ཨ་རིའི་འདེམས་ཐོན་སྲིད་འཛིན་ཊོམ་ཕུ་དང་ཞི་ཅིན་ཕིན་གྱི་ཐོག་མའི་ཐུག་འཕྲད་ག་དུས་ཡིན་ནམ།

ཨ་རིའི་འདེམས་ཐོན་སྲིད་འཛིན་ཊོམ་ཕུ་མཆོག་གི་ལས་ཁུར་དམ་བཅའི་མཛད་སྒོའི་སྟེང་རྒྱ་ནག་གཞུང་གི་མགོ་ཁྲིད་ཞི་ཅིན་ཕིན་མགྲོན་འབོད་བྱས་ཡོད་ཀྱང་རྒྱ་ནག་གཞུང་གིས་གནད་དོན་དེའི་ཐད་དམིགས་བསལ་ཡ་ལན་གང་ཡང་སྤྲད་མི་འདུག

U.S. President Donald Trump and China’s President Xi Jinping shake hands ahead of their bilateral meeting during the G20 leaders summit in Osaka, Japan, June 29, 2019. REUTERS/Kevin Lamarque/File Photo: Reuters

འདི་ལོའི་ཨ་རིའི་སྲིད་འཛིན་གྱི་འོས་བསྡུ་ཆེན་མོའི་ཁྲོད་སྲིད་འཛིན་ཟུར་པ་ཊོམ་ཕུ་མཆོག་སླར་ཡང་ཨ་རིའི་སྲིད་འཛིན་དུ་འདེམས་ཐོན་བྱུང་ཡོད་པ་ལྟར། ཕྱི་ལོ་ ༢༠༢༥ ལོའི་ཟླ་ ༡ ཚེས་ ༢༠ ཉིན་འདེམས་ཐོན་སྲིད་འཛིན་མཆོག་གིས་དངོས་སུ་ཨ་རིའི་སྲིད་འཛིན་ཐེངས་ ༤༧ པའི་ལས་ཁུར་དམ་བཅའ་གཞག་རྒྱུ་ཡིན་སྟབས། ལས་ཁུར་དམ་བཅའི་མཛད་སྒོའི་སྟེང་རྒྱ་ནག་གཞུང་གི་མགོ་འཁྲིད་ཞི་ཅིན་ཕིན་གཙོས་རྒྱལ་ཁབ་མང་པོ་ཞིག་གི་གནད་ཡོད་མི་སྣ་མགྲོན་འབོད་བྱས་ཡོད་ཀྱང་། རྒྱ་ནག་གཞུང་གིས་གནད་དོན་དེའི་ཐད་དམིགས་བསལ་ཡ་ལན་གང་ཡང་སྤྲད་མེད་པའི་གནས་ཚུལ་འཐོན་མུས་ཡིན་འདུག

ད་ལྟ་རྒྱལ་སྤྱིའི་གསར་ལམ་ཆེ་ཁག་གིས་གནས་ཚུལ་སྤེལ་བ་ལྟར་ན། འདེམས་ཐོན་སྲིད་འཛིན་ཊོམ་ཕུ་མཆོག་གིས་འདི་ལོའི་ཕྱི་ཟླ་ ༡༡ གི་ཟླ་མགོ་ནས་རྒྱ་ནག་གི་མགོ་ཁྲིད་ཞི་ཅིན་ཕིན་ཁོང་གི་ལས་ཁུར་དམ་བཅའི་མཛད་སྒོར་ཡོང་བའི་མགྲོན་འབོད་བྱས་ཡོད་ཀྱང་། རྒྱ་ནག་གི་མགོ་ཁྲིད་ཞི་ཡིས་ད་ལྟའང་ཡ་ལན་གང་ཡང་བྱས་མེད་པའི་ཁར། ད་ལྟ་ཨ་རིའི་རྒྱལ་ས་ཝ་ཤིན་ཊོན་དུ་རྟེན་གཞི་བྱས་པའི་རྒྱ་ནག་གཞུང་ཚབ་པས་ཀྱང་དགོས་ངེས་དང་ཁ་གསལ་གྱི་བརྡ་ལན་གང་ཡང་སྤྲད་མེད་སྐོར་གསལ་འདུག་ལ། རྒྱ་ནག་ཕྱི་སྲིད་བློན་ཆེན་ལས་ཁུངས་ཀྱི་མགྲིན་ཚབ་པ་དག་གིས་ཀྱང་གནད་དོན་དེའི་ཐད་གསལ་ཁ་གང་ཡང་བཏོན་མེད་པ་རེད། འོན་ཀྱང་། འདེམས་ཐོན་སྲིད་འཛིན་ཊོམ་ཕུ་མཆོག་གི་མགྲིན་ཚབ་པ་ཀ་རོ་ལ་ཡེན་(Karoline Leavitt) གྱིས། ད་ལྟ་རྒྱལ་ཁབ་མང་དག་གི་མགོ་ཁྲིད་ཚོས་སྐུ་ཞབས་ཊོམ་ཕུ་མཆོག་ལ་ཐུག་འཕྲད་བྱ་རྒྱུ་གྲ་སྒྲིག་བྱེད་མུས་ཡིན། དེ་ནི་ཊོམ་ཕུས་སླར་ཡང་སྲིད་འཛིན་གྱི་ལས་ཁུར་ཞུས་ནས། ཨ་རི་བརྒྱུད་འཛམ་གླིང་ལ་ཞི་བདེ་ཡི་འཚོ་བ་ཞིག་བསྐྲུན་པ་ཤེས་ཀྱི་ཡོད་པས་རེད། ཅེས་བརྗོད་འདུག

འདི་ལོའི་ཕྱི་ཟླ་ ༡༡ པའི་ཟླ་དཀྱིལ་དུ་ལྷོ་ཨ་མེ་རི་ཁའི་པེ་རུ་(Peru) རྒྱལ་ཁབ་ཏུ་ཨེ་ཤ་ཡའི་ཞི་བདེ་རྒྱ་མཚོའི་ཚོང་དོན་མཉམ་ལས་(APEC) སྟེང་ཨ་རིའི་ལས་ཐོག་སྲིད་འཛིན་བྷའེ་ཌན་མཆོག་དང་རྒྱ་ནག་གི་མགོ་ཁྲིད་ཞི་གཉིས་ཀྱི་ཆེས་མཐའ་མཇུག་གི་ཐུག་འཕྲད་བྱས་ཡོད་ཅིང་། སྐབས་དེར་ཞི་ཅིན་ཕིན་གྱིས་ཨ་རྒྱ་གཉིས་ཀྱི་ཚོང་དོན་མཉམ་ལས་དང་། བརྟན་བརླིང་དང་། ཞི་བདེ་སོགས་ལ་དམིགས་ནས་ཨ་རྒྱ་གཉིས་ཀྱིས་ཕྱོགས་གཉིས་ཀྱི་ཁེ་ཕན་གཙོ་བོར་དམིགས་ནས་མུ་མཐུད་མཉམ་འབྲེལ་ལས་དོན་སྤེལ་རྒྱུ་ཡིན་པའི་ཁར། ཨ་རིའི་སྐབས་ ༤༧ པའི་འདེམས་ཐོན་སྲིད་འཛིན་ཊོམ་ཕུ་དང་ལྷན་མཉམ་འབྲེལ་གྱི་ལས་དོན་སྔར་ལྷག་སྤེལ་རྒྱུ་ཡིན་ལུགས་བཤད་ཡོད་ལ། ཟླ་སྔ་མའི་ཕྱི་ཚེས་ ༨ ཉིན་ཞི་ཡིས་སྐུ་ཞབས་ཊོམ་ཕུ་ཨ་རིའི་སྲིད་འཛིན་ཐེངས་༤༧ པར་འདེམས་ཐོན་བྱུང་བར་འཚམས་འདྲི་ཡང་བྱས་ཡོད་འདུག

ཕྱི་ལོ་ ༢༠༢༠ ཟླ་ ༡༢ ཚེས་ ༢༡ ཉིན་ཊོམ་ཕུ་མཆོག་གིས་རྩིས་ལོ་ ༢༠༢༡ ལོའི་ཨ་རིའི་སྔོན་རྩིས་ཁྲིམས་འཆར་ཁག་ལ་མཚན་རྟགས་བསྐྱོན་པ་དང་བསྟུན། ཨ་རིའི་སྔོན་རྩིས་ཀྱི་ཁོངས་སུ་མཉམ་སྦྱར་ཡོད་པའི་ཕྱི་ལོ་ ༢༠༢༠ ལོའི་བོད་དོན་སྲིད་ཇུས་དང་རྒྱབ་སྐྱོར་གྱི་ཁྲིམས་འཆར་དེ་དངོས་སུ་ཨ་རིའི་ཁྲིམས་སུ་གྱུར། ཤོག་ངོས་ ༢༡ ཅན་གྱི་ཁྲིམས་ཡིག་དེའི་ནང་༧གོང་ས་མཆོག་གི་སྐུའི་ཡང་སྲིད་ངོས་འཛིན་བྱ་རྒྱུའི་འགན་དབང་མགོན་པོ་གང་ཉིད་མཆོག་དང་བོད་མི་ཚོར་ཡོད་པ་དང་། བོད་བརྒྱུད་ནང་བསྟན་གྱི་བླ་སྤྲུལ་འདེམས་སྲོལ་སྔར་རྒྱུན་བཞིན་བོད་མི་དང་། མགོན་པོ་གང་ཉིད་མཆོག་གི་ལམ་སྟོན་གཞིར་བཟུང་བྱ་རྒྱུ་ལས་རྒྱ་ནག་གཞུང་གིས་ཐེ་གཏོགས་བྱས་མི་ཆོག་པ་དང་། རྒྱ་ནག་གི་མགོ་ཁྲིད་སུ་ཞིག་གིས་༧གོང་ས་མཆོག་གི་ཡང་སྲིད་བསྐོ་བཞག་གི་བྱ་སྤྱོད་སྤེལ་ཚེ། ཨ་རིའི་གཞུང་ནས་ཁོ་ཚོའི་རྒྱུ་དངོས་དང་ཨ་རིར་ཡོང་རྒྱུ་བཀག་འགོག་བྱ་རྒྱུ་མ་ཟད། རྒྱ་ནག་གཞུང་གིས་༧གོང་ས་མཆོག་གི་ཡང་སྲིད་ལ་ཐེ་གཏོགས་བྱ་རྒྱུ་མཚམས་འཇོག་དང་བོད་མི་ཚོས་༧གོང་ས་མཆོག་གི་ཡང་སྲིད་འདེམས་སྒྲུག་གི་རང་དབང་སྲུང་སྐྱོབ་སླད་ཨ་རིའི་གཞུང་གིས་རྒྱལ་སྤྱིའི་རྒྱབ་སྐྱོར་འཐོབ་ཐབས་བྱ་རྒྱུ་ཡིན་པ་རེད།

ཕྱི་ལོ་ ༢༠༢༤ ལོའི་ཨ་རིའི་སྲིད་འཛིན་གྱི་རྒྱལ་ཡོངས་འོས་བསྡུའི་ཁྲོད། དམངས་གཙོ་ཚོགས་པའི་འོས་མི་ཀཱ་མ་ལ་ཧེ་རེ་སིར་འོས་གྲངས་ ༢༢༦ དང་། སྤྱི་མཐུན་ཚོགས་པའི་འོས་མི་སྲིད་འཛིན་ཟུར་པ་ཊོམ་ཕུ་ལ་འོས་གྲངས་ ༢༩༥ ཐོབ་སྟེ། ཊོམ་ཕུ་སྐབས་ ༤༧ པའི་ཨ་རིའི་སྲིད་འཛིན་དུ་འདེམས་ཐོན་བྱུང་ཞིང་། ཕྱི་ལོ་ ༢༠༢༥ ལོའི་ཟླ་ ༡ ཚེས་ ༢༠ ཉིན་དངོས་སུ་སྲིད་འཛིན་གྱི་ལས་འཁུར་དམ་འབུལ་ཞུ་གཏན་ཁེལ་ཡོད།

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། སྐལ་བཟང་སྦྱིན་པ།