རྒྱ་ནག་བཅིངས་གྲོལ་དམག་གི་དམག་སྤྱི་ཆེན་མོ་གཞོན་པ་ཡུ་ཧའེ་ཐའོ་ (You Haitao) དང་། མཚོ་དམག་སྤྱི་ཁྱབ་ཟུར་པ་ལི་ཕན་ཁྲང་ (Li Pengcheng) གཉིས་ཀྱིས་དམར་ཤོག་ཚོགས་པའི་ཁྲིམས་སྒྲིག་དང་འགལ་ཡོད་པའི་ཉེས་མིང་འོག་ལས་གནས་ནས་ཕྱིར་ཕུད་བཏང་ཡོད་འདུག
དེ་རིང་རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། ཁ་སང་ཕྱི་ཚེས་ ༢༥ ཉིན་རྒྱ་ནག་མི་དམངས་རྒྱལ་ཡོངས་འཐུས་མི་ཚོགས་ཆེན་གྱི་རྒྱུན་ལས་ཚང་འཛོམས་སྐབས། རྒྱ་ནག་བཅིངས་གྲོལ་དམག་གི་དམག་སྤྱི་གཞོན་པ་ཡུ་ཧའེ་ཐའོ་དང་། ལྷོ་རྒྱ་ནག་རྒྱ་མཚོའི་ཁུལ་གྱི་མཚོ་དམག་སྤྱི་ཁྱབ་ལི་ཧྥང་ཁྲང་གཉིས་ཀྱིས་སྒྲིག་འགལ་ཚབས་ཆེན་བྱས་པའི་ཉེས་མིང་འོག་ལས་གནས་ནས་ཕྱིར་ཕུད་བཏང་ཡོད་ཚུལ་བརྗོད་པ་ལས་རྒྱུ་རྐྱེན་གཞན་ཁ་གསལ་མེད་འདུག
གནད་དོན་དེའི་ཐད་ཨ་རིའི་རྒྱལ་སྲུང་ལྷན་ཁང་གིས། རྒྱ་ནག་གིས་དཔོན་རིགས་ཁག་ལ་ལྐོག་ཟ་རུལ་སུངས་བྱས་ཡོད་པའི་ཉེས་མིང་འོག་ནས་ཞིབ་བཤེར་དང་ཁྲིམས་ཐག་བཅད་པའི་གནད་དོན་དེས་རྒྱ་ནག་གི་དམག་དཔུང་དེང་རབས་ཅན་དུ་བསྒྱུར་བའི་དམིགས་ཡུལ་འགྲུབ་པར་འགོག་རྐྱེན་བཟོ་ཡི་ཡོད་སྐོར་བརྗོད་འདུག
རང་ལོ་ ༦༦ ཡིན་པའི་ཡུ་ཧའེ་ཐའོ་ནི་ནན་ཅིན་ཁུལ་གྱི་དམག་དཔུང་ (Nanjing Military Region) གི་དམག་སྤྱི་ཆེན་མོ་གཞོན་པ་ཡིན་ཞིང་། ཕྱི་ལོ་ ༢༠༡༤ ལོར་ནན་ཅིན་དམག་སྒར་གྱི་དམག་སྤྱི་གཞོན་པར་བསྐོ་གཞག་བྱས། དེ་ནས་ཕྱི་ལོ་ ༢༠༡༦ ལོར་རྒྱ་ནག་བཅིངས་གྲོལ་དམག་གི་རྐང་དམག་དམག་སྤྱི་ཆེན་མོ་གཞོན་པའི་ལས་འགན་ཁུར། གཞན་ཡང་། རང་ལོ་ ༦༡ ཡིན་ལི་ཕན་ཁྲང་ནི་རྒྱ་ནག་བཅིངས་གྲོལ་དམག་གི་ལྷོ་རྒྱུད་དམག་སྤྱི་གཞོན་པ་སྟེ། ལྷོ་རྒྱ་ནག་རྒྱ་མཚོའི་ཁུལ་དུ་ལྟ་སྲུང་བྱེད་པའི་དམག་དཔུང་གི་སྡེ་ཁག་ཡིན་ཞིང་། མཚོ་དམག་གི་ལག་ཆའི་སྦྱོང་བརྡར་བསྟི་གནས་ཁང་ (Navy Equipment Research Institute) གི་འགན་འཛིན། ཤར་རྒྱ་མཚོའི་ཁུལ་གྱི་དམག་དཔུང་གི་དམག་སྤྱི་སོགས་ཀྱི་ལས་ཀ་བྱས་མྱོང་ཡོད་འདུག
འདི་ལོའི་ཕྱི་ཟླ་ ༡༡ ཚེས་ ༢༧ ཉིན་རྒྱ་ནག་གི་རྒྱལ་སྲུང་བློན་ཆེན་ཏུང་ཅིན་ (Dong Jun) ལ་ལྐོག་ཟ་རུལ་སུངས་ཀྱི་ཉེས་མིང་འོག་ཞིབ་བཤེར་བྱེད་བཞིན་ཡོད་པ་དང་། ཁོ་ནི་རྒྱ་ནག་གི་རྒྱལ་སྲུང་བློན་ཆེན་ཞིག་ལ་ལྐོག་ཟ་རུལ་སུངས་ཀྱི་ཉེས་མིང་འོག་ཞིབ་བཤེར་བྱས་པ་ཐེངས་གསུམ་པ་དེ་ཡིན་ཞིང་། ད་ལྟའི་ཆར་ཏུང་ཅིན་ལ་ལྐོག་ཟ་རུལ་སུངས་ཀྱི་ཉེས་མིང་འོག་ཞིབ་བཤེར་བྱེད་བཞིན་ཡོད་ཟེར་བ་ཙམ་ལས་རྒྱུ་རྐྱེན་གཞན་གསལ་ཁ་མི་འདུག ད་དུང་ཕྱི་ཟླ་ ༡༡ ཚེས་ ༢༨ ཉིན་རྒྱ་ནག་དབུས་དམག་སྲིད་ལྷན་ཁང་གི་དམག་ཇུས་ཚན་པའི་འགན་འཛིན་མེའོ་ཧྭ་ཡིས་སྒྲིག་འགལ་ཚབས་ཆེན་བྱས་པའི་ཉེས་མིང་ལས་གནས་ནས་ཕྱིར་ཕུད་བཏང་སྟེ་ཞིབ་བཤེར་བྱེད་བཞིན་ཡོད་འདུག
ཞི་ཅིན་ཕིན་གྱི་སྟག་དང་སྦྲང་མ་ལེབ་རྡུང་གི་སྲིད་ཇུས་འོག་འདས་ལོ་གཅིག་པུར་རྒྱ་ནག་བཅིངས་གྲོལ་དམག་མིའི་དམག་སྤྱི་དགུ་ཏང་དང་གཞུང་གི་གོ་གནས་ནས་ཕྱིར་ཕུད་བྱས་ཡོད་ལ། འདས་ལོའི་ཕྱི་ཟླ་ ༦ ནང་རྒྱལ་སྲུང་བློན་ཆེན་ཟུར་པ་ལི་ཧྲན་ཧྥོའུ་ (Li Shangfu) དང་། དེ་སྔའི་རྒྱལ་སྲུང་བློན་ཆེན་ཝའེ་ཧྥང་ཧཱ་ (Wei Fenghe) ཟེར་བ་གཉིས་ནས་ལྐོག་ཟ་རུལ་སུངས་ཀྱི་ཉེས་མིང་འོག་ནས་སྒྲིག་འགལ་ཚབས་ཆེན་བྱས་ཡོད་ཟེར་ནས་ཕྱིར་ཕུད་བཏང་སྟེ། ད་ལྟའང་གར་སོང་ཆ་མེད་དུ་གྱུར་ཡོད་འདུག
ད་ལྟའི་ཆར་རྒྱ་ནག་མི་དམངས་བཅིངས་གྲོལ་དམག་ཁོངས་ཀྱི་མཐོ་རིམ་དཔོན་རིགས་མང་པོ་ཞིག་ལྐོག་ཟ་རུལ་སུངས་ཀྱི་གནད་དོན་དང་འབྲེལ་ནས་གོ་གནས་ནས་ཕྱིར་ཕུད་གཏོང་གི་ཡོད་ཀྱང་། རྒྱ་ནག་དབུས་གཞུང་གིས་གནད་དོན་དེ་དག་ཡོངས་བསྒྲགས་བྱེད་ཀྱི་མེད་པ་དང་། ཕྱོགས་གཅིག་ནས་བཅིངས་གྲོལ་དམག་གི་གཙོ་འཛིན་ཞི་ཅིན་ཕིན་ཡིན་པར་བརྟེན། ནང་ཁུལ་གྱི་རྙོག་ཟིང་རིགས་ཕྱི་ལ་བསྒྲགས་ནས་གནད་དོན་མི་ལྷག་ཐབས་དང་། མཐོ་རིམ་མགོ་ཁྲིད་མང་པོ་ཞིག་གོ་གནས་ནས་ཕྱིར་ཕུད་བཏང་བ་ལས་འཛིན་བཟུང་འདྲི་རྩད་རིགས་དང་བཙོན་ཁང་སོགས་སུ་བཅུག་མེད་པ་དེས་དམག་ཁོངས་ལ་བརྡབ་གསིག་མི་བཟོ་བའི་ཆེད་དུ་ཡིན་ཚུལ་བརྗོད་འདུག
གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
