འཛམ་གླིང་གི་བཟོ་ཚོང་ཁང་དང་མ་རྐང་འཇོག་མཁན་རྣམས་ཀྱིས་རྒྱ་གཞུང་གི་ཧྭ་ཏིན་ཆུ་གློག་བཟོ་ཚོང་ལ་རོགས་འདེགས་བྱས་ཏེ་བོད་ཀྱི་ཁོར་ཡུག་གཏོར་སྐྱོན་གཏོང་མཚམས་འཇོག་དགོས་པའི་འབོད་སྐུལ་ཞུས་འདུག
རྒྱ་ནག་གཞུང་གིས་བོད་ས་བཙན་བཟུང་བྱས་པ་ནས་བཟུང་བོད་ནང་གི་གཏེར་ཁ་སྔོག་འདོན་དང་། ཆུ་རགས་དང་གཞུང་ལམ་སོགས་ཀྱི་འཛུགས་སྐྲུན་རྒྱ་བསྐྱེད་ཀྱིས་ས་གནས་བོད་ཀྱི་ཁོར་ཡུག་དང་། ཤུལ་བཞག་རིག་གནས། བོད་མི་མང་གི་འཚོ་བར་ཉེན་ཁ་བཟོ་བཞིན་ཡོད་ཅིང་། རྒྱ་ནག་གིས་འཛུགས་སྐྲུན་དེ་དག་བརྒྱུད་ཐོན་ཁུངས་ལ་སྟངས་འཛིན་དང་ས་ཆའི་བདག་དབང་ལ་དབང་སྒྱུར་སྲིད་ཇུས་ཀྱི་དམིགས་ཡུལ་འགྲུབ་ཐབས་བྱེད་བཞིན་ཡོད་པ་མ་ཟད། དེས་བོད་ཀྱི་སྣོད་བཅུད་དང་། གནའ་བོའི་ཤུལ་བཞག་རིག་གནས་ཀྱི་གནས་ཆེན། མི་མང་གི་འཚོ་སྡོད་ཐོབ་ཐང་བཅས་ལ་གནོད་སྐྱོན་ཚབས་ཆེན་བཟོ་བཞིན་ཡོད་སྟབས། ཨོ་གླིང་བོད་དོན་ལས་འགུལ་ལྷན་ཁང་གིས། རྒྱལ་སྤྱིའི་བཟོ་ཚོང་ཁང་དང་མ་རྐང་འཛུགས་མཁན་རྣམས་ཀྱིས་རྒྱ་ནག་དང་མཉམ་འབྲེལ་ཐོག་བོད་ཀྱི་ཁོར་ཡུག་གཏོར་སྐྱོན་གྱི་བྱ་སྤྱོད་ལ་རམ་འདེགས་མི་བྱེད་པའི་འབོད་སྐུལ་ལས་འགུལ་སྤེལ་གྱིན་འདུག
ཐེངས་འདིའི་བོད་ཀྱི་ས་ཆར་ཐེ་གཏོགས་བྱེད་མཚམས་འཇོག་དགོས་ཞེས་པའི་ལས་འགུལ་གྱི་འབོད་སྐུལ་གཙོ་བོ་ནི། བོད་ཀྱི་ས་ཆ་བོད་མིར་བདག་གིན་ཡོད་ཅིང་། བོད་ཀྱི་ཐོན་ཁུངས་ཆུ་དང་གཏེར་རིགས་སོགས་བཀོལ་སྤྱོད་བྱེད་མིན་གྱི་ཐོབ་ཐང་བོད་མི་རང་ལ་ཡོད་པས། ནུབ་ཕྱོགས་ཀྱི་བཟོ་ཚོང་ཁང་ཁག་གིས་ད་ལྟ་བོད་མི་རྣམས་བཙན་འཛུལ་འོག་ཡོད་པའི་གནས་བབ་དང་བསྟུན། རྒྱ་ནག་དང་ལྷན་དུ་མཉམ་འབྲེལ་གྱིས་བོད་ཀྱི་ཆུ་དང་གཏེར་ཁ་སོགས་སྔོག་འདོན་བྱེད་པའི་ལས་གཞིའི་ནང་ཞུགས་ཏེ་ཁེ་ཕན་དོན་གཉེར་མཚམས་འཇོག་བྱེད་དགོས་པ་མ་ཟད། འདི་ལོའི་ཕྱི་ཟླ་ ༢ ནང་བོད་ཁམས་སྡེ་དགེ་སྐམ་ཐོག་གི་ཆུ་མཛོད་གསར་རྒྱག་དང་འབྲེལ་ནས་མི་མང་སྟོང་ཕྲག་གང་བྱུང་འཛིན་བཟུང་བྱས་ཤིང་། ལོ་ངོ་སྟོང་ཕྲག་གི་ལོ་རྒྱུས་ལྡན་པའི་དགོན་སྡེ་དྲུག་གཏོར་བཤིག་གཏོང་ཐབས་བྱས་པ། དེ་བཞིན་མི་མང་གནས་སྤོར་དང་དྲག་གནོན་བྱས་པའི་བརྒྱུད་རིམ་ལུང་འདྲེན་དང་སྦྲགས། དབྱིན་ཡུལ་གྱི་སི་ཁོ་རོ་ཌིར་སི་(Schroders) དང་། ཧྥ་རན་སིའི་དངུལ་ཁང་(Crédit Agricole Group)། འཇར་མན་གྱི་གློག་ཁང་(Siemens Energy) བཅས་ཀྱིས་བོད་སྡེ་དགེ་སྐམ་ཐོག་གི་ཆུ་མཛོད་གསར་རྒྱག་བྱེད་མཁན་གཙོ་བོ་རྒྱ་ནག་གི་བཟོ་གྲྭ་ཆེ་ཤོས་ཧྭ་ཏིན ་(Huadian) ཆུ་གློག་འཛུགས་སྐྲུན་ཁང་དང་ལྷན་དུ་མཉམ་འབྲེལ་གྱི་འབྲེལ་ཐག་གཅོད་དགོས་པའི་འབོད་སྐུལ་ཡང་ཞུས་འདུག་ལ།
ལས་འགུལ་གྱི་གསལ་བསྒྲགས་ནང་། ནུབ་ཕྱོགས་རྒྱལ་ཁབ་ཚོས་རྒྱ་གཞུང་གིས་བོད་ས་བཙན་བཟུང་བྱས་ཏེ་རང་བྱུང་ཐོན་ཁུངས་དང་། བསྐྱར་གསོ་མི་ཐུབ་པའི་ཁོར་ཡུག་གཏོར་སྐྱོན་སོགས་སྣང་མེད་དུ་བཏང་སྟེ། རྒྱ་ནག་དང་མཉམ་དུ་དཔལ་འབྱོར་གྱི་ཁེ་ཕན་ཆེད་མཉམ་ལས་བྱེད་བཞིན་ཡོད། ནུབ་ཕྱོགས་རྒྱལ་ཁབ་དང་རྒྱ་ནག་གཉིས་ཀྱིས་རང་བྱུང་ཐོན་ཁུངས་ཀྱི་ནུས་སྟོབས་ལ་དོ་སྣང་བྱེད་བཞིན་པ་དེས་བོད་ཀྱི་ས་ཆ་དང་ཐོན་ཁུངས་ཀྱི་བདག་དབང་ལ་རྩིས་མེད་རྡོག་རོལ་བཏང་དང་གཏོང་མུས་ཡིན་པ་མ་ཟད། བོད་མི་ཞི་རྒོལ་བ་རྣམས་བཙོན་འཇུག་གིས་མནར་གཅོད་གཏོང་བཞིན་ཡོད། ཅེས་གསལ་འདུག
ལས་འགུལ་དེའི་ཐད་ཨོ་གླིང་གྲོས་ཚོགས་འཐུས་མི་ཟུར་བ་ལྕམ་ཇཱ་ནེ་ཌི་རེ་སི་ (Janet Rice)ལགས་ཀྱིས། བོད་ཀྱི་ཤར་ཕྱོགས་ཁུལ་སྡེ་དགེའི་སྐམ་ཐོག་ཆུ་རགས་འཛུགས་སྐྲུན་གྱི་ལས་གཞི་མཚམས་འཇོག་དགོས། འདི་ནི་བདག་དབང་གི་གནད་དོན་ཞིག་རེད། སྐམ་ཐོག་ཆུ་རགས་འཛུགས་སྐྲུན་གྱིས་གྲོང་སྡེ་མང་པོ་ཆུ་ལོག་གིས་འཁྱེར་སྲིད་པ་དང་། ཉུང་མཐར་མི་གྲངས་ ༤༠༠༠ ལྷག་རང་ཉིད་ཀྱི་ཁྱིམ་ནས་གནས་སྤོ་བྱེད་དགོས་སྲིད་པ་མ་ཟད། ལོ་ངོ་དྲུག་བརྒྱ་ལྷག་གི་ལོ་རྒྱུས་ལྡན་པའི་དགོན་སྡེ་མང་པོ་གཏོར་བཤིག་གཏོང་སྲིད་པ་རེད། འདི་ལོའི་ལོ་མགོར་སྐམ་ཐོག་ཆུ་རགས་གསར་རྒྱག་ལ་འདོད་པ་མེད་པའི་ཞི་བའི་ལས་འགུལ་སྤེལ་བར་བརྟེན་ནས། རྒྱ་ནག་གིས་མི་གྲངས་སྟོང་ཕྲག་མང་པོ་འཛིན་བཟུང་བྱས་ཡོད། ཆུ་རགས་དེ་དག་ནི་རྒྱ་ནག་གཞུང་གི་བཟོ་གྲྭ་ཆེ་ཤོས་ཧྭ་ཏིན་ཆུ་གློག་འཛུགས་སྐྲུན་ཚོགས་པས་རྒྱག་བཞིན་ཡོད། བོད་ནང་གི་ཆུ་རགས་དེ་དག་ནི་རྒྱ་ནག་གི་གྲོང་ཁྱེར་ཁག་ཏུ་གློག་ཤུགས་བཀོལ་འདོན་བྱེད་ཆེད་དུ་བེད་སྤྱོད་བྱེད་བཞིན་ཡོད། ཅེས་དང་། ནུབ་ཕྱོགས་པའི་བཟོ་ཚོང་ཁང་རྣམས་ཀྱིས་ཧྭ་ཏིན་ཆུ་གློག་དང་འབྲེལ་ཐག་བཅད་དེ། རྒྱ་གཞུང་གིས་བོད་ནང་ཆུ་རགས་འཛུགས་སྐྲུན་རྒྱ་བསྐྱེད་མཚམས་འཇོག་བྱ་དགོས་པ་དང་། ཉེ་ལམ་རྒྱལ་ཚོགས་ཀྱིས་བོད་ནང་གི་ཆུ་རགས་འཛུགས་སྐྲུན་གྱི་སེམས་འཚབ་སྐོར་ནས་རྒྱ་གཞུང་ལ་འཕྲིན་ཡིག་བཏང་ཡོད་པ་ལྟར། མི་མང་གིས་སྟོབས་ཤུགས་ཀྱིས་ཆུ་རགས་འཛུགས་སྐྲུན་མཚམས་འཇོག་བྱེད་ཐུབ་པས། འཛམ་གླིང་མི་མང་ཡོངས་ཀྱིས་ལས་འགུལ་འདིའི་ནང་མཉམ་ཞུགས་བྱས་ཏེ་སྐམ་ཐོག་ཆུ་རགས་མཚམས་འཇོག་དང་། བོད་ཀྱི་ས་ཆ་གཏོར་བཤིག་གཏོང་མཚམས་འཇོག་དགོས་སྐོར་སོགས་བརྗོད་འདུག
ཐེངས་འདིའི་ལས་འགུལ་དེ་ནི་ཨོ་གླིང་བོད་དོན་ལས་འགུལ་ལྷན་ཚོགས་དང་། རྒྱལ་སྤྱིའི་བོད་དོན་འབྲེལ་མཐུད་ཁང་། བོད་རང་དབང་ལས་འགུལ་ཁང་། བོད་རང་བཙན་སློབ་ཕྲུག་ཚོགས་པ། བོད་དོན་ལས་འགུལ་ལྟེ་གནས་ཁང་། དེ་བཞིན་བོད་དོན་རྒྱབ་སྐྱོར་ཚོགས་པ་ཁག་གཞན་བཅས་ཐུན་མོང་གིས་གོ་སྒྲིག་གནང་ཞིང་། ད་ལྟ་ཆར་ལས་འགུལ་དེར་དྲ་ཐོག་ནས་མཚན་རྟགས་བསྐྱོན་པའི་རྒྱབ་སྐྱོར་འཚོལ་བཞིན་འདུག་ལ། ལས་འགུལ་གྱི་དྲ་ཐག་ཀྱང་སྒོ་ཕྱེས་ནས་བཞག་འདུག
གསར་འགོད་པ། བྱམས་པ་ཚེ་རིང་།
