ལ་སྟོད་ལྷོའི་དིང་རིའི་ཁུལ་དུ་ས་ཡོམ་བརྒྱབ་སྟེ་མྱུར་སྐྱོབ་བྱེད་བཞིན་ཡོད་ཀྱང་། ད་དུང་ས་ཡོམ་ཁྲོད་གནོད་འཚེ་ཐེབས་པའི་གྲོང་སྡེ་མང་པོར་མྱུར་སྐྱོབ་ཐུབ་མེད་ཁར། ས་གནས་མི་མང་ལ་དམ་དྲག་བྱས་ཏེ་གནས་ཚུལ་ཕྱིར་བསྒྲགས་བྱས་མི་ཆོག་པ་སོགས་ཀྱི་བཙན་བཀའ་བཏང་ཡོད་འདུག
ཟླ་འདིའི་ཕྱི་ཚེས་ ༧ ཉིན་གྱི་ཞོགས་པའི་ཆུ་ཚོད་དགུ་དང་སྐར་མ་ ༥ ཙམ་གྱི་སྟེང་རྒྱ་ནག་གཞུང་གིས་བཅད་བགོ་བྱས་པའི་བོད་རང་སྐྱོང་ལྗོངས་གཞིས་ཀ་རྩེ་ས་ཁུལ་ཀྱི་དིང་རི་རྫོང་དང་། ས་སྐྱ་རྫོང་། ལྷ་རྩེ་རྫོང་། ངམ་རིང་རྫོང་ཁོངས་སོགས་སུ་ས་འགུལ་ཚད་རིམ་ ༧།༡ ཅན་ཞིག་བརྒྱབ་སྟེ། མི་རྒྱུ་གཉིས་ལ་གནོད་འཚེ་ཚབས་ཆེན་ཐེབས་ཡོད་ཀྱང་། ཁ་སང་ཕྱི་ཚེས་ ༨ ཉིན་ས་གནས་ཀྱི་འབྲེལ་ཡོད་རྒྱ་གཞུང་དཔོན་རིགས་ཀྱིས། གནོད་འཚེ་ཐེབས་ཁུལ་དུ་ས་ཁུལ་གཞན་ནས་རོགས་སྐྱོར་ལེན་རྒྱུ་མིན་པའི་ཡོངས་ཁྱབ་གསལ་བསྒྲགས་བྱས་ཡོད་པ་མ་ཟད། དིང་རི་རྫོང་ཁོངས་ཀྱི་བོད་མི་རྣམས་ཀྱི་དྲ་ལམ་ལ་སྟངས་འཛིན་བྱས་ཏེ། བརྙན་པར་རིགས་བརྒྱུད་སྐུལ་བྱེད་མི་ཆོག་ཁར། ཕྱི་ཕྱོགས་སུ་འབྲེལ་བ་བྱེད་མི་ཆོག་པའི་བཙན་བཀའ་བཏང་ཡོད་འདུག་ལ། ས་གནས་ཁག་ཅིག་ལ་ད་དུང་ཡང་མྱུར་སྐྱོབ་སོགས་ཀྱི་རོགས་སྐྱོར་འབྱོར་མེད་པའི་དཀའ་ངལ་འཕྲད་ཀྱིན་ཡོད་འདུག
དེ་རིང་འདི་གའི་གསར་འགོད་པས་བོད་ཕྱི་ནང་གཉིས་ཀྱི་འབྲེལ་ཡོད་ཁག་ཅིག་ལ་ད་ལྟའི་སྟོད་དིང་རི་ཕྱོགས་ཀྱི་གནས་སྟངས་སྐོར་ལ་བཀའ་འདྲི་ཞུས་པར། ད་ལྟ་རྒྱ་ནག་གཞུང་གིས་ས་ཡོམ་རྒྱག་ས་ལྟེ་བ་མཚོ་སྒོར་རོགས་སྐྱོར་བྱེད་བཞིན་པ་ཡོངས་གྲགས་ཐོག་ཁྱབ་བསྒྲགས་བྱེད་བཞིན་ཡོད་ཀྱང་། གྲམ་མཚོ་དང་ཉི་ཤར། ངམ་རིང་དང་ལྷ་རྩེ་སོགས་ས་ཁུལ་མང་པོར་མྱུར་སྐྱོབ་ཀྱི་མཚོན་པའི་རོགས་སྐྱོར་བྱེད་མཁན་མེད་པའི་དཀའ་ངལ་ཆེན་པོ་འཕྲད་བཞིན་པ་རེད། ད་དུང་སྒོ་རུང་གཙོས་པའི་གྲམ་མཚོའི་རྫོང་ཕུག་དགོན་པ་སོགས་ནས་མི་མང་པོ་འདས་གྲོངས་སུ་ཕྱིན་ཡོད་པའི་ཁར། མྱུར་སྐྱོབ་སོགས་ཀྱི་རོགས་སྐྱོར་གང་ཡང་སླེབས་མི་འདུག ཅེས་བརྗོད་བྱུང་།
མིང་བརྗོད་འདོད་མེད་པའི་སྟོད་དིང་རིའི་ཡུལ་མི་ཞིག་གིས་འདི་གའི་གསར་འགོད་པར། ངའི་གྲོང་ཚོའི་ནང་ནས་མི་བདུན་འདས་གྲོངས་སུ་ཕྱིན་སོང་། ཁང་པ་མང་པོར་གཏོར་སྐྱོན་ཐེབས་ཡོད། འོན་ཀྱང་། ང་ཚོར་མྱུར་སྐྱོབ་སོགས་ཀྱི་རེ་བ་ཞུ་ས་མེད་ཁར། ད་དུང་ས་ཡོམ་བརྒྱབ་ཡོང་སྙམ་ནས་ཞེད་སྣང་ངང་མཚན་མོར་ཕྱི་ལོགས་སུ་གུར་ནང་ཉལ་ཐབས་བྱེད་བཞིན་ཡོད་མོད། གུར་འདང་ངེས་མེད་པས། ཡུལ་མི་མང་པོས་ས་གནས་གཞན་དུ་གུར་ཉོ་བར་འགྲོ་རྩིས་བྱེད་སྐབས། ཉེན་རྟོག་པས་བཀག་འགོག་བྱས་ཏེ་གཏོང་གི་མི་འདུག་པ་མ་ཟད། ཁ་པར་ནས་པར་རྒྱག་པ་དང་བརྙན་སོགས་ལེན་མི་ཆོག་པ་དང་ཕྱི་ཕྱོགས་སུ་འབྲེལ་བ་བྱེད་མི་ཆོག་པའི་བཀའ་བཏང་སོང་། ཞེས་བརྗོད་བྱུང་།
གསར་འགོད་པས་རྒྱུས་ལོན་བྱས་ཏེ་ཤེས་རྟོགས་བྱུང་བའི་གནས་ཚུལ་ལྟར་ན། བོད་ཀྱི་སྟོད་ཕྱོགས་སུ་ལ་སྟོད་ལྷོ་བྱང་གཉིས་ལས། ལ་སྟོད་ལྷོའི་དིང་རི་རྫོང་ཁོངས་སུ་ཞང་ ༢༠ ཡས་མས་ཙམ་ཡོད་ཅིང་། དེ་དག་ལས་ད་ལན་ས་ཡོམ་གྱི་གནོད་འཚེ་ཐེབས་ཡུལ་གཙོ་བོ་ནི། དིང་རི་རྫོང་མ་ཆོད་ཞང་བཞི་སྟེ། མཚོ་སྒོ་དང་ཆུ་ལྷོ་ཞང་། གྲམ་མཚོ་དང་ཉི་ཤར་ཞང་བཅས་ཡིན་ཞིང་། དེ་དག་ལས་གནོད་འཚེ་ཚབས་ཆེན་ཕོག་ཡུལ་ནི་མཚོ་སྒོ་ཡིན་འདུག ལ་སྟོད་བྱང་གི་ཁོངས་སུ་ཡོད་པའི་ས་སྐྱ་དང་གཏིང་སྐྱེས། ངམ་རིང་དང་ལྷ་རྩེ་རྫོང་ཁོངས་སོགས་སུ་ས་ཡོམ་གྱི་གནོད་འཚེ་བྱུང་ཡོད་ཀྱང་མྱུར་སྐྱོབ་སོགས་ཀྱི་རོགས་སྐྱོར་སླེབས་མེད་པའི་ས་ཁུལ་མང་པོ་ཡོད་ཅིང་། རྒྱ་ནག་གཞུང་འབྲེལ་གྱི་གྲངས་འབོར་ལྟར་ན། ད་སྔ་བར་ས་འགུལ་ཁྲོད་མི་གྲངས་ ༡༢༦ རྐྱེན་ལམ་དུ་ཤོར་བ་དང་། མི་གྲངས་ ༡༨༨ ལ་རྨས་སྐྱོན་ཕོག་པ། དེ་བཞིན་ཁང་པ་ ༣༦༠༩ ལ་གཏོར་སྐྱོན་ཐེབས་ཡོད་པའི་གནས་ཚུལ་བསྒྲགས་འདུག འདི་གའི་གསར་འགོད་པར་བོད་ནང་གི་བོད་མི་ཞིག་གིས་གྲམ་མཚོའི་གུ་རུང་གྲོང་ཚོ་ནས་མི་མང་པོ་རྐྱེན་ལམ་དུ་ཤོར་ཡོད་ཀྱང་། ད་དུང་གུ་རུང་གྲོང་ཚོ་གཙོས་ས་ཁུལ་གཞན་མང་པོར་མྱུར་སྐྱོབ་སླེབས་མེད་པ་དང་། ལྷ་རྩེ་ནས་མི་གཉིས་རྐྱེན་འདས་སུ་ཕྱིན་ཡོད་པ་མ་ཟད། རྐྱེན་འདས་སུ་ཕྱིན་པའི་མི་མང་པོ་ཡོད་ཀྱང་རྒྱ་ནག་གཞུང་གིས་སྦས་སྐོང་བྱེད་བཞིན་ཡོད་ཅེས་བརྗོད་བྱུང་།
ཁ་སང་རྒྱ་ནག་གཞུང་འབྲེལ་གྱི་ཐོག་ནས་ས་འགུལ་བྱུང་ཡུལ་ནི་ས་མཐོ་ཞིང་ཁ་ཐག་རིང་བ་དང་གྲང་ངར་ཆེ་བའི་ས་ཁུལ་ཡིན་སྟབས། ས་ཁུལ་གཞན་གྱི་རོགས་སྐྱོར་ལེན་རྒྱུ་མིན་པའི་གསལ་བསྒྲགས་སྤེལ་བ་དང་བསྟུན། ཉིན་ཤས་གོང་ནས་དིང་རིར་རོགས་སྐྱོར་ཆེད་ཡོང་བའི་བོད་མདོ་དབུས་ཁམས་གསུམ་གྱི་བོད་མི་མང་པོ་ཞིག་ལ་ཕྱིར་ལོག་དགོས་པའི་བཀའ་བཏང་བ་བཞིན། དེ་རིང་ནས་བོད་མི་དང་བླངས་རོགས་སྐྱོར་བ་མང་པོ་ཞིག་གཏིང་སྐྱེས་དང་ལྷ་རྩེ་རྫོང་གི་ཕྱོགས་སུ་འགྲོ་མགོ་བརྩམས་འདུག་ལ། ཁོང་ཚོར་རྒྱ་ནག་གཞུང་གིས་བརྙན་དང་པར་རིས་འདྲ་མིན་སྤེལ་མི་ཆོག་པའི་བཀའ་བཏང་ཡོད་པ་བོད་ནང་གི་བོད་མི་ཞིག་གིས་བརྗོད་བྱུང་།
ད་རེས་དིང་རི་རྫོང་དུ་ས་འགུལ་ཚད་རིམ་ཆེན་པོ་བརྒྱབ་པའི་གནས་ཚུལ་བྱུང་བ་དང་བཙན་བྱོལ་དུ་༧གོང་ས་རྒྱལ་བ་རིན་པོ་ཆེ་མཆོག་གི་དབུས་བསྟན་བདག་བླ་ཆེན་ཁག་ནས་ཐུགས་སྨོན་སྐྱབས་འཇུག་གནང་བ་དང་། བོད་མིའི་སྒྲིག་འཛུགས་ཀྱི་གཙོས་གཞུང་འབྲེལ་མིན་པ་དང་འཛམ་གླིང་ཡུལ་གྲུ་གང་སར་གནས་པའི་བོད་མི་ཚང་མས་ཉིན་དང་མཚན་བརྒྱུད་བསྔོ་བ་སྨོན་ལམ་བྱེད་པ་སོགས་ཤ་ཁྲག་གཅིག་པའི་དིང་རིའི་མི་མང་དང་གོད་ཆག་ཕོག་པའི་བོད་ནང་གི་བོད་མིར་གདུང་སེམས་མཉམ་སྐྱེད་ཞུས་དང་ཞུ་བཞིན་པ་ཡིན་ལ། བོད་ནང་དུ་མདོ་དབུ་ཁམས་གསུམ་གྱི་མི་སྣ་གྲགས་ཅན་རྩོམ་པ་པོ་དང་སྙན་ངག་པ། གཞས་པ། དྲ་དཔོན་དང་ཕྱུག་བདག ཚོགས་པ་ཁག་དང་མི་མང་སོགས་ནས་ཞལ་འདེབས་ཕུལ་བ་དང་། ཡུལ་དངོས་སུ་བསྐྱོད་དེ་ཉིན་རེའི་འཚོ་བའི་དགོས་མཁོ་བསྐྲུན་པ། ཡང་ན་རང་རང་གི་ཆེད་ལས་སྟེང་ནས། དིང་རིའི་མི་མང་ལ་གདུང་སེམས་མཉམ་སྐྱེད་ཤུགས་ཆེན་ཞུས་སོང་བས། རྒྱ་ནག་གཞུང་གིས་འཕྲལ་དུ་ས་གནས་གཞན་གྱི་རོགས་སྐྱོར་ལེན་མཚམས་འཇོག་དོན་ནི། བོད་ནང་གི་བོད་མི་ཚོའི་ནང་ཁུལ་གྱི་གཡོ་བ་མེད་པའི་མཐུན་སྒྲིལ་དང་མི་རིགས་གཅིག་གི་འདུ་ཤེས་ཀྱི་སེམས་ཚོར་ཐད་རྒྱ་ནག་གི་མགོ་ཁྲིད་ཚོར་ཞེད་སྣང་སྐྱེ་ཡི་ཡོད་པ་ཉམས་ཞིབ་པས་བརྗོད་འདུག
ཡང་ས་གནས་ཀྱི་འབྲེལ་ཡོད་བོད་མི་ཞིག་གིས། ད་རེས་ས་འགུལ་ཁྲོད་རྐྱེན་འདས་སུ་ཕྱིན་པའི་མི་མང་ཆེ་བ་གཞོན་སྐྱེས་ཡིན་པ་དང་། སྟོད་དིང་རིའི་ཕྱོགས་སུ་ངན་པ་དགུ་འཛོམས་ཉིན་བསང་གསོལ་གཏོང་བ་དང་བཟང་པོ་བཅུ་འཛོམས་ཉིན་གྲོགས་ཕུན་མཆེད་འཛོམས་ཏེ་ཆང་འཐུང་ཞོར་དུ་དགའ་དགའ་སྤྲོ་སྤྲོད་གནང་སྲོལ་ཡོད་སྟབས། བཟང་པོ་བཅུ་འཛོམས་ཀྱི་ཕྱི་ཉིན་ས་ཡོམ་བརྒྱབ་པས་གཞོན་སྐྱེས་མང་པོ་འདས་གྲོངས་སུ་ཕྱིན་འདུག འོན་ཀྱང་། རྒྱ་ནག་གཞུང་གིས་རོགས་སྐྱོར་བྱེད་ཀྱིན་འདུག རྒྱུ་མཚན་དིང་རི་ནི་ས་མཚམས་ཡིན་པས་རེད། ཅེས་འགྲེལ་བརྗོད་གནང་བྱུང་།
ད་ལན་ས་འགུལ་སྐབས། རྒྱ་ནག་གཞུང་འབྲེལ་གྱི་བརྒྱུད་ལམ་ཁག་ཚང་མས། དིང་རི་རྫོང་དུ་ས་འགུལ་ཚད་རིམ་ ༦།༨ བརྒྱབ་ཡོད་ཅེས་གཞི་རྒྱ་ཆེན་པོས་བསྒྲགས་སོང་མོད། འོན་ཀྱང་། ཨ་རིའི་རྒྱལ་ཡོངས་ས་འགུལ་རྟོག་ཞིབ་ལས་ཁུངས་ཀྱིས། དིང་རིར་བརྒྱབ་པའི་ས་འགུལ་གྱི་ཚད་རིམ་ནི་ ༧།༡ ཡིན་པ་གསལ་སྟོན་བྱས་འདུག ད་ལྟ་བོད་ནང་གི་སྤྱི་ཚོགས་བརྒྱུད་ལམ་ཁག་ཏུ་རྒྱ་ནག་གཞུང་གིས་སྒྲིག་བཀོད་བྱས་ཤིང་། གཞུང་འབྲེལ་མི་སྣས་མྱུར་སྐྱོབ་བྱེད་བཞིན་པའི་བརྙན་པར་ཤ་སྟག་ཁྱབ་བསྒྲགས་བྱེད་བཞིན་པ་ལས། ད་ལྟ་ས་གནས་ཀྱི་མང་ཚོགས་ལ་བཀག་སྡོམ་ཆེ་ཞིང་དམིགས་བསལ་བོད་ནང་གི་དྲ་དཔོན་མི་ཉུང་བ་ཞིག་ཡུལ་དངོས་སུ་ཕྱིན་ཡོད་ཀྱང་། ས་ཡོམ་ཁྲོད་གནོད་འཚེ་ཐེབས་པའི་ཛ་དྲག་གི་གནས་ཚུལ་གཅིག་ཀྱང་སྤེལ་བཅུག་མེད་ལ། ད་ལྟ་ས་ཡོམ་ཆེད་ཞལ་འདེབས་ཞེས་པའི་ཚིག་ཁ་ནས་ཐོན་པ་ཙམ་གྱིས་སྤྱི་ཚོགས་དྲ་བྱང་ཁག་འཕྲལ་མར་སྒོ་རྒྱག་གིན་ཡོད་འདུག
ཨ་རིའི་རྒྱལ་ཡོངས་ས་འགུལ་རྟོག་ཞིབ་ལས་ཁུངས་ཀྱིས། ཟླ་འདིའི་ཕྱི་ཚེས་ ༧ ཉིན་གྱི་སྔ་དྲོའི་ཆུ་ཚོད་ ༡།༥ སྟེང་དིང་རིར་ས་འགུལ་བརྒྱབ་ཡོད་པའི་གནས་ཚུལ་སྤེལ་འདུག་མོད། རྒྱ་ནག་གཞུང་གིས། ཕྱི་ཚེས་ ༧ ཉིན་གྱི་སྔ་དྲོའི་ཆུ་ཚོད་ ༩།༥ ཙམ་ལ་ས་འགུལ་བྱུང་ཡོད་པའི་གནས་ཚུལ་བསྒྲགས། ད་ལན་དིང་རིར་བྱུང་བའི་ས་འགུལ་གྱི་གཏིང་ཚད་ནི་སྤྱི་ལེ་ ༡༠ ཡིན་པ་དང་། དིང་རི་གཙོས་ས་སྐྱ། ངམ་རིང་། ལྷ་རྩེ། གཞིས་ཀ་རྩེ། གཏིང་སྐྱེས། གཞིས་ཀ་རྩེ་སོགས་སུ་ས་འགུལ་བྱུང་བ་མ་ཟད། ས་འགུལ་གྱི་ཤུགས་རྐྱེན་བལ་ཡུལ་དང་རྒྱ་གར་གྱི་འབྲས་ལྗོངས། འབྲུག་སོགས་རྒྱལ་ཁབ་མི་འདྲ་བའི་གྲོང་ཁྱེར་དང་ས་གནས་ཁག་ ༢༠ ལྷག་ལ་སླེབས་ཡོད་ལ། ཕྱི་ལོ་ ༢༠༢༠ ལོའི་ཟླ་ ༣ པར་དིང་རིར་ས་འགུལ་ཚད་རིམ་ ༥།༩ ཅན་ཞིག་བརྒྱབ་མྱོང་། དིང་རི་ནི་བོད་ཀྱི་རྒྱལ་ས་ལྷ་སའི་ལྷོ་ཕྱོགས་སུ་ཆགས་ཤིང་། ས་བབ་མཐོ་ཚད་མི་ཊར་ ༤༣༠༠ ཡོད།
གཞན་ཡང་། ཁ་སང་ཕྱི་ཚེས་ ༨ ཉིན་རྒྱབ་ཙམ་ལ་བོད་མགོ་ལོག་རྨ་སྟོད་ཕྱོགས་སུ་ཚད་རིམ་ ༥།༨ ཅན་གྱི་ས་ཡོམ་ཞིག་བརྒྱབ་སྟེ་མི་ཁག་ཅིག་ལ་གནོད་འཚེ་བཏང་ཡོད་པའི་གནས་ཚུལ་འདུག་ཀྱང་། རྒྱ་ནག་གཞུང་གིས་ས་ཡོམ་རྒྱག་ས་དེ་ནི་རི་ཁུལ་ཡིན་པས་མི་རྒྱུ་གཉིས་ལ་གནོད་འཚེ་གང་ཡང་ཐེབས་མེད་སྐོར་བསྒྲགས་འདུག་ལ། འདི་གའི་གསར་འགོད་པས་མུ་མཐུད་གནས་ཚུལ་ལ་རྒྱུས་ལོན་བྱེད་མུས་ཡིན།
གསར་འགོད་པ། སྐལ་བཟང་སྦྱིན་པ།
