མགོ་ལོག་ལྕགས་མོ།
བཙན་བྱོལ་བ་ཞིག་གི་ཕྱི་ཡུལ་གྱི་འཚོ་བ་འགོ་བཙུགས་ས་དྷ་སའི་ཕྱི་ཟླ་བཅུ་གཉིས་པའི་ལོ་མཇུག་ནི་ཕ་ཡུལ་གྱི་ནམ་ཟླ་ལྟ་བུའི་ལུས་ཀྱིས་མི་བཟོད་པའི་གྲང་ངར་ཆེན་པོ་མེད་ནའང་། ད་སྐབས་ཧི་མ་ལ་ཡི་རི་རྒྱུད་དྷ་སར་དགུན་དུས་སླེབས་ཡོད་སྟབས་ཕྱི་ནང་ཚང་མ་གྲང་ཤུར་ཤུར་ཞིག་རེད། ཕྱི་ལོ་ ༢༠༠༦ ལོའི་ཕྱི་ཟླ་ ༡༢ ཚེས་ ༢༥ ཉིན་ངས་ཕ་ཡུལ་གོས་དཀར་གྱི་གོང་བ་འདྲ་བོ་ཤུལ་དུ་བཞག ཕུ་ནུ་ཁྲབ་དཀར་གྱི་རྒྱུན་ཐག་འདྲ་བོ་རྒྱབ་ཏུ་བསྐྱུར་ནས་མི་ཡུལ་གྱི་ལུང་པར་འཁྱམས་འགོ་བཙུགས་པ་ཡིན། ད་སྐབས་ཕྱིར་འདང་ཞིག་བརྒྱབ་ན་ལོ་ཟླ་ནི་ཆུ་བོ་བཞིན་ཟད་ཐལ། ཀྱག་ཀྱོག་གི་མི་ཚེའི་ལམ་ཕྲན་མང་པོ་དགའ་སྐྱོའི་འཚོ་བས་བསྐྱལ་ནས་རང་མགོ་ཐོན་ཙམ་བྱུང་ཡོད།
སྔོན་ཆད་ལྷུག་རྩོམ་དང་། སྙན་ངག བརྩམས་སྒྲུང་སོགས་བྲི་རྒྱུ་ཅུང་ཙམ་གོམས་འདྲིས་སུ་སོང་ཡོད་པ་མ་ཟད། བོད་ཕྱི་ནང་གི་དུས་དེབ་རེ་ཟུང་ཐོག་འགྲེམ་སྤེལ་ཡང་མི་ཉུང་བ་བྱས། སྐབས་དེར་རྩོམ་ཡིག་བྲི་རྒྱུ་ནི་རང་གི་གྲོགས་རྙིང་ཞིག་ལ་སྐད་ཆ་བཤད་པ་དང་འདྲ་ལ་གང་དྲན་པ་དེ་ཡི་གེར་ཕབ་རྗེས་རང་སེམས་སུ་བདེ་ལྷོད་ལྷོད་ཅིག་གི་སྣང་བ་སྟེར། ཚོར་བ་བསོར་མོ་དེ་ནི་ཀ་ཁའི་རྩེད་རྡོ་དང་འགྲོགས་པའི་གཤིས་མཐུན་རྩེད་རོགས་ཤིག་དང་འདྲ་ལ་རྩོམ་ཡིག་ཡག་མིན་དང་ཀློག་མཁན་ཡོད་མེད་ང་ལ་ཇུས་གཏོགས་མེད།
རྗེས་སུ་ཁ་ཕོར་བའི་ཆེད་དུ་ལས་ཀ་ལ་ཞུགས་རྗེས་མཐའ་འཁྱོལ་ལ་མི་འཁྱོལ་བའི་ཞིབ་འཇུག་དང་། ཡིག་སྒྱུར་གྱི་བྱ་བར་ཤི་འཐམ་རོ་འཐབ་བྱས། གྲོད་ཁོག་བརྒྱགས་ཙམ་བྱུང་དུས་རྩོམ་ཡིག་བྲི་རྒྱུ་རྦད་དེ་གཡུགས་ནས་ཁ་པར་རྩེད་རྒྱུ་དང་། སྐོར་ལོག་བཤད་ནས་ཉིན་མ་བསྐྱལ། མཚམས་རེར་ཚོར་བས་ཟིན་པའི་རྩོམ་ཡིག་རེ་འབྲི་འདོད་ཀྱི་འདུན་པ་ཡར་ངོས་ཟླ་བ་བཞིན་སེམས་ཀྱི་ཕུག་ནས་ཤར་ཙམ་བྱས་ཀྱང་། གང་ནས་འགོ་བཙུགས་དགོས་མི་ཤེས་པར་མུན་དུང་དུ་ལྷུང་ནས་ལས་བྲེལ་ལ་ཁ་གཡར་ནས་རང་མགོ་རང་གིས་གཡོགས།
དེ་རིང་ཕྱི་རོལ་དུ་རླུང་བུ་གཡུག་བཞིན་འདུག ཕྱི་ནང་གཉིས་ཀ་གྲང་ཤུར་ཤུར་ཡིན་པའི་སྐབས་སུ་རང་སེམས་ཀྱི་ཚོར་འདུ་ཐན་ཐུན་ཞིག་ཡིག་རྙོག་ལ་མ་འཛེམ་པར་ཤར་མར་འབྲི་འདོད་བྱུང་། ང་དང་ངའི་ཆུང་མ་གཉིས་ལ་མཚོན་ན་དེ་རིང་ནི་ཕ་མ་ཟེར་བའི་འགན་འཁྲི་དེ་ཕྲག་ཏུ་ལྷུང་བའི་ཉིན་མོ་དང་། གཅེས་ཕྲུག་ཟེར་བའི་ཞེ་འདང་གི་མེ་ཏོག་ཆུང་ཆུང་པང་དུ་བླངས་བའི་ཉིན་མོ་ཡིན། གཅེས་ཕྲུག་སྲོག་འདྲ་བོ་ཞིག་ངེད་བཟའ་མི་གཉིས་ཀྱི་ལས་སྐལ་དུ་ཐོབ་པ་དགའ་བ་བརྗོད་ཀྱིས་མི་ལང་བ་ཡོད་ནའང་། གཞི་རྟེན་གྱི་གནས་མལ་མེད་སའི་མི་ཡུལ་ལུང་པ་ཞིག་ནས་རང་གི་ཤ་ལས་མཆེད་པའི་བུ་ཕྲུག་གིས་དཀའ་སྡུག་ག་ཚོད་ཅིག་ལ་གདོང་གཏོད་དགོས་བསམ་ན། ཡ་ཆུང་ཁོག་ཏུ་རང་བཞིན་གྱིས་དངངས་སྐྲག་ཅིག་སླེབས་ཡོང་། འཚོ་བའི་དཀའ་སྡུག་ཁྲོད་ཀྱི་དངངས་སྐྲག་དེ་ངེད་ཕ་མ་གཉིས་གཅིག་པོའི་མགོ་ཐོག་ཏུ་ལྷུང་བ་ཙམ་མིན་པར་ཕྱི་ཡུལ་ནས་རང་གི་ཤ་ཁྲག་ལས་མཆེད་པའི་གཅེས་ཕྲུག་གསོ་སྐྱོང་བྱེད་མཁན་གྱི་ཕ་མ་ཚང་མའི་སེམས་ཁུར་གྱི་གཞི་མ་ཡིན། འཇིག་རྟེན་འདི་ནི་འཚོ་བ་སྣ་ཚོགས་དང་། མཛེས་སྡུག་སྣ་ཚོགས། བཞུད་ལམ་སྣ་ཚོགས་ཀྱིས་ཁེངས་བའི་མི་ཚེའི་གཞི་རྟེན་བྱེད་ས་ཡིན་ནའང་། རང་གིས་ཁྱིམ་པ་བ་ཞིག་གི་འཚོ་བ་དང་དུ་བླངས་ཉིན་ནས་ཆ་རྐྱེན་ཚད་ལྡན་ཡོད་མེད་ལ་མ་ལྟོས་པར་རང་ལ་འཚམ་པའི་ཁྱིམ་ཐབ་ཅིག་གི་ལས་འགན་ཁུར་ནས་བུ་རྒྱུད་གསོ་སྐྱོང་བྱ་རྒྱུ་ནི་འཇིག་རྟེན་མཐུན་འཇུག་གི་འཚོ་བའི་གཞི་རྩ་ཡིན་པས་ངེད་ཕ་མ་གཉིས་ཀྱིས་ཀྱང་དགའ་མགུ་ཡི་རངས་ཀྱི་འཚོ་བ་བདེ་འཚམ་ངང་སྐྱེལ་བཞིན་ཡོད།
ལུང་པ་ཤོར་སོང་བའི་མི་ཞིག་ལ་མཚོན་ན་ཕྱིར་རང་གི་ལུང་པ་ལ་ལོག་རྒྱུ་ནི་མི་ཚེའི་ཕུགས་འདུན་ཡིན་པ་བཤད་མི་དགོས་ལ། ལུང་པ་དགྲ་ལག་ཏུ་ཤོར་རྗེས་མི་ཡུལ་ལུང་པ་ནས་རྒས་སོང་བའི་མི་ཞིག་ལ་མཚོན་ན་རང་གི་ཤ་ཁྲག་ལས་མཆེད་པའི་བུ་ཕྲུག་རང་ཡུལ་དུ་ལོག་ཐུབ་རྒྱུ་ནི་རེ་བ་ཉག་ཅིག་ཡིན། ང་ཚོའི་ཕ་ཡུལ་ནི་མཐོ་སྒང་གི་དབུ་ཐོད་དུ་བརྒྱན་པའི་ཐོར་ལྕོག་སྟེ་དགུང་སྔོན་དང་ཆེས་ཁ་ཐག་ཉེ་སར་ཡོད། སེམས་ཀྱི་ཟབ་ས་ན་འཁྱིལ་བའི་ལྗང་ལྡེམ་ལྡེམ་གྱི་མཚོ་མོ་སྟེ་བརྩེ་བ་དང་སྤྲོ་སྐྱིད་ཀྱི་ཉ་སྲམ་འཁོར་ཡོད། དགུན་གསུམ་གྲང་ངར་གྱི་བུ་ཡུག་ཁྲོད་དུ་པགས་རྩག་གྱོན་ནས་དཔུང་རྗེན་དུ་འགྲོ་མཁན། དབྱར་དུས་དྲག་ཆར་གྱི་བརླན་གཤེར་ཁྲོད་དུ་བོད་ལྭ་གྱོན་ནས་མགོ་རྗེན་དུ་འགྲོ་མཁན། ཤ་རྩ་སྨུག་ལ་སེམས་རྩ་དཀར་བ། དཔའ་སྙིང་ལྡན་ལ་ངང་རྒྱུད་དྲང་བ། རི་ཚོགས་དང་སྨུག་ལོང་གི་ཁྲོད་ནས་གོམ་ཁ་མ་ལྷོད་པར། ལོ་ངོ་སྟོང་ཕྲག་གི་རལ་པ་ཐོར་ལྕོག་ཏུ་དཀྲིས་ཏེ། འབྲོང་ཁྱུ་ཤར་གཤར་གྱི་རྫ་ལམ་ན། རྫི་གླུ་སིང་སིང་གི་སྣང་བ་གསོ་མཁན་དག་ནི་ཕ་ཡུལ་གྱི་སྤུན་ཟླ་ཡིན།
ཁྱེད་རང་སྐྱེས་པའི་ཉིན་མོ་དེར་ཨ་ཕས་ཁྱེད་རང་ལ་རྟེན་འབྲེལ་ཞུ་བ་དང་མཉམ་དུ་དབྱིན་ཡིག་གི་ཐོག་ནས་སྐད་ཆ་ཉུང་ཉུང་ཞིག་དྲྭ་ལམ་དུ་སྤེལ་བ་ཡིན། འདིར་བོད་ཡིག་ཐོག་བསྒྱུར་བཞག་ཡོད། “མཇུག་མ་སྒྲིལ་བའི་སྐྱབས་བཅོལ་གྱི་འཚོ་བ་འདི་ཁྱེད་ཀྱི་ཕ་མ་གཉིས་ཀྱི་བདམས་ཀ་ཡིན། བལྟས་ཡོང་ན་ཕ་མ་གཉིས་ཀྱི་མི་ཚེ་བཙན་བྱོལ་ནས་མཇུག་སྒྲིལ་འགྲོ་བ་འདྲ། ཡིན་ནའང་ཁྱེད་རང་རང་ཉིད་ལ་ཐོབ་པའི་རང་དབང་ཡོད་ཚད་དང་། ཕ་མ་གཉིས་ཀྱི་རྣམ་ཤེས་མཉམ་དུ་ཕྱིར་གངས་ཅན་ལྗོངས་སུ་ལོག་ཐུབ་པ་ངེད་ཕ་མ་གཉིས་ཀྱི་ཆེས་ཐོག་མ་དང་ཆེས་མཐའ་མའི་རེ་བ་ཡང་དེ་ཡིན།”
དགའ་སྐྱོ་འདྲེས་མའི་སེམས་གཏམ་ཐུང་ཐུང་འདི་ནི་ཚེ་ཐོག་འདིར་ཨ་ཕ་ཟེར་བའི་མིང་བྱང་འདི་གུས་པས་དང་དུ་བླངས་རྗེས་ཆེས་ཐོག་མའི་སྐད་ཆའི་ཚིག་འབྲུ་དག་ཡིན། གཅེས་ཕྲུག མི་རིགས་ཤིག་གི་འཐབ་རྩོད་ནི་མི་རབས་གཅིག་གི་འགན་འཁྲི་ཙམ་མིན་པར་དེ་ནི་ཆུ་བོ་བཞིན་རྒྱུན་རིང་དགོས་ལ། རི་རབ་བཞིན་རྩ་བ་བརྟན་དགོས་པ་བཤད་མི་དགོས། བདེན་པ་ནི་ནགས་ལ་ལྷུང་བའི་མེ་ལྕེ་འདྲ་བས་རིམ་གྱིས་ཡོད་ཚད་ཟིན་དེ་གྱེན་དུ་མཆེད་ངེས།
གཅེས་ཕྲུག དེ་རིང་ནས་བཟུང་ཕྱི་ཟླ་ ༡༢ ཚེས་ ༨ བོད་ཟླ་བཅུ་བའི་ཚེས་བརྒྱད་ཀྱི་ཆུ་ཚོད་ ༡༡:༤༩ ནི་ཁྱེད་རང་གི་སྐྱེས་སྐར་ཡིན་པ་ནོར་འཁྲུལ་སྤུ་ཙམ་མེད། ཁྱེད་ཀྱི་ཨ་ཕ་ནི་ས་མགོ་ལོག་གནམ་མགོ་ལོག་གི་འབྲོག་ཁྱིམ་ཞིག་ནས་སྐྱེས་པ་ཡིན། སྐབས་དེར་སྨན་ཁང་གི་མཐུན་རྐྱེན་མེད་སྟབས་སྦྲ་ནང་ནས་སྐྱེས་པ་ཡིན། དེང་སང་སྐྱེས་སྟངས་དེ་འདྲ་ཡིན་ཚུལ་བཤད་ན་མི་ཚོས་ཡིད་ཆེས་བྱེད་ཀྱིན་མི་འདུག དེ་ནི་མི་སྲིད་པ་ཞིག་ཡིན་རབས་བཤད། གང་ལྟར་སྐབས་དེར་འབྲོག་ཕྱོགས་ཀྱི་བྱིས་པ་ཡོད་ཚད་དེ་ལྟར་སྐྱེས་པ་ཡིན། ང་ཚོའི་སྐྱེས་ལོ་མ་གཏོགས་སྐྱེས་ཚེས་གསལ་ཁ་མེད། བདག་གི་ཨ་མས་གསུངས་བ་ལྟར་ན་གཙང་པོར་འགྲམ་དར་ཆགས་སྐབས་ཤིག་ཡིན་ཟེར། ཕལ་ཆེར་ལོ་དེའི་དགུན་འགོ་ཞིག་ཡིན་རྒྱུ་རེད།
མགོ་ལོག་འབུམ་པ་ཁག་གསུམ་ནི་དབང་ཆེན་འབུམ་དང༌། ཨ་སྐྱོང་འབུམ། པདྨ་འབུམ་གསུམ་ཡིན། སྤྱིར་མགོ་ལོག་འབུམ་པ་ཁག་གསུམ་འདི་ནི་བོད་ཆོལ་ཁ་གསུམ་ལས་མདོ་སྨད་རྟའི་ཆོལ་ཁའི་ཁོངས་སུ་གཏོགས་པ་དང་། ཆུ་བཞི་སྒང་དྲུག་ལས། རྨ་ཀླུང་གསེར་ལྡན་ཕྱུག་མོ་དང༌། རྨ་རྫ་ཟལ་མོ་སྒང༌། མདོ་ཆེན་རོལ་ཁམས་བཅོ་བརྒྱད་ལས། རྨ་རོལ། སྨྲ་རོལ། རྡོ་རོལ། ཟླ་རོལ་སོགས་སུ་གཏོགས། ཨ་ཆེན་གངས་ལ་རིང་མོ་དང་། བ་ཡན་ཧ་རི། གཡུ་རི་གངས་ཆེན་རྩེ་རྒྱལ་སོགས་ཀྱིས་མཐའ་ནས་བསྐོར་ཞིང༌། ས་བཅུ་ཐོབ་པའི་རྨ་རྒྱལ་སྦོམ་ར་དང༌། དེ་མིན་གཉན་པོ་གཡུ་རྩེ། རྨ་སྟོད་ཀྱི་རྩེ་ལྷ་བཅུ་གསུམ། རྨ་སྨད་ཀྱི་མཐོན་པོ་དགུ་སྒྲིག་སོགས་རི་བོས་ཡོངས་སུ་བསྐོར་བའི་དབུས་ན་བརྗིད་པའི་ཡུལ་གྲུ་མཐོང་བ་ཀུན་སྨོན་གྱི་ཞིང་ཁམས་ཤིག་ཡོད་པ་དེ་ནི་ཁྱེད་ཀྱི་ཕ་རྒན་གྱི་ལྟེ་ཁྲག་ས་རུ་འཕོ་ས་ཡིན། ཡུལ་དེའི་མི་རྣམས་ཀྱིས་འབྲོང་རུ་ཐུར་ཅན་གྱི་སྒོ་ཟོག་བྱས་ཡོད། རྟ་འདོ་བས་མི་ཚེའི་དཔུང་རོགས་བྱས་ཡོད། ཁྲ་རིང་མེ་མདས་སྲོག་གི་ཁེབས་མ་བྱས་ཡོད།
ཁྱེད་ཀྱི་ཨ་མ་ནི་ཧོར་སེར་ད་ར་ཁག་ལྔའི་ཁོངས་གཏོགས་ཧོར་རོང་པ་ཚ་ཟེར་བའི་འབྲོག་རོང་འདྲིས་མ། གསར་རྙིང་འདྲིས་མའི་ཁྱིམ་ཚང་ཞིག་ཏུ་སྐྱེས་པ་དང་། ལོ་ཏོག་འདེབས་པའི་དུས་ཚོད་ཅིག་ལ་སྐྱེས་ཡོད་ཀྱང་སྐྱེས་ལོ་གསལ་ཁ་མེད། ང་ཚོ་སྐྱེས་སའི་བོད་ཁུལ་ནས་བྱིས་པའི་སྐྱེས་སྐར་རོལ་བ་དེ་འདྲ་མཐོང་མྱོང་མེད་ནའང་། བྱིས་པ་ཆུང་ཆུང་ལོ་གསུམ་ལོན་སྐབས་ མནོལ་ སྐྲ་ ལེན་ པ་ ཟེར་ བ་ ནི་ བོད་ ལུགས་ ཀྱི་ བྱིས་ པའི་ སྐྲ་ སྟོན་ ཞིག་ རེད། བྱིས་ པ་ ལ་ ཨ་ མའི་ མངལ་ གྲིབ་ གང་ ཡོད་ བསང་ བར་ བྱེད་ པ་ དང་ ། བྱིས་ པས་ གོམ་ པ་ སྤོ་ཙམ་ དང་ ། ཅུང་ སྨྲ་ ཤེས་ ནས་ མི་ གྲལ་ ལ་ སོན་ པར་ དགའ་ བའི་ སྟོན་ མོ་ ཞིག་ཡིན། ལོ་ གསར་ ཚེས་ གཅིག་ གམ་ གསུམ་ དང་ ། ལྔ་ གང་ རུང་ གི་ ཞོགས་ པའི་ ཉི་ ཤར་ གྱི་ ཐོག་ མ་ རྟེན་ འབྲེལ་ གྱི་ དང་ པོར་ བརྩིས་ ཏེ་ སྐྲ་ བཞར་གྱི་ རེད།
ཁྱེད་ཀྱི་ཕ་མ་གཉིས་ཀྱི་སྐྱེས་ཡུལ་གྱི་འཚོ་བ་དང་། ཡུལ་སྐད། ཆས་གོས་སོགས་ཀྱི་ཐད་ནས་མི་འདྲ་ས་མང་པོ་ཡོད་ནའང་ཤ་དང་རུས་པ་གཅིག་གི་རྒྱུན་ཐག་གཅིག་ནས་མཆེད་པའི་མི་རིགས་ཤིག་གི་རྒྱུན་འཛིན་ཡིན་སྟབས་ཧ་ཅང་མི་མཐུན་ས་ཆེན་པོ་མེད། དད་སྡེ་དགོན་སྡེ་ཁྲ་གྱི་ལེ། འདུ་དབང་གསེར་ཏོག་སེར་ལྷང་ངེ་། ཆོས་དུང་སྒྲ་དབྱངས་སྙན་ལྷང་ངེ་ཡོད་པའི་དགོན་སྡེ་ལ་དད་པ་བྱེད་མཁན་ཡིན་པ་གཅིག་འདྲ་ཡིན། ལྷག་པར་དུ་ཕ་མ་གཉིས་ཀྱི་ཕ་ཡུལ་དུ་གླིང་སྒྲུང་གི་རིག་གནས་དར་ཁྱབ་ཧ་ཅང་ཆེ། གནའ་མིའི་བཤད་སྲོལ་ལྟར་ན་གེ་སར་གྱི་ཆིབས་རྟ་རྐྱང་རྒོད་འཕེར་བ་ཡང་གནས་དེ་ནས་བྱུང་བ་ཡིན་ཞིང་། རྟ་རྐྱང་རྒོད་འཕེར་བའི་ཞབས་རྗེས། འབྲུག་མོའི་ཐབ་ཀ་སོགས་ཆེས་མང་ཞིང་། དེ་དག་ལ་གཏམ་རྒྱུད་ཡག་པོ་བཤད་རྒྱུ་ཡོད། མགོ་ལོག་ཡུལ་གྱི་མི་སྡེ་དག་གིས་ཀྱང་གླིང་སྒྲུང་ལ་མཐོང་ཆེན་གནང་བར་མ་ཟད། སྒྲུང་ཕལ་ཆེར་བློ་ལ་བཤད་ཐུབ་མཁན་མང་། ཁྱད་པར་དུ་མང་ཚོགས་ཀྱིས་སྒྲུང་ལ་ཆེས་དགའ་བོ་གནང་བ་དང་། སྒྲུང་ཉན་བཤད་ཀྱི་བསྟན་པ་རྒྱ་ཆེ་དར་ཡོད། ཁྱེད་ཀྱི་ཨ་ཕ་ཡང་ཆུང་ཆུང་སྐབས་སུ་ཕ་མའི་རྩིབ་ནས་གླིང་སྒྲུང་ལ་ཉན་པའི་གོ་སྐབས་མང་པོ་ཐོབ་ཡོད་པས། གླིང་སྒྲུང་ནང་གི་མཛེས་དཔྱོད་ཀྱི་ལྟ་བ་དེས་རང་གི་མི་ཚེའི་ལྟ་སྟངས་ཁྲོད་བག་ཆགས་ཟབ་མོ་བཞག་ཡོད།
གཅེས་ཕྲུག ང་ཚོ་འཚོ་སྡོད་བྱེད་སའི་གནས་འདི་ཁྱེད་ལ་ནམ་ཡང་མི་དབང་ལ་ཁྱེད་ཉིད་ཀྱང་ས་འདི་དང་ཡུལ་འདིའི་བདག་པོ་མིན། འོན་ཀྱང་གནས་འདི་ན་ཁྱེད་ལ་ཕོ་ལྟོ་བ་ལྟོག་ན་ཟས་སློང་སའི་ཕ་མ་ཞིག་དང་། ལས་སྐྱིད་སྡུག་སྐབས་སུ་རྒྱབ་གཏད་སའི་སྤུན་ཟླ་ཡོད། དེ་ལས་ཀྱང་གལ་ཆེ་བ་ཞིག་ནི་ཚེ་འདི་ཕྱི་གཉིས་ཀྱི་མགོན། སྐྱབས་བླ་མ་གསེར་ནག་གི་རི་བོ་འདྲ་ཞིག་དང་། ཚེ་རིང་ཐུང་གི་ལམ་རྒྱགས་བཅུད་ཅན། རིག་གཞུང་གཡུ་ཡི་མཎྜལ་འདྲ་ཞིག་གིས་ཁྱེད་ཀྱི་མི་ཚེའི་འཚར་ལོངས་ཀྱི་རྒྱབ་རྟེན་བྱས་ཡོད། ཨ་ཕས་ཁ་ཚོད་ཆོད་པའི་ཐོག་ནས་བཤད་ཐུབ་ཞིག་ནི་ཁྱེད་རང་སྐྱེས་ནས་འཆི་རག་བར་དུ་༧གོང་ས་མཆོག་ལྟ་བུའི་སྐྱེས་བུ་དམ་པ་ཞིག་གི་ཞབས་པད་ལ་བཏུད་ནས་མི་ཚེའི་མདུན་ལམ་འཚོལ་བའི་གོ་སྐབས་རག་པ་དང་། གསེར་འོད་ལམ་ལམ་འཕྲོ་བའི་རང་གི་རིག་གཞུང་གིས་ཁྱེད་ཀྱི་ཤེས་རབ་དང་། རྣམ་དཔྱོད་རྒྱས་པར་རོགས་འདེགས་བྱས་པ་ལ་ཁྱེད་རང་བློ་འགྱོད་རྩ་བ་ནས་སྐྱེ་མི་སྲིད། ཉིན་ཞིག་ཁྱེད་རང་ནར་སོན་ནས་མི་རིགས་གཞན་དང་་དཔུང་བ་མཉམ་གཤིབ་བྱེད་སྐབས། ཁྱེད་རང་གིས་ཁྱེད་རང་གཞན་དང་མི་འདྲ་བའི་སེམས་རྒྱུད་གཙང་མ་ཞིག སྣང་བ་སྐྱིད་པོ་ཞིག བསམ་ཤེས་ཡོད་མཁན་ཞིག་མཐོང་སྲིད། དེ་ནི་བླ་མ་ཐུགས་རྗེ་ཅན་དང་། རིག་གཞུང་བཀའ་དྲིན་ཅན་འདིའི་བྱིན་རླབས་ཞུགས་པ་ཡིན།
ཁྱེད་རང་སྐྱབས་བཅོལ་བའི་ཁྱིམ་ཚང་ཞིག་ཏུ་སྐྱེས་ཡོད་ནའང་ཕ་མ་ཞིག་གི་ངོས་ཐད་ནས་བཤད་ན་ཨ་སྒོར་དུང་ཕྱུར་ཅན་གྱི་ཕྱུག་བདག་ཅིག་གི་གཅེས་ཕྲུག་དང་ཁྱད་པར་སྤུ་ཙམ་མེད། ཕ་མ་སུ་ཡིན་ནའང་རང་གི་བུ་ཕྲུག་རྩིས་ཆེན་དང་། རྩ་ཆེན་དུ་བརྩི་བ་བཤད་མི་དགོས། ཡིན་ནའང་དངོས་པོའི་གནས་ལུགས་ཐོག་ནས་སྐད་ཆ་བཤད་ན་ཕྱུག་བདག་གི་བུ་ཕྱུག་པོ་ཆགས་པའི་ངེས་པ་མེད་ལ། དབུལ་པོའི་བུ་ཕྱུག་བདག་ལ་མི་ཆགས་པའི་ངེས་པ་ཡང་མེད། བོད་མིའི་ཁ་དཔེར་ཨ་མའི་བུ་ལ་ཡོན་ཏན་ཡོད་ན་དགའ་ལྡན་གསེར་ཁྲི་སྟོང་པ་ཡིན་ཟེར་བ་ལྟར་དཀའ་སྤྱད་དང་། ཧུར་བརྩོན་གྱི་ལོ་ཟླའི་ཁྲོད་དུ་རྒྱལ་ཁའི་གསང་བ་སྦས་ཡོད། མི་ཚེའི་ཁ་ཕྱོགས་དང་འབྲེལ་བའི་གནད་དོན་འདིའི་རིགས་རྗེས་ཕྱོགས་ཨ་ཕས་ཁྱོད་ལ་ལྷོད་ལྷོད་ངང་ཁ་བརྡ་བྱ་ཆོག
ངེད་ཕ་མ་གཉིས་ཀྱི་ངོས་ནས་བཤད་ན་ངེད་གཉིས་རྒས་འཁོགས་ཆགས་རྗེས། ཁྱེད་ཀྱིས་ལྟ་སྐྱོང་བྱ་དགོས་པའི་ཕྱིར་དུ་ཁྱེད་རང་གསོ་སྐྱོང་བྱས་པ་རྩ་བ་ནས་མིན། མི་སུ་ཡིན་ནའང་རང་གི་མི་ཚེའི་ནང་གི་བཀའ་དྲིན་ཅན་གྱི་མི་བུ་མི་བརྗེད་པ་དང་། རྗེས་སུ་དྲན་པ་ནི་ཀུན་སྤྱོད་ཀྱི་གཞི་རྩ་ཡིན་ནའང་། དཔྱ་ཁྲལ་འཇལ་དགོས་པ་ལྟ་བུའི་ཀུན་སློང་ནི་བརྩེ་འདང་གི་འཚོོ་བ་རོལ་སྟངས་ཤིག་མིན་ལ། དེ་ནི་ཉོ་ཚོང་རྒྱག་སྟངས་ཡིན། ང་དེ་འདྲའི་རིགས་ལ་མི་དགའ་བ་མ་ཟད་རང་གིས་ཀྱང་བྱ་འདོད་མེད། ཁྱེད་རང་གཉོར་སྐྱོང་ལེགས་པོ་བྱས་རྗེས་འདྲ་མཉམ་ཐོག་མི་གྲལ་དུ་གཏང་རྒྱུ་ངེད་ཕ་མ་གཉིས་ཀྱི་འོས་འགན་ཡིན། མཁས་དབང་དགེ་འདུན་ཆོས་འཕེལ་གྱི་གཏམ་རྒྱུད་གསེར་ཐང་གི་མཇུག་ཏུ་སྐད་ཆ་ཧ་ཅང་གི་བློ་ལ་བབས་པ་འདི་འདྲ་ཞིག་ཡོད། འཇིག་རྟེན་འདིར་སྐྱེས་པའི་མི་སུ་ཡིན་ནའང་རང་གི་ཕྲག་ཏུ་བབས་པའི་ལས་འགན་རེ་ཡོད། ལས་འགན་དེ་ངེས་པར་དུ་བསྒྲུབ་ཐུབ་དགོས་ཞེས་གསུངས་བ་ལྟར། ཁྱེད་རང་གསོ་སྐྱོང་བྱ་རྒྱུ་ཡང་རང་གི་ཕྲག་ཏུ་བབས་པའི་ལས་འགན་ཡིན་པས་ངེས་པར་དུ་བསྒྲུབ་དགོས་པ་ཞིག་ཀྱང་ཡིན།
ཁྱེད་རང་འཇིག་རྟེན་འདིར་སྐྱེས་ཉིན་ནས་རང་གི་བསོད་ནམས་ཀྱིས་བསགས་པའི་ཚོགས་དང་། ལས་ལ་བསྐོས་པའི་རི་མོ། དགའ་སྐྱོ་ཆགས་སྡང་གི་ཚོར་བ། ཕྲག་ཏུ་བབས་པའི་འགན་འཁྲི། ངོ་མཚར་དང་། མཛེས་སྡུག རྨི་ལམ་སྣ་ཚོགས་ཀྱིས་བྱུགས་ཡོད་པས་ཤེས་རབ་དང་། བློ་གྲོས་ལྡན་པའི་ཐོག་ནས་ལོངས་སུ་སྤྱད་དགོས་པ་ལས་ཕ་མ་ལ་དྲིན་ལན་འཇལ་དགོས་བསམ་པའི་ཁུར་བོ་འདིས་མི་ཚེ་སྡུག་ལ་སྦྱར་མི་ཉན། ཡིད་ལ་འཛིན་དགོས་པ་ཞིག་ལ་ཁྱེད་རང་གི་མི་ཚེའི་ཕུགས་འདུན་འགྲུབ་སོང་ན་ངེད་ཕ་མ་གཉིས་ཀྱི་མི་ཚེའི་ཕུགས་འདུན་ཡང་འགྲུབ་སོང་བ་ཡིན།
ཁྱེད་རང་ཁྱིམ་དུ་འབྱོར་རྗེས་ངེད་ཕ་མ་གཉིས་ཀྱི་ཕ་ཡུལ་གཅིག་པ་དང་། གྲོགས་པོ། ལས་གྲོགས་སོགས་མང་པོས་ལེགས་སྐྱེས་ཁུར་ནས་ཁྱེད་རང་ལ་འཚམས་རྟགས་ཞུ་བར་འབྱོར་སོང་། ཁོ་ཚོའི་ངག་གི་སྨོན་འདུན་དང་གདོང་གི་འཛུམ་མདངས་མཐོང་ན་ངེད་ཕ་མ་གཉིས་ཀྱི་སེམས་སུ་བརྗོད་ཐབས་བྲལ་བའི་སྤྲོ་སེམས་ཀྱི་མཆི་མས་བཀང་ཡོད། ནང་ཕུ་ནུའི་ལག་རྡང་མེད་ས། དྲིན་ཕ་མའི་ལྟ་སྐྱོང་མེད་སའི་མི་ཡུལ་ས་མཐའ་ཞིག་ནས་ཁོ་ཚོ་ལྟ་བུའི་ཞེ་སེམས་མཐུན་སའི་གྲོགས་པོ་ཁྱུ་གཅིག་ཡོད་པས་འཚོ་བ་ལ་སུན་སྣང་དང་། ཁེར་རྐྱང་གི་མིག་ཆུ་ཤོར་མྱོང་མེད། དེ་རིང་གཅེས་ཕྲུག་ཁྱེད་སྐྱེས་ནས་ཟླ་གཅིག་ཏག་ཏག་ལོན་ཡོད། སྟབས་འདི་དང་བསྟུན་ཏེ་ཡུལ་གྱར་གྱི་གྲོགས་པོ་ཚང་མ་ལ་ཐུགས་རྗེ་ཆེ་ཞུ་བ་ཡིན།
བཀྲ་ཤིས་བདེ་ལེགས།
རྟེན་འབྲེལ་ཞུ། ཁྱེད་ཀྱི་གཅེས་ཕྲུག་ཚེ་རིང་ལོ་བརྒྱ་བསམ་དོན་འགྲུབ། ཁྱེད་ལྟ་བུའི་ཨ་ཕ་ཞིག་ཡོད་ན་སེམས་དྲོ་གི །དངོས་གནས་ཡག་པོ་བྲིས་འདུག