དེ་རིང་༧གོང་ས་རྒྱལ་བ་རིན་པོ་ཆེ་མཆོག་གིས་བཞུགས་སྒར་དྷ་ས་ནས་ཨ་རིའི་སྲིད་འཛིན་གྱི་འོས་བསྡུའི་ཁྲོད་ཌོ་ནལ་ཊོ་ཕུར་རྒྱལ་ཁ་ཐོབ་པར་འཚམས་འདྲིའི་གསུང་འཕྲིན་བསྩལ།
༧མགོན་པོ་གང་ཉིད་མཆོག་གི་གསུང་འཕྲིན་ནང་། ངོས་ནས་ཨ་རི་ནི་མང་གཙོ་དང་རང་དབང་། ཁྲིམས་ཀྱི་དབང་བསྒྱུར་གྱི་མཚོན་དོན་དུ་བརྩི་བཞིན་ཡོད་ལ། འཛམ་གླིང་ཡོངས་ཀྱིས་ཨ་རིའི་མང་གཙོའི་མཐོང་སྣང་དང་དབུ་ཁྲིད་ལ་རེ་བ་ཆེན་པོ་བཅོལ་ཡོད། འཛམ་གླིང་གི་ས་ཕྱོགས་གང་སར་འཁྲུག་ཆ་དོད་པོ་ཆགས་པའི་དུས་སྐབས་འདིར། ཁྱེད་ཀྱིས་ཞི་བདེ་དང་བརྟན་ལྷིང་ལ་དབུ་ཁྲིད་བྱེད་པའི་རེ་བ་ཡོད།
ཨ་རིའི་སྲིད་འཛིན་རིམ་བྱོན་དང་མི་མང་གིས་ངོས་དང་བོད་མི་རྣམས་ནས་འགྲོ་བ་མིའི་རིགས་ཡོངས་ལ་ཕན་བདེ་བསྒྲུབ་པའི་ནང་ཆོས་དང་། འཚེ་མེད་ཞི་བདེ། བྱམས་བརྩེའི་རིག་གཞུང་གི་རིན་ཐང་རྣམས་སྲུང་སྐྱོབ་ཐད་འབད་བརྩོན་བྱེད་བཞིན་པར་རྒྱབ་སྐྱོར་གནང་བར་ང་ཚོར་དགའ་སྤོབས་ཆེན་པོ་ཡོད།
མཇུག་ཏུ་། ངོས་ནས་ཁྱེད་ཀྱིས་ཨ་རིའི་མི་མང་གི་རེ་འདོད་སྐོང་བ་དང་། འཛམ་གླིང་ཞི་བདེའི་དོན་དུ་ལས་དོན་བསྒྲུབ་པར་འཕྲད་པའི་དཀའ་ངལ་མཐའ་དག་ལས་རྣམ་པར་རྒྱལ་ཏེ། ལམ་ལྷོངས་ཡོང་བའི་སྨོན་འདུན་ཞུ་རྒྱུ་ཡིན་ཞེས་གསུངས།
ཕྱི་ལོ་ ༢༠༢༤ ལོའི་ཨ་རིའི་སྲིད་འཛིན་གྱི་རྒྱལ་ཡོངས་འོས་བསྡུའི་ཁྲོད། དམངས་གཙོ་ཚོགས་པའི་འོས་མི་ཀརྨ་ལ་ཧན་རེ་སིར་འོས་གྲངས་ ༢༢༦ དང་། སྤྱི་མཐུན་ཚོགས་པའི་འོས་མི་སྲིད་འཛིན་ཟུར་པ་ཊོམ་ཕུ་ལ་འོས་གྲངས་ ༢༩༥ ཐོབ་སྟེ། ཊོམ་ཕུ་སྐབས་ ༤༧ པའི་ཨ་རིའི་སྲིད་འཛིན་དུ་འོས་འདེམས་བྱུང་བ་ཡོངས་བསྒྲགས་བྱས་ཡོད་ལ། ཕྱི་ལོ་ ༢༠༢༥ ལོའི་ཟླ་ ༡ ཚེས་ ༢༠ ཉིན་སྲིད་འཛིན་གྱི་ལས་འཁུར་དམ་འབུལ་ཞུ་གཏན་ཁེལ་ཡོད།
གསར་འགོད་པ། སྐལ་བཟང་སྦྱིན་པ།
