འདི་ག་དུས་བབ་གསར་ཁང་ནས་ཤེས་རྟོགས་བྱུང་བར་གཞིགས་ན། ཕྱི་ལོ་ ༢༠༢༤ ལོར་རྒྱ་ནག་གཞུང་གིས་ཉུང་མཐར་བོད་མི་གྲངས་ ༦༠ ལྷག་འཛིན་བཟུང་བྱས་ཡོད་པ་དང་། དེའི་ཁྲོད་ནས་བོད་མི་གྲངས་ ༤ ལ་ཉུང་མཐར་ཟླ་བརྒྱད་ནས་དང་ལོ་ ༣ བར་གྱི་བཙོན་འཇུག་ཁྲིམས་ཐག་བཅད། བོད་མི་ ༣ ལ་ཉེན་རྟོག་པས་གཅར་རྡུང་བཏང་སྟེ་བསད་པ་དང་ངོ་རྒོལ་གྱིས་རང་ཤི་རྒྱག་མཁན་ ༡ བྱུང་། བཙོན་ཟུར་ ༡ ནད་མནར་རྐྱེན་གྱིས་འདས་གྲོངས་སུ་ཕྱིན། བོད་མི་ཆབ་སྲིད་བཙོན་པ་ ༨ ཀློད་གྲོལ་བཏང་།
༡) འདི་ལོར་ཁྲིམས་ཐག་བཅད་པའི་བོད་མི།
ཕྱི་ལོ་ ༢༠༢༤ ཟླ་ ༡ ནང་ཕྱི་ལོ་ ༢༠༢༡ ཟླ་ ༦ ཚེས་ ༡༠ ཉིན་རྒྱ་ནག་ཉེན་རྟོག་པས་རྔ་བ་ཀིརྟི་དགོན་གྱི་ཚོགས་ཆེན་དབུ་མཛད་ཟུར་པ་བློ་བཟང་བཀྲ་ཤིས་ལགས་གློ་བུར་དུ་འཛིན་བཟུང་བཙན་འཁྲིད་བྱས་ཏེ་ཟླ་ཤས་འགོར་རྗེས། གསང་བའི་ཐོག་ནས་ལོ་གསུམ་གྱི་བཙོན་འཇུག་ཁྲིམས་ཐག་བཅད་དེ་དེང་སང་སི་ཁྲོན་མེན་ཡང་བཙོན་ཁང་དུ་བཙོན་འཇུག་བྱེད་མུས་ཡིན་འདུག་ལ། ཕྱི་ཟླ་ ༤ ཚེས་ ༢ ཉིན་རྒྱ་ནག་གཞུང་གིས་རྒྱུ་རྐྱེན་གང་ཡིན་གསལ་ཁ་མེད་པའི་ཐོག་ནས་བོད་མངའ་རིས་ས་ཁུལ་མཚོ་ཆེན་རྫོང་ནས་ཡིན་པའི་བོད་མི་བསམ་གཏན་ལགས་སུ་མི་ལོ་གསུམ་གྱི་བཙོན་འཇུག་ཁྲིམས་ཐག་བཅད་ཡོད་པའི་ཁར། སྐབས་དེར་ཁོང་གི་ནུ་མོ་དཔལ་སྒྲོན་ལགས་སུ་གཅར་རྡུང་བཏང་སྟེ་མཚོ་ཆེན་རྫོང་སྨན་ཁང་དུ་བསྐྱལ། དེ་བཞིན་ཕྱི་ཟླ་ ༣ པའི་ཟླ་དཀྱིལ་དུ་བོད་མདོ་སྨད་རེབ་གོང་ནས་ཡིན་པའི་དགེ་འདུན་པ་བྱམས་པ་ཆོས་འཕེལ་ལགས་ཀྱིས་སྐད་འཕྲིན་རྒྱབ་ངོས་སུ་༧གོང་ས་རྒྱལ་བ་རིན་པོ་ཆེ་མཆོག་གི་བཀའ་སློབ་བརྒྱུད་འགོད་བྱས་པའི་ཉེས་མིང་འོག རང་ཤག་ནས་འཛིན་བཟུང་གིས། ཕྱི་ཟླ་ ༨ ནང་ལོ་གཅིག་དང་ཕྱེད་ཀའི་བཙོན་འཇུག་ཁྲིམས་ཐག་བཅད། ཕྱི་ཟླ་ ༡༠ ཚེས་ ༢༧ ཉིན་རྔ་བ་ཁུལ་ཁྱུང་མཆུ་རྫོང་ཁྲིམས་ཁང་གིས་བོད་ཀྱི་ཁོར་ཡུག་སྲུང་སྐྱོབ་པ་གཞོན་ནུ་མཚོ་སྔོན་ཚེ་རིང་ལགས་སུ། སྒེར་གྱི་འཁོན་སེམས་འཁུར་ཏེ་སྤྱི་ཚོགས་ལ་རྙོག་ཟིང་བསླངས་བའི་ཉེས་མིང་འོག་ཟླ་བརྒྱད་ཀྱི་བཙོན་འཇུག་ཁྲིམས་ཐག་བཅད་དེ་ཁྱུང་མཆུ་རྫོང་བཙོན་ཁང་དུ་བཅུག་འདུག
༢) འཛིན་བཟུང་བཀག་ཉར་རྗེས་གར་སོང་ཆ་མེད་དུ་གྱུར་བ།
ཕྱི་ལོ་ ༢༠༢༤ ཟླ་ ༡ ཚེས་ ༤ ཉིན་མདོ་ལ་རྫོང་དང་ཨ་རིག་ཡུལ་ཚོའི་ས་གནས་ཉེན་རྟོག་པ་བཞིས་ཕྱི་ཕྱོགས་སུ་འབྲེལ་བ་བྱས་ནས་གསང་བ་ཕྱིར་བསྒྲགས་བྱས་པའི་ཉེས་མིང་འོག མཚོ་སྔོན་ཞིང་ཆེན་མདོ་ལ་རྫོང་ཨ་རིག་ཡུལ་ཚོ་ནས་ཡིན་པའི་བོད་མི་རྟ་མགྲིན་ལགས་འཛིན་བཟུང་དང་། ཕྱི་ཟླ་ ༢ ནང་རྒྱ་ནག་གཞུང་གིས་བོད་ཉག་ཆུ་རྫོང་ཨོ་ཐོག་སྨད་ཐ་སྡེ་བའི་གྲྭ་བསྟན་འཛིན་མཁྱེན་རབ་བམ་སྨྱུག་མིང་ལ་ལྡོང་རང་ལྕགས་ལགས་ཀྱིས་ཁ་པར་དུ་༧གོང་ས་རྒྱལ་བ་རིན་པོ་ཆེ་མཆོག་གི་སྐུ་པར་ཉར་ཡོད་ལུགས་སོགས་བཤད་ནས་འཛིན་བཟུང་བཙན་ཁྲིད་བྱས་ཏེ་མི་ལོ་གཅིག་ལྷག་ཕྱིན་ཡོད་སྟབས། ཁོང་གི་ཨ་མ་ལགས་ཀྱིས་རྒྱུན་དུ་སེམས་ཁྲལ་བྱས་རྐྱེན་གཟུགས་གཞིའི་གནས་སྟངས་སྐྱོ་བོ་ཆགས་ཏེ་ཕྱིས་སུ་འདས་གྲོངས་སུ་གྱུར། ཕྱི་ཟླ་ ༢ པའི་ནང་རྒྱ་ནག་གཞུང་གིས་ཆུ་གློག་གི་ལས་གཞི་དང་བོད་མི་གནས་སྤོར་མཚམས་འཇོག་བྱེད་དགོས་པའི་རེ་སྐུལ་ཞུ་སྐབས། མི་མང་ལ་ངན་སྐུལ་དང་སྤྱི་ཚོགས་དཀྲུགས་ཡོད་ལུགས་སོགས་བཤད་ནས། བོད་མི་རིག་འཛིན་དང་། ཐུབ་ཕུར། བདེ་ཆེན་སྒྲོལ་མ། དབྱངས་སྐྱིད། ཚེ་སྒྲུབ་སོགས་ཚུད་པའི་བོད་མི་བཅུ་ལྷག་འཛིན་བཟུང་བཙན་ཁྲིད་བྱས། ཕྱི་ཟླ་ ༣ ཚེས་ ༢༦ ཉིན་ཀིརྟི་དགོན་པའི་འདབས་ཀྱི་དཔའ་བོའི་སྲང་ལམ་དུ། རྔ་བ་ཀིརྟི་དགོན་པའི་དགེ་འདུན་པ་པདྨ་ཞུ་བ་ཞིག་གིས་༸གོང་ས་རྒྱལ་བ་རིན་པོ་ཆེ་མཆོག་གི་སྐུ་པར་ཆེན་པོ་ཞིག་ལག་ཏུ་བཟུང་སྟེ། རྒྱ་ནག་གཞུང་གི་དྲག་གནོན་སྲིད་ཇུས་ལ་ངོ་རྒོལ་སྐད་འབོད་བྱས་ཡོད་པ་དང་། དེ་འཕྲལ་ཉེན་རྟོག་པས་འཛིན་བཟུང་བཙན་འཁྲིད་བྱས། ཕྱི་ཟླ་ ༥ པའི་ཟླ་མཇུག་ཏུ་བོད་མགོ་ལོག་ཁུལ་གཅིག་སྒྲིལ་རྫོང་ཁོངས་ཀྱི་དགོན་པ་ཞིག་གི་དགེ་འདུན་པ་རང་ལོ་ ༢༦ ཅན་ཞིག་གིས། རྒྱ་ནག་དམར་གཞུང་གི་ཆབ་སྲིད་དང་འགལ་བའི་གསལ་བསྒྲགས་ཤིག་ལ་དཔྱད་མཆན་བཀོད་པར་ཁ་བྲལ་བའི་བྱ་སྤྱོད་སྤེལ་བའི་ཉེས་མིང་འོག་འཛིན་བཟུང་བྱས་ཡོད་པ་མ་ཟད། གཅིག་སྒྲིལ་རྫོང་གི་རྫོང་དཔོན་དང་རྫོང་འཐབ་ཕྱོགས་གཅིག་གྱུར་ཁང་གི་མགོ་འཁྲིད་སོགས་དགོན་པར་ཡོང་སྟེ་དགོན་པའི་བླ་སྤྲུལ་དང་དམངས་དམ་ཁང་ཟེར་བའི་ལས་བྱེད་ཚོར་སྐྱོན་བརྗོད་བྱས་རྗེས། དགོན་པར་བསྡད་ཡོད་པའི་དགེ་འདུན་པ་ ༡༠༠ ཙམ་ལ་ཉིན་གྲངས་ ༡༠ ཡས་མས་རིང་ཆབ་སྲིད་སློབ་གསོ་ཟེར་བ་ཞིག་སྤྲད་ཡོད་འདུག དེ་བཞིན་ཕྱི་ཟླ་ ༥ པའི་ནང་རྒྱ་ནག་གཞུང་གིས་མཁན་པོ་བསྟན་པ་དར་རྒྱས་ལགས་དང་། དཔོན་སྐོར་སྡེ་དཔོན་མགོན་པོ་རྣམ་རྒྱལ་ཚུད་པའི་སྡེ་མི་ཉི་ཤུ་ལྷག་མགོ་ལོག་དར་ལག་རྫོང་ནས་འཛིན་བཟུང་གིས་མགོ་ལོག་ཁུལ་ཐོག་ཏུ་བཙན་ཁྲིད་བྱས་ཏེ། ད་ལྟ་བོད་ནང་གི་དད་ལྡན་མང་ཚོགས་རྣམས་ཀྱིས་མཁན་པོ་བསྟན་པ་དར་རྒྱས་ལགས་ཀྱི་སྐུ་གཟུགས་ཀྱི་གནས་བབ་ལ་སེམས་འཚབ་ཆེན་པོ་བྱེད་མུས་འདུག ཕྱི་ཟླ་ ༨ ནང་རྒྱ་ནག་གཞུང་གིས་རྭ་རྒྱ་ཤེས་རིག་ནོར་བུའི་སློབ་གླིང་གི་སློབ་ཟུར་ཚེ་བརྟན་ཞེས་པ་ཞིག་གི་སྤུན་མཆེད་འཛོམས་སྐྱིད་ལགས་ཀྱིས་སློབ་གླིང་གི་སྐོར་ལ་དཀྲོག་གཏམ་སྤེལ་བའི་ཉེས་མིང་གཡོགས་ཏེ་འཛིན་བཟུང་བཙན་འཁྲིད་བྱས་ཏེ་གར་སོང་ཆ་མེད་དུ་གྱུར་བ་དང་། དེ་བཞིན་ཕྱི་ཟླ་ ༩ ནང་རྒྱ་ནག་གཞུང་གིས་ཕྱི་ཕྱོགས་སུ་འབྲེལ་བ་བྱས་ཡོད་ལུགས་བཤད་ནས་མདོ་སྨད་རྔ་བ་ཀིརྟི་དགོན་པའི་དགེ་འདུན་པ་བློ་བཟང་བསམ་གཏན་ལགས་དང་། བློ་བཟང་འཕྲིན་ལས་ལགས། ཚེ་རིང་བཀྲ་ཤིས་ལགས་དང་བན་སྐྱིད་ལགས་བཅས་འཛིན་བཟུང་བཙན་ཁྲིད་དང་། ཕྱི་ཟླ་ ༡༢ ཚེས་ ༡༣ ཉིན་བོད་མཚོ་སྔོན་ཞིང་ཆེན་མཚོ་ལྷོ་ཁུལ་བྲག་དཀར་རྫོང་ཉེན་རྟོག་ཁང་ཟེར་བས་རྒྱ་གཞུང་གི་ནག་སེལ་ངན་འཇོམས་ཀྱི་སྲིད་ཇུས་འོག་ནས། དེང་སང་བོད་ནང་དྲ་ལམ་གྱི་ཚོང་གཉེར་བ་གྲགས་ཅན་ཨ་དགའ་དགེ་ལེགས་ཚང་ངམ་བསོད་ནམས་ཆོས་འགྲུབ་དང་། ཀུན་བཟང་རྡོ་རྗེ། བསྟན་པ། བཙན་ཐར་རྒྱལ། བཀྲ་ཤིས་བློ་ལྡན་བཅས་བོད་མི་ལྔ་ལ་ཁྲིམས་འགལ་ཉེས་གསོག་གི་ནག་ཉེས་བཙུགས་ཡོད་པ་མ་ཟད། སྤྱི་ཚོགས་ལས་རིགས་སོ་སོ་ནས་ཁྲིམས་འགལ་ཉེས་གསོག་གི་ཁུངས་སྣེ་བསྡུ་རུབ་བྱ་རྒྱུ་ཡིན་ལུགས་བསྒྲགས་ནས་འཛིན་བཟུང་བཀག་ཉར་བྱས་རྗེས་གྲགས་འགུལ་གང་ཡང་མེད་པར་གྱུར་ཡོད་སྟབས། ཕྱི་ལོ་ ༢༠༢༤ ལོར་གཅིག་པུར་རྒྱ་ནག་གཞུང་གིས་ནག་ཉེས་འདྲ་མིན་གཡོགས་ནས་ཉུང་མཐར་མི་གྲངས་ ༦༠ ལྷག་འཛིན་བཟུང་བཙན་ཁྲིད་བྱས་ཏེ་གར་སོང་ཆ་མེད་དུ་གྱུར་འདུག
༣) ཀློད་གྲོལ་ཐོབ་པའི་ཆབ་སྲིད་བཙོན་པ།
ཕྱི་ལོ་ ༢༠༢༤ ལོའི་ཟླ་ ༡ ནང་རྒྱ་ནག་གཞུང་གིས་ཕྱི་ལོ ༢༠༢༣ ལོར་ཁ་གསལ་གང་ཡང་མེད་པའི་ཐོག་ནས་གློ་བུར་འཛིན་བཟུང་བཙན་ཁྲིད་བྱས་པའི་ཐེ་བོ་རྫོང་བཀྲ་ཤིས་དགོན་པའི་དགེ་འདུན་པ་དཀོན་མཆོག་གྲགས་པ་ལགས་ཀློད་གྲོལ་དང་། ཕྱི་ཟླ་ ༢ ཚེས་ ༡ ཉིན་ཕྱི་ལོ་ ༢༠༡༩ ལོར་རྒྱལ་ཁབ་ཁ་བྲལ་དང་སྤྱི་ཚོགས་ཟིང་འཁྲུག་བསླངས་པའི་ཉེས་མིང་འོག་ལོ་ངོ་བཞི་དང་ཕྱེད་ཀའི་བཙོན་མཇུག་ཁྲིམས་ཐག་བཅད་པའི་རྔ་བ་སྣང་ཞིག་དགོན་པའི་དགེ་འདུན་པ་རིན་ཆེན་ཚུལ་ཁྲིམས་ལགས་རྒྱ་ནག་ཁྲིན་ཏུའུ་མེན་ཡང་བཙོན་ཁང་ནས་བཙོན་མཇུག་དུས་ཡུན་ཚང་ནས་ཀློད་གྲོལ་བཏང་། ཕྱི་ཟླ་ ༣ ཚེས་ ༥ ཉིན་རྒྱ་ནག་གཞུང་གིས་༢༠༢༣ ལོའི་ཟླ་ ༣ ཚེས་ ༤ ཉིན་བོད་གཞིས་ཀ་རྩེ་གྲོང་ཁྱེར་གྱི་གངས་རི་ཟ་ཁང་དུ་ཁ་པར་ནང་དུ་སྔོག་བཤེར་བྱེད་སྐབས་ཕྱི་ཕྱོགས་སུ་པར་རིས་སོགས་བརྒྱུད་སྐུར་བྱས་ཡོད་པའི་ཉེས་མིང་གཡོགས་ནས་འཛིན་བཟུང་བཙན་ཁྲིད་བྱས་པའི་བོད་མི་དབྱངས་མཚོ་ལགས་དང་། དེ་བཞིན་བོད་ནང་གི་དྲ་དཔོན་བཀྲ་ཤིས་ཉི་མ་ལགས་ཀྱིས་ཐད་གཏོང་གི་ལམ་ནས་བོད་ཀྱི་སྐད་ཡིག་དར་སྤེལ་བྱས་པའི་རྐྱེན་གྱིས། ཕྱི་ཟླ་ ༨ ཚེས ༢༨ ནས་ཐད་ཀར་དྲ་ལམ་སྒོ་བརྒྱབ་པ་དང་། ཉིན་གྲངས་གསུམ་རིང་འཛིན་བཟུང་བཀག་ཉར་བྱས་ཏེ་ཀློད་གྲོལ་བཏང་ཡོད་འདུག ཕྱི་ཟླ་ ༩ ཚེས་ ༢༥ ཉིན་ཕྱི་ལོ་ ༢༠༢༣ ལོར་རྒྱ་ནག་གཞུང་གིས་ལོ་གསུམ་རིང་བཙོན་འཛུག་ཁྲིམས་ཐག་བཅད་པའི་མགོ་ལོག་དཔལ་ལྡན་ལགས་བཙོན་འཇུག་དུས་ཡུན་མ་ཚང་གོང་ནས་ཀློད་གྲོལ་བཏང་ཡོད་ནའང་། མུ་མཐུད་ལྟ་རྟོག་དང་རྗེས་ཕྱོགས་ལ་རྒྱའི་གླུ་གཞས་རིགས་ལེན་མི་ཆོག་པའི་ཉེན་བརྡ་བཏང་འདུག་ལ། དེ་བཞིན་རྔ་བ་ཀིརྟི་དགོན་གྱི་དགེ་འདུན་པ་དགེ་བཤེས་རྭ་ཆུང་དགེ་འདུན་ལགས་ཕྱི་ཟླ་ ༡༡ ཚེས་ ༡༦ ཉིན་བཙོན་འཇུག་དུས་ཡུན་ཚང་སྟེ་ཀློད་གྲོལ་བཏང་ཡོད་ཀྱང་། སྐུ་གཟུགས་གནས་སྟངས་ཧ་ཅང་ཞན་པའི་རྐྱེན་གྱིས་སྨན་པར་བསྟེན་གཏུག་བྱ་དགོས་ཁེལ་ཡོད། ཕྱི་ཟླ་ ༡༢ ཚེས་ ༩ ཉིན་བོད་ནང་གི་རྩོམ་པ་པོ་གྲགས་ཅན་རོང་བོ་དགེ་འདུན་ལྷུན་གྲུབ་ལགས་བཙོན་གྲོལ་ཐོབ་ཡོད་ནའང་། ད་ལྟ་ལྟ་རྟོག་འོག་ཏུ་ཡོད་པས་གཟུགས་གཞིའི་གནས་སྟངས་སོགས་གསལ་ཁ་གང་ཡང་མེད་ནའང་། ཁོང་གི་སྙན་ངག་ལ་དགའ་མཁན་དང་བོད་ནང་གི་ཤེས་ཡོན་པ་མང་དག་ཅིག་གིས་ཁོང་ཉིད་ཀློད་གྲོལ་བཏང་བར་དགའ་མོས་ཆེན་པོ་བྱེད་ཀྱིན་འདུག དེ་བཞིན་ཕྱི་ཟླ་ ༡༢ ཚེས་ ༡༨ ཡས་མས་ཤིག་ལ་རྒྱ་ནག་གཞུང་གིས་མི་ལོ་ ༡༥ བཙོན་འཇུག་ཁྲིམས་ཐག་བཅད་པའི་བོད་ཀྱི་ཁོར་ཡུག་སྲུང་སྐྱོབ་པ་དང་གནའ་རྫས་བདག་གཉེར་བ་ཀརྨ་བསམ་འགྲུབ་ལགས་ཀློད་གྲོལ་བཏང་ཡོད་ནའང་སྐེད་པ་ནད་པ་ཆགས་ཡོད་པ་མ་ཟད། མུ་མཐུད་འགྲོ་འདུག་གི་རང་དབང་མེད་ཁར་ལྐོག་ཏུ་ཉུལ་ཞིབ་བྱེད་མུས་ཡིན་འདུག
༤) འདས་གྲོངས་སུ་གྱུར་བའི་ཆབ་སྲིད་བཙོན་པ་དང་བཙོན་ཟུར།
ཕྱི་ལོ་ ༢༠༢༤ ཕྱི་ཟླ་ ༡ ཚེས་ ༡༥ ཉིན་ཕྱི་ལོ་ ༢༠༢༣ ལོར་རྒྱ་ནག་གཞུང་གིས་བཙན་ཁྲིད་བྱས་པའི་བོད་སྙེ་མོ་རྫོང་བོད་སྙེ་མོ་རི་ཚོ་གྲོང་ཚོའི་བུ་མོ་ཚེ་སྒྲོན་ལགས་སུ་ཉེས་རྡུང་ཚབས་ཆེན་བཏང་བའི་དབང་གིས་སྣེ་མོ་རྫོང་གི་སྨན་ཁང་ཞིག་ནས་འདས་གྲོངས་སུ་གྱུར་ཡོད་ཅིང་། ས་གནས་ཉེན་རྟོག་པས་ཁོང་མོ་ས་རུ་འགྱེལ་ནས་འདས་གྲོངས་སུ་གྱུར་ཡོད་ལུགས་ལ་བསྙད་ནས་ནང་མིར་ཕུང་པོའང་སྤྲད་མེད། ཕྱི་ཟླ་ ༤ ནང་བོད་དིང་རི་རྫོང་ཤེལ་དཀར་དགོན་པའི་དགེ་འདུན་པ་བསྟན་འཛིན་རྡོ་རྗེ་ལགས་ཀྱིས་ཁུལ་དེའི་མི་མང་ལ་༧གོང་ས་རྒྱལ་བ་རིན་པོ་ཆེ་མཆོག་གི་གསུང་རྩོམ་ཕྱག་དེབ་ཅིག་དང་གསུང་ཆོས་སོགས་ལ་འགྲེལ་བཤད་གནང་བའི་ཉེས་མིང་འོག ཕྱི་ལོ་ ༢༠༢༣ ཟླ་ ༥ པའི་ནང་རྒྱ་གཞུང་ཉེན་རྟོག་པས་ཁོང་བཙན་ཁྲིད་བྱས་ཏེ་ཉིན་ཤས་རིང་འདྲི་བརྩད་དང་གཅར་རྡུང་ཚད་མེད་བཏང་རྗེས་ཀློད་ཡོད་ཀྱང་། ཟླ་དེའི་ཕྱི་ཚེས་ ༢༥ ཉིན་ཁོང་གིས་རང་ཤག་ཏུ་རང་ཤི་བརྒྱབ་ཡོད་པའི་གནས་ཚུལ་ཤེས་རྟོགས་བྱུང་ཡོད། ཕྱི་ཟླ་ ༥ ནང་གདན་ས་ཆེན་མོ་སེ་ར་ཐེག་ཆེན་གླིང་གི་དགེ་འདུན་པ་བློ་གསལ་ལགས་ཀྱིས། བོད་ཀྱི་ཕྱི་ཕྱོགས་སུ་འབྲེལ་བ་བྱས་ནས། བོད་ནང་གི་གནས་ཚུལ་བསྡུ་རུབ་བྱས་ཏེ་མཁོ་སྤྲོད་བྱས་པའི་དོགས་གཞིའི་འོག་འཛིན་བཟུང་བྱས་ཏེ། ཕྱིས་སུ་རྒྱ་གཞུང་གིས་དགེ་འདུན་པ་བློ་གསལ་ལགས་སུ་བཙོན་འཇུག་གི་སྐབས་ཉེས་རྡུང་བཏང་སྟེ་ནད་གཅོང་དུ་གྱུར་ཡོད་ནའང་། སྨན་བཅོས་སོགས་ཀྱི་མཐུན་རྐྱེན་གང་ཡང་མ་སྤྲད་སྟབས། བཙོན་འཇུག་བྱེད་སའི་དོ་དམ་ཁང་དུ་འདས་གྲོངས་སུ་ཕྱིན་ཡོད། ཕྱི་ཟླ་ ༩ ཚེས་ ༢༨ ཉིན་རྒྱ་ནག་གཞུང་གིས་མི་ལོ་བཅོ་ལྔ་རིང་བཙོན་འཇུག་ཁྲིམས་ཐག་བཅད་པའི་བོད་ཀྱི་རྒྱལ་ས་ལྷ་སའི་མལ་དྲོ་གུང་དཀར་རྫོང་ཁོངས་རྒྱ་མ་མདའ་ཤར་ནས་ཡིན་པའི་ཆབ་སྲིད་བཙོན་ཟུར་ཐུབ་བསྟན་ཡེ་ཤེས་ལགས་རྒྱལ་ས་ལྷ་སར་འདས་གྲོངས་སུ་གྱུར། ཕྱི་ཟླ་ ༡༢ ཕྱི་ཚེས་ ༡༨ ཉིན་རྒྱ་ནག་གཞུང་གིས་ཕྱི་ཟླ་ ༥ ནང་འཛིན་བཟུང་བྱས་པའི་མགོ་ལོག་དཔོན་སྐོར་སྡེ་བའི་སྡེ་དཔོན་མགོན་པོ་རྣམ་རྒྱལ་ལགས་འདས་གྲོངས་སུ་གྱུར་ཡོད་ཅིང་། ཁོང་གི་ཕུང་པོར་སྤུར་ལས་བྱེད་སྐབས་རྒྱ་ནག་གཞུང་གིས་གློག་གི་ཡོ་ཆས་བཀོལ་ནས་ཉེས་རྡུང་བཏང་རྐྱེན་གཟུགས་པོའི་ནང་ཁྲོལ་མང་པོ་ཞིག་འཚིགས་ཡོད་པ་ཤེས་རྟོགས་བྱུང་ཡོད།
༥) རྒྱ་སྒྱུར་སློབ་གསོའི་ཚ་རླབས་དང་བོད་ཀྱི་སྐད་ཡིག་གི་ཆག་འཇིག
ཕྱི་ལོ་ ༢༠༢༤ ཟླ་ ༤ ནང་རྒྱ་ནག་གཞུང་གིས་མི་ལོ་ ༡༡ རིང་བོད་ཕྱི་ནང་གཉིས་ཀྱི་རྩོམ་པ་པོས་བྲིས་པའི་རྩོམ་ཡིག་སྤེལ་སའི་ལུག་ཚང་དཔལ་ཡོན་དྲ་ཚོམས་ཀྱི་པར་དབང་སོགས་ལ་ཁ་གཡར་ནས་བཙན་གྱིས་སྒོ་བརྒྱབ་བཅུག་ཡོད་ཅིང་། ཕྱི་ལོ་ ༢༠༡༣ ལོར་ལུག་ཚང་དཔལ་ཡོན་དེ་དྲ་ཚིགས་ཀྱི་ངོ་བོའི་ཐོག་ནས་དབུ་འབྱེད་བྱས་ཡོད་ཅིང་། དེ་ནས་སྐད་འཕྲིན་གྱི་ངོས་སུ་འཕྲིན་སྟེགས་སུ་བསྒྱུར་ཏེ། འདས་པའི་མི་ལོ་བཅུ་གྲངས་རིང་བོད་ཕྱི་ནང་གཉིས་ཀྱི་རྩོམ་པ་པོས་བྲིས་པའི་རྩོམ་ཡིག་མང་དག་ཅིག་སྤེལ། དེ་བཞིན་དྲ་ཚོམས་དེར་བོད་གཞས་དང་། ཡིག་བསྒྱུར་སོགས་ཀྱིས་མཚོན་པའི་རིག་གནས་ཀྱི་ཚན་པ་འགའ་ཡོད་ལ། འདས་པའི་ལོ་ཤས་རིང་བོད་ནང་ཆེས་བྲིན་རྒྱུགས་ཆེ་བའི་དྲ་ཚོམས་ཤིག་ཡིན་པ་རེད། ཕྱི་ཟླ་ ༡༢ པའི་ཟླ་དཀྱིལ་དུ་བོད་ནང་གི་སྐད་འཕྲིན་ཚོགས་པ་ཞིག་ཏུ་མཐོ་རྒྱུགས་ནང་དུའང་བོད་ཡིག་འཇོག་གི་མེད་པས། ཕ་མ་ཚོས་སོ་སོའི་བུ་ཕྲུག་ལ་མུ་མཐུད་བོད་ཡིག་སྦྱོང་དུ་འཇུག་མིན་གདམ་ག་ཡིན་པའི་བརྡ་ཁྱབ་ཅིག་སྤེལ་འདུག་ལ། སྤྱིར་བཏང་ཕྱི་ལོ་ ༢༠༢༢ ཙམ་ནས་བཟུང་བོད་ཁུལ་གྱི་ས་གནས་མང་པོར་མཐོ་རྒྱུགས་ནང་བོད་ཡིག་མེད་པ་བཟོས་ཏེ་བོད་ཁུལ་གྱི་དགེ་རྒན་དང་སློབ་མ་མང་པོར་དཀའ་ངལ་འཕྲད། ཕྱོགས་ཡོངས་ནས་བོད་ཀྱི་སྐད་ཡིག་བཀོལ་སྤྱོད་ཀྱི་ཐད་ལ་ཚོད་འཛིན་ནན་མོ་བྱེད་མུས་ཡིན་སྟབས། བོད་ནང་གི་ན་གཞོན་མང་པོ་ཞིག་གཅིག་རྗེས་གཉིས་མཐུད་ཀྱིས་དྲ་ལམ་དུ་ཐོན་ནས་བོད་སྐད་ཡིག་གི་གལ་ཆེའི་རང་བཞིན་དང་བོད་ནང་གི་མཐོ་རྒྱུགས་ཁག་ལ་བོད་ཡིག་གདམ་ཁའི་སློབ་ཚན་དུ་བཞག་པར་བློ་འཚབ་ཆེན་པོ་བྱས་ཡོད། དེ་བཞིན་རྒྱ་ནག་གཞུང་གིས་འདི་ལོར་བོད་ཀྱི་དགོན་སྡེ་ཁག་གིས་བོད་ཕྲུག་རྣམས་ལ་སློབ་གསོ་ཡག་པོ་སྟེར་ཐུབ་མེད་ལུགས་བཤད་ནས། རང་ལོ་བཅོ་བརྒྱད་མ་ལོན་པའི་གྲྭ་ཕྲུག་རྣམས་དགོན་པར་ཞུགས་མི་ཆོག་པའི་བཙན་བཀའ་བཏང་བར་བརྟེན། ཕྱི་ཟླ་ ༩ ནང་བོད་མདོ་སྨད་རྔ་པ་ཁུལ་ཟུང་ཆུ་རྫོང་གི་དམུ་དགེ་དགོན་པའི་གྲྭ་ཆུང་ལྔ་ཙམ་ནས་ཆུ་རུ་ལྕེབས་ནས་རང་ཤི་རྒྱག་ཐབས་བྱས་ཀྱང་། ས་གནས་མང་ཚོགས་ཀྱིས་བཀག་ཡོད་པའི་གནས་ཚུལ་ཐོན་ཡོད་ལ། ཕྱི་ཟླ་ ༡༢ ནང་བོད་རང་སྐྱོང་ལྗོངས་ཟེར་བའི་ནང་། དགུན་དུས་ཀྱི་སློབ་གྲྭ་ཆུང་འབྲིང་གི་གུང་སེང་གཏོང་སྐབས། ཕྲུ་གུར་སློབ་གྲྭའི་འཆར་འགོད་ལས་ཟུར་དུ་ཟབ་སྦྱོང་སྤྲོད་པ་གཏན་འགག་དང་། ཆོས་ལུགས་བྱེད་སྒོ། དགོན་པ་ཁག་ཏུ་རྩ་ནས་གཏོང་མི་ཆོག་པའི་བརྡ་ཁྱབ་ཅིག་སྤེལ་འདུག དེ་བཞིན་མདོ་སྨད་རྔ་པ་ཀིརྟིའི་དགོན་དང་། སྟག་ཚང་ལྷ་མོ་ཀིརྟིའི་དགོན། སྒོ་མང་དགོན། རྨ་ཆུ་རྫོང་མཚན་སྒྲོགས་དགོན། བསང་ཆུ་རྫོང་བླ་བྲང་དགོན་སོགས་ལ་དམ་དྲག་ཤུགས་ཆེའི་འོག་གྲྭ་བཙུན་ལོ་གཞོན་རྣམས་ཀྱི་ནང་མི་ལའང་གྲྭ་བཙུན་ཆུང་གྲས་རིགས་དགོན་པར་བཏང་མི་ཆོག་པའི་བཙན་བཀའ་ཕབ་སྟེ་དཀའ་ངལ་མང་པོ་སྤྲད་དང་སྤྲོད་མུས་དང་། གཞན་ཡང་སྒེར་བཙུགས་སློབ་གྲྭ་ཁག་ཀྱང་བཙུགས་མི་ཆོག་པའི་བཙན་བཀའ་བཏང་སྟེ། སློབ་གྲྭ་མང་པོ་སྒོ་བརྒྱབ་པ་དང་། བོད་ཕྲུག་རྣམས་ཀྱིས་གུང་སེང་སྐབས་བོད་ཀྱི་སྐད་ཡིག་གི་སྦྱོང་སྤྱོད་སོགས་ཀྱི་ཐད་ལ་ལོ་རེ་བཞིན་དམ་དྲག་ཇེ་ཆེར་བྱེད་མུས་ཡིན་པ་རེད།
༦) ར་རྒྱ་ཤེས་རིག་ནོར་གླིང་སྒོ་བརྒྱབ་པ།
ཕྱི་ལོ་ ༢༠༢༤ ཟླ་ ༧ ཚེས ༡༤ ཉིན་བོད་ནང་སྐད་གྲགས་ཆེ་བའི་རྭ་རྒྱ་གངས་ལྗོངས་ཤེས་རིག་ནོར་བུའི་སློབ་གླིང་སྒོ་བརྒྱབ་པའི་མཇུག་བསྡོམས་ཚོགས་འདུ་བསྡུས་ཡོད་པ་དང་། སྐབས་དེར་མཚོ་སྔོན་ཞིང་ཆེན་དང་མགོ་ལོག་ཁུལ། རྨ་ཆེན་རྫོང་བཅས་ནས་ལས་ཁུངས་ཁག་ ༡༨ ཀྱི་འཐུས་ཚབ་ཡོང་ཡོད་ཅིང་། ཕྱི་ཚེས་ ༡༢ ཉིན་སློབ་གྲྭ་འདི་འཕྲལ་དུ་སྒོ་རྒྱག་དགོས་པའི་བཙན་བཀའ་འབྱོར་འདུག་ལ། སྤྱིར་ན་ལོ་མང་རིང་ནས་མགོ་ལོག་ཁུལ་གྱི་དམར་ཤོག་དྲུང་ཆེ་ལས་ཐོག་སོགས་ཀྱིས་སློབ་གྲྭ་འདི་སྒོ་རྒྱག་ཐབས་སུ་ངན་ཇུས་ཡོད་རྒུ་བཏོན་ཏེ་ཁྲིམས་གཏུགས་རབ་དང་རིམ་པར་རྒྱབ་གནོན་དང་སྐུལ་འདེད་བཏང་མཐར་ལག་བསྟར་བྱུང་བ་ཞིག་ཡིན་འདུག གནད་དོན་དེའི་ཐད་རྭ་རྒྱ་གངས་ལྗོངས་ཤེས་རིག་ནོར་གླིང་ཐོག་མར་འཛུགས་མཁན་རྒན་རྭ་རྒྱ་འཇིགས་མེད་རྒྱལ་མཚན་ལགས་ནས་སྒེར་གྱི་སྐད་འཕྲིན་གླེང་སྟེགས་སུ་དེ་འབྲེལ་ཡོངས་བསྒྲགས་ཤིག་སྤེལ་བའི་ནང་། མགོ་ལོག་ཁུལ་འཇིགས་མེད་རྒྱལ་མཚན་མི་རིགས་ལས་རིགས་སློབ་གྲྭ་ལགས། ཁྱེད་རང་དགུང་གྲངས་སུམ་ཅུ་ཏག་ཏག་ལས་མ་བཞུགས་ན། ལོ་ན་གཞོན་ལ་སྐུ་ལུས་བཟང་སྒང་ཡིན་པས་ཅི་འདྲའི་ཡིད་སེམས་ཕངས་པ་ཞིག་ཡིན་མོད། མི་རྟག་པ་ནི་ནམ་ཡང་མི་རྟག་པ་ཡིན་པས། སྐད་ཅིག་སྐད་ཅིག་གིས་འཇིག་ཅིང་མི་གནས་པར་འགྱུར་བ་ནི་བཟློག་ཏུ་མེད་པའི་མི་རྟག་པའི་ཆོས་ཉིད་དོ།། ང་ཚོས་སྐྱེ་བ་སྔ་ཕྱི་ཁས་ལེན་ཞིང་ཚེ་རབས་ཕྲེང་རྒྱུད་ཀྱི་སློབ་གསོ་གཙུག་ཏུ་བཀུར་བས། སྐྱེ་བ་ཕྱི་མའི་སློབ་གསོ་ལ་སྨོན་ལམ་བརྒྱབ་ན་ཅིས་མི་ཆོག ཤི་བ་སླར་ཡང་གསོན་རྒྱུ་མེད་ན་འོ་དོད་འབོད་པས་ཅི་ཕན། དེ་བས་སྐྱེ་བ་ཕྱི་མར་ལུས་རྟེན་ཕུན་སུམ་ཚོགས་པ་ལོན་པར་སྨོན་ལམ་རྒྱག་རྒྱུ་ནི་ཆེས་ལེགས་ཤོས་ཡིན་པས། ཚང་མས་སྐྱོ་སྐྱོ་མ་གནང་བར་རང་གི་འོས་བབ་ཕྲག་ཏུ་ཁུར་བར་ཞུ། ཞེས་བརྗོད་འདུག རྒྱ་ནག་གཞུང་གིས་གློ་བུར་དུ་བོད་སྐད་ཡིག་གི་གནས་བབ་མཐོ་བའི་བོད་ཀྱི་སློབ་གྲྭ་ཞིག་གློ་བུར་དུ་སྒོ་བརྒྱབ་བཅུག་པས། བོད་ཕྱི་ནང་གཉིས་ཀྱི་བོད་མི་རྣམས་ལ་བློ་ཡུལ་ལས་འདས་པའི་སེམས་འཚབ་ཅིག་བྱུང་ཡོད། རྭ་རྒྱ་གངས་ལྗོངས་ཤེས་རིག་ནོར་བུའི་སློབ་གླིང་ནི་ཕྱི་ལོ་ ༡༩༩༤ ཟླ་༨ པར་མགོ་ལོག་ཁུལ་མི་དམངས་སྲིད་གཞུང་ཟེར་བས་ཆོག་མཆན་སྤྲད་དེ་དངོས་སུ་བཙུགས་ཤིང་། མཚོ་སྔོན་ཞིང་ཆེན་ཡོངས་ཀྱི་ཆེས་ཐོག་མའི་སྒེར་བཙུགས་སློབ་གྲྭ་དེ་ཡིན་འདུག ཕྱི་ལོ་ ༢༠༠༡ ལོའི་ཟླ་ ༤ ཚེས་ ༡༤ ཉིན་ཁུལ་མི་དམངས་སྲིད་གཞུང་གིས་ཆོག་མཆན་སྤྲད་དེ་ཆེད་ལས་མཐོ་འབྲིང་དུ་བསྒྱུར། ཕྱི་ལོ་ ༢༠༠༢ ལོར་འཇིགས་མེད་རྒྱལ་མཚན་སྒེར་བཙུགས་སློབ་གྲྭ་ཞེས་པའི་མིང་ཡང་འཇིགས་མེད་རྒྱལ་མཚན་ཕན་བདེ་སློབ་གྲྭ་ཞེས་པར་བཅོས། ༢༠༠༣ ལོར་མཚོ་སྔོན་ཞིང་ཆེན་དམངས་སྲིད་ཐིང་ཟེར་བས་དམངས་ཁྲོད་དོ་དམ་རྩ་འཛུགས་ཀྱི་དམངས་ཕན་ལས་ཁུངས་སུ་བདམས། ༢༠༠༦ ལོའི་ཟླ་ ༣ ཚེས་ ༧ ཉིན་ཀྲུང་ཧྭ་ཆེད་ལས་སློབ་གསོ་སྡེ་ཁག་གིས་ཀྲུང་ཧྭ་ཆེད་ལས་སློབ་གསོའི་མཚོ་སྔོན་ཚོད་ལྟའི་སློབ་གྲྭ་རུ་བསྒྱུར། སློབ་གླིང་དེ་ནི་བོད་ཡུལ་ན་ཆེས་མིང་དུ་གྲགས་པའི་བོད་ཡིག་ཆེད་སྦྱོང་གི་སློབ་གྲྭ་ཡག་ཤོས་ཤིག་ཏུ་ངོས་འཛིན་བྱེད་ཀྱི་ཡོད་པ་རེད།
༧) ཆུ་རགས་གསར་རྒྱག་དང་གནས་སྤོར།
ཕྱི་ལོ་ ༢༠༢༤ ཟླ་ ༢ ནང་རྒྱ་ནག་གཞུང་གིས་འབྲི་ཆུའི་རྒྱུད་དུ་ཆུ་རགས་གསར་རྒྱག་གི་ལས་གཞི་སྤེལ་ཏེ། ས་གནས་དགོན་སྡེ་ཁག་དང་མང་ཚོགས་རྣམས་བཙན་གྱིས་ས་གནས་གཞན་དུ་གནས་སྤོར་བྱ་དགོས་པའི་བཙན་བཀའ་གཏོང་གི་ཡོད་པ་ལྟར། ཕྱི་ཟླ་ ༢ ཚེས་ ༢༠ དང་། ༢༡། ༢༢ བཅས་སུ་སྡེ་དགེ་དབོན་སྟོད་སོགས་ཀྱིས་ཞི་བའི་ཐོག་ནས་འབྲེལ་ཡོད་ལས་བྱེད་པར་རེ་སྐུལ་ངུ་འབོད་གནང་སྟེ་བཙན་བཀའ་ཟློག་ཐབས་གནང་ཡོད་སྟབས། གློ་བུར་དུ་ཉེན་རྟོག་པ་མང་པོ་བསླེབས་ནས་གང་བྱུང་གཅར་རྡུང་བཏང་སྟེ་མི་ཁག་ཅིག་སྡེ་དགེ་རྫོང་མི་མང་སྨན་ཁང་དུ་བསྐྱལ་ཡོད་པ་མ་ཟད། སེར་སྐྱ་མི་མང་མང་པོ་འཛིན་བཟུང་བཙན་འཁྲིད་བྱས་ཏེ། ས་གནས་མི་མང་གི་འགྲོ་འདུག་ལ་དམ་དྲག་ཤུགས་ཆེན་བྱས་ཡོད་ལ། ཕྱིས་སུ་བོད་སྡེ་དགེ་རྫོང་མི་དམངས་ཁྲིམས་ཁང་དང་། སྡེ་དགེ་རྫོང་མི་དམངས་ཞིབ་དཔྱོད་ཁང་། སྡེ་དགེ་རྫོང་ཉེན་རྟོག་ཁང་། སྡེ་དགེ་རྫོང་ཁྲིམས་འཛིན་ཁང་ཟེར་བ་བཅས་མཉམ་འབྲེལ་ཐོག བདེ་འཇགས་དོ་དམ་གྱི་ཆད་གཅོད་བཅའ་ཁྲིམས་དང་། འདུ་ཚོགས་ཁྲོམ་སྐོར་རྔམ་སྟོན་བཅའ་ཁྲིམས། ཡིག་སྐུར་ངོ་གཏུག་གི་སྲོལ་ཡིག་ཟེར་བ་སོགས་གཞི་རྩར་བཟུང་སྟེ། བོད་སྡེ་དགེ་རྫོང་དབོན་པོ་སྟོད་ནས་རྒྱ་ནག་གཞུང་གི་བཙན་བཀའ་ཟློག་ཐབས་སུ་ཞི་བའི་རེ་སྐུལ་གནང་མཁན་སེར་སྐྱ་མང་པོ་འཛིན་བཟུང་བཙན་འཁྲིད་བྱས་ཏེ། གོང་རིམ་གྱི་བཀའ་རྒྱ་དང་ལེན་མ་བྱས་པ་དང་སྤྱི་ཚོགས་ནང་དཀྲུག་རྐྱེན་བསླངས་བ་ཟེར་བ་སོགས་ཀྱི་ཉེས་མིང་གཡོག་ཡོད་པ་མ་ཟད། ཁུལ་དེར་དམག་མི་ཕོན་ཆེན་བཀྲམ་ནས་མི་མང་ལ་འཇིགས་སྐུལ་དང་དམ་དྲག་ཤུགས་ཆེན་བྱས་ཡོད། ཡང་ཕྱི་ཟླ་ ༤ ནང་རྒྱ་ནག་གཞུང་གིས་བོད་མཚོ་ལྷོ་ཁུལ་བྲག་དཀར་རྫོང་ཁོངས་ཀྱི་དཀར་མོ་གཡས་འཁྱིལ་རྨ་ཆུའི་འགྲམ་བརྒྱུད་དུ་གཡང་འཁྱིལ་ཆུ་གློག་ས་ཚིགས་ཟེར་བ་ཞིག་རྒྱག་བཞིན་ཡོད་པའི་རྐྱེན་གྱིས། ཉེ་འགྲམ་དུ་ཆགས་པའི་ཨ་ཚོགས་དགོན་བདེ་ཆེན་ཆོས་འཁོར་གླིང་དཔལ་ཁ་གྲོང་རྡལ་ནས་སྤྱི་ལེ་གསུམ་བཞི་ཙམ་གྱི་མཚམས་སུ་ཡོད་པའི་ཁྱོ་དཀར་ནག་ལོ་ཞེས་པའི་རི་སྣ་ཞིག་ཡོད་པ་དེར་གནས་སྤོར་དགོས་པའི་བཀའ་བཏང་ནས། རྨ་ཆུའི་གཡང་འཁྱིལ་ཆུ་གློག་ས་ཚིགས་བྲག་དཀར་རྫོང་ཨ་ཚོགས་དགོན་པ་གནས་སྤོར་བྱེད་པའི་བཟོ་སྐྲུན་མཛད་སྒོ་ཟེར་བ་ཞིག་བསྡུས་ཏེ། ཨ་ཚོགས་དགོན་པ་དངོས་སུ་གནས་སྤོར་མགོ་བརྩམས་ཡོད་པ་མ་ཟད། ཆུ་གློག་ས་ཚིགས་འཛུགས་སྐྲུན་དང་འབྲེལ་ནས་ཉེ་འཁྲིས་ཀྱི་ཐང་ནག་སྟོད་སྨད་བར་གསུམ་གྱི་ཁྱིམ་ཚང་ ༡༠༨༥ ཡི་མི་གྲངས་ ༤༥༥༤ གནས་སྤོར་བྱས་བཅུག་ཡོད་ལ། སྐབས་དེར་མི་མང་གི་མིག་ཆུ་གཏོང་ཞོར་ཨ་ཚོགས་དགོན་པར་རྐྱང་ཕྱག་འཚལ་བའི་ཡིད་སེམས་འགུལ་བའི་བརྙན་ཞིག་དྲ་ལམ་བྲིན་རྒྱུག་ཆེན་པོ་ཆགས་ཡོད་ལ། ཕྱིས་སུ་ཨ་ཚོགས་དགོན་ཤུལ་མེད་བཏང་བའི་པར་བརྙན་སོགས་ཀྱང་ཐོན་ཡོད། ཡང་ཕྱི་ཟླ་ ༤ ནང་རྒྱ་ནག་གཞུང་གིས་མགོ་ལོག་ཁུལ་རྭ་རྒྱ་གྲོང་རྡལ་མར་སྟེང་སྡེ་བའི་ཉེ་འགྲམ་གྱི་རྨ་ཆུའི་བཞུར་རྒྱུན་མཐོ་ཤོས་ཁུལ་དུ། མར་སྟེང་ཆུ་མཛོད་ཟེར་བ་གསར་རྒྱག་བྱས་ནས། ཁུལ་དེའི་ཁྱིམ་ཚང་བརྒྱ་ལྷག་ལ་དངུལ་འབོར་ཆེན་སྤྲད་ནས་གནས་སྤོར་བྱེད་བཅུག་ཡོད་པ་མ་ཟད། ཆུ་མཛོད་གསར་རྒྱག་བྱས་པ་ལ་བརྟེན་ནས་༧རྒྱལ་བ་ཀརྨ་པ་སྐུ་ཕྲེང་བཞི་བའི་སྐབས་ཀྱི་བཀའ་བརྒྱུད་པའི་དགོན་ཤུལ་ཞིག་དང་། ཨ་མ་མ་ལྕམ་ལྷ་མོ་ཞེས་པའི་གཞི་བདག་ཅིག རྭ་རྒྱའི་གདོད་མའི་ནགས་ཚལ་དག་ཆུའི་འོག་ཏུ་ནུབ་ཡོད་པ་མ་ཟད། ཕྱི་ཟླ་ ༡༠ ཟླ་མཇུག་ཙམ་ནས་རྒྱ་ནག་གཞུང་གིས་མཚོ་སྔོན་ཞིང་ཆེན་མཚོ་ཤར་ཁུལ་ཡ་རྫི་ (རྒྱ་སྐད་དུ་ཞིན་ཧྭ།) རྫོང་ཀ་རིང་བོད་རིགས་ཞང་ཁོངས་ཀྱི་གནས་རི་ཨ་མྱེས་ར་སྟོད་ཉིལ་སྲིད་རབས་བཤད་ནས། རི་འདབས་ཀྱི་ཡ་ཀ་སྡེ་བ་དང་བིས་ཚང་སྡེ་བ་གཉིས་ཀྱི་ཕྱེད་ཀ་ས་གནས་གཞན་དུ་སྤོར་དགོས་པའི་བཀོད་ཁྱབ་བཏང་ཡོད་པ་དང་། ཨ་མྱེས་ར་སྟོད་ནི་ཀ་རིང་ལུང་པའི་གནས་རི་གཙོ་བོ་ཡིན་པ་དང་། ཀ་རིང་ལུང་པར་ཁྱོན་ས་མ་འབྲོག་གི་སྡེ་བ་ཆེ་ཆུང་ ༢༢ ཡས་མས་ཤིག་དང་། ཡ་ཀ་སྡེ་བར་དུད་ཁྱིམ་ ༢༠༠ ཡས་མས་དང་། བིས་ཚང་སྡེ་བར་དུད་ཁྱིམ་ ༡༠༠ ལྷག་ཡོད་པའི་གྲས་ནས་བརྒྱ་ཆའི་སུམ་བཅུ་ལྷག་ཨ་མྱེས་ར་སྟོད་གནས་རིའི་རི་འདབས་དང་རི་སྟེང་དུ་འཁེལ་ཡོད་སྟབས། དུད་ཁྱིམ་མང་པོ་ས་གནས་གཞན་དུ་གནས་སྤོར་བྱ་དགོས་པའི་བཙན་བཀའ་བཏང་འདུག
༨) འདི་ལོར་མགོན་པོ་སྐྱིད་ཀྱིས་ཐེངས་བཞི་ལ་ཞུ་གཏུགས་བྱས།
བོད་ཀྱི་ཕྱུག་བདག་ཆེན་མོ་རྡོ་རྗེ་བཀྲ་ཤིས་ལགས་ཀྱི་གཅེན་མོ་བདེན་པའི་འཐབ་རྩོད་པ་མགོན་པོ་སྐྱིད་ལགས་ཀྱིས་བོད་རང་སྐྱོང་ལྗོངས་མི་མང་ཁྲིམས་ཁང་ཟེར་བ་དེས་རྡོ་རྗེ་བཀྲ་ཤིས་ལགས་ལ་དྲང་བདེན་མིན་པའི་ཁྲིམས་ཐག་བཅད་པར་བསྐྱར་དུ་ཁྲིམས་ཞིབ་དགོས་པའི་འབོད་སྐུལ་ལས་འགུལ་མུ་མཐུད་དུ་སྤེལ་བཞིན་ཡོད་པ་ལྟར། འདི་ལོའི་ཕྱི་ཟླ་ ༢ ཚེས་ ༢༠ དང་། ཕྱི་ཟླ་ ༣ ཚེས་ ༡༥ ཉིན་བཅས་སུ་བོད་ཀྱི་བདེན་པའི་འཐབ་རྩོད་པ་མགོན་པོ་སྐྱིད་ལགས་ཀྱིས་བསྐྱར་དུ་བོད་རང་སྐྱོང་ལྗོངས་མཐོ་རིམ་མི་མང་ཁྲིམས་ཁང་ཟེར་བའི་མདུན་དུ་ཞི་བའི་འབོད་སྐུལ་ལས་འགུལ་སྤེལ་ཡོད་ཅིང་། ཕྱི་ཟླ་ ༥ ཚེས་ ༢༨ ཉིན་མགོན་པོ་སྐྱིད་ལགས་ཀྱིས་མུ་མཐུད་བོད་རང་སྐྱོང་ལྗོངས་མཐོ་རིམ་མི་དམངས་ཁྲིམས་ཁང་གི་མདུན་ནས་ཞི་རྒོལ་ལས་འགུལ་སྤེལ་སྐབས། རྒྱ་གཞུང་ཉེན་རྟོག་པས་གཅར་རྡུང་བཏང་སྟེ་བཙན་གྱིས་ཕྱིར་རང་ཁྱིམ་དུ་ལོག་བཏང་བའི་གནས་ཚུལ་ཐོན། ཡང་ཕྱི་ཟླ་ ༩ ཚེས་ ༡༤ ཉིན་མགོན་པོ་སྐྱིད་ལགས་ཀྱིས་ལྷ་སའི་ཁྲན་ཀཱན་སྤྱི་བདེ་ཉེན་རྟོག་ཁང་ཞུ་གཏུགས་བྱས་ཡོད་ཀྱང་། ཁྲིམས་ཁང་གིས་མགོན་པོ་སྐྱིད་ཀྱི་ཞུ་གཏུགས་དོན་ཚན་ལྔ་ལ་ངོས་ལེན་མ་བྱས་པའི་ཁར། ཁོང་མོར་གང་བྱུང་གཅར་རྡུང་བཏང་སྟེ་འཛིན་བཟུང་བཙོན་འཇུག་བྱས་པ་སོགས་ནི་ཁྲིམས་མཐུན་ཡིན་ལུགས་བརྗོད་འདུག ཕྱི་ལོ་ ༢༠༢༠ ལོ་སྟེ་རྡོ་རྗེ་བཀྲ་ཤིས་བཙོན་འཇུག་བྱས་ཏེ་ལོ་ ༡༠ ཕྱིན་པའི་སྐབས་དེར་ཁོང་གི་ཁྲིམས་རྩོད་པ་དང་ནང་མི་ཚོས་ཐེངས་མང་དྲང་བདེན་མིན་པའི་ཁྲིམས་ཆད་དེར་བསྐྱར་ཞིབ་དགོས་པའི་རེ་བ་བཏོན་ཡོད་ཀྱང་དོན་འབྲས་ཐོན་མེད་པར་བརྟེན། ཕྱི་ལོ་ ༢༠༢༣ ཟླ་ ༥ ཚེས་ ༡༠ དང་ ༡༦། ཟླ་ ༧ ཚེས་ ༥ དང་ ༡༣། ཕྱི་ཟླ་ ༨ ཚེས་ ༢། ཕྱི་ཟླ་ ༨ ཚེས་ ༢༥ ། ཕྱི་ཟླ་ ༡༢ ཚེས་ ༡༣ བཅས་སུ་མགོན་པོ་སྐྱིད་ལགས་ཀྱིས་ལྷ་ས་འབྲིང་རིམ་མི་མང་ཁྲིམས་ཁང་གི་མདུན་སོགས་ལ་སྔ་གཞུག་ཏུ་ཐེངས་ ༧ ལྷག་ལ་ཟས་བཅད་ངོ་རྒོལ་དང་རྐྱང་ཕྱག་འཚལ་བ་སོགས་བྱས་ནས་ཞུ་འབོད་ལས་འགུལ་སྤེལ་ཡོད་འདུག
༩) རྒྱལ་སྤྱིའི་གཟེངས་རྟགས་ཐོབ་པའི་བོད་མི།
ཕྱི་ལོ་ ༢༠༢༤ ཟླ་ ༢ ཚེས་ ༡༧ ནས་ ༢༧ བར་ཉིན་གྲངས་བཅུ་གཅིག་རིང་ལྷོ་སོག་ཏུ། རྒྱ་ནག་རྒྱལ་ཡོངས་སྐབས་བཅུ་བཞི་བའི་དགུན་དུས་ལུས་རྩལ་འགྲན་ཚོགས་ཀྱི་གངས་ཤུད་འགྲན་ཚོགས་སྟེང་། གཞོན་ནུའི་རུ་ཁག་གི་བུད་མེད་རྟིང་རྩོད་གངས་ཤུད་འགྲན་བསྡུར་ཁྲོད་བོད་ཀྱི་ལུས་རྩལ་པ་དབྱངས་ཅན་ལྷ་མོ་ལགས་སུ་གསེར་གྱི་གཟེངས་རྟགས་ཐོབ་ཡོད་པ་དང་། ཕྱི་ཟླ་ ༣ ཚེས་ ༢ ནས་ ༦ བར་ཉིན་གྲངས་ལྔའི་རིང་རྒྱ་ནག་ཅིས་ལིས་སུང་ཧྭ་མཚེའུ་རུ། ཕྱི་ལོ་ ༢༠༢༤ ལོའི་ཨེ་ཤ་ཡའི་གངས་ཤུད་ལུས་རྩལ་འགྲན་བསྡུར་འཚོགས་ཡོད་ཅིང་། འགྲན་བསྡུར་ནང་ཉི་ཧོང་དང་། ལྷོ་ཀོ་རི་ཡ། ཐའེ་ལན་ཌི། རྒྱ་ནག་བཅས་ཀྱི་རྒྱལ་ཁབ་བཞིའི་ལུས་རྩལ་པ་ ༦༦ མཉམ་ཞུགས་བྱས་ཏེ་གངས་ཤུད་འགྲན་བསྡུར་རིམ་པ་བདུན་བྱས་ཡོད་པའི་ཁྲོད། བོད་ཀྱི་ལུས་རྩལ་བ་ཚེ་བརྟན་གཡུ་སྒྲོན་ལགས་ལ་བུ་མོའི་ལམ་ཐག་ཐུང་བ་དང་། གྱེན་བསྡུར་མྱུར་ཚད། མི་སྒེར་གྱི་རྒྱང་བགྲོད། མཉམ་བསྲེས་མཐུད་རྒྱུག་གི་འགྲན་བསྡུར་བཅས་ལ་གསེར་གྱི་རྟགས་མ་བཞི་ཐོབ་ཡོད་འདུག ཕྱི་ཟླ་ ༨ ཚེས་ ༢༧ ནས་ཕྱི་ཟླ་ ༩ ཚེས་ ༡ བར་ཉིན་གྲངས་ ༦ རིང་ལྷོ་ཨ་མེ་རི་ཁའི་པེ་རུ་རྒྱལ་ཁབ་ཀྱི་རྒྱལ་ས་ལི་མཱ་རུ། འཛམ་གླིང་གཞོན་ནུའི་མཆོང་རྒྱུག་འཕེན་གསུམ་གྱི་ལུས་རྩལ་འགྲན་བསྡུར་ཁྲོད། བོད་རིགས་འདུར་རྒྱུག་ལུས་རྩལ་བ་པདྨ་སྒྲོལ་མ་ལགས་ཀྱིས་བུད་མེད་ཀྱི་སྨི་ ༡༠༠༠༠ ཡི་འདུར་རྒྱུག་འགྲན་སྡུར་ལས་སྐར་མ་ ༤༣ དང་སྐར་ཆ་ ༢༦ ། གྲངས་ཆུང་ ༦༠ ཡི་གྲུབ་འབྲས་བླངས་ཏེ་གསེར་གྱི་གཟེངས་རྟགས་ཐོབ་འདུག དེ་བཞིན་ཕྱི་ཟླ་ ༩ ཚེས་ ༢༢ ཉིན་རྒྱ་ནག་ཧོ་པེ་ཞིང་ཆེན་ཧིང་ཧྲུས་གྲོང་ཁྱེར་དུ། ཕྱི་ལོ་ ༢༠༢༤ ལོའི་རྒྱ་ནག་རྒྱལ་ཡོངས་ཀྱི་ས་ཚིགས་གཉིས་པའི་རྒྱང་རྒྱུག་རྩེད་འགྲན་ནང་བོད་རང་སྐྱོང་ལྗོངས་ཟེར་བའི་ལུས་རྩལ་པ་ ༨ འགྲན་ཞུགས་བྱས་ཡོད་པའི་ཁྲོད། བོད་ཀྱི་ལུས་རྩལ་པ་ཚེ་རིང་མཚོ་མོས་ཆུ་ཚོད་ ༢ དང་། སྐར་མ་ ༢༦། སྐར་ཆ་ ༤༧ གྱི་གྲུབ་འབྲས་བླངས་ཏེ་གསེར་གྱི་རྟགས་མ་ཐོབ་ཡོད་པ་དང་། དེ་ནི་རྒྱ་ནག་རྒྱལ་ཡོངས་བུད་མེད་རུ་ཁག་འགྲན་བསྡུར་གྱི་ཟིན་ཐོ་གསར་བ་བཏོད་ཡོད་འདུག ཡང་ཕྱི་ཟླ་ ༢ ཕྱི་ཚེས་ ༦ ནས་ ༡༣ བར་ཧྥ་རན་སི་ཝེ་སོལ་ཨེ་ཤེ་ཡའི་རྒྱལ་སྤྱིའི་གློག་བརྙན་དུས་སྟོན་ (Vesoul International Film Festival of Asian Cinema) ཐེངས་ ༣༠ པའི་སྟེང་བོད་ཀྱི་གློག་བརྙན་འཁྲབ་ཁྲིད་པ་གྲགས་ཅན་འདས་པོ་པདྨ་ཚེ་བརྟན་ལགས་ཀྱི་གློག་བརྙན་གསའ་ལ་གློག་བརྙན་རྩེ་གྲས་གྱི་བྱ་དགའ་ཐོབ་ཡོད་པ་དང་། བོད་ཀྱི་གློག་བརྙན་འཁྲབ་སྟོན་པ་ཚེ་བརྟན་བཀྲ་ཤིས་ལགས་ལ་དམིགས་བསལ་འཁྲབ་སྟོན་པའི་བྱ་དགའ་ཐོབ་ཡོད་འདུག ཐེངས་དེའི་གློག་བརྙན་དུས་སྟོན་ཐོག་རྒྱལ་ཁབ་འདྲ་མིན་གྱི་གློག་བརྙན་བརྩམས་ཆོས་མི་འདྲ་བ་ ༩༠ ལྷག་མཉམ་ཞུགས་གནང་ཡོད་ཅིང་། གློག་བརྙན་དཔྱད་འདེམས་ཚོགས་ཆུང་གིས་གཏམ་རྒྱུད་གློག་བརྙན་ ༩ དང་། དངོས་བཤུས་གློག་བརྙན་ ༨ བདམས་ཡོད་པའི་ཁྲོད་གློག་བརྙན་བརྩམས་ཆོས་རྩེ་གྲས་ ༨ ལ་བྱ་དགའ་ཐོབ་འདུག་ལ། ཡང་ཕྱི་ལོ་ ༢༠༢༤ ལོའི་རྒྱ་ནག་གློག་བརྙན་འཁྲབ་ཁྲིད་པའི་མཐུན་ཚོགས་ཀྱི་དུས་སྟོན་ཐོག་བོད་ཀྱི་གློག་བརྙན་འཁྲབ་ཁྲིད་པ་གྲགས་ཅན་པདྨ་ཚེ་བརྟན་དམ་པར་འཁྲབ་ཁྲིད་པ་ཡག་ཤོས་དང་སྦྱིན་པ་ལགས་ལ་འཁྲབ་སྟོན་པ་ཡག་ཤོས་ཀྱི་བྱ་དགའ་ཐོབ་འདུག
༡༠) འདས་གྲོངས་སུ་གྱུར་བའི་བོད་ནང་གི་སྐྱེས་བུ།
ཕྱི་ལོ་ ༢༠༢༤ ཟླ་ ༡༡ ཚེས་ ༡༩ ཉིན་བོད་ཀྱི་ལོ་རྒྱུས་སྨྲ་བ་གྲགས་ཅན་ནོར་བྲང་ཨོ་རྒྱན་ལགས་དགུང་ལོ་ ༩༢ ཐོག་བོད་ཀྱི་རྒྱལ་ས་ལྷ་ས་ནས་སྐུ་གཤེགས་པའི་གནས་ཚུལ་ཐོན་ཡོད་ཅིང་། བོད་ནང་གི་སྙན་ངག་པ་དང་རྩོམ་པ་པོ། ཤེས་ཡོན་པ་སོགས་ཀྱི་ཁོང་གི་ཤུལ་ལུས་ནང་མི་ལ་སེམས་གསོ་དང་། ཁོང་ལ་མྱ་ངན་ཞུ་ཡིག་བྲིས་པའི་ནང་། མི་འདི་ཚོ་གངས་རིའི་ཕྱི་ནང་སྲུང་བའི་ལྕགས་རི་ཡིན། ཁོ་ཚོའི་མི་ཚེ་གངས་རིའི་ཚེ་སྲོག་ལ་ཕུལ་ཡོད། གངས་རིའི་མིང་སྲིང་ཚོའི་སེམས་ནང་གི་ཕོ་རྒོད་དག་དག་ཡིན། ཕ་སྐད་ཀྱི་སྲོག་ཤིང་ཡིན་པའི་བགྲེས་པོ་ལགས། བདེ་བར་བཞུད། ཅེས་བྲིས་འདུག་ལ། བོད་ནང་གི་སྙན་ངག་པ་སྐྱབས་ཆེན་བདེ་གྲོལ་ལགས་དང་། རྩོམ་པ་པོ་དང་འགྲོ་བ་མིའི་ཐོབ་ཐང་དང་རང་དབང་འཐབ་རྩོད་པ་ཞོགས་ལྗང་ལགས་སོགས་ཀྱིས་འདས་པོ་ཁོང་ལ་མྱ་ངན་ཞུས་འདུག གསུང་རྩོམ་ལ་«དེབ་ཐེར་དཔྱིད་ཀྱི་རྒྱལ་མོའི་གླུ་དབྱངས་ཀྱི་འགྲེལ་པ་ཡིད་ཀྱི་དགའ་སྟོན་»དང་། «ཆོས་རྣམ་ཀུན་བཏུས་»སྟོད་སྨད་གཉིས། «སྤྲིན་གྱི་ཕོ་ཉའི་འགྲེལ་པ་ངོ་མཚར་དགའ་སྟོན་» «དཔལ་གྲུབ་པའི་དབང་ཕྱུག་བརྩོན་འགྲུས་བཟང་པོའི་རྣམ་ཐར་» «རྟོགས་བརྗོད་དཔག་བསམ་འཁྲི་ཤིང་གི་འགྲེལ་པ་ཡིད་ཀྱི་སྙེ་མ་»པོད་གཉིས། «རྗེ་ཙོང་ཁ་པའི་གསུང་རྩོམ་སྙན་ངག་ཨའི་དབྱངས་ངེས་སོགས་ཁག་གསུམ་གྱི་འགྲེལ་པ་» «བོད་སིལ་བུའི་བྱུང་བ་བརྗོད་པ་ཤེལ་དཀར་ཕྲེང་བ་» «ཆོས་རྒྱལ་དྲི་མེད་ཀུན་ལྡན་གྱི་རྟོགས་བརྗོད་བསྔགས་འོས་བསྔགས་པའི་རྩ་འགྲེལ་པད་དཀར་ཆུན་པོ་» «བོད་ཀྱི་གནའ་རབས་དཔལ་འབྱོར་ཐང་བཞིའི་སྐོར་གྱི་དཔྱད་རྩོམ་ཕྱོགས་བསྒྲིགས་ངོ་མཚར་མིག་འབྱེད་» «རྗེ་བཙུན་མི་ལའི་རྟོགས་བརྗོད་སྙན་ཚིག་མའི་རྩ་འགྲེལ་» «ནོར་བྲང་ཨོ་རྒྱན་གྱི་གསུང་རྩོམ་ཕྱོགས་བསྒྲིགས་» «བོད་ཀྱི་ལོ་རྒྱུས་རགས་རིམ་གཡུ་ཡི་ཕྲེང་བ་»པོད་གསུམ་ཅན་སོགས་གསུང་འབུམ་པོད་གྲངས་ཉི་ཤུ་ལྷག་ཡོད་འདུག འདི་ལོའི་ཕྱི་ཟླ་ ༡ ཚེས་ ༢ ཉིན་བོད་ཀྱི་གཞས་པ་གྲགས་ཅན་གངས་བཞུགས་ལགས་ནད་གཞིའི་རྐྱེན་གྱིས་ཁྲིན་ཏུའུ་གྲོང་ཁྱེར་དུ་འདས་གྲོངས་སུ་ཕྱིན་ཡོད་སྟབས། བོད་ཕྱི་ནང་གཉིས་ཀྱི་སྒྱུ་རྩལ་བ་དང་གླུ་བ་གླུ་མ། རྩོམ་པ་པོ་སོགས་མི་མང་པོས་གདུང་སེམས་མཉམ་སྐྱེད་བྱས་འདུག གཞས་པ་གངས་བཞུགས་ལགས་ནི་ཕྱི་ལོ་ ༡༩༧༣ ལོའི་ཟླ་ ༩ ཚེས་ ༡༥ ཉིན་བོད་མདོ་སྨད་རྔ་བའི་ཡུལ་དུ་སྐྱེས་ཤིང་། སི་ཁྲོན་རོལ་དབྱངས་སློབ་གླིང་ནས་རོལ་མོའི་ཐོག་བསླབ་པ་མཐར་སོན་ཡོད་པ་དང་། ཁོང་ནི་གངས་ལྗོངས་ཁུ་བྱུག་སྔོན་མོ་བདུད་བྷེ་ལགས་ཀྱི་སློབ་མ་ཐོག་མའི་གྲས་ཡིན་འདུག ཁོང་གིས་ཟི་ལིང་གྲོང་ཁྱེར་དུ་ཉི་མའི་ཚོ་བ་གླུ་གར་གླིང་ཞེས་པའི་ནང་མ་ཁང་ཞིག་བཙུགས་ནས་བོད་ཀྱི་གླུ་གཞས་སྒྱུ་རྩལ་ཐོག་ཆེད་ལས་རང་བཞིན་གྱི་ཐོག་ནས་འབད་འབུངས་གནང་ཡོད་པ་དང་། མདོ་དབུས་ཁམས་གསུམ་གྱི་གླུ་གཞས་ལ་དགའ་བའི་སློབ་མ་མང་པོ་ཞིག་ཀྱང་སྐྱེད་སྲིང་གནང་ཡོད་འདུག་ལ། ཁོང་གི་གླུ་གཞས་བརྩམས་ཆོས་ཟླ་འོད་འོག་གི་ཕོ་བྲང་པོ་ཏ་ལ་དང་། མཐོ་སྒང་དམར་པོ། མ་ཎི་རྡོ་འབུམ། སེམས་ཀྱི་ལོག་ཕེབས། སྙིང་ཁོང་གི་འབོད་པ། འཛོམས་པ་ཡག་མོ་སོགས་སྤྱི་ཚོགས་ཐོག་ཏུ་དགའ་མོས་ཆེན་པོ་ཐོབ་ཡོད་པ་རེད།
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
