སྤྱི་ལོ་ ༢༠༢༤ ཟླ་ ༡༢ ཚེས་ ༢༧ ཉིན་ ༼ཕྱི་ལོ་༢༠༢༤ ལོའི་རྨ་ཆུ་རྫོང་དུ་སྐྱེ་ཁམས་དང་ས་གཤིས་གནོད་འཚེ་འགོག་ཐབས་ཀྱིས་གཅིག་བསྡུས་གནས་སྤོ་ཐོ་འགོད་མཛད་སྒོ། ༽ཟེར་བ་ཞིག་སྤེལ་ཏེ། རྨ་ཆུའི་སྟོད་རྒྱུད་ཀྱི་སྐྱེ་ཁམས་གསར་སྤེལ་དང་ས་གཤིས་གནོད་འཚེ་འགོག་ཐབས་ཀྱི་འབོད་སྒྲའི་འོག་མདོ་སྨད་རྨ་ཆུ་རྫོང་ཁོངས་ཀྱི་ཞིང་དང་གྲོང་བརྡལ་བཞིའི་ཁྱབ་ཁོངས་སྟེ། རྨ་ཁུག་རྟ་ར། མཚེ་རུ་མ་གྲོང་བརྡལ། ཆུ་ཁ་མ་གྲོང་བརྡལ། མེར་ཕྱི་གྲོང་བརྡལ་བཅས་ཀྱི་ཁོངས་སུ་གཏོགས་པའི་ས་བབ་མཐོ་སར་གནས་པའི་འབྲོག་པ་རུབ་སྡོད་གྲོང་སྡེ་གསར་སྐྲུན་ཆེད་དུད་ཁྱིམ་རེ་ནས་རྒྱ་སྒོར་ཁྲི་ལྔ་རེ་བསྡུས་ཤིང་། རྒྱ་གཞུང་ནས་རོགས་སྐྱོར་རྒྱ་སྒོར་ཁྲི་བཅུ་རེ་བཅས་ཁྱོན་རྒྱ་སྒོར་ཁྲི་བཅོ་ལྔ་བཏང་ཐོག་སྡོད་ཁང་ ༡༢༢ དང་མི་གྲངས་ཁྱོན་བསྡོམས་ ༩༣༨ དངོས་སུ་གནས་སྤོར་གྱི་སྒོ་འབྱེད་མཛད་སྒོ་ཚོགས་འདུག་པའི་པར་དང་བརྙན། གནས་སྤོ་ཟིན་པའི་འབྲོག་པ་དག་ལ་བཅར་འདྲི་བྱས་པ་དག་རེ་རེ་བཞིན་ཞིབ་ཏུ་ཀློག་ན། ལོ་ངོ་སྟོང་ཕྲག་རིང་མཐོ་སྒང་གི་རི་དྭགས་བཞིན་གནས་པའི་འབྲོག་པ་དག་རི་ནས་ལུང་གཞུང་ལ་ཕབ་ཅིང་གཞུང་ནས་རྡོ་ཁང་ལ་བཅུག་པར་ཁྲིམས་ཀྱིས་བསྡམས་ཤིང་ལྕགས་ཀྱིས་མ་བྲབ་ན་དཔེ་མི་སྲིད་པ་ཞིག་ཡིན།
དེ་ཡང་ལོ་ངོ་སྟོང་ཕྲག་རིང་འཚོ་རྟེན་འབྲོག་ལས་གཅིག་པོར་བརྟེན་པའི་འབྲོག་པ་རུབ་སྡོད་གྲོང་སྡེ་གསར་བསྐྲུན་དང་འབྲོག་པ་མང་ཚོགས་ཀྱི་རང་གི་ཕ་མས་ཀྱི་འཚོ་རྟེན་རྟ་ནོར་ལུག་ཐམས་ཅད་རྩ་རྫོགས་བྱས་ནས་རུབ་སྡོད་གྲོང་སྡེར་སྤར་ཏུ་བཅུག། ཤེས་ཡོན་དང་ལག་ཤེས་མེད་ལ། ཞིང་ལས་མི་ཤེས་ལ་ཤེས་ཀྱང་འདེབས་འཛུགས་བྱེད་སའི་ས་ཆ་མེད། རྒྱ་ནག་གི་སྐྱོབ་གསོ་གཅིག་པོ་ནི་མཐར་དེད་ན་ཁོང་དག་གི་འཚོ་རྟེན་འབའ་ཞིག་དེ་ཡིན། ད་དུང་རང་ཉིད་ཀྱི་བུ་སྤུན་དག་ནས་གཞུང་གི་སྲིད་བྱུས་སྒྲིག་འགལ་ཅུང་ཙམ་བྱུང་ན་སྐྱོབ་གསོ་ཆད་འགྲོ་ལ། ཐ་ན་བུ་ཕྲུག་སློབ་གྲྭ་གཏོང་བའི་གོ་སྐབས་དེ་ཡང་ཤོར་འགྲོ་བས། རྡོ་ཁང་ནང་གི་འབྲོག་པ་ནི་དུས་དང་རྣམ་པ་ཀུན་ཏུ་སྐྲག་སྣང་གིས་འཚོ་ཡོད། མཐར་དེད་ན་འབྲོག་པ་འདི་དག་གིས་རང་གི་འཚོ་གནས་རང་དབང་དང་། སྨྲ་བརྗོད་རང་དབང་། ཆོས་དད་རང་དབང་། འགྲོ་འདུག་རང་དབང་སོགས་ཡོངས་སུ་རང་ཉིད་དང་ནང་མི་བུ་ཕྲུག་བཅས་ཀྱི་ཉིན་རེའི་འཚོ་རྟེན་ལ་མི་བརྗེ་ག་མེད་གྱུར་ཡོད། ད་དུང་མཛད་སྒོ་དང་འབྲེལ་སྐབས་ཐོག་འབྲོག་པ་དག་ལ་ཡང་བཅར་འདྲི་བྱས། ང་ཚོ་དབྱར་དགུན་སྟོན་དཔྱིད་འཚོ་གནས་སྤར་ཏེ་འགྲོ་བཞིན་ཡོད་པ་དང་། དཀའ་ངལ་ཆེ་ཤོས་ནི་ཆུ་དང་གློག ལམ་ཁ་ཡག་པོ་མེད་པའི་རྒྱུ་མཚན་བཤད་དུ་བཅུག་འདུག
༡ དོན་དངོས་འབྲོག་པ་ཆུའི་དཀའ་ངལ་ཡོད་དམ།
རང་ཉིད་ས་མཐོའི་རི་ཀློང་ནས་སྐྱེས་ཤིང་འཚར་བའི་འབྲོག་ཕྲུག་དག་མ་ཞིག་ཡིན་ན། འབྲོག་པ་ཆུའི་དཀའ་ངལ་མེད་པ་ཤེས། གལ་སྲིད་ས་ཁུལ་རེ་ཟུང་ལ་ཡོད་སྲིད་ཡང་། དེའི་དཀའ་ངལ་སེལ་ཐབས་སུ་སྔར་ལོ་ངོ་སྟོང་ཕྲག་གི་རིང་ནས་རྒྱུན་བསྲིངས་བའི་ཐབས་ལམ་སྣ་ཚོགས་པ་ཡོད། འཚོ་གནས་ཡོངས་སུ་བློས་གཏོང་དགོས་པའི་དཀའ་ཁག་རྩ་བ་ནས་མེད། དེ་ལས་དེང་སྐབས་བོད་ནང་གི་གྲོང་ཁྱེར་དང་གྲོང་བརྡལ་ཁག་ཏུ་འབྲོག་པ་དག་ལས་ཀྱང་ཆུའི་དཀའ་ངལ་ཆེན་པོ་འཕྲད་བཞིན་ཡོད། རྫོང་དང་གྲོང་བརྡལ་འགར་ཉིན་རེར་ཆུ་བེད་སྤྱོད་ཀྱི་ཚད་གཞི་བཟོས་ཏེ་སྤྱི་རྒྱ་ ༢༠ ལས་མང་བ་བེད་སྤྱོད་བཏང་མི་ཆོག་པ་ལྟ་བུའི་ཁྲིམས་སྒྲིག་བཟོས་ཏེ་དཀའ་ཁག་ཛ་དྲག་ཅན་ཏུ་འགྱུར་བཞིན་པ་མངོན་གསལ་ཡིན། དེ་ཡང་བོད་ནི་འཛམ་གླིང་གི་སྣེ་མོ་གསུམ་པ་དང་ཨེ་ཤ་ཡིའི་ཆུ་མཛོད་ཡིན་བཞིན་ཏུ་བོད་ནང་གི་གྲོང་ཁྱེར་དང་རྫོང་། གྲོང་བརྡལ་ཁག་ཏུ་ཅིའི་ཕྱིེར་ཆུའི་དཀའ་ངལ་འཕྲད་བཞིན་པ་ཡིན་ནམ།
༢ དོན་དངོས་འབྲོག་པ་ལ་གློག་མེད་པའི་དཀའ་ངལ་ཡོད་དམ།
གློག་ནི་དེང་སྐབས་དགོས་ངེས་ཅན་ཞིག་ཡིན། དེ་བཞིན་རང་ཉིད་མཐོ་སྒང་ནས་ཡོང་བའི་འབྲོག་པ་ཞིག་ཡིན་ཚེ། མཐོ་སྒང་ལ་ཡོད་པ་ནི་ཉི་འོད་ཡིན། ཉི་གསོག་གློག་ཤེལ་ནི་གློག་གི་འབྱུང་ཁུངས་ཡིན། རྒྱུན་མཁོའི་དཀར་ངོགས་ལས་དེང་སྐབས་ད་དུང་དྲ་རྒྱ་དང་ཚ་གློག་ཡང་ཉི་གློག་ལ་བརྟེན་ནས་བེད་སྤྱོད་བྱ་མུས་ཡིན་པས། གློག་གི་དཀའ་རྩ་བ་ནས་མེད། གལ་སྲིད་དུད་ཁྱིམ་ཆེས་ཕལ་པ་ཞིག་ཡིན་ཡང་། དཀར་ངོགས་ཙམ་གྱི་དཀའ་ངལ་དེ་རྩ་བ་ནས་མེད་ལ་གལ་སྲིད་ཡོད་པས་དབང་དུ་བཏང་ཡང་། དཀར་ངོགས་ཙམ་གྱི་ཆེད་དུ་རང་དང་རང་གི་བུ་རབས་ཚ་རྒྱུད་ཀྱི་ལྟོ་གོས་དང་ཐད་ཀར་འབྲེལ་བའི་འཚོ་གནས་བློ་གཏོང་མི་སྲིད། ལྷག་པར་རྒྱ་ནག་གི་བོད་ཀྱི་གཙང་ཆེན་ཁག་སྟེ། ཡར་ཀླུང་གཙང་པོ། འབྲུ་ཆུ། རྫ་ཆུ། རྨ་ཆུ་སོགས་གཙང་པོ་ཁག་གི་ཐོག་གློན་འདོན་ཆུ་རགས་བརྒྱབ་ཟིན་པ་ཧ་ཅང་མང་ལ་ད་ལྟ་འཛམ་གླིང་གི་གློག་འདོན་ཆུ་རགས་ཆེ་ཤོས་ཡར་ཀླུང་གཙང་པོའི་ཐོག་རྒྱག་བཞིན་ཡོད་མོད། བོད་ཀྱི་འབྲོག་པ་མང་ཆེ་ད་དུང་ཉི་གློག་ལ་བརྟེན་ཡོད་པས་རྒྱུ་མཚན་ཅི་ཡིན་ནམ།
༣ གཞུང་ལམ་གྱི་དཀའ་ངལ་ཡོད་དམ།
ས་མཐོའི་འབྲོག་ཁུལ་ཏུ་གཞུང་ལམ་ཡག་པོ་མེད་པ་དངོས་བདེན་རེད། ཡིན་ཡང་འཚོ་གནས་ཡོངས་སུ་དོར་དགོས་པའི་དཀའ་ངལ་རྩ་བ་ནས་མེད། ས་མཐོའི་མཐོ་་སྒང་གི་འབྲོག་པ་ཞིང་དང་གྲོང་བརྡལ་ནས་རང་ཁྱིམ་ལོག་པར་སྣུམ་ལམ་བརྒལ་ཏེ་ས་ལམ་བརྒྱུད་རྫ་རི་དང་རི་ཆེན་རི་ཆུང་བརྒྱུད་རླངས་འཁོར་དང་འཕྲུལ་རྟ་ཞོན་ནས་དུས་ཚོད་མང་འགྲོ་དགོས། ཡིན་ཡང་། དབྱར་དགུན་སྟོན་དཔྱིད་མེད་པར་བྱིས་པ་སློབ་གྲྭར་ཕར་སྐྱེད་ཚུར་ལེན་དང་ཟས་གོས་སྐྱེལ་འདྲེན་ལ་དཀའ་ངལ་མེད། གལ་སྲིད་རླངས་འཁོར་མི་ཐར་སའི་ས་ཁུལ་འགའ་ཤས་ཡོད་སྲིད། དེ་ཡང་འཕྲུལ་རྟ་ཤ་མར་འགྲོ་ཐུབ། དེར་བརྟེན། ལམ་ཁ་ཡག་པོ་མེད་པ་རྒྱུ་མཚན་དུ་བྱས་ནས་རང་གི་འཚོ་བ་ཡོངས་སུ་བློས་བཏང་ནས་ཅི་ཞིག་ཟ་དགོས། ཅི་ཞིག་འཐུང་དགོས། འབྲོག་པ་དེང་རབས་སློབ་སྦྱོང་མེད་པ་བདེན་ཡང་། རང་གི་འཚོ་གནས་ལ་བསམ་བློ་གཏོང་མི་ཤེས་པའི་ཚད་རྩ་བ་ནས་མིན། བཙན་ཤེད་ཀྱི་བཀའ་རྒྱ་ལྕགས་ཚེར་ལྟ་བུ་ཞིག་མེད་པར་རི་ཀློང་ན་བག་ཡངས་ཀྱིས་འཚོ་བའི་འབྲོག་པ་འདི་དག་རྡོ་ཁང་སྟོང་པ་ཞིག་གི་ནང་དུ་སྤར་མི་སྲིད་ལ་། དེ་བས་ཀྱང་གལ་ཆེ་བ་ནི་རང་གི་ཕ་མེས་ནས་གནང་བའི་རང་དབང་གི་མགོ་བོ་མཐོན་པོ་དེ་དོན་མེད་གཞན་ལག་ཏུ་མི་འཇོག་པ་ནི་རྩ་བའི་དམ་བཅའ་ལྟ་བུ་ཞིག་ཡིན།
༤ རུབ་སྡོད་གྲོང་སྡེ་གསར་བསྐྲུན་བྱ་ཡུལ་ལ་བལྟས་ན་འབྲོག་པ་གསོ་ཆེད་མིན་པར་གསོད་འཆར་ཡིན་པ་མངོན་པར་གསལ།
རྒྱ་ནག་གཞུང་གིས་འདས་པའི་ལོ་མང་རིང་རྨ་འབྲུའི་མགོ་ཁུངས་ཁོར་ཡུག་སྲུང་སྐྱོབ་གྱི་འབོད་སྒྲའི་འོག་རྨ་འབྲིའི་མགོ་སྟོད་དུ་འཛམ་གླིང་གི་ཆེས་ཆེ་བའི་སྤྱི་གླིང་འཛུགས་སྐྲུན་ཆེད་མཐོ་སྒང་གི་ས་ཁུལ་མང་པོར་རུབ་སྡོད་གྲོང་སྡེ་གསར་སྐྲུན་བྱེད་བཞིན་འདུག དེ་དག་ནི་རྫོང་དང་གྲོང་སྡེ་ཁག་གི་མཐའ་མཐའ་ལ་ཡིན། ཞིང་དང་གྲོང་བརྡལ་ཁག་དང་ཅུང་ཐག་ཉེ་བའི་ས་ཁུག་ལུང་ཁུག་དག་ཏུ་འཛུགས་སྐྲུན་བྱས་ཡོད། ཁང་པ་ནི་ནང་མའི་མི་འབོར་ལ་བབ་པའི་ཆེ་ཆུང་སོགས་མེད་པར་ཚང་མ་རྒྱུགས་པ་ལེབ་རྡུང་ལྟར་གྲལ་རིམ་བཞིན་གཅིག་མཚུངས་སུ་བརྒྱབ་ཡོད། ཁང་པ་དེ་དག་གི་སྒེའུ་ཁུང་ཐོག་ཏུ་བོད་ཁང་གི་བཟོ་ལྟ་ཙམ་ཞིག་ཡོད་པ་ལས་གཞན་རྡོ་ཁང་རང་ཡིན། འཛུགས་སྐྲུན་དང་རྒྱུ་ཆའི་ཆ་ནས། འཛུགས་བསྐྲུན་འཆར་གཞི་འདེངས་མཁན་དང་ས་ཐིག་རྒྱག་མཁན། ཨར་ལས་བྱེད་མཁན་ཚང་མ་རྒྱ་ཡིན། ཁང་པའི་རྨང་གཞི་ངོ་བོ་ཙམ་ལས་ས་གཏིང་བསྐོ་བ་དང་ལྕགས་སོགས་བླུགས་མེད། རྒྱུ་ཆ་ཡང་ས་ཕག་མ་ཡིན་པར་ས་ཕག་ལས་ཆེ་ཞིང་ཨར་འདམ་ཀྱིས་བཟོས་པའི་རྡོ་ཕག་དཀྱིལ་ན་བར་སྟོང་ཆེན་པོ་ཡོད་པ་དེ་ཡིན། ཁང་པའི་རྒྱབ་དང་ཕྱོགས་གཉིས་ནས་ཨར་འདམ་ལས་གྲུབ་པའི་རྡོ་ཕག་བརྩིགས་ཤིང་ཨར་འདམ་བླུགས་ཏེ་ཡར་བསླང་པ་ཙམ་ལས་ཐ་ན་ཀ་བ་ཡང་མེད། སྒང་ལྕགས་ཤོག་ཡིན། ཁང་པའི་ནང་ངོས་དེང་སྐབས་ཀྱི་ཤིང་རྫུན་ཤོག་བུ་འདྲ་དེ་ཡིན། ཁང་པའི་མདུན་ཤེལ་སྒོ་མང་། དེ་ཡང་པར་ངོས་ནས་གནས་སྟངས་གསལ་བོར་མཐོང་། གློག་འཐེན་ཡོད། གློག་རིན་རང་གིས་སྤྲོད་དགོས། ཆུ་འཐེན་ཡོད། ཡིན་ཡང་མཐོ་སྒང་གི་དགུན་ཁའི་གྲང་ངར་ཆེ་སྟབས་དགུན་ཁ་ཆུ་མེད། ལོ་མང་སྔོན་རུབ་སྡོད་གྲོང་བརྡལ་རྒྱག་པའི་སྲིད་བྱུས་འདི་དང་པོ་ལག་ལེན་བྱེད་སྐབས་ཁང་པ་རེའི་ནང་གློག་བརྙན་དང་འཁྱགས་སྒམ། རྐུབ་སྟེགས་སོགས་ཡོད་པ་ཁྱབ་བསྒྲགས་རྒྱ་ཆེ་འདུག ཡིན་ཡང་དེང་སྐབས་དེ་ཡང་མེད་པ་འདྲ། དྲིལ་བསྒྲགས་ནང་མཐོང་སར་མི་འདུག
དེ་བས། འདི་ནི་པར་དང་བརྙན་ལམ་ན་མངོན་སུམ་མཐོང་དུ་ཡོད་པའི་བདེན་པའི་དཔེ་མཚོན་ཞིག་ལས། མདོ་དབུས་ཁམས་གསུམ་གྱི་ཡུལ་ལུང་སོ་སོ་རུ་རུབ་སྡོད་གྲོང་སྡེར་ཕབ་ཟིན་པ་དང་ད་ལྟ་དབབ་བཞིན་པ། མ་འོངས་དབབ་འཆར་ཡོད་པ་ག་ཚོད་ཡོད་དམ། སྲིད་བྱུས་འདིའི་འོག་མཐོ་སྒང་གི་འབྲོག་པ་དག་ནི་རང་དབང་དང་རང་འཚོ་ནས་གཞན་བརྟེན་དང་དབུལ་ཕུངས་སུ་བསྒྱུར་ཞིང་། མཐར་རྒྱ་ནག་དམར་གཞུང་གི་ཟླ་རེའི་འཚོ་སྣོན་ཆད་ན་ལྟོག་ཤུ་ཐེབས་ཡོང་བའི་གནས་ཤིག་ལ་ཁ་ཕྱོགས་ནས་འགྲོ་བཞིན་ཡོད་པས། གལ་སྲིད་འབྲོག་པ་འདི་དག་ལ་རང་དབང་ཡོད་ན་རང་ཉིད་ཀྱི་ཉིན་རེའི་ཟ་འཐུང་ཡང་གཞན་ལ་བརྟེན་དགོས་པའི་གནས་ཤིག་ལ་ནམ་ཡང་འགྲོ་མི་སྲིད་པ་རྒྱུན་ཤེས་ཤིག་མ་ཡིན་ནམ།
ཚེ་དབང་རྒྱལ་མཚན་ནས་གནས་ཚུལ་མཐོང་མ་ཐག་ཏུ་རང་གི་སེམས་ཚོར་ཤར་མར་བྲིས་པའོ། སྤྱི་ལོ་ ༢༠༢༥ ལོའི་ཟླ་༡ ཚེས་༢ ཉིན།
