སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་གི་མཉམ་རུབ་ལས་གཞི།

མཉམ་རུབ། Nyamrub

བོད་ཀྱི་སྐད་དང་ཡི་གེ་གཉིས་བརྡ་འཕྲིན་དུས་རབས་ཀྱི་འགྲོས་དང་མཐུན་པར་རྒྱུན་འཛིན་བྱེད་པར་དྲ་ཐོག་ལ་བེད་སྤྱོད་བྱེད་ཐུབ་པ་ཙམ་གྱིས་མི་ཆོག་པར། མིས་བཟོས་རིག་ནུས་ཀྱི་འཇིག་རྟེན་ལ་གོམ་པ་ཅི་དགར་སྤོ་ཐུབ་པ་ཞིག་བྱ་དགོས་པ་ཡིན། ལས་དོན་འདི་ཧ་ཅང་གཞི་རྒྱ་ཆེན་པོ་ཞིག་ཡིན་སྟབས་མི་ཉུང་ཤས་ཤིག་གིས་དུས་ཡུན་ཐུང་ངུའི་ནང་ལ་སྒྲུབ་ཐུབ་པ་ཞིག་ག་ལ་ཡིན། འོན་ཀྱང་བོད་ཀྱི་སྐད་དང་ཡི་གེ་ཤེས་མཁན་གྱི་སྐྱེ་བོ་འཛམ་གླིང་ཤར་ནུབ་གང་ན་སུ་ཡོད་ཚང་མ་མཉམ་རུབ་ཀྱིས་བསྒྲུབས་ན། དུས་ཡུན་ཐུང་ངུའི་ནང་ལ་བདེ་བླག་ཏུ་སྒྲུབ་མི་ཐུབ་པ་ཞིག་ཀྱང་གཏན་ནས་མིན་པར་བརྟེན། ང་ཚོས་འདིར་བོད་ཀྱི་སྐད་དང་ཡི་གེ་ཤེས་མཁན་ཚང་མས་ལྷན་ཅིག་ཏུ་སྟབས་བདེ་པོའི་ངང་ལས་དོན་བསྒྲུབ་ས་“མཉམ་རུབ་”ཅེས་པའི་ཐུན་མོང་གི་དྲ་རྒྱའི་སྡིངས་ཆ་ཞིག་བསྐྲུན་ཡོད། དྲ་རྒྱ་འདིའི་ཐོག་ལ་ཡི་གེ་བསྒྱུར་རྒྱུ་དང་། བཀླག་རྒྱུ། ཉན་རྒྱུ། བྲི་རྒྱུ། ཞུ་དག་བཅས་སྡེ་ཚན་བཞི་ཡོད་པ་དང་། ཁྱེད་རང་གིས་སྡིངས་ཆ་འདིའི་སྒང་ནས་གོང་བརྗོད་ཀྱི་སྡེ་ཚན་དེ་དག་ལས་གང་ཞིག་སྒྲུབ་ཐུབ་པ་དེ་གདམ་གསེས་ཀྱིས་ཆ་ཤས་ལེན་ཆོག

སྒྱུར།

གལ་སྲིད་ཁྱེད་རང་ལོ་ཙཱའི་ལས་རིགས་ལ་དོ་སྣང་ཡོད་ཚེ། སྒྱུར་ཅེས་པའི་རེའུ་མིག་ཏུ་དབྱིན་ཡིག་ནས་བོད་ཡིག་ཏུ་ཚིག་གྲུབ་འདྲ་མིན་སྣ་ཚོགས་བསྒྱུར་རྒྱུ་ཡོད། ཁྱེད་ཀྱིས་སྐར་མ་ཁ་ཤས་ཤིག་བཏང་ནས་ཚིག་གྲུབ་གཅིག་ཙམ་ལས་མ་བསྒྱུར་ནའང་། དེ་ནི་ཁྱེད་ཀྱི་ངོས་ནས་བོད་ཀྱི་སྐད་ཡིག་ལ་ཞབས་འདེགས་ཀྱི་ལས་ཀ་མགོ་མཇུག་ཚང་བ་ཞིག་བསྒྲུབས་པ་ཡིན།

ཀློགས།

གལ་སྲིད་ཁྱེད་རང་ཡི་གེ་ཀློག་རྒྱུར་དོ་སྣང་ཡོད་ཚེ། བཀའ་སློབ་དང་གསར་འགྱུར་སོགས་ཡི་གེ་འདྲ་མིན་བཀླག་རྒྱུ་ཡོད་པས། ཁྱེད་ཀྱིས་ཀློགས་ཞེས་པའི་རེའུ་མིག་ཏུ་ཤར་བའི་ཚིག་གྲུབ་ཅིག་བཀླགས་ཚར་རྗེས་ “འགྲིག་”ཅེས་པར་མནན་ཙམ་བྱས་ཚེ། བཀླགས་ཟིན་པའི་སྒྲ་དེ་ང་ཚོ་ལ་ཐད་ཀར་འབྱོར་གྱི་ཡོད།

ཉོན།

གལ་སྲིད་ཁྱེད་རང་དཔེ་ཁྲིད་དང་། ཁ་བརྡ་སོགས་ལ་ཉན་རྒྱུར་དོ་སྣང་ཡོད་ཚེ། ཁྱེད་ཀྱིས་ཉོན་ཅེས་པའི་རེའུ་མིག་ཏུ་ཡོད་པའི་དཔེ་ཁྲིད་སོགས་ལ་མཉན་ནས། དེའི་སྒྲ་རྣམས་ཇི་མ་ཇི་བཞིན་ཡི་གེར་ཕབ་རྗེས་“འགྲིག་”ཅེས་པར་མནན་ནས་ང་ཚོར་བསྐུར་ཆོག

བྲིས།

གལ་སྲིད་ཁྱེད་རང་ཡིག་འབེབས་བྱ་རྒྱུར་དོ་སྣང་ཡོད་ཚེ། བྲིས་ཞེས་པའི་རེའུ་མིག་ནང་གི་པར་རིས་ཀྱི་ཡི་གེ་རྣམས་ཇི་མ་ཇི་བཞིན་གཤམ་དུ་ཕབ་བཤུས་བྱས་ནས་“འགྲིག་”ཅེས་པར་མནན་ཙམ་བྱས་ན། ཁྱེད་ཀྱིས་ཕབ་བཤུས་བྱས་ཟིན་པའི་ཡི་གེ་རྣམས་ང་ཚོར་འབྱོར་ངེས་ཡིན། པར་རིས་ནང་གི་དབུ་མེད་ཀྱི་ཡི་གེ་ལ་  བཀྲིས་  ལེཌ་  བཀྲིན་ ཞེས་པ་ལྟ་བུ་བསྐུངས་ཡིག་གི་རིགས་ཡོད་ཚེ། དབུ་ཅན་ལ། བཀྲ་ཤིས། ལེགས། བཀའ་དྲིན་ཞེས་ཕབ་བཤུས་བྱ་དགོས་པ་ལས། བཀྲིས། ལེཊ། བཀྲིན་ཞེས་འབྲི་མི་རུང་།

ཞུ་དག

ཞུ་དག་རེའུ་མིག་ཏུ་སྐད་དང་ཡི་གེ་གཉིས་ཀ་ཕན་ཚུན་ཏག་ཏག་བསྡད་ཡོད་མེད་བལྟ་དགོས། གལ་སྲིད་སྐད་དང་ཡི་གེ་གཉིས་ཀ་ཕན་ཚུན་ཏག་ཏག་བསྡད་ཡོད་ཚེ། “འགྲིག་”རྟགས་བརྒྱག་དགོས་པ་དང་། སྐད་གསལ་པོ་མེད་པའི་དབང་གིས་སྐད་དང་ཡི་གེ་གཉིས་ཀ་ཕན་ཚུན་ཏག་ཏག་བསྡད་ཡོད་མེད་གསལ་པོར་མ་ཤེས་ཚེ། “མཆོང་”ཞེས་པར་མནན་ནས་ཞུ་དག་གསར་པ་གཞན་པ་ཞིག་འགོ་འཛུགས་ཆོག སྐད་དང་ཡི་གེ་གཉིས་ཀ་ཕན་ཚུན་ཏག་ཏག་བསྡད་མེད་ན། “ནོར་”རྟགས་བརྒྱག་དགོས།

འཛུལ་ཞུགས་བྱེད་སྟངས།

ཁྱེད་རང་གིས་མཉམ་རུབ་བྱེད་སྐབས། དྲ་ངོས་ཀྱི་(Register/login)ཞེས་པར་ཐོ་འགོད་བྱས་ནས་མཉམ་རུབ་བྱེད་སྟངས་ཤིག་དང་། ཡང་(Participate now)ཞེས་ཐོ་འགོད་བྱེད་མི་དགོས་པར་མཉམ་རུབ་བྱེད་སྟངས་ཤིག་བཅས་རིགས་གཉིས་ཡོད། ཐོ་འགོད་བྱས་ནས་མཉམ་རུབ་བྱས་ན། (Leaderboard)ཞེས་པའི་རེའུ་མིག་ཏུ་ཁྱེད་ཀྱིས་མཉམ་རུབ་བྱས་པར་དྲ་ཐོག་ནས་རང་འགུལ་གྱིས་སྐར་མ་སྤྲོད་ཀྱི་ཡོད་པ་དང་། སོ་སོ་རང་ཉིད་ལ་སྐར་མ་ག་ཚོད་ཐོབ་ཡོད་པ་ཐད་ཀར་ལྟ་ཐུབ་ཅིང་། ལོ་གཅིག་འཁོར་མཚམས་མཉམ་རུབ་བྱེད་མཁན་རྣམ་པའི་ནང་ནས་སྐར་མ་མང་བ་འཐོབ་མཁན་རྩེ་ཕུད་གསུམ་ལ་ང་ཚོས་ཐུགས་རྗེ་ལེགས་འབུལ་རེ་ཡང་འབུལ་རྒྱུ་ཡིན། ལས་དོན་འདི་ལ་མཉམ་རུབ་བྱེད་སྐབས་ཐོ་འགོད་བྱེད་མིན་ནི་མཉམ་རུབ་བྱེད་མཁན་སོ་སོའི་འདོད་མོས་ལྟར་ཡིན་པ་ལས་ངེས་པར་དུ་ཐོ་འགོད་བྱས་ནས་མཉམ་རུབ་བྱ་དགོས་པ་ཞིག་མིན།

མཐའ་དོན་ཁྱེད་ཀྱི་ངོས་ནས་རང་གི་ཚེ་སྲོག་ལྟ་བུའི་དུས་ཚོད་བེད་སྤྱད་དེ་བོད་ཀྱི་སྐད་དང་ཡི་གེ་ལ་ཞབས་འདེགས་ཞུས་པའི་དགེ་རྩ་ནི་ཇི་སྲིད་བོད་ཀྱི་སྐད་དང་ཡི་གེ་མ་འཇིག་བར་དུ་གནས་རྒྱུ་ཡིན་པ་སྨོས་མ་དགོས་པར་བརྟེན། འདི་ནི་ཁྱོད་དང་ང་ཡི་ངོས་ནས་བོད་ཀྱི་སྐད་དང་ཡི་གེ་ལ་གཅེས་སྤྲས་བྱེད་སྟངས་དང་ཞབས་འདེགས་ཞུ་སྟངས་བླ་ན་མེད་པ་ཞིག་ཡིན་པར་ངོས་འཛིན་བྱེད་ཆོག་གོ།