བོད་ཀྱི་སྲིད་བྱུས་ཉམས་ཞིབ་ཁང་གི་ཉམས་ཞིབ་པ་གཉིས་ཀྱིས་ཉིན་གྲངས་ ༡༢ རིང་འཚོག་བཞིན་པའི་འཛམ་གླིང་མཉམ་འབྲེལ་རྒྱལ་ཚོགས་ཀྱི་ཁོར་ཡུག་ཚོགས་ཆེན་ཐེངས་ ༢༩ པའི་ཐོག་བོད་ཀྱི་ཁོར་ཡུག་གི་ཛ་དྲག་གནས་སྟངས་སྐོར་ཞུ་གཏུག་གནང་བཞིན་འདུག
ཟླ་འདིའི་ཕྱི་ཚེས་ ༡༡ ནས་ ༢༢ བར་ཉིན་གྲངས་ ༡༢ རིང་ཨ་ཛར་བྷའེ་ཇན་ (Azerbaijan) རྒྱལ་ཁབ་ཀྱི་རྒྱལ་ས་བྷ་ཀུ་ (Baku) རུ། འཛམ་གླིང་མཉམ་འབྲེལ་རྒྱལ་ཚོགས་ཀྱི་ཁོར་ཡུག་ཚོགས་ཆེན་ཐེངས་ ༢༩ (COP29) འཚོགས་མུས་ཡིན་པ་ལྟར། བོད་ཀྱི་སྲིད་བྱུས་ཉམས་ཞིབ་ཁང་གི་ཁོར་ཡུག་ཉམས་ཞིབ་པ་བདེ་ཆེན་དཔལ་མོ་ལགས་དང་། ཉམས་ཞིབ་པ་དོན་གྲུབ་དབང་མོ་ལགས་རྣམ་གཉིས་ཀྱིས་བོད་ཀྱི་ཁོར་ཡུག་གི་ཛ་དྲག་གནས་སྟངས་སྐོར་དྲིལ་བསྒྲགས་དང་ཞུ་གཏུག་གནང་བཞིན་འདུག འདི་ལོའི་ཚོགས་ཆེན་དེ་དཔལ་འབྱོར་དང་འབྲེལ་བ་ཞིག་ཆགས་ཀྱི་ཡོད་ཀྱང་། ཚོགས་ཞུགས་པ་རྒྱལ་ཁབ་ཁག་གི་སྐུ་ཚབ་དང་གནད་ཡོད་མི་སྣ་རྣམས་མི་ཁོར་ཡུག་དང་འབྲེལ་བའི་སྐུ་ཚབ་རྐྱང་རྐྱང་ཡིན་སྟབས། བོད་པའི་སྐུ་ཚབ་གཉིས་ཀྱིས་གནད་ཡོད་མི་སྣར་ཐུག་འཕྲད་དང་། དམིགས་བསལ་གྱིས་བོད་དོན་དང་འབྲེལ་བའི་ཟུར་ཚོགས་སྟེང་དུ་མཉམ་ཞུགས་གནང་གི་ཡོད་འདུག
དེ་རིང་ཉམས་ཞིབ་པ་བདེ་ཆེན་དཔལ་མོ་ལགས་ཀྱིས་འདི་གའི་གསར་འགོད་པར། ད་ལོའི་ཞུ་གཏུག་གཙོ་བོ་ནི་རྒྱ་ནག་གཞུང་གིས་སྡེ་དགེ་ཁུལ་དུ་ཆུ་རགས་ཆེན་པོ་གསར་རྒྱག་གི་ལས་གཞི་དེའི་ཁྲོད། ཡུལ་མི་མང་པོ་ཞིག་བཙན་གྱིས་གནས་སྤོ་དགོས་པ་དང་། འབྲི་ཆུའི་རྒྱུད་དུ་ཆགས་པའི་སྡེ་དགེ་རྫོང་ཁོངས་ཀྱི་ཡེ་ན་དགོན་པ་དང་། དབོན་སྟོད་དགོན། མཁའ་མདོ་དགོན་པ། རབ་བསྟན་དགོན་པ། དགོན་སར་དགོན་པ། བཀྲ་ཤིས་དགོན་པ་བཅས་ལོ་རྒྱུས་ཡུན་རིང་ལྡན་པའི་དགོན་སྡེ་ཁག་དྲུག་ཙམ་གཏོར་བཤིག་འགྲོ་མུས་ཡིན་པ་དང་འབྲེལ་ནས་ཞུ་གཏུག་བྱེད་ཀྱི་ཡོད། ཅེས་དང་། སྡེ་དགེའི་ཆུ་རགས་གསར་རྒྱག་གི་ལས་གཞི་ནི་ས་གནས་ཀྱི་གནད་དོན་ཙམ་མིན་པར་ས་ཁུལ་གྱི་ཆུའི་བདེ་འཇགས་དང་། སྐྱེ་དངོས་སྣ་མང་གི་རང་བཞིན་ལ་ཤུགས་རྐྱེན་ཐེབས་མུས་ཡིན་པ་མ་ཟད། བོད་ཀྱི་ཁོར་ཡུག་དང་དེ་ལ་བརྟེན་པའི་མི་མང་གི་འཚོ་བ་ལའང་ཤུགས་རྐྱེན་ཆེན་པོ་ཐེབས་ཀྱི་ཡོད་པར་བརྟེན་རྒྱབ་སྐྱོར་འཚོ་བར་ཡོང་ཡོད་སྐོར་བརྗོད་བྱུང་།
ཡང་ཉམས་ཞིབ་པ་བདེ་ཆེན་དཔལ་མོ་ལགས་ཀྱིས། དོན་ཚན་བཅུའི་ཐོག་ནས་ཞུ་གཏུག་བྱས་ཡོད། དེ་ཡང་རྒྱ་ནག་གཞུང་གིས་བོད་ནང་ཆུ་རགས་མང་པོ་གསར་རྒྱག་བྱེད་མུས་ཡིན་པ་དེ་དག་མཚམས་འཇོག་དགོས་པ་དང་། ཆུ་རགས་གསར་རྒྱག་བྱས་རུང་ཡུལ་མིའི་མོས་མཐུན་ཡོད་དགོས་པ་དང་། ཆུ་རགས་གསར་རྒྱག་མ་བྱས་གོང་ནས་ས་གནས་ཡུལ་མི་ལ་བརྡ་ལན་སྤྲོད་དགོས་པ། ཡུལ་མི་དེ་དག་གིས་མོས་མཐུན་ཡོད་མེད་ལ་དོ་སྣང་ངེས་པར་དུ་བྱ་དགོས་པ། ཁོར་ཡུག་ལ་གནོད་འཚེ་མི་ཡོང་བའི་ཐོག་ནས་ཆུ་རགས་གསར་རྒྱག་བྱ་དགོས་པ་སོགས་རེ་སྐུལ་ཞུས་ཡོད། ཅེས་བརྗོད་བྱུང་།
ཐེངས་འདིའི་ཞུ་གཏུག་སྐབས་བོད་སྡེ་དགེ་རྫོང་ཁོངས་སུ་ཆུ་རགས་གསར་རྒྱག་གི་ལས་གཞིར་མཐའ་གཅིག་ཏུ་ངོ་རྒོལ་ (Say no to the Derge Dam Project in Tibet) ཞེས་པ་དང་། འབྲི་ཆུའི་བཞུར་རྒྱུན་དུ་རྟེན་གཞི་བྱས་པའི་མི་མང་དང་རིག་གཞུང་རྩ་མེད་གཏོང་བཞིན་པར་སྲུང་སྐྱོབ་དགོས་ (Protect the Drichu River Community and Heritage From Destruction) ཞེས་པའི་དེབ་ཆུང་གཉིས་འགྲེམས་སྤེལ་བྱེད་བཞིན་འདུག་ལ། དེབ་ཆུང་དེའི་ནང་དུ་འདི་ལོའི་ཕྱི་ཟླ་ ༢ པའི་རྒྱ་གཞུང་གིས་འབྲི་ཆུར་ཆུ་རགས་གསར་རྒྱག་དང་ཁུལ་དེའི་མི་མང་རྣམས་བཙན་གྱིས་གནས་སྤོར་བྱ་དགོས་པའི་གནས་སྟངས་སྐོར་དང་། སྐམ་ཐོག་ཆུ་རགས་གསར་རྒྱག་གི་ལས་གཞིའི་ཁྲོད་དུ་ཡུལ་མི་ཁྲི་གཅིག་ལྷག་གནས་སྤོ་དགོས་པ། དགོན་པ་མང་པོ་ཞིག་གཏོར་སྐྱོན་འགྲོ་མུས་ཡིན་པ་མ་ཟད། དམིགས་བསལ་གྱིས་དབོན་སྟོད་དགོན་པའི་ནང་དུས་རབས་ ༡༣ དང་ ༡༤ གོང་ནས་ཡོད་པའི་ལྡེབས་རིས་དང་ཐང་ག་སོགས་རྩ་ཆེན་པོ་མང་པོ་ཞིག་ཡོད་ཀྱང་ཆུ་རགས་གསར་རྒྱག་གི་རྐྱེན་གྱིས་དེ་དག་རྩ་མེད་འགྲོ་ཡི་ཡོད་སྐོར་སོགས་འཁོད་འདུག
གསར་འགོད་པ། བསྟན་འཛིན་ཕུར་བུ།
རྩོམ་སྒྲིག་པ། པདྨ་མཚོ།
