རྒྱ་ནག་མི་དམངས་འཐུས་མི་ཚོགས་ཆེན་སྐབས་ ༡༣ པའི་དཔལ་འབྱོར་དང་དངུལ་རྩིས་ཁང་གི་འགན་འཛིན་གཞོན་པ་སུང་ཀྲི་ཀང་གིས་ལྐོག་རྔན་རྒྱ་སྒོར་ས་ཡ་ ༨ བླངས་བའི་ནག་ཉེས་འོག་སྲོག་ཁྲིམས་གཅོད་རྒྱུ་ཡིན་པ་ལོ་གཉིས་ཕྱིར་འགྱངས་བྱས་ཡོད་འདུག
ཞི་ཅིན་ཕིན་གཞུང་གིས་སྟག་དང་སྦྲང་མ་ལེབ་རྡུང་གི་སྲིད་ཇུས་ཟེར་བའི་མིང་འོག་ནས་རྒྱ་ནག་དང་། རྒྱའི་བཙན་བཟུང་འོག་ཡོད་པའི་བོད་དང་ལྷོ་སོག ཡུ་གུར་སོགས་ཀྱི་དཔོན་རིགས་མང་པོ་ཞིག་ལ་ལྐོག་ཟ་རུལ་སུངས་དང་ལྐོག་རྔན་བླངས་བ། དམར་ཤོག་གཞུང་ལ་བློ་སེམས་མི་དཀར་བ་སོགས་ཀྱི་ནག་ཉེས་འོག་ཁྲིམས་ཆད་ཕོག་གི་ཡོད་པ་ལྟར། ཁ་སང་ཟླ་འདིའི་ཕྱི་ཚེས་ ༢༩ ཉིན་ཐིན་ཅིན་གྲོང་ཁྱེར་གྱི་འབྲིང་རིམ་མི་དམངས་ཁྲིམས་ཁང་གཉིས་པ་ཟེར་བས། རྒྱ་ནག་རྒྱལ་ཡོངས་མི་དམངས་འཐུས་མི་ཚོགས་ཆེན་སྐབས་ ༡༣ པའི་དཔལ་འབྱོར་དང་དངུལ་རྩིས་ཁང་གི་འགན་འཛིན་གཞོན་པ་དང་། ཀོས་ཀྲོའུ་ཞིང་ཆེན་དམར་ཤོག་དྲུང་ཆེ་སུང་ཀྲི་ཀང་གིས་ལྐོག་རྔན་རྒྱ་སྒོར་ས་ཡ་ ༨ ལྷག་བླངས་བའི་ནག་ཉེས་བཙུགས་ཏེ་སྲོག་ཁྲིམས་བཅད་ཡོད་ཀྱང་ལོ་གཉིས་རིང་ཕྱིར་འགྱངས་བྱས་ཡོད་ཚུལ་བསྒྲགས་འདུག
ཐེན་ཅིན་གྲོང་ཁྱེར་གྱི་འབྲིང་རིམ་མི་དམངས་ཁྲིམས་ཁང་གཉིས་པ་ཟེར་བས། སུང་ཀྲི་ཀང་གིས་ཕྱི་ལོ་ ༢༠༠༢ ལོ་ནས་ ༢༠༢༣ ལོའི་ཟླ་ ༨ བར་ཧུའུ་པེ་ཞིང་ཆེན་གྱི་དམར་ཤོག་ཚོགས་པའི་དྲུང་ཡིག་དང་། ཨན་ཧེ་ཞིང་ཆེན་གྱི་མགོ་ཁྲིད་གཞོན་པ། རྒྱ་ནག་འཛུགས་སྐྲུན་ཡར་རྒྱས་ཚན་པའི་འགན་འཛིན་གཞོན་པ། ཀོས་ཀྲོའུ་ཞིང་ཆེན་གྱི་མགོ་ཁྲིད་དང་དམར་ཤོག་ཚོགས་པའི་དྲུང་ཡིག རྒྱ་ནག་རྒྱལ་ཡོངས་མི་དམངས་འཐུས་མི་ཚོགས་ཆེན་སྐབས་ ༡༣ པའི་དཔལ་འབྱོར་དང་དངུལ་རྩིས་རྒྱུན་ལས་ཁང་གི་འགན་འཛིན་གཞོན་པ་སོགས་ཀྱི་གཞུང་འབྲེལ་གོ་གནས་བེད་སྤྱོད་ལོག་པར་བཏང་སྟེ་མི་སྒེར་གྱི་ཁེ་ལས། ལས་གྲྭ་འགན་ལེན། གོ་གནས་སྤར་བ། ཁེ་ཕན་དོན་གཉེར་ཟེར་བ་སོགས་བྱས་ནས་ལྐོག་རྔན་ཁྱོན་རྒྱ་སྒོར་ས་ཡ་ ༨ འབུམ་ ༡༨ བླངས་ཡོད་པའི་ནག་ཉེས་བཙུགས་འདུག
སུང་ཀྲི་ཀང་ནི་ཕྱི་ལོ་ ༡༩༥༤ ལོར་རྒྱ་ནག་ཧི་ནན་ཞིང་ཆེན་ཞང་ཡང་ནས་སྐྱེས་ཡོད་ཅིང་། ཕྱི་ལོ་ ༡༩༧༣ ལོར་ཝུའུ་ཧན་ལྕགས་རིགས་སློབ་གླིང་ཁང་དུ་ལྕགས་རིགས་ཆེད་ལས་ཐོག་སློབ་གཉེར་བྱས། ཕྱི་ལོ་ ༡༩༧༦ ལོར་རྒྱ་ནག་དམར་ཤོག་ཚོགས་པའི་ནང་དུ་ཞུགས། ཕྱི་ལོ་ ༡༩༧༩ ལོ་ནས་ ༡༩༨༠ ལོར་བར་ཀྲུང་ནན་གཏེར་ལས་ལྕགས་རིགས་མཐོ་སློབ་ཀྱི་ཁེ་ལས་དོ་དམ་པའི་འོས་སྦྱོང་བྱས། ཕྱི་ལོ་ ༡༩༨༥ ལོར་ཝུའུ་ཧན་གྲོང་ཁྱེར་མི་དམངས་སྲིད་གཞུང་དུ་ལས་ཀ་བྱས། ཕྱི་ལོ་ ༡༩༨༦ ནས་ ༡༩༨༧ བར་ཝུའུ་ཧན་གྲོང་ཁྱེར་དཔལ་འབྱོར་འཆར་བཀོད་ཁང་དུ་འགན་འཛིན་གཞོན་པ་བྱས། ཕྱི་ལོ་ ༡༩༩༣ ནས་ ༡༩༩༧ བར་ཝུའུ་ཧན་མཐོ་སློབ་ནས་དཔལ་འབྱོར་རིག་པའི་འབུམ་རམས་པའི་ལག་འཁྱེར་བླངས། ཧུའུ་པེ་ཞིང་ཆེན་དུ་ལོ་ངོ་༢༠ ལྷག་ལས་ཀ་བྱས་མྱོང་བ་དང་། ཡིས་ཁྲང་གྲོང་ཁྱེར་གྱི་དམར་ཤོག་ཚོགས་པའི་དྲུང་ཆེ་དང་། ཧུ་པེ་ཞིང་ཆེན་དམར་ཤོག་ཚོགས་པའི་དྲུང་ཆེ་བཅས་ཀྱི་གོ་གནས་བཟུང་།
ཕྱི་ལོ་ ༢༠༠༦ ལོར་ཨན་ཧེ་ཞིང་ཆེན་དམར་ཤོག་ཚོགས་པའི་རྒྱུན་ལས་དང་། ཨན་ཧེ་ཞིང་ཆེན་མགོ་ཁྲིད་གཞོན་པའི་འགན་འཁུར་ཡོད་འདུག ཕྱི་ལོ་ ༢༠༡༠ ལོའི་མཇུག་ཏུ་པེ་ཅིན་དུ་སྤོས་ཏེ་རྒྱལ་ཡོངས་འཕེལ་རྒྱས་དང་བཅོས་བསྒྱུར་ལྷན་ཁང་གི་གཞོན་འགན་དང་། རྒྱལ་ཡོངས་འཕྲོད་བསྟེན་དང་བཟའ་རིགས་ལྷན་ཁང་གི་འགན་འཛིན་གཞོན་པ་སོགས་བྱས། ཕྱི་ལོ་ ༢༠༡༥ ལོའི་ཟླ་ ༡༠ པར་ཀོས་ཀྲོའུ་ཞིང་ཆེན་གྱི་དམར་ཤོག་དྲུང་ཆེ་གཞོན་པ་དང་། ཀོས་ཀྲོའུ་ཞིང་ཆེན་གྱི་མགོ་ཁྲིད། ༢༠༡༧ ལོའི་ཟླ་ ༧ པར་ཀོས་ཀྲོའུ་ཞིང་ཆེན་དམར་ཤོག་ཚོགས་པའི་དྲུང་ཆེར་བསྐོ་བཞག་བྱས་ཡོད་འདུག ཕྱི་ལོ ༢༠༢༠ ལོའི་ཟླ་ ༡༡ ནང་དུ་སུང་ཀྲི་ཀང་ལས་གནས་ནས་ཕྱིར་ཕུད་བཏང་ཡོད་འདུག
ཕྱི་ལོ་ ༢༠༢༣ ལོའི་ཟླ་ ༨ པར་སུང་ཀྲི་ཀང་ལ་ཞིབ་བཤེར་བྱེད་བཞིན་ཡོད་པའི་གསལ་བསྒྲགས་བྱས་ཤིང་། འདི་ལོའི་ཕྱི་ཟླ་ ༢ པའི་ནང་རྒྱ་ནག་དམར་ཤོག་ཚོགས་པའི་ཚོགས་མིའི་ཁོངས་ནས་ཕྱིར་ཕུད་བཏང་། གསལ་བསྒྲགས་ནང་སུང་ཀྲི་ཀང་རྒྱ་ནག་གཞུང་གི་གལ་ཆེའི་ཐག་གཅོད་ལག་བསྟར་མ་བྱས་པ་དང་། ལས་གནས་ཀྱི་སྐབས་སུ་རྒྱ་གཞུང་གི་བྱ་སྤྱོད་དང་འགལ་ཏེ་མི་སྒེར་གྱི་བུ་ལོན་བརྒྱུད་ནས་ཁེ་བཟང་བླངས་པ་དང་། རྒྱ་གཞུང་གི་ཞིབ་བཤེར་ལ་ངོ་རྒོལ་བྱས་པ། ཁྲིམས་དཔྱད་ལས་དོན་ལ་ཐེ་གཏོགས་བྱས་པ། ལྐོག་རྔན་མང་པོ་བླངས་བ་སོགས་ཀྱི་ནག་ཉེས་བཙུགས་ཡོད་འདུག
གསར་འགོད་པ། བྱམས་པ་ཆེ་རིང་།
