བོད་མིའི་སྒྲིག་འཛུགས་ཀྱིས་བོད་གཞིས་བྱེས་གཉིས་ཀྱི་ཚབ་གནང་སྟེ་༧གོང་ས་རྒྱལ་བ་རིན་པོ་ཆེ་མཆོག་ཕྱི་ལུགས་ལྟར་དགུང་གྲངས་ ༩༠ ཕེབས་པའི་སྐུའི་གོ་སྟོན་སྲུང་གཙི་ཞུ་རྒྱུ་ཡིན་འདུག
ཕྱི་ལོ་ ༢༠༢༥ ཟླ་ ༧ ཚེས་ ༥ གཟའ་ཚེས་དགེ་བའི་ཉིན་བཞུགས་སྒར་དྷ་རམ་ས་ལའི་ཐེག་ཆེན་ཆོས་གླིང་གཙུག་ལག་ཁང་དུ། བོད་མིའི་སྒྲིག་འཛུགས་ཀྱི་ངོས་ནས་བོད་གཞིས་བྱེས་ལྷ་མི་ཡོངས་ཀྱི་ཚབ་ཞུས་ཏེ་༧གོང་ས་རྒྱལ་བ་རིན་པོ་ཆེ་མཆོག་ཕྱི་ལུགས་ལྟར་དགུང་ལོ་ ༩༠ ཕེབས་པའི་༧སྐུའི་གོ་སྟོན་སྲུང་གཙི་ཞུ་གཏན་འཁེལ་ཡོད་པའི་སྐོར་ལ་གསལ་བསྒྲགས་ཤིག་གནང་འདུག
ཁ་སང་བོད་མིའི་སྒྲིག་འཛུགས་ཀྱི་དབུས་གོ་སྟོན་གོ་སྒྲིག་ཚོགས་ཆུང་གི་དེ་འབྲེལ་གསལ་བསྒྲགས་ནང་དུ། བོད་མིའི་སྒྲིག་འཛུགས་ཀྱིས་ཕྱི་ལོ་ ༢༠༢༥ ཟླ ༧ ནས་ལོ་འཁོར་གཅིག་རིང་བྱམས་བརྩེའི་ལོ་ཞེས་སྲུང་གཙི་ཞུ་རྒྱུ་དང་། ལོ་འཁོར་མོའི་རིང་བཞུགས་སྒར་དྷ་རམ་ས་ལ་གཙོ་བོར་གྱུར་བའི་རྒྱལ་སྤྱིའི་ཁྱོན་ཡོངས་སུ་གོ་སྟོན་དང་འབྲེལ་བའི་མཛད་རིམ་སྣ་མང་གྲ་སྒྲིག་གནང་གི་ཡོད་འདུག་ལ། བརྟན་བཞུགས་དང་གོ་སྟོན་ཆེད་ཞལ་འདེབས་འབུལ་མཁན་རྣམས་ཀྱིས་ས་གནས་མགོ་འཛིན་དང་གནས་ཡུལ་རྒྱལ་ཁབ་ཁག་གི་སྐུ་ཚབ་དོན་གཅོད་དུ་དབུལ་དགོས་ཀྱི་ཡོད་འདུག
ཡང་གསལ་བསྒྲགས་ནང་། ལྷར་བཅས་སྲིད་ཞིའི་གཙུག་རྒྱན། ཁམས་གསུམ་ཆོས་ཀྱི་རྒྱལ་པོ། འདི་ཕྱི་གཉིས་ཀྱི་སྐྱབས་གནས། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ ༸རྒྱལ་དབང་ཐམས་ཅད་མཁྱེན་ཅིང་གཟིགས་པ་ཆེན་པོ་མཆོག་ལ་སྐུ་གེགས་ཀྱི་མཚན་མ་ཅི་མཆིས་རྨེག་མེད་དུ་ཞི་ནས་སྐུ་ཚེ་ཡུན་དུ་བརྟན་པ་དང་། ཐུགས་ཀྱི་བཞེད་དགོངས་མཐའ་དག་གེགས་མེད་ལྷུན་གྱིས་འགྲུབ་པའི་ཆེད་དུ། ཚེ་དཔག་མེད་དྭངས་མ་བཅུད་འདྲེན་གྱི་ཆོ་གའི་སྒོ་ནས་བརྟན་བཞུགས་བསྟར་འབུལ་ཞུ་གཏན་ཁེལ་ཡོད། ཅེས་དང་། ཕྱི་ལོ་ ༢༠༢༥ ཟླ་ ༧ ཚེས་ ༦ ཉིན་ཕྱི་ལུགས་ལྟར་མགོན་པོ་གང་ཉིད་ནས་དགུང་གྲངས་ ༩༠ བཞེས་པའི་༸སྐུའི་འཁྲུངས་ལྷ་དབྱར་གསོལ་གྱི་གཞུང་འབྲེལ་མཛད་སྒོས་སྔུན་བསུས་ཏེ། ལོ་འཁོར་མོར་བཞུགས་སྒར་གཙོས་རྒྱལ་སྤྱིའི་ཁྱོན་ལ་གོ་སྟོན་དང་འབྲེལ་བའི་མཛད་རིམ་རྣམ་མང་གོ་སྒྲིག་ཞུ་འཆར་ཡོད། ཅེས་གསལ་འདུག
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།
