མཱ་ལེ་ཤི་ཡར་ཆུ་ལོག་གིས་གནོད་འཚེ་ཐེབས་ཀྱི་འདུག

ལྷོ་ཨེ་ཤ་ཡའི་རྒྱལ་ཁབ་མཱ་ལེ་ཤི་ཡའི་ཤར་ནུབ་ཁུལ་དུ་ཆུ་ལོག་གི་གནོད་འཚེ་ཐེབས་ཏེ་ད་བར་མི་གྲངས་ཁྲི་བརྒྱད་ལྷག་གི་འཚོ་གནས་ལ་གནོད་སྐྱོན་དང་ཉུང་མཐར་མི་གྲངས་གསུམ་རྐྱེན་འདས་སུ་གྱུར་ཡོད་འདུག

ལོ་ལྟར་ཕྱི་ཟླ་ ༡༠ ནས་ ༣ པ་བར་ལྷོ་ཤར་ཨེ་ཤ་ཡའི་རྒྱལ་ཁབ་མཱ་ལེ་ཤི་ཡ་ (Malaysia) ནང་ཆར་ཞོད་དང་ཆུ་ལོག་གི་གནོད་སྐྱོན་ཡང་ཡང་འབྱུང་གི་ཡོད་པ་ལྟར། འདས་པའི་ཉིན་ཤས་རིང་ལྷོ་ཤར་ཨེ་ཤ་ཡའི་མཚོ་གླིང་རྒྱལ་ཁབ་དེའི་ཀི་ལན་ཊན་(Kelantan) མངའ་སྡེ་དང་། ཌི་རང་གྷ་ནུ་(Terengganu) ཀི་དྷ་(Kedah) པིར་ལི་སི་(Perlis) ཇོ་ཧོར་(Johor) པི་རག་ (Perak) མངའ་སྡེ་ཚུད་པའི་ས་ཁུལ་མང་པོ་ཞིག་ཏུ་ཆུ་ལོག་གི་གནོད་འཚེ་ཐེབས་ཏེ། ད་བར་དུད་ཚང་ ༩༢༢༣ ལྷག་དང་ཉུང་མཐར་མི་གྲངས་ཁྲི་བརྒྱད་ལྷག་གི་འཚོ་གནས་ལ་དོ་ཕོག་འགྲོ་མུས་ཡིན་འདུག

དེའི་ཐད་ཁ་སང་ཕྱི་ཚེས་༢༨ ཉིན་མཱ་ལེ་ཤི་ཡའི་སྲིད་བློན་ཨན་ཝར་(Anwar Ibrahim) ལགས་ཀྱིས། ང་ཚོས་རྒྱལ་ཁབ་ཀྱི་རང་བྱུང་གོད་ཆག་དོ་དམ་ལྷན་ཚོགས་(National Disaster Management Committee) ལ་ཚད་མཐོའི་འབྲེལ་ལམ་བཟུང་ནས་ཐད་ཀར་གཞུང་ཁོངས་མིན་པའི་ཚོགས་སྡེ་ཁག་ལ་མཉམ་འབྲེལ་བྱས་ཏེ། ཆར་དུས་རིང་ཆུ་ལོག་གནོད་འཚེ་འགོག་སྲུང་དང་ཡུལ་མི་རྣམས་ལ་རོགས་འདེགས་བྱ་རྒྱུའི་ཚད་མཐོའི་རེ་སྐུལ་ཞུས་ཡོད། ཅེས་བརྗོད་འདུག

དེ་བཞིན་ཡུལ་དེའི་སྲིད་བློན་གཞོན་པ་དང་རྒྱལ་ཁབ་ཀྱི་རང་བྱུང་ཁོར་ཡུག་གི་གོད་ཆག་དོ་དམ་ཚན་པའི་ཚོགས་གཙོ་(National Disaster Management Committee chairman) སྐུ་ཞབས་ཨེ་མཱ་ཌི་ཛ་ཧིད་(Ahmad Zahid Hamidi) ལགས་ཀྱིས། ད་ལྟའི་གནས་བབ་ལ་གཞིགས་པའི་ཚོགས་སྡེ་ཁག་ཚང་མས་མཉམ་རུབ་ཐོག་ཆུ་ལོག་གིས་གནོད་འཚེ་ཐེབས་པའི་ཡུལ་མི་ཚོའི་བདེ་འཇགས་སྲུང་སྐྱོབ་ཐད་ལ་རོགས་རམ་བྱེད་དགོས། ད་ལན་གྱི་ཆུ་ལོག་དེ་ནི་ཕྱི་ལོ་ ༢༠༡༤ ལོའི་ཆུ་ལོག་ལས་ཉེན་ཚབས་ཆེ་བ་ཡོང་ཉེན་འདུག་ཅེས་ཚང་མས་དོགས་གཟོན་ནན་པོ་དགོས་སྐུལ་བརྗོད་འདུག་པ་མ་ཟད། ཟླ་འདིའི་ཕྱི་ཚེས་ ༢༧ ཉིན་ཡུལ་དེའི་གནམ་གཤིས་བརྟག་དཔྱད་ཚན་པས། འདི་ལོའི་ཕྱི་ཟླ་ ༡༢ ཚེས་ ༡ བར་རྒྱལ་ཁབ་དེའི་ནུབ་རྒྱུད་ཁུལ་དུ་ཆར་པ་ཤུགས་ཆེན་བབ་ཉེན་ཡོད་པའི་ཉེན་བརྡ་བཏང་འདུག

ལོ་ལྟར་ཆར་དུས་སྐབས་མཱ་ལེ་ཤི་ཡ་རྒྱལ་ཁབ་ཏུ་ཆུ་ལོག་གི་གནོད་འཚེ་ཡང་ཡང་ཐེབས་ཀྱི་ཡོད་ཅིང་།  ཕྱི་ལོ་ ༢༠༡༤ ལོར་ཡུལ་དེར་ཆུ་ལོག་ཆེ་ཤོས་བྱུང་སྟེ་ཉུང་མཐར་མི་གྲངས་འབུམ་ལྔ་ལྷག་གི་འཚོ་གནས་ལ་གནོད་སྐྱོན་ཐེབས་ཡོད་པ་དང་། མི་གྲངས་ ༢༡ གི་ཚེ་སྲོག་ཤོར་ཡོད་འདུག

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།