ཏཱ་ལའི་བླ་མ་མཐོ་སློབ་ཏུ་བོད་ཀྱི་བདུན་ཕྲག་ཅེས་པ་ཞིག་སྲུང་གཙི་གནང་གི་འདུག  

ཏཱ་ལའི་བླ་མ་མཐོ་རིམ་སློབ་གཉེར་ཁང་གིས་ཉམས་ཞིབ་ལྟེ་གནས་ཁང་ཞིག་སྒོ་འབྱེད་བྱས་ཏེ་སེའེ་ཊབ་ཀེ་སར་ལོ་འཁོར་བོད་རིག་པའི་ཚོགས་འདུ་འཚོག་བཞིན་འདུག

རྒྱ་གར་ལྷོ་ཕྱོགས་ཀྱི་སྦེང་ལོར་གྲོང་ཁྱེར་དུ་རྟེན་གཞི་བྱས་པའི་ཏཱ་ལའི་བླ་མ་མཐོ་རིམ་སློབ་གཉེར་ཁང་གིས། དེ་རིང་ཕྱི་ཚེས་ ༢ ནས་ ༧ བར་ཉིན་གྲངས་དྲུག་རིང་བོད་ཀྱི་བདུན་ཕྲག་ཅེས་པའི་བོད་ཀྱི་རིག་གཞུང་སྲུང་སྐྱོབ་དང་དར་སྤེལ་ཆེད་དུ་དམིགས་པའི་ལས་གཞི་ཞིག་སྤེལ་བཞིན་འདུག  དེ་རིང་དང་སང་ཉིན་གཉིས་ལ་མཐོ་སློབ་ཀྱི་ཆེད་སྦྱོང་སྡེ་ཚན་གྱི་གོ་སྒྲིག་འོག སེའེ་ཊབ་ཀེ་སར་ལོ་འཁོར་བོད་རིག་པའི་ཚོགས་འདུ་ཞིག་འཚོག་མུས་ཡིན་ཞིང་། ཚོགས་འདུའི་ཐོག་ལྷོ་སྤྱི་འཇིགས་མེད་ཚུལ་ཁྲིམས་ལགས་དང་སྦེང་ལོར་གཙུག་ལག་སློབ་གཉེར་ཁང་གི་དམིགས་བསལ་འབྲེལ་མཐུད་པ་སློབ་དཔོན་ཀ་རི་གྷར་ཀེ་ར་ཨེ(C.S Karigar)། བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་གཞོན་པ་ཛམ་ལྷ་བསྟན་པ་རྒྱལ་མཚན་ལགས། དེ་བཞིན་བོད་ཀྱི་མཐོ་སློབ་ཁག་གི་སློབ་དཔོན་དང་འབུམ་རམས་པ། ཉམས་ཞིབ་པ་སོགས་ཚོགས་ཞུགས་པ་ ༩༠ ལྷག་འཛོམས་འདུག  

དབུ་འབྱེད་མཛད་སྒོའི་ཐོག་ཏཱ་ལའི་བླ་མ་མཐོ་རིམ་སློབ་གཉེར་ཁང་གི་སློབ་སྤྱི་འབུམ་རམས་པ་བསྟན་འཛིན་པ་སངས་ལགས་ཀྱིས། དེ་རིང་གི་མཛད་སྒོ་འདི་ནི་བོད་ཀྱི་བདུན་ཕྲག་དང་སེའེ་ཊབ་ཀེ་སར་ལོ་འཁོར་བོད་རིག་པའི་ཚོགས་འདུ་གཉིས་ཀྱི་དབུ་འབྱེད་ཀྱི་མཛད་སྒོ་ཞིག་ཆགས་ཡོད། དེ་བཞིན་ངེད་ཏཱ་ལའི་བླ་མ་མཐོ་རིམ་སློབ་གཉེར་ཁང་དུ་འབུམ་རམས་པའི་ལས་གཞི་མགོ་བཙུགས་ནས་ལོ་ལྔ་ཙམ་འགྲོ་མུས་ཡིན་ལ། ན་ནིང་ལོར་འབུམ་རམས་པའི་སློབ་མ་ཐོག་མ་དེའང་ཐོན་ཡོད་པས།  ང་ཚོས་སྦེང་ལོར་གཙུག་ལག་སློབ་གཉེར་ཁང་དང་ཟུང་འབྲེལ་གྱིས་ཉམས་ཞིབ་ཀྱི་སློབ་སྦྱོང་ཞིག་འབུལ་མུས་ཡིན་སྟབས། ཉམས་ཞིབ་ཀྱི་ལྟེ་གནས་ཁང་ཞིག་ཀྱང་དབུ་འབྱེད་བྱེད་པའི་ཉིན་མོ་ཆགས་ཀྱི་ཡོད། ཉམས་ཞིབ་ལྟེ་གནས་ཁང་དེའང་སྔོན་མ་འབུམ་རམས་པའི་ལས་གཞི་མགོ་འཛུགས་སྐབས། ཨ་མ་རྗེ་བཙུན་པདྨ་ལགས་ཀྱི་དགོངས་གཞི་བཞིན་ཉམས་ཞིབ་པའི་ལྟེ་གནས་ཁང་ཞིག་ལོགས་སུ་བཙུགས་པ་ཞིག་ཆགས་ཀྱི་ཡོད། ལྟེ་གནས་ཁང་དེར་བོད་ཀྱི་ཉམས་ཞིབ་པ་གང་མང་བསྡུས་ཐབས་ཀྱིས་དེང་རབས་ཀྱི་ཉམས་ཞིབ་ཀྱི་ཐབས་ལམ་སོགས་བརྒྱུད་ནས་ཉམས་ཞིབ་པའི་ལྟེ་གནས་ཤིག་ཏུ་བསྒྱུར་རྒྱུའི་རེ་བ་བཅང་གི་ཡོད། ཅེས་དང་། ད་ལན་བོད་ཀྱི་བདུན་ཕྲག་གི་ལས་གཞིའི་ཁོངས་སེའེ་ཊབ་ཀེ་སར་ལོ་འཁོར་བོད་རིག་པའི་ཚོགས་འདུ་དེ་ཐོག་མ་ཆགས་ཡོད་ཅིང་། དེ་ནི་བོད་ཀྱི་སྐད་ཡིག་དར་སྤེལ་དང་། རྒྱུན་འཛིན། དེ་བཞིན་ཉམས་ཞིབ་ཀྱི་ཐབས་ལམ་གང་མང་བརྒྱུད། སྐད་ཡིག་རྒྱུན་འཛིན་གྱི་གནས་བབ་ཇེ་ཆེར་གཏོང་ཐབས་དང་། སླད་མར་ཡང་ཉམས་ཞིབ་པ་རྣམས་ཀྱིས་ཕན་ཚུན་བར་བསམ་ཚུལ་བརྗེ་ལེན་གང་ལེགས་ཡོང་ཐབས་གཙོ་བོར་དམིགས་པ་ཡིན་སྐོར་སོགས་བརྗོད་སོང་། 

དབུ་འབྱེད་མཛད་སྒོའི་ཐོག་སྐུ་མགྲོན་གཙོ་བོ་སློབ་དཔོན་བྱམས་པ་བསམ་གཏན་ལགས་ཀྱིས། ངས་དེ་རིང་ཏཱ་ལའི་བླ་མ་མཐོ་རིམ་སློབ་གཉེར་ཁང་དང་སྦེང་ལོར་གཙུག་ལག་སློབ་གཉེར་ཁང་གཉིས་ཟུང་འབྲེལ་གྱི་ཐོག་ནས་གོ་སྒྲིག་བྱས་པའི་ཚོགས་འདུ་དེ་ཧ་ཅང་གལ་གནད་ཅན་ཞིག་ཏུ་མཐོང་གི་ཡོད། ངས་ཚོགས་འདུ་འདི་གལ་ཆེན་ཡིན་ཚུལ་སྐོར་དང་འབྲེལ་ནས་རྒྱ་གར་ནང་བོད་ཀྱི་ཤེས་ཡོན་འཕེལ་རིམ་གྱི་ལོ་རྒྱུས་མདོར་བསྡུས་ཤིག་ཞུས་ན། རྒྱ་གར་ནང་བོད་ཀྱི་ཤེས་རིག་དར་སྤེལ་གྱི་རིམ་པ་གཉིས་ཡོད་ཅིང་། རིམ་པ་དང་པོ་ནི་ཕྱི་ལོ་ ༡༨༣༠ ནས་ ༡༩༤༧ ལོ་བར་ཏེ་དབྱིན་ཇི་བཙན་རྒྱལ་ཆེན་པོས་རྒྱ་གར་ལ་དབང་བསྒྱུར་བྱེད་པའི་དུས་སྐབས་ལ་ཁེལ་ཡོད། དུས་རབས་བཅུ་དགུ་བར་བོད་ནི་ནུབ་ཕྱོགས་རྒྱལ་ཁབ་ཅིག་གིས་གོ་ཐོས་མེད་པའི་ས་གནས་གསར་པ་ཞིག་ཡིན་པ་རེད། དུས་རབས་བཅུ་དགུ་པའི་མགོ་སྟོད་དུ་དབྱིན་ཇི་བཙན་རྒྱལ་རིང་ལུགས་ཀྱིས་བོད་ཀྱི་ས་བབ་ཆགས་ཚུལ་དང་། རིག་གཞུང་རྟོག་ཞིབ་ཀྱི་ལས་གཞི་ཞིག་ཐོག་མར་བརྩམས་པ་རེད། བོད་ཀྱི་ཆེས་ཐོག་མའི་ཉམས་ཞིབ་པའམ་བོད་རིག་པ་བ་དག་ནི་སྐུ་ཚབ་ཚོགས་ཆུང་ངམ་གསང་ཉུལ་བ། ཆོས་སྤེལ་བ་བཅས་ཡིན་ཞིང་། ཁོང་ཅག་ནི་བོད་རིག་པ་རྒྱ་གར་དུ་ཐོག་མར་སྤེལ་མཁན་དག་ཡིན། རྒྱ་གར་ནང་བོད་རིག་པའི་རིམ་པ་གཉིས་པ་ནི་རྒྱ་གར་རང་བཙན་ཐོབ་ཚར་བའི་རྗེས་ཏེ། ཕྱི་ལོ་ ༡༩༥༧ ཏེ་རྒྱ་ནག་གཞུང་གིས་བོད་སར་བཙན་འཛུལ་སྐབས། རྒྱ་གར་སྲིད་བློན་ནེ་རུ་ཡིས་བ་ཀུ་ལ་རིན་པོ་ཆེ་བོད་དུ་མངགས་ནས་བོད་ནང་གི་གནས་བབ་རྟོག་ཞིབ་སོགས་བྱེད་བཅུག་པ་རེད། ཅེས་བརྗོད་སོང་། དེ་སྔ་བོད་མི་རྣམས་བཙན་བྱོལ་དུ་ཡོང་རྗེས་རྒྱ་གར་གྱི་མཐོ་རིམ་སློབ་གཉེར་ཁང་མང་དག་ཅིག་ཏུ་བོད་རིག་པ་བཙུགས་ཡོད་ཀྱང་ཕྱིས་སུ་མེད་པ་ཆགས་རེད། ད་ལན་གྱི་བདུན་ཕྲག་གཅིག་གི་ལས་རིམ་འདི་ནི་སྦེང་ལོར་གཙུག་ལག་སློབ་གཉེར་ཁང་བརྒྱུད་བོད་ཀྱི་སྐད་ཡིག་དང་རིག་གཞུང་རྒྱ་གར་གྱི་སྤྱི་ཚོགས་སོགས་སུ་གོ་རྟོགས་སྤེལ་བའི་གོ་སྐབས་དམིགས་བསལ་ཞིག་ཡིན་སྐོར་སོགས་བརྗོད་སོང་།

དེ་བཞིན་ཏཱ་ལའི་བླ་མ་མཐོ་རིམ་སློབ་གཉེར་ཁང་གི་ཆེད་སྦྱོང་སྡེ་ཚན་གྱི་འགན་འཛིན་འབུམ་རམས་པ་དགེ་བཤེས་བློ་བཟང་དངོས་གྲུབ་ལགས་ཀྱིས། བོད་ཀྱི་མི་རབས་རྒན་པ་རྣམས་ཀྱིས་བོད་ཀྱི་རིག་གཞུང་ཐོག་རྨང་གཞི་བཏིང་བར་དུས་ཚོད་མང་པོ་བཏང་ཡོད་ཅིང་། མི་རབས་གཞོན་པ་རྣམས་ཀྱིས་སྐད་ཡིག་འདྲ་མིན་དང་བརྗོད་གཞི་སྣ་མང་ཐོག་ཏུ་རིགས་གཅིག་རྐང་འཛིན་གྱི་ཉམས་ཞིབ་བྱས་ཏེ། བོད་ཀྱི་ནང་ཆོས་དང་། རིག་གཞུང་། ཡུལ་སྲོལ། གོམས་གཤིས་སོགས་རྒྱལ་སྤྱིའི་སྡིངས་ཆའི་ཐོག་བསྐྱལ་རྒྱུ་འོས་འགན་ཆགས་ཡོད་ལ། ཕ་མེས་ནས་བརྒྱུད་པའི་ཡ་རབས་བཟང་སྤྱོད་དེ་འཛམ་གླིང་ཐོག་ངོམས་སུ་རུང་བ་མ་ཟད། ༧གོང་ས་རྒྱལ་བ་རིན་པོ་ཆེ་མཆོག་གི་བཀའ་བཞིན་འཛམ་གླིང་མི་མང་ལ་ཞབས་ཕྱི་བསྒྲུབ་ཐུབ་པ་ཞིག་ཡིན་པས། ཐེངས་འདིའི་ཤེས་རིག་གི་སྡིངས་ཆ་བརྒྱུད་ནས་ཚོགས་བཅར་བ་རྣམས་ཀྱིས་རྣམ་དཔྱོད་ཀྱི་རྩལ་ངོམས་ཏེ། བོད་ཀྱི་ཤེས་རིག་གི་མ་འོངས་པའི་བགྲོད་ལམ་ལ་སྔར་ལས་ལྷག་པའི་འོད་སྟོང་འབར་བའི་མདུན་ལམ་ཞིག་བསྐྲུན་རྒྱུ་གལ་ཆེན་ཡིན་པའི་སྐོར་བརྗོད་སོང་།

  དེ་རིང་བོད་རིག་པའི་ཚོགས་འདུ་དེའི་ཐོག་ན་ག་སངས་རྒྱས་བསྟན་དར་ལགས་ཀྱིས་བོད་ཀྱི་བརྡ་སྤྲོད་ཁོ་ནར་གསལ་བའི་ཡི་གེའི་རྟགས་ཀྱི་གཞུང་ལུགས་གཞན་དང་། དགེ་བཤེས་ལྷ་རམས་པ་ཏྲེ་ཧོར་ཟླ་བ་ཚེ་རིང༌ལགས་ཀྱིས་ནང་བསྟན་སྐད་བརྡ་རིག་པ་དང་སྒྲ་རྟོག་ཡུལ་ལ་འཇུག་ཚུལ་བར་གྱི་འབྲེལ་བ། འབུམ་རམས་པ་རིག་འཛིན་ལྷུན་གྲུབ་ལགས་ཀྱིས་བོད་སྐད་ཀྱི་གྲུབ་ཆ་གཙོ་བོ་ཡི་གེ་བཅུ་གླེང་བ། འབུམ་རམས་པ་ཨ་འབྲུག་དཀོན་མཆོག་ལགས་ཀྱིས་བོད་ཀྱི་བཙོན་མའི་བརྩམས་ཆོས་ཀྱི་བྱུང་བ་དང་གནས་བབ་བསྐྱར་ཞིབ། ཨཱཅཱརྱ་ཨག་ལོ་ལགས་ཀྱིས་བཀའ་དྲུང་ཤེལ་དཀར་གླིང་པ་མི་འགྱུར་ལྷུན་གྲུབ་ཀྱི་ལྷ་ས་དྲན་གླུ་དང་རང་ཚུལ་བརྗོད་པའི་ཀ་བཤད་ཀྱི་གཙོས་པའི་ཁོང་གི་བརྩམས་ཆོས་སྐོར་གླེང་བ། མཁན་པོ་དཀོན་མཆོག་ཐུབ་བསྟན་ལགས་ཀྱིས་ལ་དྭགས་ཀྱི་ཐོག་མའི་མི་རིགས་འཕེལ་རིམ་དང་རིག་གཞུང་ལ་ཤུགས་རྐྱེན་ཐེབས་ཚུལ་རགས་བསྡུས་དཔྱད་པ། འབུམ་རམས་པ་བསོད་ནམས་རྒྱལ་མཚན་ལགས་ཀྱིས་དུས་རབས་བཅོ་ལྔ་ནས་བཅོ་བརྒྱད་བར་དུ་མཚོ་ཁར་གནས་སྡོད་བྱས་པའི་སོག་པོའི་གནས་བབ་ལ་ལྟ་བ། དགེ་བཤེས་ཁྲི་གཡུང་དྲུང་ལགས་ཀྱིས་ཏུན་ཧོང་ཡིག་རྙིང་ཁྲོད་ཀྱི་བོན་དང་འབྲེལ་བའི་ཡིག་ཆ་ངོས་འཛིན། ལོ་རྒྱུས་སློབ་དཔོན་ལ་སྟོད་ནོར་བུ་ལགས་ཀྱིས་སོ་བློན་དབའ་གསལ་སྣང་གི་མཛད་རྗེས་གླེང་བ། འབུམ་རམས་པ་དགེ་བཤེས་བློ་བཟང་རྡོ་རྗེ་རབ་གླིང༌ལགས་ཀྱིས་ལེགས་སྦྱར་དང་པཱ་ལི་སོགས་ནས་བསྒྱུར་བའི་བོད་སྐད་དུ་བཀའ་བསྟན་ཇི་ཡོད་སྐོར། དགེ་བཤེས་ལྷ་རམས་པ་ཉི་མ་དབང་ཕྱུག་གིས་ཕྱྭ་བ་ཆོས་སེང་གེས་གསར་གཏོད་བྱས་པའི་རྩོད་སྒྲུབ་རིག་པ་གཞུང་ལུགས་ཞིབ་འཇུག་གི་དཔྱད་ཐབས་སུ་བཀོད་པའི་ཕན་ནུས་གླེང་བ་སོགས་ཀྱི་སྐོར་ལ་གཏམ་བཤད་གནང་འདུག

སང་ཉིན་ཕྱི་ཚེས་ ༣ ཉིན་སློབ་དཔོན་བྱམས་པ་བསམ་གཏན་ལགས་ཀྱིས་ལི་ཡུལ་སོགས་ཨེ་ཤི་ཡ་དབུས་མའི་ཡུལ་ཁག་ནས་ཤཱཀྱ་ཐུབ་པའི་བསྟན་པ་བོད་ཡུལ་དུ་དར་ཁྱབ་བྱུང་སྐོར་དང་། འབུམ་རམས་པ་གཙང་ཕྲུག་སྟོབས་ལགས་ཀྱིས་མན་ཇུ་གོང་མས་༧རྒྱལ་དབང་སྐུ་ཕྲེང་འགར་ཕུལ་བའི་གསེར་ཐམ་གྱི་གནས་བབ་ལ་དཔྱད་པ། བཀྲ་ཤིས་དོན་གྲུབ་ལགས་ཀྱིས་མངོན་ཆུང་དུ་ལྷག་པའི་སློབ་དཔོན་སེང་གེ་ཞབས་འབྲིང་པའི་སྐྱེས་རབས་ངོ་སྤྲོད་དང་མ་དཔེ་བསྐྱར་གསོའི་བརྒྱུད་རིམ་ལ་རོབ་ཙམ་དཔྱད་པ། ལོ་རྒྱུས་སློབ་དཔོན་ཡེ་ཤེས་བསམ་གྲུབ་ལགས་ཀྱིས་མི་ལོ་བཞི་བཅུ་ལྷག་ཙམ་རིང་སྟག་ལུང་དགོན་དང་སྡེ་འབངས་བཅས་པ་གཞུང་བཞེས་མཛད་པའི་རྒྱབ་ལྗོངས་དང་སྐབས་དེའི་གནས་བབ་སྐོར་སོགས་ཀྱི་བརྗོད་གཞི་ཐོག་གཏམ་བཤད་གནང་རྒྱུ་ཡིན་འདུག  

ཐེངས་འདིའི་བོད་ཀྱི་བདུན་ཕྲག་གི་ལས་རིམ་ཁྲོད། བོད་ཀྱི་སྨན་རྩིས་ཁང་གིས་བོད་ཀྱི་གསོ་བ་རིག་པ་དང་སྨན་གཞུང་གི་འགྲེམས་སྟོན་དང་གཏམ་བཤད་ཀྱི་ལས་རིམ། དེ་བཞིན་བོད་ཀྱི་དུས་ཐུང་གློག་བརྙན་གཟིགས་འབུལ་དང་དཔྱད་གླེང་། བོད་ཀྱི་འགྲེམས་སྟོན་ཁང་གིས་བོད་དང་རྒྱ་གར་གྱི་འབྲེལ་ལམ་ཐད་ཀྱི་འགྲེམས་སྟོན། བོད་ཀྱི་ཐུན་མོང་མ་ཡིན་པའི་རྩམ་པ་བཟོ་སྟངས་དང་ཁྱད་ཆོས་སོགས་སྐོར་གྱི་འགྲེམས་སྟོན། བོད་ཀྱི་ཟས་རིགས་ཀྱི་དུས་སྟོན། བོད་ཀྱི་རིག་གཞུང་དུས་སྟོན། དཀྱིལ་འཁོར་བཞེངས་སྟངས་སོགས་འགྲེམས་སྟོན་བྱེད་ཀྱི་ཡོད་འདུག 

གསར་འགོད་པ། བྱམས་པ་ཚེ་རིང་། དཔལ་ལྡན།  རྩོམ་སྒྲིག་བྱེད་མཁན། པདྨ་མཚོ།