སི་པན་རྒྱལ་ཁབ་ནང་མི་རྒྱུ་གཉིས་ལ་རང་བྱུང་གོད་ཆག་གི་དཀའ་ངལ་འཕྲད་མུས་ཡིན་འདུག

ཡུ་རོབ་ཀྱི་སི་པན་རྒྱལ་ཁབ་ནང་དྲག་ཆར་དང་ཆུ་ལོག་རྒྱུག་སྟེ་ཉུང་མཐར་མི་གྲངས་ ༡༥༨ ལྷག་རྐྱེན་འདས་དང་མི་མང་པོ་གར་སོར་ཆ་མེད་དུ་གྱུར་ཡོད་པས། ད་ལྟ་དམག་མི་ ༡༢༠༠ ལྷག་གིས་མྱུར་སྐྱོབ་བྱེད་མུས་ཡིན་འདུག

དེ་རིང་རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། ཡུ་རོབ་རྒྱལ་ཁབ་སི་པན་ནང་བདུན་ཕྲག་གཅིག་རིང་ཆར་བ་ཤུགས་ཆེན་བབས་རྐྱེན། སི་པན་ནང་མི་རྒྱུ་གཉིས་ལ་རང་བྱུང་གོད་ཆག་གི་དཀའ་ངལ་འཕྲད་མུས་ཡིན་པ་ལྟར། སི་པན་ལྷོ་ཤར་ཁུལ་དུ་དྲག་ཆར་དང་ཆུ་ལོག་རྒྱུག་སྟེ་ཉུང་མཐར་མི་གྲངས་ ༡༥༨ རྐྱེན་འདས་དང་། མི་མང་པོ་ཞིག་གར་སོང་ཆ་མེད་དུ་གྱུར་འདུག དེའི་ཁྲོད་དུ་ཝ་ལེན་ཤི་ཡ་ཁུལ་གྱི་མི་གྲངས་ ༡༥༥ རྐྱེན་འདས་སུ་ཕྱིན་ཡོད་པ་མ་ཟད། ཧེ་ཕོ་ཐར་མི་ཡ་ཁུལ་དུ་དབྱིན་ཡུལ་ནས་ཡིན་པའི་ལོ་ ༧༡ ཅན་གྱི་རྒན་པོ་ཞིག་རྐྱེན་འདས་སུ་གྱུར། གྲོང་ཁྱེར་གྱི་གཞུང་ལམ་དང་ཁང་པ་སོགས་ཆུས་བསྐོར་ཡོད་སྟབས། གནས་སྐབས་རིང་སློབ་གྲྭ་དང་འགྲིམ་འགྲུལ་སོགས་སྒོ་བརྒྱབ་ཡོད་འདུག་ལ། དེ་བཞིན་སི་ཕན་གྱི་མུར་ཤི་ཡ་དང་། མཱ་ལཱ་གྷ། ཨན་ཌ་ལུ་ཤི་ཡ་སོགས་ཉེ་འགྲམ་གྱི་ས་ཁུལ་ཁག་ཏུའང་དེ་མཚུངས་དཀའ་ངལ་འཕྲད་བཞིན་ཡོད་ཅིང་།  ད་ལྟ་དམག་མི་ ༡༢༠༠ ལྷག་གིས་མྱུར་སྐྱོབ་བྱེད་མུས་ཡིན་འདུག

སི་པན་གྱི་ནང་སྲིད་བློན་ཆེན་ཨན་གྷལ་ཝེ་ཁི་ཌིར་ཌོ་རེ་སི་ལགས་ཀྱིས། ཕྱི་ཟླ་ ༡༠ ཚེས་ ༢༩ ཉིན་ནས་བཟུང་དྲག་ཆར་འབབ་མགོ་ཚུགས་ཡོད་པ་དང་། ད་ལྟ་བར་ཉུང་མཐར་མི་གྲངས་ ༡༥༨ རྐྱེན་འདས་ཕྱིན་ཡོད་པའི་ཁྲོད། ཝི་ལེན་ཤི་ཡ་ཁུལ་དུ་མི་གྲངས་ ༡༥༥ རྐྱེན་འདས་ཕྱིན་ཡོད། ཆུ་ལོག་གིས་གྲོང་སྡེ་དང་ལམ་ཁ་མང་པོ་གཏོར་བཤིག་བཏང་ཡོད་པ་མ་ཟད། ས་ཆ་གཙང་བཟོ་བྱེད་པར་གློག་མེད་པའི་དཀའ་ངལ་འཕྲད་བཞིན་ཡོད་འདུག དེ་བཞིན་མི་མང་པོ་གར་སོང་ཆ་མེད་དུ་གྱུར་ཡོད་པས། དེ་དག་གི་གྲངས་ཀ་གསལ་བོ་ཤེས་ཀྱི་མི་འདུག  ང་ཚོས་མྱུར་སྐྱོབ་བྱེད་བཞིན་ཡོད་ཀྱང་། གར་སོང་ཆ་མེད་དུ་གྱུར་བ་རྣམས་ད་དུང་རྙེད་ཐུབ་ཀྱི་མི་འདུག ང་ཚོས་ཁོང་ཚོ་གསོན་པོ་གནས་པར་རེ་བ་རྒྱག་རྒྱུ་མི་འདུག ཅེས་བརྗོད་འདུག

ཁ་སང་སི་པེན་གྱི་སྲིད་བློན་པེ་ཌི་རོ་སན་ཆེ་སི་མཆོག་ཝ་ལེན་སི་ཡ་རུ་གཟིགས་སྐོར་གནང་སྐབས། ཆུ་ལོག་གིས་གནོད་སྐྱོན་ཕོག་པའི་ས་ཁུལ་ཁག་ལ་སི་པན་གཞུང་ནས་རྒྱབ་སྐྱོར་ཆ་ཚང་གནང་རྒྱུའི་ཁས་ལེན་བྱས་ཡོད་ཅིང་།  ཁོང་གིས་ད་དུང་ཆུ་ལོག་གི་གནས་སྟངས་བརྟན་པོ་བྱུང་མེད་པས། མི་མང་རྣམས་ཁྱིམ་དུ་སྡོད་དགོས་པའི་འབོད་སྐུལ་གནང་ཡོད་པ་དང་། གལ་ཆེ་ཤོས་ནི་གར་སོང་ཆ་མེད་དུ་གྱུར་བའི་མི་རྣམས་མྱུར་དུ་འཚོལ་རྒྱུ་དེ་ཡིན།  གོད་ཆག་ཕོག་པའི་ས་ཁུལ་ཆེད་མྱུར་སྐྱོབ་དང་བསྐྱར་བཟོ་མཐུན་རྐྱེན་སྦྱོར་རྒྱུ་ཡིན། ཡུ་རོབ་ལྷན་ཚོགས་ཀྱི་ཚོགས་གཙོ་ཨུར་སུ་ལ་ཝོན་ཌེར་ལེ་ཡེན་དང་བཀའ་མོལ་བྱུང་སྟེ། ཡུ་རོབ་མཐུན་ཚོགས་ཀྱི་རོགས་སྐྱོབ་ཀྱི་ཞལ་བཞེས་ཐོབ་པ་མ་ཟད། མཐུན་ཚོགས་ཀྱི་ཚོགས་མི་རྒྱལ་ཁབ་ཁག་ནས་ཀྱང་དགོས་ངེས་མཁོ་སྤྲོད་བྱ་རྒྱུ་ཡིན་སྐོར་གསུངས་འདུག

ཁོར་ཡུག་ཉམས་ཞིབ་པ་ཚོས་སི་པན་ནང་དྲག་ཆར་འབབ་པའི་རྒྱུ་རྐྱེན་གཙོ་བོ་ནི་གྷོ་ཊ་ཧྥི་རི་ཡ་(gota fria)ཞེས་པའི་རང་བྱུང་གི་གནམ་གཤིས་འགྱུར་ལྡོག་ཅིག་ཡིན་པ་ངོས་འཛིན་བྱས་ཡོད་པ་དང་།  དེ་ནི་སི་པན་ནང་སྟོན་ཁ་དང་དགུན་ཁའི་དུས་སུ་རླུང་གྲང་མོས་རྒྱ་མཚོའི་མཐའ་སྐོར་གྱི་ཆུ་དྲོན་མོའི་སྟེང་དུ་བབས་པ་ལས་བྱུང་བ་ཞིག་ཡིན་པར་བརྗོད་འདུག

ཚན་རིག་པ་ཚོས་བྷི་བྷི་སི་གསར་ཁང་ལ་བརྗོད་པ་ལྟར་ན། འཛམ་གླིང་གི་དྲོད་ཚད་འཕེལ་བའི་རྐྱེན་གྱིས་སྤྲིན་པས་ཆར་པ་མང་བོ་འཁྱེར་གྱི་ཡོད། བཟོ་ལས་དུས་རབས་མགོ་ཚུགས་པ་ནས་བཟུང་། འཛམ་གླིང་གི་དྲོད་ཚད་ ༡.༡ ཙམ་འཕར་ཡོད། གལ་སྲིད་འཛམ་གླིང་གི་རྒྱལ་ཁབ་ཁག་གིས་རླངས་གཟུགས་ཕྱིར་འབུད་ཚད་ཉུང་དུ་གཏོང་མ་ཐུབ་ཚེ། འཛམ་གླིང་གི་དྲོད་ཚད་མུ་མཐུད་དུ་འཕར་རྒྱུ་རེད། ཅེས་བརྗོད་འདུག

ཕྱི་ལོ་ ༢༠༢༡ ལོར་འཇར་མན་ནང་ཆུ་ལོག་ཆེན་པོ་ཞིག་རྒྱུག་སྟེ་མི་གྲངས་ ༡༨༥ ལྷག་རྐྱེན་འདས་བྱུང་ཡོད་པ་དང་།  ཕྱི་ལོ་ ༡༩༧༠ ལོར་རོ་མེ་ནི་ཡའི་ནང་མི་གྲངས་ ༢༠༩  རྐྱེན་འདས་བྱུང་། ཕྱི་ལོ་ ༡༩༦༧ ལོར་པོར་ཅུ་གྷལ་ནང་ཆུ་ལོག་གི་རྐྱེན་གྱིས་མི་གྲངས་ ༥༠༠ ཙམ་རྐྱེན་འདས་ཕྱིན་འདུག ཕྱི་ལོ་ ༡༩༥༩ ལོར་སི་པན་གྱི་གྲོང་ཚོ་རི་བ་ཌེལ་ལ་གོར་ནང་ཆུ་ལོག་གི་རྐྱེན་གྱིས་མི་གྲངས་ ༡༤༤ རྐྱེན་འདས་སུ་གྱུར།  དེ་ནི་རང་བྱུང་གི་གོད་ཆག་ཅིག་མིན་པར་བེ་ག་ཌེ་ཊེ་རའི་ཆུ་མཛོད་ཀྱི་ཆུ་རགས་ཞིག་རལ་དུ་ཕྱིན་པའི་རྐྱེན་གྱིས་རེད་འདུག དེ་བཞིན་ཕྱི་ལོ་ ༡༩༥༧ ལོར་ཝ་ལེན་སི་ཡ་གྲོང་ཁྱེར་ནང་ཆུ་ལོག་གི་རྐྱེན་གྱིས་མི་གྲངས་ ༡༠ ལྷག་རྐྱེན་འདས་སུ་གྱུར།  གྲོང་ཁྱེར་དེའི་ནང་ཆུ་ལོག་མི་ཡོང་བའི་ཆེད་དུ་ཏུ་རི་ཡ་གཙང་པོའི་ཆུ་རགས་གསར་བཟོ་བྱས་ཡོད་འདུག

གསར་འགོད་པ། བྱམས་པ་ཚེ་རིང་།