རྒྱལ་མཚན་ནོར་བུ་བལ་ཡུལ་དུ་ཡོང་རྒྱུ་ཡིན་འདུག 

རྒྱ་ནག་གཞུང་གིས་ངོས་འཛིན་བྱས་པའི་པཎ་ཆེན་རྒྱལ་མཚན་ནོར་བུ་ཟེར་བ་ལུམ་བི་ནིར་འཚོག་འཆར་ཡོད་པའི་རྒྱ་ནག་ལྷོ་རྒྱ་མཚོའི་ནང་པའི་ལྷན་ཚོགས་ཐོག་མཉམ་ཞུགས་བྱ་རྒྱུ་ཡིན་འདུག

ཟླ་འདིའི་ཕྱི་ཚེས་ ༡༢ ནས་ ༡༥ བར་རྒྱ་ནག་ལྷོ་རྒྱ་མཚོའི་ནང་པའི་ལྷན་ཚོགས་(Nanhai Buddhism Round Table) ཞེས་པ་ཞིག་བལ་ཡུལ་གྱི་ལུམ་བི་ནི་ཁུལ་དུ་བསྡུ་འཆར་ཡོད་ཅིང་། ནང་པའི་གླེང་སྟེགས་དེའི་ཐོག་འཛམ་གླིང་རྒྱལ་ཁབ་ཉི་ཤུ་ལྷག་གི་སྐུ་ཚབ་འཐུས་མི་དང་། གྲྭ་བ་སོགས་ཀྱིས་མཉམ་ཞུགས་གནང་གི་ཡོད་པ་མ་ཟད། ཟླ་འདིའི་ཕྱི་ཚེས ༡༣ ཉིན་རྒྱ་ནག་གཞུང་གིས་ངོས་འཛིན་བྱས་པའི་པཎ་ཆེན་རྒྱལ་མཚན་ནོར་བུ་ཟེར་བའང་མཉམ་ཞུགས་བྱ་རྒྱུ་ཡིན་འདུག

གནད་དོན་དེའི་ཐད་ལུམ་བི་ནི་ཡར་སྐྱེད་ཐེབས་རྩ་( Lumbini Development Trust) ཁང་གི་གཞུང་འབྲེལ་མི་སྣས། ད་ལན་འཛམ་གླིང་གི་རྒྱལ་ཁབ་ཉི་ཤུ་ཙམ་གྱི་གཞུང་འབྲེལ་མི་སྣ་དང་། གྲྭ་བ་སོགས་ཀྱིས་མཉམ་ཞུགས་བྱེད་ཀྱི་ཡོད་ཀྱང་། བལ་ཡུལ་གཞུང་གིས་རྒྱ་ནག་གི་པཎ་ཆེན་བལ་ཡུལ་དུ་ཡོང་རྒྱུའི་གནད་དོན་དེ་གསང་བར་བཞག་ཡོད། ཁོ་ད་ལན་ཆོས་ཕྱོགས་ཀྱི་བྱེད་སྒོ་ཞིག་གི་སླད། བལ་ཡུལ་དུ་ཡོང་གི་ཡོད་རེད། ཅེས་བརྗོད་འདུག་ལ། བལ་ཡུལ་གྱི་སྲིད་བློན་རྒྱ་ནག་ཏུ་གཞུང་འབྲེལ་སྐོར་སྐྱོད་དུ་མ་ཕྱིན་གོང་ནས་བལ་ཡུལ་གྱི་འགྲིམ་འགྲུལ་བློན་ཆེན་ལས་ཁུངས་དང་ལུམ་བི་ནི་ཡར་སྐྱེད་ཐེབས་རྩ་(Ministry of Tourism and the Lumbini Development Trust) གཉིས་སུ་རྒྱ་ནག་གཞུང་གིས་ངོས་འཛིན་བྱས་པའི་རྒྱལ་མཚན་ནོར་བུའི་སྐོར་སྐྱོད་དང་འབྲེལ་བའི་བརྡ་ལན་སྤྲད་ཚར་ཡོད་ལུགས་སོགས་བསྒྲགས་འདུག

དེ་རིང་བལ་ཡུལ་གྱི་རྒྱལ་ས་ཀ་ཐི་མན་ཌུར་རྟེན་གཞི་བྱས་པའི་རིའི་པཱ་བྷི་ལིག་ཁ་(Republica ) གསར་ཁང་གིས་གནས་ཚུལ་སྤེལ་བའི་ནང་། རྒྱལ་མཚན་ནོར་བུ་ཟེར་བ་དེ་རྒྱ་ནག་གི་རྒྱལ་ས་པེ་ཅིན་ནས་ཐད་ཀར་གནམ་གྲུ་བརྒྱུད་བལ་ཡུལ་གྱི་སྟོན་པའི་འཁྲུངས་གནས་ལུམ་བི་ནི་དང་། དེ་ནས་བལ་ཡུལ་ཀ་ཐི་མན་ཌུ་རུ་འགྲོ་འཆར་ཡོད་པའི་ཁར། ཁོ་དང་ལྷན་རྒྱ་ནག་གཞུང་གིས་ཆེད་དུ་བཏང་བའི་ཉེན་སྲུང་དམག་མི་ཟེར་བ་སོགས་ཀྱང་ཡོང་གི་ཡོད་པ་མ་ཟད། ད་ལྟ་ཁུལ་དེར་ཕྱི་མི་སོགས་ཀྱི་འགྲོ་སྐྱོད་ཐད་ལའང་དམ་དྲག་དང་ལྟ་ཞིབ་བྱེད་མུས་ཡིན་སྐོར་གསལ་འདུག

དེ་བཞིན་རྒྱལ་མཚན་ནོར་བུའི་བལ་ཡུལ་གྱི་ལས་རིམ་ཆེད། ཁ་སང་རྒྱ་ནག་གི་གཞུང་འབྲེལ་སྐུ་ཚབ་སུ་ཇན་ཝན་(Siu Jiawen) སན་ཅན་ཧོ( Sun Jing Hao) ལུ་ཀོ་ཤན་( Liu Guoxin) སོགས་ཀྱིས་གྲུབ་པའི་སྐུ་ཚབ་ཚོགས་ཆུང་ཞིག་བལ་ཡུལ་དུ་ཡོང་སྟེ། ད་ལྟ་བལ་ཡུལ་རྒྱ་ནག་གཞུང་ཚབ་པ་ཁྲན་སོང་(Chen Song) སོགས་ཀྱིས་ཁོའི་བལ་ཡུལ་གྱི་ལས་རིམ་ཁག་ལ་གྲ་སྒྲིག་བྱེད་མུས་ཡིན་ལུགས་བསྒྲགས་ཡོད་པའི་ཁར། རྒྱ་ནག་གཞུང་གིས་ཁོའི་བལ་ཡུལ་གྱི་གཞུང་འབྲེལ་ཕྱོགས་སྐྱོད་དེ་ནི་ཧ་ཅང་གནད་ཆེན་ཞིག་ཡིན་ལུགས་སོགས་ཀྱང་བསྒྲགས་འདུག

གནད་དོན་དབྱེ་ཞིབ་པ་མང་པོ་ཞིག་གིས། རྒྱ་ནག་གཞུང་གིས་ངོས་འཛིན་བྱས་པའི་ནང་པའི་བླ་མ་ཞིག་བལ་ཡུལ་དུ་ཡོང་བ་དེས། བལ་ཡུལ་དང་། རྒྱ་གར། ཨ་རི་སོགས་སུ་གནད་སྡོད་བྱེད་མུས་ཡིན་པའི་ནང་པའི་སྤྱི་ཚོགས་ལ་འགུལ་ཤུགས་འཕར་མ་ཞིག་བཟོས་ཤིང་། དེར་རྒྱལ་སྤྱིའི་སྤྱི་ཚོགས་ཀྱིས་ཀྱང་དོ་དབྱིངས་ཆེན་པོས་ལྟ་ཉན་བྱེད་ཀྱི་ཡོད་པ་མ་ཟད། ད་ལན་རྒྱ་ནག་གཞུང་གིས་བལ་ཡུལ་དང་རྒྱ་ནག་གི་ནང་པའི་སྤྱི་ཚོགས་ཀྱི་མཐུན་སྒྲིལ་ཟེར་བ་སོགས་ལ་ཁ་གཡར་ནས། ཆེད་དུ་རྒྱལ་མཚན་ནོར་བུ་བལ་ཡུལ་དུ་མངགས་པ་ཡིན་པའི་ཚོད་དཔག་བྱེད་ཀྱི་འདུག

༧པཎ་ཆེན་སྐུ་འཕྲེང་བཅུ་གཅིག་པ་བསྟན་འཛིན་དགེ་འདུན་ཡེ་ཤེས་འཕྲིན་ལས་མཆོག་ནི་ཕྱི་ལོ་ ༡༩༨༩ ཟླ་ ༤ ཕྱི་ཚེས་ ༢༥ ཉིན་བོད་ནག་ཆུ་ཁུལ་ལྷ་རི་རྫོང་དུ་ཡབ་དཀོན་མཆོག་ཕུན་ཚོགས་དང༌། ཡུམ་བདེ་ཆེན་ཆོས་སྒྲོན་གཉིས་ཀྱི་སྲས་སུ་སྐུ་བལྟམས་ཤིང་། ཕྱི་ལོ་ ༡༩༩༥ ཕྱི་ཟླ་ ༥ ཚེས་ ༡༤ ཉིན་༧གོང་ས་རྒྱལ་བ་རིན་པོ་ཆེ་མཆོག་གིས་༧པཎ་ཆེན་༧སྐུ་གོང་མའི་ཡང་སྲིད་འཁྲུལ་བྲལ་དུ་ཡོངས་བསྒྲགས་མཛད་དེ། དེ་མ་ཐག་རྒྱ་ནག་གཞུང་གིས་ཡང་སྲིད་འཚོལ་ཞིབ་མི་སྣའི་དབུ་ཁྲིད་བྱ་བྲལ་རིན་པོ་ཆེ་མཆོག་འཛིན་བཟུང་བྱས། ཕྱི་ལོ་ ༡༩༩༥ ཟླ་བ་ ༠༥ ཚེས་ ༡༧ ཉིན་པཎ་ཆེན་སྐུ་ཕྲེང་བཅུ་གཅིག་པ་མཆོག་དང་། ཁོང་གི་ནང་མི་ཡོངས་རྫོགས་རྒྱ་གཞུང་གིས་འཛིན་བཟུང་བཀག་ཉར་བྱས་ཏེ། ཁོང་ཉིད་འཛམ་གླིང་སྟེང་གི་ཆབ་སྲིད་བཙོན་པ་དགུང་ན་ཆུང་ཤོས་སུ་གྱུར། དེ་རྗེས་རྒྱ་ནག་གཞུང་གིས་ ༧གོང་ས་མཆོག་ནས་ཡང་སྲིད་རིན་པོ་ཆེ་སྣང་མེད་བཏང་ནས་རང་མོས་ཀྱི་ཡང་སྲིད་བདམས་ཏེ། ཕྱི་ལོ་ ༡༩༩༥ ཟླ་བ་ ༡༡ ཚེས་ ༡༡ ཉིན་རྒྱ་ནག་དམར་ཤོག་ཚོགས་པས་རྒྱལ་མཚན་ནོར་བུ་ཞེས་པ་ཞིག་པཎ་ཆེན་སྐུ་ཕྲེང་བཅུ་པའི་ཡང་སྲིད་དུ་ངོས་འཛིན་གསལ་བསྒྲགས་བྱས་ཤིང་། ཕྱི་ལོ་ ༡༩༩༥ ཟླ་བ་ ༡༢ ནང་གདན་ས་བཀྲ་ཤིས་ལྷུན་པོའི་གཡས་གཡོན་དུ་དམག་མི་ལྔ་བརྒྱ་ལྷག་བཏང་ནས་ཉེན་སྲུང་བཙན་པོའི་ངང་ཁྲི་འདོན་བྱས་ཡོད་འདུག

ཕྱི་ལོ་ ༢༠༡༩ ཟླ་ ༦ ཚེས་ ༢༢ ཉིན་རྒྱལ་མཚན་ནོར་བུ་ཐོག་མར་བོད་རང་སྐྱོང་ལྗོངས་ཟེར་བའི་ནང་བསྟན་མཐུན་ཚོགས་ཀྱི་ཚོགས་གཙོར་བསྐོས་ཤིང་། འདི་ལོའི་ཕྱི་ཟླ་ ༩ ཚེས་ ༣ ཉིན་རྒྱལ་མཚན་ནོར་བུ་བསྐྱར་དུ་བོད་རང་སྐྱོང་ལྗོངས་ཟེར་བའི་ནང་བསྟན་མཐུན་ཚོགས་ཀྱི་ཚོགས་གཙོར་བསྐོ་བཞག་བྱས་ཡོད། ད་ལྟ་ཁོང་རྒྱ་ནག་ནང་བསྟན་མཐུན་ཚོགས་ཀྱི་ཚོགས་གཞོན་ཡང་ཡིན་འདུག

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། སྐལ་བཟང་སྦྱིན་པ།