བལ་ཡུལ་གཞུང་གིས་རྒྱ་ནག་གཞུང་གིས་ངོས་འཛིན་བྱས་ཏེ་ཆབ་སྲིད་ཀྱི་ལག་ཆར་བཀོལ་མུས་ཡིན་པའི་པཎ་ཆེན་རྒྱལ་མཚན་ནོར་བུ་ཟེར་བ་བལ་ཡུལ་ནང་ཡོང་མི་འཇུག་རྒྱུའི་རེ་སྐུལ་ཞུས་འདུག
ཟླ་འདིའི་ཕྱི་ཚེས་༡༣ ཉིན་ནས་རྒྱ་ནག་གཞུང་གིས་ངོས་འཛིན་བྱས་པའི་པཎ་ཆེན་རྒྱལ་མཚན་ནོར་བུ་ཟེར་བ་བལ་ཡུལ་གྱི་རྒྱལ་ས་ཀ་ཐི་མན་ཌུ་དང་ལུམ་བི་ནི་ཁུལ་དུ་ཡོང་གི་ཡོད་པ་ལྟར། ཁ་སང་ཕྱི་ཚེས་ ༡༡ ཉིན་དབུས་བོད་ཀྱི་གཞོན་ནུ་ལྷན་ཚོགས་ཀྱིས་ངོ་རྒོལ་བསྒྲགས་གཏམ་ཞིག་སྤེལ་བའི་ཁྲོད། རྒྱ་གཞུང་གིས་རྒྱལ་མཚན་ནོར་བུ་བེད་སྤྱོད་བྱས་ཏེ་བོད་མི་རིགས་ཀྱི་ཆིག་སྒྲིལ་རང་བཞིན་ལ་གཏོར་བཤིག་གཏོང་གིན་ཡོད་སྐོར་སོགས་གསལ་འདུག
དབུས་བོད་ཀྱི་གཞོན་ནུ་ལྷན་ཚོགས་ཀྱིས་སྤེལ་བའི་བསྒྲགས་གཏམ་ཁྲོད། བོད་ཀྱི་གཞོན་ནུ་ལྷན་ཚོགས་ཀྱིས་བློ་འཚབ་ཆེན་པོའི་ངང་ནས་བོད་ནང་རྒྱ་ནག་གུང་ཁྲན་ཏང་གིས་བསྐོ་བཞག་བྱས་པའི་པཎ་ཆེན་རྒྱལ་མཚན་ནོར་བུ་བལ་ཡུལ་དུ་ཡོང་འཆར་ཡོད་པའི་གནས་ཚུལ་གོ་ཐོས་བྱུང་། རྒྱལ་མཚན་ནོར་བུ་ནི་རྒྱ་གཞུང་གིས་བསྐོ་བཞག་བྱས་པ་ཞིག་ཡིན་པ་མ་ཟད། པཎ་ཆེན་རིན་པོ་ཆེའི་མཚན་གནས་བེད་སྤྱོད་ཀྱིས་བོད་མི་རིགས་ཀྱི་ཆོས་ཕྱོགས་དང་རིག་གཞུང་ལ་སྟངས་འཛིན་བྱས་ཏེ་བོད་ས་ཡོངས་སུ་དབང་སྒྱུར་བྱེད་པའི་ཆབ་སྲིད་ཀྱི་ལག་ཆ་ཞིག་ལ་བེད་སྤྱོད་གཏོང་གི་ཡོད། ཅེས་གསལ་འདུག
བསྒྲགས་གཏམ་ཁྲོད། གཞིས་བྱེས་བོད་མི་ཡོངས་ནས་རྒྱ་གཞུང་གིས་བོད་ཀྱི་ཆོས་ཕྱོགས་དང་འབྲེལ་བའི་གནད་དོན་ཁག་ལ་ཐེ་ཇུས་དམ་དྲག་གང་བྱས་ལ་ངོས་ལེན་རྩ་བ་ནས་མེད་ལ། རྒྱ་གཞུང་གིས་རྒྱལ་མཚན་ནོར་བུ་བེད་སྤྱོད་བྱས་ཏེ་བོད་མི་རིགས་ཀྱི་ཆིག་སྒྲིལ་རང་བཞིན་ལ་གཏོར་བཤིག་དང༌། བོད་མི་ཡོངས་ཀྱི་དད་མོས་ཆེ་བའི་ཆོས་ཕྱོགས་ཀྱི་དབུ་ཁྲིད་ཅིག་ལ་འཇོག་རྒྱུའི་ངན་སེམས་འཆང་བཞིན་ཡོད། འོན་ཀྱང་བོད་མི་ཡོངས་ཀྱི་ཆོས་ཕྱོགས་ཀྱི་དབུ་ཁྲིད་གཙོ་བོ་ནི་སྤྱི་ནོར་༧གོང་ས་ྋསྐྱབས་མགོན་ཆེན་པོ་མཆོག་ཡིན་པ་དང་། ཁོང་གིས་ངོས་འཛིན་གནང་བའི་”༧པཎ་ཆེན་བསྟན་འཛིན་དགེ་འདུན་ཡེ་ཤེས་འཕྲིན་ལས་ཕུན་ཚོགས་དཔལ་བཟང་པོ་མཆོག་ནི་བོད་མི་རིགས་ཀྱི་ཆོས་ཕྱོགས་ཀྱི་དབུ་ཁྲིད་ངོ་མ་དེ་ཡིན། ཁོང་ནི་ཕྱི་ལོ་ ༡༩༩༥ ཟླ་ ༥ ཚེས་ ༡༧ ཉིན་དགུང་ལོ་དྲུག་ལ་ཕེབས་སྐབས་རྒྱ་ནག་གི་བཙན་འོག་ཏུ་གར་སོང་ཆ་མེད་དུ་གྱུར་ཡོད། ང་ཚོས་ཆུང་སྲིད་རིན་པོ་ཆེ་བཙོན་གྲོལ་མྱུར་དུ་གཏང་དགོས་པའི་ནན་སྐུལ་བྱེད་བཞིན་ཡོད། ཅེས་གསལ་འདུག
ཡང་བསྒྲགས་གཏམ་ནང་། གལ་སྲིད་རྒྱལ་མཚན་ནོར་བུ་བལ་ཡུལ་ནང་ཆོས་ཕྱོགས་ཀྱི་བྱེད་སྒོའི་ནང་འཛུལ་ཞུགས་བྱེད་དུ་བཅུག་ཚེ། བལ་ཡུལ་གཞུང་གིས་རང་གི་རྒྱལ་ཁབ་ཀྱི་ལོ་རྒྱུས་ལྡན་པའི་ཆོས་ལུགས་འཆམ་མཐུན་དང༌། ལྷག་པར་ནང་པའི་ལྟ་གྲུབ་དང་འབྲེལ་བའི་ཐད་འགལ་བ་འགྲོ་བཞིན་ཡོད། དེ་འདྲའི་འཚམས་གཟིགས་གང་འདྲ་ཞིག་ཡིན་རུང་བལ་ཡུལ་གཞུང་གིས་འཕྲལ་སེལ་ཆབ་སྲིད་ཀྱི་ཁེ་ཕན་ཆེད་དུ་རྒྱ་ནག་གི་ཆོས་ཕྱོགས་ལས་དོན་ཐད་ཐེ་ཇུས་ལ་ངོས་ལེན་བྱེད་པ་ནི་ང་ཚོའི་ངོས་ནས་ངོས་ལེན་རྩ་བ་ནས་མེད། བལ་ཡུལ་གྱིས་རྒྱ་ནག་གཞུང་གི་ཐེ་ཇུས་རྣམ་པ་གང་འདྲ་ཞིག་ཡིན་རུང་ངོས་ལེན་མི་བྱ་རྒྱུའི་རེ་སྐུལ་དང་། ཁྲིམས་ལུགས་ལྟར་ཆོས་དད་རང་དབང་དང་། འགྲོ་བ་མིའི་ཐོབ་ཐང་ལ་རྒྱབ་སྐྱོར་གྱི་ཁས་ལེན་བསྐྱར་ནན་གནང་སྐྱོང་ཡོང་བ་ཞུ་རྒྱུ་དང་། བལ་ཡུལ་ནི་རྒྱ་ནག་གིས་བོད་ཀྱི་ནང་ཆོས་ལ་ཚོད་འཛིན་བྱེད་པའི་ལག་ཆར་མི་འགྱུར་བའི་རེ་བ་དང༌། བོད་ཀྱི་ནང་ཆོས་ཐད་དགྲ་བོ་རྒྱ་གཞུང་གི་སྲིད་ཇུས་ལ་ངོ་རྒོལ་མཐའ་གཅིག་ཏུ་ཡོད། ཅེས་གསལ་འདུག
ཕྱི་ལོ་ ༡༩༩༥ ཟླ་བ་ ༡༡ ཚེས་ ༡༡ ཉིན་རྒྱ་ནག་དམར་ཤོག་ཚོགས་པས་རྒྱལ་མཚན་ནོར་བུ་ཞེས་པ་ཞིག་པཎ་ཆེན་སྐུ་ཕྲེང་བཅུ་པའི་ཡང་སྲིད་དུ་ངོས་འཛིན་གསལ་བསྒྲགས་བྱས་ཤིང་། ཕྱི་ལོ་ ༡༩༩༥ ཟླ་བ་ ༡༢ ནང་གདན་ས་བཀྲ་ཤིས་ལྷུན་པོའི་གཡས་གཡོན་དུ་དམག་མི་ལྔ་བརྒྱ་ལྷག་བཏང་ནས་ཉེན་སྲུང་བཙན་པོའི་ངང་ཁྲི་འདོན་བྱས་ཡོད་འདུག ཕྱི་ལོ་ ༢༠༡༩ ཟླ་ ༦ ཚེས་ ༢༢ ཉིན་རྒྱལ་མཚན་ནོར་བུ་ཐོག་མར་བོད་རང་སྐྱོང་ལྗོངས་ཟེར་བའི་ནང་བསྟན་མཐུན་ཚོགས་ཀྱི་ཚོགས་གཙོར་བསྐོས་ཤིང་། འདི་ལོའི་ཕྱི་ཟླ་ ༩ ཚེས་ ༣ ཉིན་རྒྱལ་མཚན་ནོར་བུ་བསྐྱར་དུ་བོད་རང་སྐྱོང་ལྗོངས་ཟེར་བའི་ནང་བསྟན་མཐུན་ཚོགས་ཀྱི་ཚོགས་གཙོར་བསྐོ་བཞག་བྱས་ཡོད། ད་ལྟ་ཁོང་རྒྱ་ནག་ནང་བསྟན་མཐུན་ཚོགས་ཀྱི་ཚོགས་གཞོན་ཡང་ཡིན་འདུག
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
