རྒྱ་ནག་གི་གསང་ཉུལ་བ་དང་དབྱིན་ཇིའི་རྒྱལ་སྲས་གསང་འབྲེལ། 

རྒྱ་ནག་གི་གསང་ཉུལ་བ་ཡང་ཟེར་བས་དབྱིན་ཡུལ་གྱི་རྒྱལ་སྲས་དང་ལྷན་གསང་བའི་སྒེར་འབྲེལ་བཟུང་ཡོད་པའི་གནས་ཚུལ་ཐེར་འདོན་བྱས་འདུག

དེ་རིང་རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་གནས་ཚུལ་སྤེལ་བ་ལྟར་ན། ཁ་སང་ཕྱི་ཚེས་ ༡༦ ཉིན་དབྱིན་ཡུལ་གྱི་ཆེས་མཐོའི་ཁྲིམས་ཁང་ཞིག་གིས་རྒྱ་ནག་གི་གསང་ཉུལ་བ་ཡང་ཐཱན་པཱོ་( Yang Tengbo) ཟེར་བས་དབྱིན་ཇིའི་རྒྱལ་སྲས་ཨེན་ཌི་(Prince Andrew, Duke of York) དང་གསང་འབྲེལ་བྱས་ཡོད་པའི་གནས་ཚུལ་ཐེར་འདོན་བྱས་ཏེ། རྒྱལ་སྲིད་བདེ་འཇགས་ཀྱི་གནད་དོན་འོག་ནས་ཡང་དན་པཱོ་དབྱིན་ཡུལ་ནས་ཕྱིར་བསྐྱོད་མི་ཆོག་པའི་བཀག་རྒྱ་བསྒྲགས་ཡོད་ཅིང་། ད་ལྟ་གནད་དོན་དེ་ནི་དབྱིན་ཇིའི་ནང་རྒྱ་ནག་གི་ཤུགས་རྐྱེན་སྤྲོད་ཐབས་བྱེད་བཞིན་པའི་གྱོད་དོན་ཞིག་ཆགས་ཡོད་པ་མ་ཟད། དབྱིན་ཡུལ་གཙོས་འཛམ་གླིང་གི་ས་ཕྱོགས་གང་སར་ནས་ཚ་གླེང་ཆེ་ཤོས་བྱེད་མུས་ཡིན་པའི་གནད་དོན་ཅིག་ཏུ་འགྱུར་མུས་ཡིན་འདུག

གནད་དོན་དེའི་ཐད་དེ་རིང་དབྱིན་ཡུལ་དུ་རྟེན་གཞི་བྱས་པའི་རྒྱ་ནག་གཞུང་ཚབ་ཁང་གིས་བསྒྲགས་གཏམ་ཞིག་སྤེལ་བའི་ནང་། དབྱིན་ཇིའི་གྲོས་ཚོགས་འཐུས་མི་ཁག་ཅིག་གིས་རྒྱ་ནག་ལ་ངོ་རྒོལ་གྱི་སྐད་ཆ་ལས་ཁོང་ཚོའི་ང་རྒྱལ་དང་ངོ་ཚ་མེད་པའི་རང་གཤིས་ཤིག་མངོན་ཡོང་གི་ཡོད་པ་མ་ཟད།  རྐུན་མའི་ཞྭ་མོ་གཡོགས་པ་ལྟ་བུ་ཞིག་རེད། ཅེས་དང་།  ཁོང་ཚོས་དབྱིན་ཡུལ་དུ་ཡོད་པའི་རྒྱ་རིགས་སྤྱི་ཚོགས་ལ་གཙོ་བོར་དམིགས་ནས། ཕྱོགས་གཉིས་ཀྱི་རྒྱུན་ལྡན་གྱི་འགྲོ་འོང་ལ་གཏོར་བཤིག་གཏོང་བ་བཅས་ཀྱི་དམིགས་ཡུལ་འཆང་ཡོད། ང་ཚོས་ངོ་རྒོལ་མཐའ་གཅིག་ཏུ་བྱ་རྒྱུ་ཡིན། ཞེས་བརྗོད་འདུག་ལ།  རྒྱ་ནག་གཞུང་གིས་རྒྱལ་ཁབ་ཁག་ལ་བརྩི་བཀུར་དང་། མཉམ་གནས་འཕེལ་རྒྱས། ནང་སྲིད་ལ་ཐེ་གཏོགས་མི་བྱེད་པར་མཉམ་ལས་ཀྱི་ལས་དོན་གཉེར་རྒྱུ་སོགས་ཀྱི་ཐད་ལ་མཉམ་ལས་བྱ་འདོད་ཡོད་ལུགས་སོགས་བཤད་འདུག

དེ་བཞིན་དབྱིན་ཡུལ་ནང་སྲིད་ལས་ཁུངས་ཀྱིས་རྒྱ་ནག་གི་གསང་ཉུལ་བ་ཡང་ཟེར་བས། དབྱིན་ཡུལ་གྱི་མཐོ་རིམ་མི་སྣ་དང་རྒྱ་ནག་གི་དཔོན་རིགས་བར་འབྲེལ་ལམ་འཛུགས་ཐབས་གང་ཡོང་བྱས་ཡོད་པའི་དཔང་རྟགས་ལོན་ཡོད་པའི་ཁར། དབྱིན་ཡུལ་རྒྱལ་སྲས་ཀྱིས་ཁོ་ལ་གསང་འབྲེལ་བྱས་ཏེ་ཁེ་ཕན་ལེན་ཐབས་བྱས་ཡོད་པའི་དཔང་རྟགས་རིགས་མང་པོ་ཞིག་ལོན་ཡོད་ནའང་། བདུན་ཕྲག་སྔ་མར་རྒྱལ་སྲས་ཨེན་ཌི་ཡིག་ཚང་གིས།  རྒྱལ་སྲས་ཀྱིས་དབྱིན་ཡུལ་སྲིད་གཞུང་གི་ལམ་སྟོན་གྱི་འོག་ནས་ཡིག་ཚང་གི་བརྒྱུད་ལམ་ཐོག་ནས་ཁོ་ལ་སྒེར་འབྲེལ་ཞིག་བྱས་པ་ལས། ཚོར་སྣང་སྐྱེན་པའི་གནད་དོན་གྱི་རིགས་ལ་གླེང་སློང་གང་ཡང་བྱས་མེད། ཅེས་བརྗོད་འདུག

རྒྱ་མི་ཡང་ཟེར་བ་ནི་རྒྱ་ནག་གི་འཐབ་ཕྱོགས་གཅིག་གྱུར་ལས་ཁང་གི་ལས་དོན་སྒྲུབ་མཁན་ཞིག་ཡོད་པའི་དོགས་གཞི་ཆེན་པོ་བྱུང་ཡོད་ཅིང་། ཁོའི་ལས་འགན་ནི་ཕྱི་ནང་གཉིས་སུ་རྒྱ་ནག་དམར་ཤོག་ཚོགས་པའི་ཤུགས་རྐྱེན་གང་མང་སྤྲོད་ཐབས་བྱ་རྒྱུ་དེ་ཡིན་པའི་ཁར།  འཐབ་ཕྱོགས་གཅིག་གྱུར་ཁང་གིས་རྒྱ་ནག་དམར་ཤོག་ཚོགས་པར་ཕྱིའི་རྒྱལ་ཁབ་ཁག་གི་ཆབ་སྲིད་པ་དང་མི་སྣ་གྲགས་ཅན་ཚོའི་རྒྱབ་སྐྱོར་ཐོབ་རྒྱུའི་ལས་དོན་སྒྲུབ་པ་དང་། རྒྱ་ནག་གཞུང་གི་ལྡོག་ཕྱོགས་ནས་ལང་མཁན་གྱི་རྒྱལ་སྤྱིའི་ཆབ་སྲིད་ཀྱི་མི་སྣ་ཚོར་སྐྱོན་བརྗོད་དང་ཉེས་འཛུགས་བྱ་རྒྱུ་དེ་ཡིན་འདུག་ལ། གནད་དོན་དེ་དང་འབྲེལ་ནས་གནད་དོན་དབྱེ་ཞིབ་པ་མང་པོ་ཞིག་གིས། རྒྱ་ནག་གཞུང་གིས་རྒྱལ་སྤྱིར་མིང་གྲགས་ཡོད་པའི་གནད་ཡོད་མི་སྣ་དང་། ཚོང་པ་སོགས་ལ་འབྲེལ་ལམ་གསར་འཛུགས་ཀྱིས། ཕྱིའི་རྒྱལ་ཁབ་མང་པོ་ཞིག་ཏུ་རྒྱ་ནག་དམར་ཤོག་རིང་ལུགས་ཀྱི་སྟོབས་ཤུགས་དང་ཤུགས་རྐྱེན་སྐྱེད་ཐབས་གང་མང་བྱེད་ཀྱིན་ཡོད་པའི་ཚོད་དཔག་བྱེད་ཀྱིན་འདུག

རྒྱ་ནག་གི་ཚོང་པ་ཡང་ཐཱན་པཱོ་ཟེར་བས་ཡུན་ནན་མཐོ་རིམ་སློབ་གཉེར་ཁང་ནས་ལོ་རྒྱུས་དང་ཡིག་ཚགས་ཐོག་རིག་གནས་རབ་འབྱམས་པའི་བསླབ་པ་མཐར་སོན་བྱུང་། ཕྱི་ལོ་ ༢༠༠༢ ལོར་དབྱིན་ཡུལ་དུ་ཡོང་སྟེ་ཡོག་གཙུག་ལག་སློབ་གཉེར་ཁང་(University of York) ནས་གཙུག་ལག་རབ་འབྱམས་པའི་ལག་འཁྱེར་བླངས། ཕྱི་ལོ་ ༢༠༠༥ ལོར་ཁོས་དབྱིན་ཡུལ་གྱི་རྒྱལ་ས་ལོན་ཌོན་དུ་དབྱིན་རྒྱ་གཉིས་ཀྱི་ཚོང་ལས་ཁང་བར་མཉམ་ལས་བྱ་སའི་རྒྱལ་སྤྱིའི་ཧམ་ཕུ་ཌོན་(Hampton Group International) ཞེས་པ་ཞིག་གསར་འཛུགས་བགྱིས།

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། སྐལ་བཟང་སྦྱིན་པ།