རྒྱ་གཞུང་གིས་བླ་རུང་སྒར་དུ་དམག་མི་འབོར་ཆེན་འགྲེམ་འཇོག་དང་། ཐད་འཕུར་དམག་གྲུ་བཏང་སྟེ་དམ་དྲག་ཤུགས་ཆེན་བྱེད་བཞིན་པ་མ་ཟད། སང་ལོ་ནས་བླ་རུང་སྒར་དུ་གྲྭ་བཙུན་རྣམས་ལོ་བཅོ་ལྔ་མ་གཏོགས་འདུག་མི་ཆོག་པ་བཟོ་རྩིས་ཡིན་འདུག
ཟླ་འདིའི་ཕྱི་ཚེས་ ༢༠ ཉིན་བོད་དཀར་མཛེས་ཁུལ་བྲག་མགོ་རྫོང་དང་ཉེ་འཁོར་གྱི་རྫོང་ཁག་ཁག་ནས་དམག་མི་ ༤༠༠ ཙམ་དང་ཐད་འཕུར་གནམ་གྲུ་སོགས་གསེར་རྟ་བླ་རུང་སྒར་དུ་མངགས་གཏོང་གིས་གནམ་གྲུ་བརྒྱུད་ནས་བླ་རུང་དགོན་པར་ལྟ་རྟོག་བྱེད་བཞིན་ཡོད་པ་སོགས་དམ་དྲག་ཤུགས་ཆེན་བྱེད་མུས་ཡིན་འདུག
བོད་མིའི་སྒྲིག་འཛུགས་ལ་ཁུངས་ལྡན་གནས་ཚུལ་འབྱོར་བ་ལྟར་ན། རྒྱ་ནག་གཞུང་གིས་ཕྱི་ལོ་ ༢༠༢༥ ནས་བཟུང་བླ་རུང་སྒར་དུ་གྲྭ་བཙུན་རྣམས་དུས་ཡུན་ལོ་ ༡༥ ཙམ་ལས་སྡོད་མི་ཆོག་པའི་སྲིད་བྱུས་གསར་པ་ཞིག་ལག་བསྟར་བྱ་རྒྱུ་ཡིན་པ་མ་ཟད། གྲྭ་བཙུན་གྱི་གྲངས་འབོར་ཇེ་ཉུང་དུ་གཏོང་ཕྱིར་རྒྱ་གཞུང་གིས་བཅད་བགོས་བྱས་པའི་ཞིང་ཆེན་རིམ་པའི་ཐོག་ནས་གྲྭ་བཙུན་སློབ་གཉེར་བའི་གྲངས་ ༡༠༠༠ ལས་བརྒལ་མི་ཆོག་པའི་ཚོད་འཛིན་བྱ་རྒྱུ་ཡིན་པ་དང་། རྒྱ་རིགས་སློབ་གཉེར་བ་རྣམས་ཕྱིར་ལོག་དགོས་པའི་གསལ་བསྒྲགས་བྱས་ཡོད་པ་དེ། བླ་རུང་སྒར་གྱི་གྲྭ་བཙུན་ཇེ་ཉུང་དུ་གཏོང་བའི་དམིགས་ཡུལ་གཙོ་བོ་ཡིན་འདུག
གསེར་རྟ་བླ་རུང་ཆོས་སྒར་ནི་བོད་ཀྱི་དགོན་སྡེ་ཆེ་ཤོས་ཤིག་ཡིན་ལ། ཆོས་སྒར་དེ་མཁན་ཆེན་དམ་པ་འཇིགས་མེད་ཕུན་ཚོགས་འབྱུང་གནས་མཆོག་གིས་ཐོག་མར་ཕྱག་བཏབ་པ་དང་། ད་ལྟའི་བར་ཆོས་སྒར་དེ་ནས་ནང་པའི་མཁས་དབང་དུ་མ་ཞིག་སྐྱེད་སྲིང་གནང་ཡོད་པ་མ་ཟད། འཛམ་གླིང་གི་ས་གནས་གང་ས་ནས་ནང་ཆོས་སློབ་གཉེར་ཆེད་དུ་ཕེབས་མཁན་མང་དག་ཅིག་ཡོང་བཞིན་ཡོད་ཀྱང་། ཕྱི་ལོ་ ༢༠༡༦ ནས་བཟུང་རྒྱ་ནག་གཞུང་གིས་དགོན་པའི་གྲྭ་བཙུན་གྱི་གྲངས་ཚད་ཆིག་ཁྲི་འགལ་བ་ནས་ ༥༠༠༠ མ་གཏོགས་མེད་པ་བཟོས་ཡོད་པ་དང་། དེ་བཞིན་དགོན་པའི་གྲྭ་ཤག་ཀྱང་དེ་དང་མཉམ་དུ་གཏོར་བཤིག་གཏོང་རྒྱུ་ཡིན་པའི་བཀོད་ཁྱབ་འོག་དགོན་པའི་གྲྭ་ཤག་སོགས་གཏོར་བཤིག་གཏོང་བཞིན་ཡོད་པའི་གནས་ཚུལ་ཐོན་ཡོད། བོད་རང་སྐྱོང་ལྗོངས་ཀྱི་དཔོན་རིགས་ཚོས་ཡ་ཆེན་སྒར་གྱི་བཙུན་མའི་ནང་མི་ལ་བཙུན་མ་ཚོ་ཕྱིར་རང་ཁྱིམ་དུ་མ་ལོག་ཚེ། ཁོ་ཚོའི་ཐོབ་ཐང་ལག་འཁྱེར་གཞུང་བཞེས་བཏང་སྟེ་ཉེས་ཆད་ལྕི་མོ་གཅོད་རྒྱུ་ཡིན་སྐོར་དང་། ཡ་ཆེན་སྒར་གྱི་བཙུན་མ་ཚོ་ཕྱིར་རང་ཁྱིམ་དུ་ལོག་རྗེས་དགོན་སྡེ་གཞན་ནང་འཛུལ་ཞུགས་མི་ཆོག་པ་མ་ཟད། ཆོས་ཀྱི་བྱེད་སྒོ་སྣ་ཚོགས་སྤེལ་མི་ཆོག་པའི་བཙན་བཀའ་བཏང་ཡོད་སྐོར་སོགས་བརྗོད་འདུག
ཕྱི་ལོ་ ༢༠༡༧ ལོར་རྒྱ་ནག་གཞུང་གིས་གསེར་རྟ་བླ་རུང་དགོན་དང་ལྔ་རིག་སློབ་གླིང་གཉིས་བར་ལྕགས་ར་བརྒྱབ་སྟེ་ལོགས་ཁ་བཟོ་ཡི་ཡོད་པ་མ་ཟད། དགོན་པ་དང་སློབ་གླིང་གཉིས་ལ་དོ་དམ་ལས་ཁུངས་བཙུགས་ཏེ། དེའི་འགན་འཛིན་དང་དྲུང་ཡིག་བཅས་ལ་དམར་ཤོག་ཚོགས་མི་ ༦ བསྐོ་བཞག་བྱས་ཏེ་བླ་རུང་སྒར་གྱི་འཛིན་སྐྱོང་དང་ཉིན་རེའི་བྱེད་སྒོ་ཡོངས་ལ་སྟངས་འཛིན་ནན་མོ་བྱས་ཡོད་འདུག
གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
