ཌོ་ནལ་ཊོམ་ཕུར་ཨ་རིའི་སྲིད་འཛིན་གྱི་འོས་བསྡུའི་རྒྱལ་ཁ་ཐོབ།

ཕྱི་ལོ་ ༢༠༢༤ ལོའི་ཨ་རིའི་སྲིད་འཛིན་གྱི་འོས་བསྡུའི་ཁྲོད་སྤྱི་མཐུན་ཚོགས་པའི་འོས་མི་སྲིད་འཛིན་ཟུར་པ་ཌོ་ནལ་ཊོམ་ཕུར་སྐབས་ ༤༧ པའི་ཨ་རིའི་སྲིད་འཛིན་རྒྱལ་ཁ་ཐོབ།

ཁ་སང་དང་དེ་རིང་ཉིན་གཉིས་རིང་ཨ་རི་གཙོ་བྱས་པའི་རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་འཛམ་གླིང་གི་སྟོབས་ཤུགས་ཆེ་ཤོས་ཀྱི་རྒྱལ་ཁབ་ཨ་རིའི་སྲིད་འཛིན་གྱི་འོས་བསྡུ་ཆེན་མོའི་སྐོར་ལ་ཚ་ཚ་འུར་འུར་དུ་གླེང་སློང་དང་བརྒྱུད་འགོད་བྱེད་བཞིན་ཡོད་པ་ལྟར།  དེ་རིང་ཨ་རིའི་འོས་བསྡུ་ལྷན་ཚོགས་ཀྱིས་ཕྱི་ལོ་ ༢༠༢༤ ལོའི་ཨ་རིའི་སྲིད་འཛིན་གྱི་རྒྱལ་ཡོངས་འོས་བསྡུའི་ཁྲོད། དམངས་གཙོ་ཚོགས་པའི་འོས་མི་ཀརྨ་ལ་ཧན་རེ་སིར་འོས་གྲངས་ ༢༢༦ དང་། སྤྱི་མཐུན་ཚོགས་པའི་འོས་མི་སྲིད་འཛིན་ཟུར་པ་ཊོམ་ཕུ་ལ་འོས་གྲངས་ ༢༩༥ ཐོབ་སྟེ། ཊོམ་ཕུ་སྐབས་ ༤༧ པའི་ཨ་རིའི་སྲིད་འཛིན་དུ་འོས་འདེམས་བྱུང་བ་ཡོངས་བསྒྲགས་བྱས། ད་སྔ་བར་གྲོས་ཚོགས་གོང་འོག་གཉིས་ལས་དམངས་གཙོ་ཚོགས་པར་འོས་གྲངས་ ༤༤ དང་སྤྱི་མཐུན་ཚོགས་པར་འོས་གྲངས་ ༥༢ བཅས་ཆགས་ཏེ་གྲོས་ཚོགས་གོང་མ་སྤྱི་མཐུན་ཚོགས་པར་རྒྱལ་ཁ་ཐོབ་ཡོད་ཀྱང་། གྲོས་ཚོགས་འོག་མའི་འོས་གྲངས་ད་དུང་རྩིས་བཤེར་བྱེད་བཞིན་པ་ཡིན་འདུག

ཨ་རིའི་ནེའུ་ཡོག་དུས་བབ་ཀྱིས་འོས་བསྡུའི་གྲུབ་འབྲས་ཕྱི་བསྒྲགས་བྱས་པ་ལྟར་ན། ཨ་རིའི་མངའ་སྡེ་ ༥༠ ཁྲོད་ཌོ་ནལ་ཊོམ་ཕུར་མངའ་སྡེ་  ༢༧ ནང་ནས་རྒྱལ་ཁ་ཐོབ་ནས་འོས་གྲངས་ ༧༢༦༢༣༨༨༢ ཆགས།  ། ཀརྨ་ལ་ཧན་རེ་སིར་མངའ་སྡེ་ ༡༧ ནང་ནས་རྒྱལ་ཁ་ཐོབ་ནས་འོས་གྲངས་ ༦༧༩༢༧༩༨༩ ཆགས། ཨ་རིའི་འོས་བསྡུ་ལྷན་ཚོགས་ནི་ཨ་རིའི་བཅའ་ཁྲིམས་ལྟར། མངའ་སྡེ་རེ་ནས་གྲོས་ཚོགས་འཐུས་མིའི་ཞབས་འགྱག་གི་གྲངས་རིམ་ལྟར་བསྐོ་གཞག་བྱེད་སྲོལ་ཡོད་པ་དང་། ཨ་རིའི་མངའ་སྡེ་ ༥༠ ནང་འོས་བསྡུ་ལྷན་ཚོགས་ལ་ཁྱོན་འཐུས་མི་ ༥༣༨ དང་སྲིད་འཛིན་གྱི་འོས་བསྡུའི་རྒྱལ་ཁ་འཐོབ་པར་འཐུས་མི་ ༢༧༠ ཡི་རྒྱབ་སྐྱོར་འཐོབ་དགོས་ཀྱི་ཡོད་པ་ཞིག་ཡིན་འདུག

ཨ་རིའི་སྲིད་འཛིན་གྱི་འོས་བསྡུས་འཛམ་གླིང་ནང་ཤུགས་རྐྱེན་ཆེན་པོ་སྤྲོད་ཀྱིན་ཡོད་པའི་རྒྱུ་རྐྱེན་ནི། སྲིད་འཛིན་གྱི་འོས་མིའི་ཆབ་དཔལ་རིག་གསུམ་སོགས་ཀྱི་ལྟ་བ་ལངས་ཕྱོགས་ལ་རག་ལས་ཡོད་ཅིང་། འདི་ལོའི་འོས་བསྡུའི་ཁྲོད་བརྗོད་གཞི་བཅུ་གཅིག་ཐོག་འོས་མི་གཉིས་ཀྱི་ལྟ་བ་ལངས་ཕྱོགས་གཞིར་བཟུང་གིས། མི་མང་ནས་འོས་འཕངས་ཡོད་ལ། དེའི་ཁྲོད་ཁྲོམ་རའི་མ་གནས་ཐད། ཀརྨ་ལ་ཧན་རེ་སི་ཡིས། ངལ་རྩོལ་མི་མང་གི་ཟས་རིགས་དང་སྡོད་ཁང་གི་རིན་བབ་མར་བཅག་རྒྱུ་ཡིན་པ་མ་ཟད། ཉིན་རེའི་དམའ་མཐའི་ཐོབ་ཕོག་སྤར་རྩིས་ཡོད། ཨ་རིའི་འབྱོར་ལྡན་བཟོ་ཚོང་ཁང་ཁག་གི་དཔྱ་ཁྲལ་སྤར་རྩིས་ཡོད་ཅིང་། མི་སེར་དཀྱུས་མའི་ཁྱིམ་ཚང་ཁག་ལ་དཔྱད་ཁྲལ་གུ་ཡངས་སུ་གཏོང་རྒྱུའི་ཁས་ལེན་བྱསཡོད།

དེ་བཞིན། ཧན་རེ་སིས་ཁྲིམས་ལུགས་གཏན་འབེབ་ཀྱིས་མངལ་སྤྲུམ་གྱི་ཐོབ་ཐང་ཆ་ཚང་སྤྲོད་རྒྱུ་དང་། མེག་སི་ཁོ་བརྒྱུད་ནས་ཨ་རིར་གནས་སྦོར་བྱེད་བཞིན་པ་དག་གི་ཆེད་དུ་མ་དངུལ་བསྡུ་འགོད་བྱས་ཏེ། ཨ་རིའི་བྱང་ཕྱོགས་ཀྱི་འབྲེལ་ཡོད་ས་གནས་ཁག་ཏུ་ཁྲིམས་འགལ་ཐོག་གནས་སྤོར་བའི་ལས་དོན་སྒྲུབ་མཁན་དག་ལ་གདོང་ལེན་བྱ་རྒྱུ་ཡིན་པ་མ་ཟད། ཕྱི་སྲིད་དང་འབྲེལ་ནས་ཨ་རིས་མུ་མཐུད་ཡོ་ཁུ་རེན་ལ་རྒྱབ་སྐྱོར་བྱ་རྒྱུ་དང་དམིགས་བསལ་དུས་རབས་ཉེར་གཅིག་པའི་ཨ་རྒྱ་གཉིས་ཀྱི་འགྲན་རྩོད་ཁྲོད་རྒྱ་ནག་ལ་རྒྱལ་ཁ་སྤྲོད་རྒྱུ་མིན་པ་གསལ་འདོན་བྱས་ཡོད་ལ། ཚོང་འབྲེལ་གྱི་ཐོག་ནས་རྒྱ་ནག་ནས་ནང་འདྲེན་བྱས་པའི་དངོས་ཟོག་ཐོག་དཔྱ་ཁྲལ་སྤར་རྩིས་ཡོད། ཧན་རེ་སིས་ཁོར་ཡུག་སྲུང་སྐྱོབ་ཀྱི་སྲིད་ཇུས་ལ་རྒྱབ་སྐྱོར་བྱས་ཏེ། གནམ་གཤིས་འགྱུར་ལྡོག་དང་འབྲེལ་བའི་དཀའ་ངལ་རིགས་སེལ་ཐབས་བྱ་རྒྱུ་ཡིན་འདུག

ཌོ་ནལ་ཊོམ་ཕུས། ཨ་རིའི་ནང་ཁྲོམ་རའི་མ་གནས་དང་འབྲེལ་བའི་དཀའ་ངལ་མེད་པར་བཟོ་ཐབས་སུ། སྣུམ་གྱི་ཐོན་ཁུངས་ཇེ་མང་དུ་གཏོང་རྒྱུ་དང་ཡིག་ཆ་མེད་པའི་གནས་སྤོར་བ་དག་ཕྱིར་ཕུད་བཏང་སྟེ་ཨ་རིའི་མི་མང་ཡོངས་ནས་སྡོད་ཁང་དང་དངོས་ཟོག་སོགས་ཉོ་ཚོང་ཐུབ་པར་བཟོ་རྒྱུ་ཁས་ལེན་བྱས་ཡོད། ཚོང་འབྲེལ་དང་འབྲེལ་ནས་ནང་འདྲེན་བྱས་པའི་ཚོང་ཟོག་ཐོག་ཁྲལ་སྤར་ཏེ་ཨ་རིའི་མི་མང་ལ་ཨ་སྒོར་ཁྲི་ཁྲག་མང་པོའི་དཔྱད་ཁྲལ་ཆག་ཡངས་གཏོང་རྒྱུ་དང་།  གནས་སྦོ་སྲིད་ཇུས་ཐད་ཊོམ་ཕུས་མེག་སི་ཁོ་བརྒྱུད་ནས་གནས་སྤོ་བྱེད་མཁན་བཀག་འགོག་གི་ཆེད་དུ་རྩིག་གྱང་རྒྱག་རྒྱུ་མ་ཟད། ཆབ་སྲིད་ཚོགས་པ་སྣ་མང་གི་ཐོག་ནས་ཁྲིམས་ལུགས་གཏན་འབེབ་ཀྱིས་གནས་སྤོར་བ་བཀག་སྡོམ་བྱ་རྒྱུ་དང་ལྷག་པར་དུ་ཨ་རིའི་ལོ་རྒྱུས་ནང་བྱུང་མ་མྱོང་བའི་ཡིག་ཆ་ངེས་གཏན་མེད་པའི་གནས་སྤོར་བ་འབོར་ཆེན་ཕྱིར་ཕུད་གཏོང་རྒྱུ་ཡིན་འདུག

དེ་བཞིན་ཕྱི་སྲིད་དང་འབྲེལ་ནས། ཊོམ་ཕུས་ཨ་རི་འཛམ་གླིང་ཡུལ་ལུང་གང་གི་དམག་འཁྲུག་སོགས་ཀྱི་དཀྱིལ་འཁོར་ནས་ཕྱིར་འཐེན་བྱ་རྒྱུ་དང་། ཁོ་སྲིད་འཛིན་ཆགས་རྗེས་ཀྱི་ཆུ་ཚོད་ ༢༤ ནང་ཚུད་དུ་ཡོ་ཁུ་རེན་དང་ཨུ་རུ་སུའི་བར་གྲོས་མོལ་བརྒྱུད་དམག་འཁྲུག་མཚམས་འཇོག་བྱ་རྒྱུའི་ཁས་ལེན་བྱས་ཡོད། འོན་ཀྱང་། གྷ་རྫའི་དམག་འཁྲུག་ཐོག་ཨི་ཟི་རལ་ལ་རྒྱབ་སྐྱོར་ཡོད་པའི་རྣམ་འགྱུར་བསྟན་པ་ལས། གྷ་རྫའི་དམག་འཁྲུག་སེལ་ཐབས་ཐད་སྐད་ཆ་དམིགས་བསལ་བཤད་མེད་པ་རེད། ཚོང་འབྲེལ་ཐད་ཕྱི་ཕྱོགས་ནས་ནང་འདྲེན་བྱས་པའི་ཚོང་ཟོག་ཚང་མའི་ཐོག་དཔྱ་ཁྲལ་བརྒྱ་ཆ་ ༡༠ ནས་ ༢༠ བར་སྤར་རྩིས་ཡོད། ཚན་རིག་གིས་སྒྲུབ་བཞིན་པའི་གནམ་གཤིས་འགྱུར་ལྡོག་ལ་ཡིད་ཆེས་མེད་ཁར། ཁོས་སྔོན་མ་ཁོར་ཡུག་སྲུང་དང་འབྲེལ་བའི་ཚོགས་པ་ཁག་ ༡༠༠ ལྷག་སྒོ་བརྒྱབ་ཡོད་ལ། ད་རེས་ཀྱང་དེ་བཞིན་བྱ་རྒྱུའི་འཆར་གཞི་ཡོད།

ཊོམ་ཕུས་ཕྱི་ལོ་ ༢༠༢༠ ལོའི་འོས་བསྡུའི་མཇུག་འབྲས་ལ་ངོས་ལེན་བྱས་མེད་ཁར། ཁོས་རང་ཉིད་ཀྱི་རྒྱབ་སྐྱོར་བ་དག་ཕོ་བྲང་དཀར་པོ་གཏོར་བཅོམ་གཏོང་བར་མངགས་ཡོད་ལ། ད་རེས་ཀྱང་རང་ཉིད་ལ་ཕམ་ཁ་བྱུང་ཚེ། འོས་བསྡུའི་གྲུབ་འབྲས་ལ་ངོས་ལེན་བྱ་རྒྱུ་མིན་ཞེས་ཁ་གསལ་བཟོས་ཡོད་པས། ཁོ་ནི་ཨ་རིའི་ལོ་རྒྱུས་ནང་འོས་བསྡུའི་གྲུབ་འབྲས་ཁས་ལེན་མི་བྱེད་པའི་སྲིད་འཛིན་ཁོ་ན་དེ་ཡིན་པ་རེད།

དབྱེ་ཞིབ་པ་མང་པོས། ཊོམ་ཕུས་སྔོན་མ་ནང་ལྟར་ཨ་རི་གཙོ་བཟུང་གིས་སྲིད་ཇུས་ཤིག་བཟུང་ཞིང་། རང་ཉིད་ཀྱི་བཀག་རྡོ་ལྟ་བུར་གྱུར་བའི་ཨ་རིའི་མང་གཙོའི་ལམ་ལུགས་ལ་རྨ་ཁ་བཟོ་ཉེན་ཆེ་བ་མ་ཟད། ཨ་རིའི་སྣེ་ཁྲིད་པའི་འཛམ་གླིང་གི་སྣང་ཚུལ་ལ་འགྱུར་ལྡོག་འགྲོ་སྲིད་སྐོར་སོགས་བརྗོད་འདུག

གསར་འགོད་པ། སྐལ་བཟང་སྦྱིན་པ།