༧གོང་ས་མཆོག་གིས་ལམ་རིམ་སྐབས་ཀྱི་སྐྱེས་བུ་གསུམ་གྱི་ལམ་གྱི་འགྲོ་སྟངས་སོ་སོའི་རྒྱུད་ལ་སྦྱར་ནས་ཉམས་ལེན་བྱེད་ཐུབ་ཚེ་མི་ལུས་ཐོབ་པའི་གོ་ཆོད་པ་རེད་ཅེས་གསུངས།
དེ་རིང་ཕྱི་ཚེས་ ༡༡ ཉིན་བཞུགས་སྒར་རྒྱལ་བའི་ཕོ་བྲང་དུ། ༸གོང་ས་རྒྱལ་བ་རིན་པོ་ཆེ་མཆོག་གིས་རྒྱུད་སྟོད་གྲྭ་ཚང་དུ་ཆོས་ཐོག་འགྲིམ་བཞིན་པའི་དགེ་བཤེས་གྲངས་ ༡༠༧ ལ་མཇལ་ཁ་དང་བཀའ་སློབ་གནང་སྐབས། ཆོས་ལུགས་རིས་མེད་ཐོག་གུས་ཞབས་བྱེད་པའི་བློ་སྤོབས་དགོས། ངོས་རང་ལ་ཆ་བཞག་ན་ནང་པའི་དགེ་སློང་ཞིག་རེད། རྒྱ་གར་གཞུང་ནས་ངོས་ལ་མཐོང་དང་ཡིད་ཆེས་ཧ་ཅང་ཡག་པོ་བྱེད་ཀྱི་འདུག ང་ཚོ་རྒྱ་གར་དུ་བསྡད་ནས་རིས་སུ་མ་ཆད་པའི་ཆོས་ལ་བློ་ཁོག་ཆེན་པོས་བཤད་ཐུབ་པ་དང་། སློབ་སྦྱོང་བྱས་པ་དེ་ལག་ལེན་གྱིས་བསྐྱེད་དེ་བསླབ་པ་གསུམ་གྱི་ཉམས་ལེན་ཡག་པོ་བྱེད་དགོས། ལམ་རིམ་གྱི་སྐབས་སུ་སྐྱེས་བུ་གསུམ་གྱི་ལམ་གྱི་འགྲོ་སྟངས་ལ་དོ་སྣང་ཡག་པོ་བྱས། དེ་ནས་སོ་སོའི་རྒྱུད་ལ་སྦྱར་ཏེ་བསླབ་པ་བྱས་ཚེ། མི་ལུས་ཐོབ་པའི་གོ་ཆོད་པ་རེད། ངོས་རང་ལ་ཆ་བཞག་ན་ཟི་ལིང་ནས་ཡོང་བ་རེད། གཙོ་བོ་ཡོངས་འཛིན་དམ་པ་གཉིས་ཀྱི་ཞབས་ལ་གཏུགས་ཏེ་ལམ་རིམ་ལ་རྒྱུས་ཡོད་ཆགས་ཡོད། རྒྱུས་ཡོད་པ་དེ་ཉིན་རེ་བཞིན་དུ་ཞོགས་པ་ཡར་ལངས་པ་དང་ལམ་རིམ་ཆ་ཚང་སྒོམ་བཞིན་ཡོད། དེས་མི་ཚེ་དོན་དང་ལྡན་པ་ཞིག་ཡོང་གི་འདུག ཅེས་གསུངས་སོང་།
ཡང་༧གོང་ས་མཆོག་གིས། ལམ་རིམ་གྱི་བསམ་བློ་ཅུང་ཙམ་བཏང་ཡོང་དུས། རྐྱེན་ངན་གྲོགས་ལ་ཤར་བ་དང་། རྐྱེན་ངན་ཁོང་ཁྲོ་དང་ང་རྒྱལ་སོགས་འདྲ་མིན་སྐྱེས་རྒྱུ་མེད་པ་བྱེད་དགོས། ཁོང་ཁྲོ་སྐྱེས་བའི་དུས་སུ་ཁོང་ཁྲོ་སྐྱེ་སའི་ཡུལ་དུ་བརྩེ་བ་དང་སྙིང་རྗེ་སྒོམ་པར་ཧ་ཅང་ཡག་པོ་འདུག ཤེས་བཞིན་དུ་ཁོང་ཁྲོ་ལངས་བའི་སྐབས་སུ་བཟོད་པའི་ཉམས་ལེན་བྱེད་དགོས། ཁོང་ཁྲོ་སློང་མཁན་ཞིག་མེད་པ་ཡིན་ན་བཟོད་པ་སྒོམ་རྒྱུ་ཡོང་གི་མ་རེད། ཁོང་ཁྲོ་སློང་མཁན་བཟོད་པ་སྒོམ་པའི་རྟེན་དང་གྲོགས་ཆགས་འདུག བར་སྐབས་རྒྱ་མིས་ང་ཚོ་བོད་པར་སྡུག་པོ་བཏང་ཡོང་དུས། ཁོང་ཁྲོ་ཟ་བསྡད་ཚེ་ཞེ་སྡང་སྐྱེས་པ་མ་གཏོགས་གང་ཡང་ཡོང་རྒྱུ་མི་འདུག ཆོས་གྲོགས་ཚོས་ཀྱང་སྙིང་རྗེ་སྒོམ་དང་། བཟོད་པའི་བློ་སྐྱེས་ཡོང་དུས། སོ་སོའི་བློ་ལ་ཞི་བདེ་བསླེབས་པ་དང་། རིམ་བཞིན་སོ་སོའི་ངོ་ཤེས་ཚོའང་སེམས་ཀྱི་ཞི་བདེ་བསྒྲུབ་རྒྱུ་བཤད་དུས། མི་ལ་ཕན་ཐོགས་ཡོང་གི་འདུག གཞན་གང་ཡང་མི་འདུག བཀྲ་ཤིས་བདེ་ལེགས། ཞེས་གསུངས་སོང་།
གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
