བོད་ནང་ས་ཡོམ་ཤུགས་ཆེན་བརྒྱབ་སྟེ་མི་རྒྱུ་གཉིས་ལ་གནོད་སྐྱོན་ཆེན་པོ་བཟོས། ཁ་སྣོན།

བོད་དིང་རི་རྫོང་ཤེལ་དཀར་གཙོས་ངམ་རིང་རྫོང་དང་ལྷ་རྩེ་རྫོང་སོགས་སུ་ས་ཡོམ་གོད་ཆག་ཆེན་པོ་བྱུང་ནས་ད་བར་ཉུང་མཐར་མི་གྲངས་ ༡༢༦ རྐྱེན་འདས་དང་མི་ ༡༩༠ ལྷག་ལ་རྨས་སྐྱོན་ཕོག་ཡོད་འདུག

 དེ་རིང་ཕྱི་ཚེས་ ༧ ཉིན་གྱི་ཞོགས་པར་བོད་དིང་རི་རྫོང་དང་། ངམ་རིང་རྫོང་། ལྷ་རྩེ་རྫོང་ཁོངས་སུ་ས་ཡོམ་ཤུགས་ཚད་ ༧ ཙམ་ཞིག་བརྒྱབ་ནས་མི་རྒྱུ་གཉིས་ལ་གནོད་འཚེ་ཆེན་པོ་ཐེབས་ཡོད་པ་མ་ཟད། དིང་རི་རྫོང་ཁོངས་སུ་ཁང་པ་དང་གཞུང་ལམ་སོགས་ལ་རྡིབ་སྐྱོན་བྱུང་ནས་མི་རྒྱུ་གཉིས་ལ་གནོད་འཚེ་ཚབས་ཆེན་བཟོས་ཡོད་ཅིང་། ས་ཡོམ་གྱི་ཤུགས་རྐྱེན་རྒྱ་གར་དང་ བྷང་ལ་ཌེ་ཤི། བལ་ཡུལ་སོགས་ཀྱི་ས་འབྲེལ་ཁུལ་དུའང་བསླེབས་ཡོད་འདུག་ལ། ད་བར་ཉུང་མཐར་མི་གྲངས་ ༡༢༦  རྐྱེན་འདས་དང་ ༡༩༠ ལ་རྨས་སྐྱོན་ཐེབས་ཡོད་པ་དང་། ཁང་པ་ ༣༦༠༩ ལྷག་ལ་རྡིབ་སྐྱོན་བྱུང་ཡོད་འདུག

འདི་གའི་གསར་འགོད་པར་འབྲེལ་ཡོད་གནས་ཚུལ་མཁོ་སྤྲོད་པ་ཞིག་གིས། བོད་ངམ་རིང་རྫོང་དང་།  ལྷ་རྩེ་རྫོང་། དིང་རི་རྫོང་བཅས་ལ་ས་ཡོམ་ཧ་ཅང་ཤུགས་ཆེ་བའི་རྐྱེན་གྱིས་གོད་ཆག་ཚབས་ཆེན་བྱུང་འདུག ལྷག་པར་དིང་རི་རྫོང་ཁོངས་ཀྱི་ཤེལ་དཀར་ཉེ་འདབས་དང་མཚོ་སྒོ། དྲང་གསོ་བཅས་པར་ཁང་པར་རྡིབ་སྐྱོན་བྱུང་བ་དང་མི་ལའང་ཤི་སྐྱོན་ཆེན་པོ་བྱུང་འདུག་ཀྱང་། ད་ལྟའི་ཆར་ཚོད་དཔག་བྱེད་ཁག་པོ་ཆགས་ཡོད་སྐོར་ཡིག་ཐོག་ནས་གནས་ཚུལ་མཁོ་སྤྲོད་གནང་བྱུང་ལ། དམིགས་བསལ་གྱིས་དིང་རི་ཤེལ་དཀར་ལ་གནོད་སྐྱོན་ཆེན་པོ་བྱུང་ཡོད་འདུག

སྤྱི་ཚོགས་དྲ་ལམ་དུ་ཁྱབ་པའི་འབྲེལ་ཡོད་བརྙན་ཐུང་ཁག་གི་ནང་། རྫོང་ཁོངས་ཀྱི་ཁང་པ་མང་པོར་རྡིབ་སྐྱོན་བྱུང་བ་དང་། སེམས་ཅན་བསད་པ། དེ་བཞིན་གཞུང་ལམ་གང་སར་གྱང་རོས་ཁེངས་བ་དང་མི་རྣམས་འཇིགས་སྣང་ཆེན་པོས་གཞུང་ལམ་གཡས་གཡོན་དུ་རྒྱུག་བཞིན་པ་དང་གྱང་རོ་སྔོག་བཞིན་པ་སོགས་མཐོང་རྒྱུ་འདུག་ལ། དིང་རི་རྫོང་ཁོངས་ཀྱི་གྲོང་སྡེ་ཞིག་གི་ཁང་པ་མང་པོ་བརྡིབས་ནས་ཡུལ་མི་རྣམས་ཀྱིས་ངུ་འབོད་བྱེད་བཞིན་པ་སོགས་འདུག 

གནས་ཚུལ་ཐོན་རིམ་བཞིན་ཁ་སྣོན་བྱ་རྒྱུ་ཡིན། 

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།