༧གོང་ས་རྒྱལ་བ་རིན་པོ་ཆེ་མཆོག་གིས་རྒྱ་གར་ལྷོ་ཕྱོགས་སྦེལ་ཀོབ་ནས་བོད་ནང་ས་ཡོམ་གྱི་གོད་ཆག་བྱུང་བར་ཐུགས་གསོ་མཛད།
དེ་རིང་ཕྱི་ཚེས་ ༧ ཉིན་གྱི་ཞོགས་པར་བོད་དིང་རི་རྫོ
༧མགོན་པོ་གང་ཉིད་མཆོག་གི་ཐུགས་གསོའི་གསུང་འཕྲིན་ནང་། ད་ནངས་སྔ་དྲོ་དིང་རི་གཙོས་ས་གནས་ཁག་ཅིག་ཏུ་ས་འགུལ་བྱུང་བ་ལ་བརྟེན་ནས་ཤི་རྨས་དང་ཁང་ཁྱིམ་ལ་གཏོར་བཤིག་ཚབས་ཆེར་ཐེབས་པའི་གནས་ཚུལ་ཐོས་ཏེ་བློ་ཕམ་ཆེན་པོ་བྱུང་། རྐྱེན་འདས་སུ་སོང་བ་རྣམས་ལ་བསྔོ་སྨོན་དང་། རྨས་སྐྱོན་བྱུང་བ་རྣམས་གང་མྱུར་དྲག་སྐྱེད་ཡོང་བའི་སྨོན་འདུན་ཡོད། ཅེས་གསུངས།
དེ་བཞིན། བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས། ད་ནངས་ ཆུ་ཚོད་ ༩།༠༥ སྟེང་། བོད་ཀྱི་དིང་རི་ཁུལ་དུ་ཚད་རིམ་ ༦་༨ ཅན་གྱི་ས་ཡོམ་བརྒྱབ་སྟེ། དེ་རིང་ཕྱི་དྲོ་བར་མི་གྲངས་ ༩༥ ཙམ་ལ་འཆི་སྐྱོན་དང་། མི་གྲངས་ ༡༣༠ ཙམ་ལ་རྨས་སྐྱོན་ཕོག་པ་དང་། ཁང་ཁྱིམ་ཆིག་སྟོང་ལྷག་ལ་གཏོར་སྐྱོན་ཐེབས་པའི་གནས་ཚུལ་གོ་ཐོས་བྱུང་ཞིང་། ད་དུང་འཆི་རྨས་ཀྱི་གནས་ཚུལ་ཇི་ཆགས་ཆ་མ་འཚལ་ནའང་། འདས་གྲོངས་གྱུར་པ་རྣམས་ཀྱི་ཆེད་བསྔོ་སྨོན་དང་། རྨས་སྐྱོན་ཐེབས་པ་རྣམས་གང་མྱུར་དྲག་སྐྱེད་ཡོང་སླད། སང་ཉིན་ཕྱི་དྲོར་བོད་མིའི་སྒྲིག་འཛུགས་ཀྱི་མགོ་ལས་ཡོངས་དང་། དྷ་སར་གནས་འཁོད་རང་རིགས་ཐུན་མོང་ནས་ཐེག་ཆེན་ཆོས་གླིང་གཙུག་ལག་ཁང་དུ་མཆོད་འབུལ་སྨོན་ལམ་ཚུགས་རྒྱུ་ཡིན། ཞེས་གསུངས་འདུག
བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས། བོད་ནང་དུ་ཚད་རིམ་ ༧། ༡ ཅན་གྱི་ས་ཡོམ་ཁྲོད་ནས་མི་གྲངས་བརྒྱ་ལྷག་རྐྱེན་འདས་སུ་གྱུར་བར་སྐྱོ་སྣང་ཆེན་པོ་བྱུང་བས། ང་ཚོའི་སེམས་དང་སྨོན་འདུན་དག་གནོད་འཚེ་ཐེབས་མཁན་དག་དང་ལྷན་དུ་ཡོད། ང་ཚོས་བོད་ཀྱི་མིང་སྲིང་ཚོ་དང་འགྲེང་ནས་གདུང་སེམས་མཉམ་སྐྱེད་ཞུ་ཡི་ཡོད་ལ། ཁྱེད་ཅག་བདེ་འཇགས་དང་དྲག་སྐྱེད་ཡོང་རྒྱུར་སྐྱབས་འཇུག་ཞུ་ཡི་ཡོད། ཅེས་གསུངས་འདུག
དེ་བཞིན་༧སྐྱབས་རྗེ་ཀིརྟི་རིན་པོ་ཆེ་བློ་བཟང་བསྟན་འཛིན་འཇིགས་མེད་ཡེ་ཤེས་རྒྱ་མཚོ་མཆོག་གིས་ཐུགས་གསོའི་གསུང་འཕྲིན་ཞིག་སྩལ་བའི་ནང་། ཁ་སང་ཕྱི་ཟླ་དང་པོའི་ཚེས་བདུན་གྱི་ཞོགས་པར་བོད་ནང་དུ་ས་ཡོམ་གྱི་འབྱུང་བའི་གནོད་པ་ཤུགས་ཆེན་བྱུང་བའི་དབང་གིས་མི་རྒྱུ་གཉིས་ལ་གནོད་སྐྱོན་ཚབས་ཆེན་ཐེབས་འདུག་པར་བརྟེན། རྡོར་གདན་ཀིརྟིའི་སྒར་བསམ་ཡས་གླིང་གི་སྨོན་ལམ་ཆེན་མོ་འདིའི་ཐོག་ནས་གདུང་སེམས་མཉམ་བསྐྱེད་ཀྱིས་ཐུགས་གསོ་ཞུ་བ་དང་ཆབས་ཅིག ཕྱི་མའི་ལྔ་ལམ་དུ་གྱུར་པ་རྣམས་དལ་རྟེན་རིམ་བརྒྱུད་བླ་མེད་རྫོགས་བྱང་མྱུར་དུ་ཐོབ་པ་དང་། རྨས་སྐྱོན་ཕོག་པ་རྣམས་ཀྱི་ནད་གཞི་མྱུར་དྭངས། སྣོད་བཅུད་ཀྱི་རྒུད་པ་ཐམས་ཅད་མྱུར་དུ་སེལ་བའི་ཐུགས་སྨོན་སྐྱབས་འཇུག་ བརྩེ་བས་གཟིགས་པ་དང་འབྲེལ། བདེན་ཚིག་སྨོན་ལམ་ཚད་མེད་ཡོན་ཏན་མ་དམིགས་བསལ་གསུང་གནང་ཡོང་བར་མཁྱེན། ཞེས་གསུངས་འདུག
ཕྱི་ཚེས་ ༧ ཉིན་གྱི་ཞོགས་པར་བོད་དིང་རི་རྫོ
གསར་འགོད་པ། སྐལ་བཟང་སྦྱིན་པ།
