རྒྱ་དཀར་ནག་བར་གནད་དོན་དྲུག་གི་ཐོག་མཉམ་ལས་བྱ་རྒྱུའི་མོས་མཐུན་བྱུང་།

རྒྱ་དཀར་ནག་གཉིས་ཀྱི་ཆེས་མཐོའི་གནད་ཡོད་མི་སྣའི་ཐུག་འཕྲད་ཐོག་སྣ་ཐོད་ལའི་ཚོང་ལམ་དང་གངས་རིན་པོ་ཆེའི་གནས་མཇལ་འགག་སྒོ་ཕྱེ་རྒྱུ་མཚོན་པའི་གནད་དོན་དྲུག་གི་ཐོག་མཉམ་འབྲེལ་མོས་མཐུན་བྱུང་འདུག

The 23rd Meeting of SRs on India-China Boundary Question (Embassy of India in Beijing)

ཁ་སང་ཕྱི་ཚེས་ ༡༨ ཉིན་རྒྱ་གར་གྱི་བདེ་སྲུང་སློབ་སྟོན་པ་སྐུ་ཞབས་ཨ་ཇི་ཐི་དྷོ་ཝལ་(Ajit Doval ) དང་རྒྱ་ནག་ཕྱི་སྲིད་བློན་ཆེན་ཝང་ཡི་(Wang Yi) གཉིས་ཀྱི་སྣེ་འཁྲིད་པའི་ཚོགས་ཆུང་གིས་རྒྱ་ནག་གི་རྒྱལ་ས་པེ་ཅིན་དུ་ཐུག་འཕྲད་བྱས་ཏེ། རྒྱ་དཀར་ནག་གཉིས་ཀྱི་ཧིན་བོད་མཐའ་མཚམས་ཀྱི་རྩོད་གླེང་ཞི་འཇགས་ཡོང་ཐབས་དང་། སྣ་ཐོད་ལའི་ཚོང་ལམ་དང་གངས་རིན་པོ་ཆེར་གནས་མཇལ་འགག་སྒོ་ཁག་སླར་གསོ་བྱ་རྒྱུ་ཡིན་པ་སོགས་དང་འབྲེལ་པའི་དོན་ཚན་དྲུག་ཅན་ཞིག་ལ་མོས་མཐུན་བྱུང་འདུག

གནད་དོན་དེའི་ཐད་རྒྱ་གར་ཕྱི་སྲིད་བློན་ཆེན་ལས་ཁུངས་ཀྱིས་བསྒྲགས་གཏམ་ཞིག་སྤེལ་བའི་ཁྲོད། འདི་ལོའི་ཕྱི་ཟླ་ ༡༠ ནང་རྒྱ་གར་གྱི་སྲིད་བློན་མུ་དྷི་མཆོག་དང་ཞི་ཅིན་ཕིན་གཉིས་ཀྱི་ཐུག་འཕྲད་སྐབས་རྒྱལ་ཁབ་གཉིས་ཀྱི་མཐའ་མཚམས་རྩོད་གླེང་དང་དཀའ་རྙོག་ཞི་ཐབས་བྱས་ཡོད་པའི་སྐོར་ལ། ད་ལན་སྐུ་ཞབས་ཨ་ཇི་ཐི་དྷོ་ཝལ་དང་རྒྱ་ནག་གི་ཕྱི་སྲིད་བློན་ཆེན་བར་ཕྱོགས་གཉིས་ཀྱི་མོས་མཐུན་ལྡན་པའི་ཐབས་ལམ་འཚོལ་ཐབས་སྐོར་གླེང་སློང་བྱས་ཡོད་སྐོར་དང་། རྒྱ་དཀར་ནག་གི་འབྲེལ་ལམ་གོང་མཐོར་བཏང་ནས་མཚོ་ལམ་ཚུད་པའི་ཚོང་དོན་སྤེལ་རྒྱུར་མོས་མཐུན་བྱུང་ཡོད་སྐོར་སོགས་གསལ་འདུག

རྒྱ་གར་དུས་བབ་གསར་ཁང་ལྟར་ན། རྒྱ་ནག་གི་ཕྱི་སྲིད་བློན་ཆེན་ཝང་ཡི་ཟེར་བས། རྒྱ་དཀར་ནག་གཉིས་ཀྱི་འབྲེལ་ལམ་ནི་འཛམ་གླིང་ཡོངས་ཀྱི་ཞི་བདེ་དང་བརྟན་བརླིང་ལ་འབྲེལ་བ་ཆེན་པོ་ཡོད་ལུགས་དང་འབྲེལ་ནས། ཕྱོགས་གཉིས་ཀྱིས་མཉམ་འབྲེལ་གྱི་ནུས་པ་གོང་མཐོར་བཏང་སྟེ། སྣ་ཐོད་ལའི་ཚོང་འབྲེལ་འགག་སྒོ་སོགས་སྒོ་ཕྱེ་རྒྱུ་ཡིན་པའི་ཁར། ཧིན་བོད་མཐའ་མཚམས་ཀྱི་རྩོད་རྙོག་ཞི་འགྲིག་ཡོང་ཐབས་སུ་ཕྱོགས་གཉིས་ཀྱིས་རྒྱལ་མཚམས་ས་ཐིག་ཁུལ་དུ་འཛུགས་སྐྲུན་གྱི་ལས་གཞི་སྤེལ་ནས། རྒྱ་དཀར་ནག་གི་ཆེས་མཐོའི་དཔོན་རིགས་དང་དམག་དོན་མི་སྣ་ཐུག་འཕྲད་ཀྱིས་ས་ཚིགས་བསྐྲུན་ཐབས་བྱ་རྒྱུ་ཡིན་ལུགས་སོགས་བཤད་ཡོད་འདུག

ད་ལན་གྱི་རྒྱ་དཀར་ནག་གཉིས་ཀྱི་ཆེས་མཐོའི་མི་སྣའི་ཐུག་འཕྲད་དེའི་སྟེང་། ཕྱོགས་གཉིས་ཀྱི་མཐའ་མཚམས་སྲུང་སྐྱོབ་ཀྱིས་མཉམ་འབྲེལ་འཕེལ་རྒྱས་ལ་གནོད་འཚེ་མི་གཏོང་བར་ཚགས་ཚུད་དང་ལྷིང་འཇགས་རང་བཞིན་གྱི་ཐོག་ནས་མཉམ་ལས་སྤེལ་རྒྱུ། ཕྱི་ལོ་ ༢༠༠༥ ལོའི་རྒྱ་དཀར་ནག་གཉིས་ཀྱི་ཧིན་བོད་མཐའ་མཚམས་ཀྱི་དམག་དོན་དང་འབྲེལ་བའི་མཉམ་འབྲེལ་ཡིག་ཆ་བསྐྱར་གསོ་དང་མུ་མཐུད་དྲང་བདེན་གྱི་ལམ་ནས་གཙི་སྲུང་གནང་ཐབས། ཕྱོགས་གཉིས་ཀྱིས་མཉམ་ལས་དང་བརྟན་བརླིང་གི་ཐོག་ནས་མཐའ་མཚམས་འཛུགས་སྐྲུན་གྱི་ལས་དོན་ལ་གཞོལ་རྒྱུ། ཕྱོགས་གཉིས་ཀྱི་མཉམ་འབྲེལ་ཚོང་དོན་སླད་སྣ་ཐོད་ལའི་ཚོང་དོན་འགག་སྒོ་ཕྱེ་རྒྱུ་དང་། ཧིན་དྷུའི་ཆོས་པ་རྣམས་བོད་ནང་གི་གངས་རིན་པོ་ཆེར་གནས་མཇལ་གཏང་རྒྱུ། ཕྱོགས་གཉིས་ཀྱིས་ཧིན་བོད་མཐའ་མཚམས་སུ་དམིགས་བསལ་དཔོན་རིགས་ཐུག་འཕྲད་དང་གྲོས་མོལ་གྱིས་ས་ཚིགས་བསྐྲུན་ཐབས། ལོ་རྗེས་མར་རྒྱ་གར་དུ་ཕྱོགས་གཉིས་ཀྱི་ཆེས་མཐོའི་སྐུ་ཚབ་ཚོགས་ཆུང་གི་ཚོགས་འདུ་ཞིག་བསྡུ་རྒྱུ་བཅས་ཀྱི་དོན་ཚན་དྲུག་ལ་མོས་མཐུན་བྱུང་འདུག

ཕྱི་ལོ་ ༢༠༢༠ ཟླ་ ༦ ཚེས་ ༡༥ ཉིན་བོད་དང་རྒྱ་གར་གྱི་ས་མཚམས་སུ་ཁེལ་བའི་གྷལ་ཝན་ལུང་གཤོངས་སུ་རྒྱ་དཀར་ནག་གཉིས་ཀྱི་དམག་མིའི་བར་དྲག་པོའི་འཁྲུག་འཛིང་ཤོར་ཏེ། རྒྱ་གར་གྱི་མཐའ་སྲུང་དམག་མི་ ༢༠ དང་རྒྱ་ནག་གི་མཐའ་སྲུང་དམག་མི་ ༤ ཡི་ཚེ་སྲོག་ཤོར་ཡོད་པའི་གནས་ཚུལ་ཐོན། ཕྱོགས་གཉིས་བར་ཐེངས་མང་པོར་གྲོས་མོལ་བྱས་ཡོད་ཀྱང་དོན་འབྲས་དེ་ཙམ་ཐོན་མེད་པར་བརྟེན་འཁོན་འཛིང་ཆེ་རུ་ཕྱིན་ཏེ། འདས་པའི་ལོ་ཤས་རིང་རྒྱ་དཀར་ནག་གཉིས་བར་ཧིན་བོད་མཐའ་མཚམས་ཁུལ་དུ་གདོང་ཐུག་ཡང་ཡང་བྱུང་ནས་གནས་སྟངས་ཛ་དྲག་ཅན་དུ་གྱུར། དེ་བཞིན་ཕྱོགས་གཉིས་ནས་མཐའ་མཚམས་བརྟན་སྲུང་ཆེད་གཞུང་ལམ་དང་དམག་དོན་ལྟེ་གནས་སྔར་ལས་མང་པོ་འཛུགས་སྐྲུན་བྱས་ཏེ་དམག་དོན་ནུས་པ་གོང་སྤེལ་དུ་གཏོང་བཞིན་ཡོད་པ་མ་ཟད། དེ་རིང་རྒྱ་གར་ཧིན་དྷུ་སི་ཐན་དུས་བབ་གསར་ཁང་གིས་གནས་ཚུལ་སྤེལ་བའི་ཁྲོད། འདས་པའི་ལོ་ཤས་རིང་རྒྱ་ནག་གཞུང་གིས་ཕྱི་ལོ་ ༢༠༡༧ ལོར་རྒྱ་དཀར་ནག་གི་དམག་མི་གདོང་ཐུག་བྱུང་སའི་འབྲོག་ལམ་ཁུལ་དུ། ཉུང་མཐར་ཡང་དུད་ཚང་ ༢༢ ཅན་གྱི་གྲོང་ཚོ་ཞིག་གསར་འཛུགས་ཀྱིས་ཁུལ་དེར་བརྟན་སྲུང་དང་འབྲུག་རྒྱལ་ཁབ་ཁུལ་དུ་རྒྱ་ནག་གཞུང་གི་དབང་སྐྱེད་གང་ཐུབ་བྱེད་མུས་ཡིན་པའི་གནས་ཚུལ་ཤེས་རྟོགས་བྱུང་འདུག