སྟོབས་ཆེན་རྒྱལ་ཁབ་བདུན་གྱི་ཕྱི་སྲིད་བློན་ཆེན་དག་གིས་བོད་དོན་གླེང་སློང་བྱས། 

འཛམ་གླིང་གི་སྟོབས་ཆེན་རྒྱལ་ཁབ་བདུན་གྱི་ཕྱི་སྲིད་བློན་ཆེན་རྣམས་ཀྱི་ཚང་འཛོམས་ཐོག་བོད་དང་ཤར་ཊུ་ཀི་སི་ཐན་སོགས་ཀྱི་འགྲོ་བ་མིའི་ཐོབ་ཐང་གི་གནས་བབ་ཐད་ལ་གླེང་སློང་བྱས་འདུག

ཟླ་འདིའི་ཕྱི་ཚེས་ ༢༥ དང་ ༢༦ བར་ཉིན་གྲངས་གཉིས་རིང་ཡུ་རོབ་ཀྱི་ལྷོ་རྒྱུད་ཨི་ཊ་ལི་རྒྱལ་ཁབ་ཏུ་འཛམ་གླིང་སྟོབས་ཆེན་རྒྱལ་ཁབ་བདུན་ (G7) གྱི་ཕྱི་སྲིད་བློན་ཆེན་རྣམས་ཚང་འཛོམས་ཀྱི་ཚོགས་འདུ་ཞིག་འདུ་སྐོང་བྱས་ཡོད་པ་ལྟར། ཁ་སང་ཕྱི་ཚེས་ ༢༦ ཉིན་གྱི་དགོང་མོར་ཨ་རིའི་རྒྱལ་སྲིད་ལས་ཁུངས་ཀྱིས་ཤོག་གྲངས་ ༡༥ ཅན་གྱི་སྟོབས་ཆེན་བློན་ཆེན་བདུན་གྱི་མཉམ་འབྲེལ་བསྒྲགས་གཏམ་ཞིག་སྤེལ་ཡོད་པའི་ཁྲོད། བོད་དང་། ཤར་ཊུ་ཀི་སི་ཐན་ཚུད་པའི་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་བབ་ཐད་ལ་སེམས་འཚབ་ཆེན་པོས་གླེང་སློང་གནང་ཡོད་སྐོར་གསལ་འདུག

སྟོབས་ཆེན་རྒྱལ་ཁབ་བདུན་གྱི་ཕྱི་སྲིད་བློན་ཆེན་རྣམས་ཀྱི་མཉམ་འབྲེལ་བསྒྲགས་གཏམ་ཁྲོད། ང་ཚོས་བོད་དང་། ཤར་ཊུ་ཀི་སི་ཐན་ཚུད་པའི་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་བབ་ཐད་ལ་སེམས་འཚབ་དང་། ཧོང་ཀོང་གི་འགྲོ་བ་མིའི་ཐོབ་ཐང་དང་གཞི་རྩའི་འགྲོ་བ་མིའི་ཐོབ་ཐང་གི་གནས་བབ་ཇེ་སྡུག་ཏུ་འགྲོ་མུས་ཡིན་པར་སེམས་ངལ་ཆེན་པོས་གླེང་སློང་བྱས་ཡོད། ང་ཚོས་རྒྱ་ནག་གཞུང་གིས་སྟོབས་ཆེན་རྒྱལ་ཁབ་བདུན་ཚུད་པའི་ཁྱིམ་མཚེས་རྒྱལ་ཁབ་ཁག་གི་མཐའ་སྲུང་དང་བདེ་འཇགས་ལ་གནོད་འཚེ་མི་གཏང་རྒྱུར་རེ་སྐུལ་ཞུ་ཡི་ཡོད། ཅེས་གསལ་འདུག

ཡང་བསྒྲགས་གཏམ་ནང་། རྒྱལ་ཁབ་ཀྱི་བདེ་འཇགས་ལ་གནོད་འཚེ་བཏང་བའི་ཉེས་མིང་གཡོགས་ཏེ། ཧོང་ཀོང་གི་དམངས་གཙོ་དོན་གཉེར་བ་ ༤༥ ལ་ཁྲིམས་འགལ་བཙོན་འཇུག་ཁྲིམས་ཐག་བཅད་དེ་འགྲོ་བ་མིའི་ཐོབ་ཐང་གི་གནས་བབ་ལ་རྩིས་མེད་རྡོག་རོལ་བཏང་བར་བློ་ཕམ་ཆེན་པོ་ཡོད་པའི་སྐོར་དང་། ཨེ་ཤ་ཡའི་ལྷོ་རྒྱུད་རྒྱལ་ཁབ་མཐུན་ཚོགས་(ASEAN) ཁག་གི་མཉམ་འབྲེལ་ཁྲིམས་སྒྲིག་ལ་ངོས་ལེན་དང་རྒྱབ་སྐྱོར་ཚད་ལྡན་གྱི་ཐོག་ནས། ཨེ་ཤ་ཡའི་མཚོ་གླིང་རྒྱལ་ཁབ་ཁག་དང་། ལྷག་པར་རྒྱ་གར་ཞི་བདེ་རྒྱ་མཚོ་ཁུལ་དུ་བརྟན་བརླིང་ཡོང་རྒྱུ། དེ་བཞིན་སྟོབས་ཆེན་རྒྱལ་ཁབ་བདུན་གྱིས་ཨ་ཧྥི་རི་ཁའི་རྒྱལ་ཁབ་དག་ལ་ཐུན་མོང་གི་རྒྱབ་སྐྱོར་དང་རོགས་འདེགས་བྱ་རྒྱུར་མོས་མཐུན་ཡོད་པའི་ཁར། བརྟན་བརླིང་དང་ཞི་བདེ་ལྡན་པའི་ངང་ནས་ཨ་ཧྥི་རི་ཁ་གླིང་ཆེན་འཕེལ་རྒྱས་གཏོང་བར་རོགས་འདེགས་བྱ་རྒྱུ་ཡིན་སྐོར་སོགས་གསལ་འདུག

དེ་བཞིན་ད་ལན་ཉིན་གྲངས་གཉིས་རིང་འདུས་པའི་སྟོབས་ཆེན་རྒྱལ་ཁབ་བདུན་གྱི་ཕྱི་སྲིད་བློན་ཆེན་གྱི་ཚང་འཛོམས་སྟེང་། ད་ལྟ་དཀྱིལ་ཤར་ཨེ་ཤ་ཡར་འབྱུང་མུས་ཡིན་པའི་དམག་འཁྲུག་དང་། ཨུ་རུ་སུས་ཡུ་ཁེ་རིན་ལ་བཙན་འཛུལ་དང་བྱང་ཀོ་རི་ཡས་ཨུ་རུ་སུར་མངགས་པའི་རོགས་དམག་གི་གནད་དོན། སྟོབས་ཆེན་རྒྱལ་ཁབ་བདུན་གྱི་མཉམ་འབྲེལ་ལས་དོན། རྒྱ་གར་ཞི་བདེ་རྒྱ་མཚོའི་བརྟན་བརླིང་། རྒྱ་ནག་གིས་ལྷོ་ཨེ་ཤ་ཡའི་མཚོ་གླིང་རྒྱལ་ཁབ་ཁག་ཏུ་དབང་ཤུགས་སྐྱེད་ཐབས་བྱེད་མུས་ཡིན་པའི་གནད་དོན། སྐྱབས་བཅོལ་གནས་སྤོར་དང་འཚོ་ཐབས་སོགས་ཀྱི་ཐད་ལ་གླེང་སློང་བྱས་འདུག

འདི་ལོའི་ཕྱི་ཟླ་ ༩ ནང་རྒྱ་ནག་གི་རྒྱལ་ས་པེ་ཅིན་དུ་ཕྱི་ལོ་ ༢༠༢༤ ལོའི་རྒྱ་ནག་དང་ཨ་ཧྥི་རི་ཁའི་མཉམ་ལས་གླེང་སྟེགས་ (Forum on China–Africa Cooperation) ཀྱི་ཚོགས་ཆེན་དེའི་ཐོག་ཨ་ཧྥི་རི་ཁའི་རྒྱལ་ཁབ་ལྔ་བཅུ་ལྷག་གི་མགོ་ཁྲིད་མཉམ་ཞུགས་ཀྱིས། ཕྱོགས་གཉིས་མཉམ་ལས་ཀྱི་སྟོབས་ཤུགས་ལས་གླིང་ཆེན་ཨ་ཧྥི་རི་ཁའི་རྒྱལ་ཁབ་ཁག་འཕེལ་རྒྱས་སུ་གཏང་རྒྱུའི་གླེང་སློང་ཤུགས་ཆེན་བྱས་ཏེ། རྒྱ་ནག་གིས་འབྱུང་འགྱུར་མི་ལོ་གསུམ་ནང་རྒྱ་སྒོར་ཐེར་འབུམ་ ༣༦༠ (ཨ་སྒོར་ཐེར་འབུམ་ ༥༠།༧༢) ལྷག་བཏང་ནས་རོགས་རམ་བྱ་རྒྱུ་ཡིན་པའི་ཁྲོད། རྒྱ་སྒོར་ཐེར་འབུམ་ ༧༠ ལྷག་ཡུལ་དེར་རྒྱ་ནག་གི་བཟོ་ཚོང་ཁང་འཛུགས་སྐྲུན་དང་དམག་དོན་གྱི་ལས་གཞིའི་ཆེད་རོགས་རམ་བྱས་ཡོད་པས། རྒྱ་ནག་ནང་དཔལ་འབྱོར་ཉམས་ཉེས་འགྲོ་མུས་ཡིན་པའི་སྐབས་དེར། གླིང་ཆེན་ཨ་ཧྥི་རི་ཁར་མ་འཇོག་ཆེན་པོ་བྱས་ཏེ་རྒྱ་ནག་གི་དཔལ་འབྱོར་ཉམས་ཉེས་ཀྱི་དཀའ་ཁག་སེལ་ཐབས་དང་། ལྷག་པར་རྒྱུད་གཅིག་ལམ་གཅིག་གི་སྲིད་ཇུས་སྤེལ་གང་ཐུབ་བྱེད་མུས་ཡིན་པས། འཛམ་གླིང་སྟོབས་ཆེན་རྒྱལ་ཁབ་བདུན་གྱིས་ཀྱང་ཨ་ཧྥི་རི་ཁར་རྒྱ་ནག་གི་དབང་ཤུགས་སྐྱེད་པར་འགོག་རྒོལ་གང་ཐུབ་དང་། མཉམ་འབྲེལ་གྱི་ཐོག་ནས་ཨ་ཧྥི་རི་ཁའི་རྒྱལ་ཁབ་ཁག་ལ་རོགས་འདེགས་བྱ་རྒྱུའི་མོས་མཐུན་བྱུང་འདུག

ད་ལྟ་འཛམ་གླིང་གི་སྟོབས་ཆེན་རྒྱལ་ཁབ་བདུན་(G7) གྱི་ཚོགས་མིའི་ཁོངས་སུ་ཁེ་ན་ཌ་དང་། ཧྥ་རན་སི། འཇར་མི་ནི། ཨི་ཊ་ལི། ཉི་ཧོང་། དབྱིན་ཡུལ། ཡུ་རོབ་མཐུན་ཚོགས་བཅས་ཡོད་ཅིང་། ལྷན་ཚོགས་དེའི་དགོས་དམིགས་གཙོ་བོ་ནི། རྒྱལ་ཁབ་ཕན་ཚུན་བར་གྱི་མཉམ་འབྲེལ་གྱི་ཚོང་འབྲེལ་ལས་དོན་གོང་མཐོར་དང་། ཁྲིམས་མཐུན་གྱི་དཔྱ་ཁྲལ་ཆག་ཡང་། བཅོས་མའི་རིག་ནུས་ཀྱི་ནུས་པ་མཐོར་འདེགས། གནས་སྤོར་དང་ཡུལ་སྐོར་གྱི་གནས་བབ་ཇེ་ལེགས་སུ་གཏོང་ཐབས། དེ་བཞིན་འཛམ་གླིང་གི་གནམ་གཤིས་འགྱུར་ལྡོག་དང་དུག་རླངས་གཙང་སེལ་གྱི་མཉམ་ལས་གོང་སྤེལ་གཏོང་ཐབས་བཅས་ཡིན་འདུག

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། སྐལ་བཟང་སྦྱིན་པ།