རྒྱ་ནག་གཞུང་གིས་རུ་ཐོག་རྫོང་ཁོངས་ཀྱི་སྐྱེས་པ་རྣམས་དམག་མིར་ཞུགས་ཚེ་གཞུང་ནས་དཔལ་འབྱོར་གྱི་རོགས་རམ་རག་གི་ཡོད་ལུགས་རྗོད་ཀྱིན་འདུག
རྒྱ་ནག་གཞུང་གིས་འདི་ལོ་ནས་ལོ་ ༡༨ སོན་པའི་སྐྱེས་པ་རྣམས་དམག་མིར་ངེས་པར་དུ་ཞུགས་དགོས་པའི་བཙན་བཀའ་བསྒྲགས་ཡོད་པ་ལྟར། ཟླ་སྔ་མའི་ཟླ་མཇུག་ཙམ་དུ་རྒྱ་ནག་གཞུང་གིས་ཧིན་བོད་མཐའ་མཚམས་ཀྱི་ཉེ་འགྲམ་དུ་ཆགས་པའི་བོད་ཀྱི་རུ་ཐོག་རྫོང་ཁོངས་ཀྱི་ལོ་ཚད་ལོན་པའི་སྐྱེས་པ་རྣམས་ངེས་པར་དུ་དམག་ཁོངས་སུ་ཞུགས་དགོས་པའི་བརྡ་ཁྱབ་བཏང་བ་དང་འབྲེལ། རུ་ཐོག་རྫོང་ཁོངས་ཀྱི་བོད་མི་གཞོན་སྐྱེས་རྣམས་ཀྱི་ཕ་མ་སོགས་ལ་སྒེར་འབྲེལ་བགྱིས་ནས་དམག་ཁོངས་སུ་ཞུགས་དགོས་པའི་སྒེར་བརྡ་གཏོང་གིན་ཡོད་པའི་གནས་ཚུལ་འཐོན་མུས་ཡིན་འདུག
འདི་གའི་གསར་འགོད་པར་འབྲེལ་ཡོད་ཀྱིས་མཁོ་སྤྲོད་གནང་བའི་བརྡ་ཁྱབ་དེའི་ནང་། རྒྱ་ནག་གཞུང་གི་དམག་དོན་གྱི་དོན་ཚན་ ༡༥ པའི་དགོངས་དོན་ཇི་བཞིན། ཕྱི་ལོ་ ༢༠༢༤ ཟླ་ ༡༢ ཚེས་ ༣༡ ནས་ཕོ་ལོ་བཅོ་བརྒྱད་སོན་པའི་སྐྱེས་པ་དག་གིས། རྒྱལ་ཁབ་ཀྱི་དམག་དོན་ཞབས་ཞུ་ཆེད་ཕྱི་ལོ་ ༢༠༢༥ ཟླ་ ༦ ཚེས་ ༣༠ སྔོན་ལ་ཐོ་འགོད་བྱས་ཟིན་པ་དགོས། ཞེས་གསལ་འདུག
འབྲེལ་ཡོད་གནས་ཚུལ་མཁོ་སྤྲོད་པས། རུ་ཐོག་རྫོང་ནི་ཧིན་བོད་གཉིས་ཀྱི་མཐའ་མཚམས་སུ་ཁེལ་ཡོད་པས། རྒྱ་ནག་གཞུང་གིས་དོགས་ཟོན་ཆེན་པོ་བྱེད་ཀྱི་ཡོད་པའི་ཁར། དམག་དོན་གྱི་ཆ་ནས་ཀྱང་ཁུལ་དེའི་དམག་སྒར་དག་ཏུ་དམག་དོན་གྱི་ལས་དོན་སྤེལ་གྱིན་ཡོད། རྒྱ་ནག་གཞུང་གིས་ལོ་རེ་བཞིན་རུ་ཐོག་རྫོང་གི་སྐྱེས་པ་ན་གཞོན་རྣམས་མཐའ་མཚམས་དམག་མིར་ཞུགས་རྒྱུར་སྐུལ་མ་ཡང་ཡང་གཏོང་གིན་ཡོད་སྐོར་དང་། འདི་ལོར་ཡང་རྒྱ་ནག་གཞུང་གིས་སྐྱེས་པ་ལོ་བཅོ་བརྒྱད་ཡན་རྣམས་ལ་དམག་ཁོངས་སུ་ཞུགས་རྒྱུར་བདའ་འདེད་ཡང་ཡང་གཏོང་གིན་འདུག་ལ། མི་ཚང་ཁ་ཤས་ཀྱི་ཕ་མ་རྣམས་ལ་ཆེད་དུ་ཁ་པར་བཏང་ནས། བུ་ཕྲུག་དག་དམག་མིར་ཞུགས་ཚེ། རྗེས་མ་ཕ་མ་དང་བུ་ཕྲུག་རྣམས་ལ་རོགས་དངུལ་ཡག་པོ་རག་རྒྱུར་ཕན་ཐོགས་ཆེན་པོ་ཡོད་ལུགས་སོགས་བཤད་ཡོད་སྐོར་སོགས་བརྗོད་བྱུང་།
ཡང་ཁོང་གིས། འདས་པའི་ལོ་ཤས་གོང་ནས་རུ་ཐོག་རྫོང་དང་རུ་ཐོག་མཐའ་སྲུང་དམག་དོན་ཚན་པ་གཉིས་མཉམ་འབྲེལ་གྱིས། ཁུལ་དེར་རྒྱ་ནག་རྒྱལ་སྟོན་དུས་ཆེན་ཟེར་བ་དང་། མཐའ་སྲུང་དམག་མིའི་ཉིན་མོ་སོགས་སྲུང་གཙི་བྱེད་དུ་བཅུག་ཅིང་། གཞུང་གིས་མཐའ་མཚམས་གྲོང་བརྡལ་དུ་ངོས་འཛིན་གྱིས། ཕྱིའི་འཛུགས་སྐྲུན་ཀྱང་མང་དག་ཅིག་བྱས་ཁོངས། ཉེ་ལམ་རྒྱ་ནག་གཞུང་གིས་རུ་ཐོག་ཁོངས་སུ་ཉི་གློག་ཀྱང་གསར་རྒྱག་བྱས་ཟིན་ཡོད་སྐོར་དང་། རུ་ཐོག་རྫོང་ཁོངས་ཀྱི་མཐའ་སྲུང་དམག་སྒར་གྱི་དཔོན་རིགས་ཚོས་ཀྱང་མཐའ་མཚམས་གྲོང་སྡེ་ཁག་གི་ཡུལ་མི་རྣམས་དམག་མིར་ཞུགས་རྒྱུར་སློབ་གསོ་ཟེར་བ་ཞིག་ཡང་ཡང་རྒྱག་གིན་ཡོད་སྐོར་སོགས་བརྗོད་སོང་།
འདས་ལོའི་ལོ་མཇུག་ཏུ་རྒྱ་ནག་གཞུང་གིས་བརྡ་ཁྱབ་ཞིག་སྤེལ་བའི་ཁྲོད། ཕྱི་ལོ་ ༢༠༢༥ ཟླ་ ༡ ཚེས་ ༡ ཉིན་ནས་བཟུང་དམག་ཞབས་བཅའ་ཁྲིམས་ཟེར་བའི་སྒྲིག་གཞི་ཟེར་བའི་འོག་ནས། ལོ་ ༡༨ སོན་པའི་རྒྱ་ནག་གི་སྐྱེས་པ་ཚང་མས་དམག་ཞབས་ཐོ་འགོད་ངེས་པར་དུ་བྱ་དགོས་པའི་ལམ་ལུགས་ཤིག་ལག་བསྟར་བྱ་རྒྱུ་ཡིན་ཞིང་། དེ་ནི་དམག་ཞབས་བཅའ་ཁྲིམས་ཟེར་བའི་ནང་ལོ་བཅོ་བརྒྱད་ལོན་པའི་སྐྱེས་པ་ཚོས་དམག་ཞབས་ཐོ་འགོད་ཀྱི་འོས་འགན་ལག་བསྟར་བྱ་དགོས་པའི་གཏན་འབེབས་བྱས་པ་ཡིན་ལ། ཐོ་འགོད་བྱེད་པར་རྒྱ་ནག་གི་རྒྱལ་ཡོངས་དམག་བསྡུའི་དྲ་བ་ཟེར་བ་ནས་ཐོ་འགོད་བྱ་དགོས་སྐོར་གསལ་འདུག་ལ། ཕྱི་ལོ་ ༢༠༢༥ ཟླ་ ༡ ཚེས་ ༡ ཉིན་ནས་བཟུང་རྒྱ་ནག་གིས་དམག་མི་བསྡུ་བའི་མགོ་འཛུགས་རྒྱུ་ཡིན་པ་དང་། དེའི་ཁོངས་སུ་ལོ་ ༡༨ སོན་པའི་སྐྱེས་པ་རྣམས་ཀྱིས་དམག་ཞུགས་ཐོ་འགོད་ངེས་པར་བྱ་དགོས་པས། གལ་སྲིད་དམག་ཞུགས་ཐོ་འགོད་མ་བྱས་ཚེ། མཐོ་སློབ་ཏུ་སློབ་སྦྱོང་གི་གོ་སྐབས་དང་ལས་ཀ་འཚོལ་རྒྱུའི་ཐད་དཀའ་ངལ་འཕྲད་པ་སོགས་ཀྱི་མཇུག་འབྲས་ངན་པ་སློང་སྲིད་སྐོར་བརྗོད་ཡོད།
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
