོང་གིས། དྷ་ས་རྒྱལ་སྤྱིའི་གློག་བརྙན་དུས་སྟོན་སྟེང་འཛམ་གླིང་གི་གློག་བརྙན་སྤུས་དག་རྣམས་བསྟན་རྒྱུའི་དམིགས་ཡུལ་ཐོག་མགོ་ཚུགས་པ་རེད། རྗེས་སུ་རྒྱ་གར་ནང་ལོ་རེ་བཞིན་འཚོགས་ཏེ་སྐད་གྲགས་དང་མཐོང་ཆེན་པོ་ཆགས་དུས། ལོ་ལྟར་གློག་བརྙན་བཟོ་མཁན་དང་ལྟད་མོ་ལྟ་མཁན་མང་ནས་མང་དུ་འགྲོ་བཞིན་འདུག གློག་བརྙན་གྱི་ཆེད་དུ་དྷ་ས་གློག་བརྙན་དུས་སྟོན་གྱིས་ཧ་ཅང་ཕན་ཐོགས་པོ་བྱུང་། དེ་བཞིན་བོད་དོན་ཐོག་གློག་བརྙན་དུས་སྟོན་འདི་གལ་ཆེན་པོ་མཐོང་གི་འདུག གློག་བརྙན་དུས་སྟོན་ནི་ཆབ་སྲིད་དང་འབྲེལ་བ་མེད་ཀྱང་། ཚོགས་ཡུལ་དྷ་རམ་ས་ལ་ཆགས་ཡོད་པས་འཛམ་གླིང་གི་གློག་བརྙན་བཟོ་མཁན་དང་ལྟད་མོ་མང་པོ་རང་བཞིན་གྱིས་བོད་དོན་འཐབ་རྩོད་ཐོག་གོ་རྟོགས་ཡོང་གི་འདུག བོད་ཀྱི་གཞོན་སྐྱེས་མང་པོས་གློག་བརྙན་ཐོག་དོ་སྣང་ཤུགས་ཆེན་ཡོང་གི་ཡོད་པ་མ་ཟད། སྔོན་མ་ལས་གློག་བརྙན་སྤུས་དག་པོའི་རིགས་ཡོང་བཞིན་འདུག  མ་འོངས་བར་བཙན་བྱོལ་ནང་བོད་ཀྱི་གློག་བརྙན་སྤུས་དག་པོ་བཟོ་མཁན་མང་པོ་ཡོང་རྒྱུ་རེད་བསམ་གྱི་འདུག ཅེས་བརྗོད་སོང་།

མཇུག་ཏུ་ཁོང་གིས་སྔོན་མ་དང་བསྡུར་ན་དེང་སང་བོད་པའི་སྤྱི་ཚོགས་ཁྲོད་དུ་གློག་བརྙན་བཟོ་མཁན་མང་དུ་ཕྱིན་འདུག སྔར་དང་མི་འདྲ་བར་གློག་བརྙན་སྤུས་དག་པོའི་རིགས་བཟོས་ཡོང་གི་འདུག གློག་བརྙན་ཐོག་དོ་སྣང་ཤུགས་ཆེན་བྱས་ཏེ་གློག་བརྙན་ཡག་པོ་བཟོ་བཞིན་འདུག གློག་བརྙན་ཐོག་དཀའ་ལས་རྒྱག་མཁན་མང་དུ་འབྱུང་བཞིན་ཡོད་པས། མ་འོངས་བར་བོད་པའི་སྤྱི་ཚོགས་ནང་དུ་གློག་བརྙན་སྤུས་དག་བཟོ་མཁན་མང་དུ་འགྲོ་རྒྱུ་རེད་འདུག ཅེས་དང་། དྷ་རམ་ས་ལའི་རྒྱལ་སྤྱིའི་གློག་བརྙན་དུས་སྟོན་ཐོག་སྟོན་བཞིན་པའི་གློག་བརྙན་རྣམས་ཚོང་ལས་དང་འབྲེལ་བ་མེད་པ་དང་། རང་དབང་ཅན་གྱི་གློག་བརྙན་རིགས་རེད། རྒྱལ་ཁབ་འདྲ་མིན་དང་རྒྱ་གར་གྱི་ལྟད་མོ་མང་པོའི་དོ་སྣང་བྱེད་བཞིན་ཡོད་པས། བོད་པ་རྣམས་ཀྱིས་ཀྱང་གློག་བརྙན་ཁང་དུ་སོང་སྟེ་གློག་བརྙན་དེའི་རིགས་ལ་དོ་སྣང་བྱ་རྒྱུ་གལ་ཆེན་པོ་རེད། ཅེས་འགྲེལ་བརྗོད་གནང་སོང་།

གསར་འགོད་པ། བྱམས་པ་ཚེ་རིང་།