རྒྱ་ནག་གཞུང་གིས་ཨེ་ཤ་ཡ་དང་ཡུ་རོབ་ཀྱི་རྒྱལ་ཁབ་ ༣༨ ཀྱི་མི་སེར་ལ་ཐོངས་མཆན་རིན་མེད་སྤྲད་དེ་ཉིན་གྲངས་ ༣༠ རིང་རྒྱ་ནག་ནང་ཡུལ་སྐོར་དུ་འགྲོ་ཆོག་པ་བཟོས་འདུག
The Potala Palace in Lhasa, Tibet. Photo:https://www.bordersofadventure.com/
ཏོག་དབྱིབས་རིམས་ནད་བྱུང་རྗེས་རྒྱ་ནག་གི་དཔལ་འབྱོར་ལ་ཉམས་ཉེས་ཤུགས་ཆེན་ཕྱིན་ཡོད་པར་བརྟེན། རྒྱ་ནག་གཞུང་གིས་འདས་པའི་མི་ལོ་གཅིག་ཙམ་གྱི་གོང་ནས་བཟུང་རྒྱ་ནག་དང་ཕྱིའི་རྒྱལ་ཁབ་བར་གྱི་འབྲེལ་ལམ་ཡར་སྐྱེད་བརྗེ་ལེན་ཟེར་བའི་སྲིད་ཇུས་འོག ཨེ་ཤ་ཡ་དང་། ཡུ་རོབ་རྒྱལ་ཁབ་བཅུ་གཉིས་ཀྱི་མི་སེར་རྣམས་ལ་རིན་མེད་ཐོངས་མཆན་སྤྲད་དེ་རྒྱ་ནག་ཏུ་ཉིན་གྲངས ༡༥ རིང་ཡུལ་སྐོར་དུ་འགྲོ་ཆོག་པ་བཟོས་ཡོད་པ་རེད། ཉེ་སྔོན་ཡང་རྒྱ་ནག་གཞུང་གིས་ཉི་ཧོང་དང་། ཁོ་རི་ཤི་ཡ། (Croatia) རོ་མན་ནི་ཡ་ (Romania) ཨི་སི་ཊོ་ནི་ཡ་(Estonia) གཙོས་བྱས་པའི་རྒྱལ་ཁབ་དགུ་ཡི་མི་སེར་རྣམས་ལའང་ཐོངས་མཆན་རིན་མེད་སྤྲད་དེ། ཕྱི་ལོ ༢༠༢༥ ལོའི་ལོ་མཇུག་བར་འཛམ་གླིང་ཤར་ནུབ་ཀུན་གྱི་རྒྱལ་ཁབ་ ༣༨ ཀྱི་མི་སེར་རྣམས་ཐོངས་མཆན་རིན་མེད་ཐོག་ཟླ་ངོ་གཅིག་རིང་ཡུལ་སྐོར་ལ་སྐྱོད་ཆོག་ལུགས་བསྒྲགས་འདུག
དེའི་ཐད་རྒྱ་ནག་ཕྱི་སྲིད་བློན་ཆེན་ལས་ཁུངས་ཀྱི་མགྲིན་ཚབ་པ་ལིང་ཇན་( Lin Jian) ཟེར་བས་རྒྱུན་ལྡན་གྱི་གསར་འགོད་གསལ་བསྒྲགས་ཤིག་གི་ཐོག རྒྱ་ནག་གིས་རྒྱལ་ཁབ་ ༣༨ ཀྱི་མི་སེར་རྣམས་ཚོང་དོན་དང་། ཡུལ་སྐོར། ནང་མིའི་སྤྲོ་འཆམ་སོགས་ཀྱི་ངོ་བོའི་ཐོག་ནས་རིན་མེད་ཐོག་རྒྱ་ནག་ནང་ཡུལ་སྐོར་དུ་ཡོང་ཆོག་པའི་ཐོངས་མཆན་སྤྲད་ཡོད་ལ། ཕྱི་མིའི་ཐོངས་མཆན་རིན་མེད་ཀྱི་སྲིད་ཇུས་ལ་འགྱུར་བ་བཏང་སྟེ། ཕྱི་མི་ཡུལ་སྐོར་བ་ཚོ་རྒྱ་ནག་ཏུ་ཉིན་གྲངས་བཅོ་ལྔ་ནས་ཟླ་བ་གཅིག་རིང་ཡོང་ཆོག་པའི་སྲིད་ཇུས་ཤིག་གཏན་འབེབས་བྱས་ཡོད། ཅེས་བརྗོད་འདུག
ཕྱི་ལོ ༢༠༢༣ ལོར་རྒྱ་ནག་གི་དཔལ་འབྱོར་འཕེལ་རྒྱས་འགྲོ་ཚད་ཀྱི་བརྒྱ་ཆ ༥།༤ ལ་བསླེབས་ཏེ། ཐོན་སྐྱེད་ཞན་པ་དང་མི་འབོར་རྒས་བཞིན་པའི་གནས་སྟངས་འོག་ཕྱི་ལོ ༢༠༢༨ ལོར་བརྒྱ་ཆ་ ༣།༥ ལ་བསླེབ་རྒྱུ་ཡིན་པའི་ཚོད་དཔག་བྱས་ཡོད་ལ། ལྷག་པར་ཕྱོགས་ཡོངས་ནས་རྒྱ་ནག་གི་དཔལ་འབྱོར་ལ་ཉམས་ཉེས་ཆེན་པོ་ཕྱིན་རྐྱེན། ཕྱི་ལོ་ ༢༠༢༣ ལོ་མཇུག་ཙམ་ནས་རྒྱ་ནག་གིས་ཡུ་རོབ་དང་ཨེ་ཤ་ཡ་ཁུལ་གྱི་རྒྱལ་ཁབ་དག་ཐོངས་མཆན་རིན་མེད་ཐོག་རྒྱ་ནག་ཏུ་ཤར་གཏོང་བྱེད་མགོ་བཙུགས་ཡོད་ཅིང་། ཨ་རིར་རྟེན་གཞི་བྱས་པའི་ཧྥོག་སི་(FOX40 ) གསར་ཁང་གིས་གནས་ཚུལ་སྤེལ་བའི་ནང་། འདི་ལོའི་ལོ་མགོའི་ཟླ་གསུམ་གཅིག་པུའི་ནང་བོད་ཀྱི་རྒྱལ་ས་ལྷ་སའི་ཁུལ་དུ་ཉུང་མཐར་ཕྱི་རྒྱལ་ཡུལ་སྐོར་བ་མི་གྲངས་ ༡༦༦༡༠ ལྷག་འབྱོར་སྐོར་གསལ་འདུག
འདི་ལོའི་ཕྱི་ཟླ་ ༦ པའི་ནང་རྒྱ་ནག་གོ་ལའི་དུས་བབ་ཀྱིས་དེ་འབྲེལ་གནས་ཚུལ་ཞིག་སྤེལ་བའི་ནང་། ཕྱི་ལོ་ ༢༠༢༤ ལོར་རྒྱ་ནག་གཞུང་གིས་ཐོངས་མཆན་རིན་མེད་ཀྱི་སྲིད་ཇུས་ལག་བསྟར་བྱས་པའི་ཟླ་བ་གསུམ་ཙམ་གྱི་ནང་། ཕྱི་མི་ས་ཡ་ ༡༤།༦༤ གྱིས་རིན་མེད་ཐོངས་མཆན་ཞུས་ཡོད་པས། ཕྱི་ལོ་ ༢༠༢༣ དང་བསྡུར་ན་རྒྱ་ནག་ཏུ་ཡོང་མཁན་ཡུལ་སྐོར་བའི་བརྒྱ་ཆ་ ༢༦༦།༡ ལ་འཕར་ཡོད་འདུག་ལ། ཟླ་འདིའི་ཟླ་དཀྱིལ་ཙམ་ལ་རྒྱ་ནག་གི་གནས་སྤོར་དང་ལས་ཁུངས་(National Immigration Administration) ཀྱིས། འདས་པའི་ཟླ་ངོ་གསུམ་ལྷག་གི་རིང་རྒྱ་ནག་ནང་ཡུལ་སྐོར་བ་བརྒྱ་ཆ་༤༨།༨ དེ་མི་གྲངས་ས་ཡ་ ༨།༡༩ ཐོངས་མཆན་རིན་མེད་ཐོག་རྒྱ་ནག་ནང་ཡུལ་སྐོར་དུ་ཡོང་ཡོད་ཅིང་། ད་ལྟའང་མུ་མཐུད་དུ་འཛམ་གླིང་ས་ཕྱོགས་གང་ས་ནས་ཡུལ་སྐོར་བ་མང་པོ་ཞིག་གིས་ཐོ་འགོད་བྱེད་མུས་ཡིན་ལུགས་བསྒྲགས་འདུག་ལ། འདི་ལོའི་རྒྱ་ནག་གི་ཡུལ་སྐོར་བ་ཆེས་མང་བའི་ས་ཚིགས་ལྔ་ནི་རྒྱ་ནག་གི་ལྕགས་རི་རིང་མོ་དང་། པེ་ཅིན། ཞི་ཨན། ཁྲིན་ཏུའུ་སོགས་ཡིན་འདུག
ཕྱི་ལོ་ ༢༠༢༣ ལོའི་ལོ་མཇུག་ཏུ་རྒྱ་ནག་གཞུང་གིས་ཐོག་མར་ཧྥ་རན་སི་དང་། འཇར་མི་ནི། ཨི་ཊི་ལི། ནེ་ཐ་ལེན་ཌི། སི་པེན། མེ་ལེ་ཤི་ཡ་སོགས་རྒྱལ་ཁབ་དྲུག་གི་མི་སེར་རྣམས་ཐོངས་མཆན་རིན་མེད་ཐོག་རྒྱ་ནག་ཏུ་ཡོང་ཆོག་པའི་གསལ་བསྒྲགས་བྱས་ཡོད་པ་དང་། ཕྱི་ལོ་ ༢༠༢༥ ལོའི་ཕྱི་ཟླ་ ༡༢ ཚེས་ ༣༡ བར་འཛམ་གླིང་རྒྱལ་ཁབ་ ༣༨ ཀྱི་མི་སེར་རྣམས་ཟླ་ངོ་གཅིག་རིང་ཐོངས་མཆན་རིན་མེད་ཐོག་རྒྱ་ནག་ཏུ་འགྲོ་ཆོག་གི་ཡོད་འདུག་ལ། ཡུ་རོབ་རྒྱལ་ཁབ་ཁག་གི་ན་གཞོན་མང་པོ་ཞིག་རྒྱ་ནག་གི་གྲོང་ཁྱེར་ཆེ་ཁག་ཏུ་ཡུལ་སྐོར་ལ་འགྲོ་ཡི་ཡོད་འདུག
གསར་འགོད་པ། དཔལ་ལྡན།
རྩོམ་སྒྲིག་བྱེད་མཁན། པདྨ་མཚོ།
![Because of high altitudes in the Himalayas, difficult terrain and often poor weather, the Kailash Manasarovar pilgrimage if one of the most challenging in the world [File: Purnima Shrestha/Reuters]](https://tibettimes.net/wp-content/uploads/2026/05/Screen-Shot-2026-05-14-at-5.25.22-PM-360x180.png)
