བོད་དཀར་མཛེས་ཁུལ་ཉག་ཆུ་རྫོང་གི་ཉེ་འགྲམ་དུ་མེ་སྐྱོན་ཤོར་ཏེ་ཡུལ་མིའི་སྡོད་ཁང་ལ་གནོད་སྐྱོན་དང་མི་གྲངས་ ༡༤༠ ལྷག་གནས་སྤོ་བྱས་ཡོད་འདུག
ཟླ་འདིའི་ཕྱི་ཚེས་ ༩ ཉིན་གྱི་ཕྱི་དྲོའི་ཆུ་ཚོད་ ༣ དང་སྐར་མ་ ༢༠ ཙམ་ལ་དཀར་མཛེས་ཁུལ་ཉག་ཆུ་རྫོང་གི་ཧི་ཁུག་ཡུལ་ཚོ་ཁྲིན་ཞང་སྡེ་བའི་ཉེ་འགྲམ་གྱི་རི་ངོས་སུ་མེ་སྐྱོན་ཤོར་ཞིང་། ཕྱི་ཚེས་ ༡༠ ཉིན་མེ་ཤུགས་ཆེ་རུ་ཕྱིན་ཏེ་ཡུལ་མིའི་སྡོད་ཁང་སོགས་ལ་གནོད་སྐྱོན་ཐེབས་ཡོད་པ་རྒྱ་ནག་གི་མགྱོགས་འཕྲིན་དྲ་ལམ་དུ་ཡུལ་མི་ཚོས་སྤེལ་འདུག་པ་མ་ཟད། མི་གྲངས་ ༡༤༠ ལྷག་ཉག་ཆུ་རྫོང་ཐོག་ཏུ་གནས་སྤོ་བྱས་ཡོད་ཅེས་རྒྱ་ནག་གཞུང་གིས་བསྒྲགས་འདུག
ད་ལྟའི་ཆར་མེ་སྐྱོན་དེའི་རྐྱེན་གྱིས་ཉེ་འགྲམ་གྱི་ས་གནས་ཁག་ཏུ་གློག་ཆད་པ་དང་། འགྲིམ་འགྲུལ་སོགས་ཀྱི་ལམ་ཁ་ཁག་བཀག་སྡོམ་བྱས་ཡོད། ཐེངས་འདིའི་མེ་སྐྱོན་ཆེད་མེ་གསོད་མཁན་མི་གྲངས་ ༣༠༠ ལྷག་དང་། གནམ་གྲུ་སོགས་ཀྱི་མྱུར་སྐྱོབ་རོགས་རམ་བྱེད་བཞིན་པ་ལས། ཐེངས་འདིའི་མེ་སྐྱོན་ཁྲོད་དུ་ས་གནས་མི་མང་དང་ཁང་པ་སོགས་ལ་གནོད་སྐྱོན་ཐེབས་པའི་གནས་ཚུལ་རིགས་རྒྱ་ནག་གཞུང་གིས་བསྒྲགས་མི་འདུག
འདི་ལོའི་ཟླ་ ༣ ཚེས་ ༡༥ ཉིན་གྱི་ཕྱི་དྲོའི་ཆུ་ཚོད་ ༥ པ་ཙམ་ལ་བོད་དཀར་མཛེས་ཁུལ་ཉག་ཆུ་རྫོང་མགར་ར་གྲོང་རྡལ་གྲུ་བསུ་སྟོད་པ་གྲོང་ཚོར་ནགས་ཚལ་མེ་སྐྱོན་ཤོར་ཡོད་ཅིང་། ཕྱི་ཚེས་ ༡༦ ནས་མེ་སྐྱོན་གྱི་འབར་ཤུགས་ཆེ་རུ་ཕྱིན་ཏེ། ཕྱི་ཚེས་ ༡༧ ཉིན་ཉག་ཆུ་རྫོང་གི་ལྷོ་ནུབ་དང་། བྱང་ཤར། ནུབ་བྱང་བཅས་ས་གནས་གསུམ་གྱི་ཕྱོགས་སུ་མེ་ཤུགས་མཆེད་ཡོད་པས། ས་གནས་གྲོང་ཚོ་མང་པོར་གནོད་སྐྱོན་ཐེབས་ཏེ་ས་གནས་གཞན་དུ་གནས་སྤོ་བྱས་ཡོད་འདུག དེའི་ཁྲོད་དཀར་མཛེས་ཁུལ་ཉག་ཆུ་རྫོང་མགར་ར་གྲོང་རྡལ་གྱི་ཁྱིམ་ཚང་ ༧༤༢ དང་མི་གྲངས་ ༢༦༥༥ ། ཆུ་ཁ་གྲོང་རྡལ་གྱི་ཁྱིམ་ཚང་ ༤༣༥ དང་མི་གྲངས་ ༡༨༧༣ ། མཁར་རིང་པོ་ཡུལ་ཚོའི་ཁྱིམ་ཚང་ ༡༨༣ དང་མི་གྲངས་ ༡༣༨༠ བཅས་ཁྱོན་ཁྱིམ་ཚང་ ༡༣༦༠ དང་མི་གྲངས་ ༥༩༠༨ ལྷག་གནས་སྤོ་བྱས་ཡོད་པ་མ་ཟད། དར་མདོ་གྲོང་ཁྱེར་ར་རྔ་ཁ་གྲོང་རྡལ་ནས་ལི་ཐང་རྫོང་བར་གྱི་འགྲིམ་འགྲུལ་ལམ་ཁ་བཀག་སྡོམ་བྱས་ཡོད་འདུག
འདས་ལོའི་ཕྱི་ཟླ་ ༥ ཚེས་ ༣༠ ཉིན་དཀར་མཛེས་ཁུལ་ཉག་ཆུ་རྫོང་མར་རུ་མཚོ་གྲོང་རྡལ་ཐང་འཇོར་གྲོང་ཚོའི་ཉེ་འདབས་ཀྱི་ནགས་ཚལ་ལ་མེ་སྐྱོན་ཚབས་ཆེན་བྱུང་ཡོད་ཀྱང་། མང་ཚོགས་གནས་སྤོར་དང་མི་མང་ལ་ཤི་རྨས་སོགས་ཀྱི་དོན་རྐྱེན་བྱུང་མེད་སྐོར་རྒྱ་ནག་གིས་བསྒྲགས་ཡོད་ཅིང་། ཕྱི་ལོ་ ༢༠༡༧ ལོར་བོད་ཉག་ཆུ་ཁ་རྫོང་གི་རྒྱ་ཁྱོན་སྤྱི་ལེ་ ༡༠༠ ཙམ་ལ་མེ་སྐྱོན་ཤོར་ཡང་རྒྱ་ནག་གིས་རོགས་སྐྱོར་བྱས་མེད་པ་མ་ཟད། ཕྱི་ལོ་ ༢༠༡༢ ལོར་དཀར་མཛེས་ཁུལ་ལི་ཐང་རྫོང་གི་མོ་ལྷ་གྲོང་ཚོ་དང་ཉག་ཆུ་རྫོང་གི་དེས་ཚང་གྲོང་ཚོ་གཉིས་བར་གཟའ་འཁོར་གཅིག་ལྷག་རིང་མེ་སྐྱོན་ཤོར་སྐབས་ཀྱང་མེ་གསོད་རུ་ཁག་སོགས་ཀྱི་རོགས་སྐྱོར་བྱས་མེད་ཁར། དེ་ནི་རྒྱ་ནག་གཞུང་གིས་ཆེད་དུ་མེ་བརྒྱབ་པ་ཡིན་པར་ས་གནས་མི་མང་ལ་དོགས་གཞིའང་བྱུང་ཡོད་པ་རེད། དེ་བཞིན་ཕྱི་ལོ་ ༢༠༡༢ ལོར་སྨར་ཁམས་རྫོང་གི་ནགས་ཚལ་ཆེ་ཤོས་ལ་མེ་སྐྱོན་ཤོར་ནས་ཟླ་གཅིག་མ་ཟིན་ཙམ་འགོར་ཡང་རྒྱ་ནག་གཞུང་གིས་སྣང་མེད་དུ་བཞག་སྟབས། ས་གནས་མི་མང་གིས་ཉིན་མཚན་དབྱེ་མེད་ཀྱིས་ཉིན་གྲངས་ཉི་ཤུ་ལྷག་རིང་མེ་གསོད་ཐབས་ཀྱི་ལས་ཀ་བྱེད་དགོས་བྱུང་ཡོད་པ་རེད།
གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
