བོད་མི་མང་སྤྱི་འཐུས་ཚོགས་གཙོ་མཆོག་དང་བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་རྣམ་གཉིས་ནས་སྐུ་ཞབས་མའེ་ཁི་ཇོན་སོན་མཆོག་སླར་ཡང་ཨ་རིའི་གྲོས་ཚོགས་འོག་མའི་ཚོགས་གཙོར་བདམས་ཐོན་བྱུང་བར་དགའ་བསུའི་འཚམས་འདྲི་གནང་འདུག
ཁ་སང་ཕྱི་ཚེས་ ༩ ཉིན་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་སྐབས་བཅུ་བདུན་པའི་བོད་མི་མང་སྤྱི་འཐུས་ལྷན་ཚོགས་ཀྱི་ཚབ་ཞུས་ཏེ། སྐུ་ཞབས་མའེ་ཁི་ཇོན་སོན་ (Mike Johnson) མཆོག་བསྐྱར་དུ་ཨ་རིའི་གྲོས་ཚོགས་འོག་མའི་ཚོགས་གཙོར་གསར་དུ་བདམས་ཐོན་བྱུང་བ་དང་། ཚོགས་གཙོའི་དམ་འབུལ་ཞུས་པར་དགའ་བསུའི་འཚམས་འདྲི་ཞུས་གནང་འདུག
དེ་འབྲེལ་ཚོགས་གཙོ་མཆོག་གི་འཚམས་འཕྲིན་ནང་། ཨ་རིའི་རྒྱལ་ཁབ་ནི་བོད་མིའི་གཞི་རྩའི་ཐོབ་ཐང་སྲུང་སྐྱོབ་ཐོག་ཡུན་རིང་རྒྱབ་སྐྱོར་ཤུགས་ཆེ་གནང་མཁན་ཞིག་ཡིན་པ་མ་ཟད། རྒྱལ་སྤྱིའི་ཐོག་བོད་ཀྱི་གནད་དོན་གླེང་སློང་གནང་མཁན་ཞིག་ཀྱང་ཆགས་ཀྱི་ཡོད། དེ་ལྟར་རྒྱབ་སྐྱོར་གནང་བའི་ཐོག་ནས་ཨ་རིའི་རྒྱལ་ཁབ་ནི་དམངས་གཙོ་དང་། འགྲོ་བ་མིའི་ཐོབ་ཐང་། འགྲོ་བ་མིའི་ཆེ་མཐོང་བཅས་སྲུང་སྐྱོབ་གོང་འཕེལ་ཤུགས་ཆེ་གནང་མཁན་ཞིག་ཡིན་པ་མཚོན་གྱི་ཡོད། གཉིས་སྨན་དབུ་མའི་ལམ་གྱི་སྲིད་བྱུས་ཐོག་ནས་བོད་རྒྱའི་དཀའ་རྙོག་སེལ་རྒྱུར་སྐུ་ཉིད་ནས་རྒྱབ་སྐྱོར་མཐུན་འགྱུར་གནང་རྒྱུའི་རེ་བ་ཞུ་བཞིན་ཡོད། སྐུ་ཉིད་ཀྱིས་ཚོགས་གཙོའི་ལས་ཡུན་རིང་ཨ་རིའི་མི་མང་གི་མངོན་འདོད་འགྲུབ་རྒྱུ་སོགས་མ་འོངས་པའི་ལས་དོན་མཐའ་དག་ལམ་ལྷོངས་ལྡན་པ་ཡོང་བ་དང་། དེ་བཞིན་འཛམ་གླིང་ནང་ཞི་བདེ་དང་དྲང་བདེན། འགྲོ་བ་མིའི་ཐོབ་ཐང་སྲུང་སྐྱོབ་གང་ལེགས་ཡོང་བའི་རེ་བ་ཞུ་རྒྱུ་ཡིན་ཞེས་གསུངས་འདུག
བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས། སྐུ་ཉིད་སླར་ཡང་ཨ་རིའི་གྲོས་ཚོགས་འོག་མའི་ཚོགས་གཙོར་བདམས་ཐོན་བྱུང་བར་དབུས་བོད་མིའི་སྒྲིག་འཛུགས་དང་བོད་མི་མང་གི་ཚབ་ཞུས་ཏེ་འཚམས་འདྲི་བཀྲ་ཤིས་བདེ་ལེགས་ཞུ་རྒྱུ་ཡིན། ལོ་བཅུ་ཕྲག་མང་པོའི་རིང་ལ་ཨ་རིའི་གྲོས་ཚོགས་ཀྱིས་བོད་ཀྱི་རྩ་དོན་ལ་གཡོ་འགུལ་མེད་པའི་རྒྱབ་སྐྱོར་གནང་གི་ཡོད་པ་དང་། གྲོས་ཚོགས་ཕྱོགས་གཉིས་ཀྱི་ཁས་ལེན་བརྟན་པོ་འདིས་ཨ་རིའི་ཕུགས་རྒྱང་རིང་བའི་སྲིད་བྱུས་འོག་ནས་བོད་དོན་ལ་རྒྱབ་སྐྱོར་ཡུན་རིང་བརྟན་གནས་ཡོང་བར་ཕན་ཐོགས་ཆེན་པོ་བྱུང་ཡོད། སྐུ་ཉིད་ཀྱི་ཚོགས་གཙོའི་འོག་ང་ཚོས་གྲོས་མོལ་གྱི་ལམ་ནས་དབུ་མའི་ལམ་ལ་གཞི་བཅོལ་བའི་བོད་རྒྱའི་དཀའ་རྙོག་སེལ་ཐབས་ཀྱི་གལ་ཆེའི་ལས་དོན་མུ་མཐུད་སྤེལ་རྒྱུར་རེ་སྒུག་བྱེད་ཀྱི་ཡོད། ཅེས་གསུངས་འདུག
མཇུག་ཏུ། སྲིད་སྐྱོང་མཆོག་གིས་ཐུགས་རྗེ་ཆེ་ཞུས་པ་དང་། ཨ་རིའི་གྲོས་ཚོགས་ནས་བོད་མི་མང་ལ་རྒྱུན་རིང་རྒྱབ་སྐྱོར་གནང་བའི་གལ་ཆེའི་རང་བཞིན་གསལ་སྟོན་གནང་བ་དང་སྦྲགས། ཨ་རིའི་གྲོས་ཚོགས་དང་བོད་མི་མང་དབར་ཡུན་རིང་གནས་པའི་འབྲེལ་ལམ་སྲ་བརྟན་ཡོང་སླད་ཚོགས་གཙོ་སྐུ་ཞབས་མའེ་ཁི་ཇོན་སོན་མཆོག་ལ་དངོས་སུ་མཇལ་འཕྲད་གནང་རྒྱུའི་ཐུགས་འདུན་ཞུས་ཡོད་ཅེས་གསུངས་འདུག
ཨ་རིའི་བདམས་ཐོན་སྲིད་འཛིན་ཌོ་ནལ་ཊོམ་ཕུ་མཆོག་གིས་སྐུ་ཞབས་མའེ་ཁི་ཇོན་སོན་ལགས་སུ། ཚོགས་གཙོ་མའེ་ཁི་ཇོན་སོན་མཆོག་ལ་གྲོས་ཚོགས་ནང་སྔར་བྱུང་མ་མྱོང་བའི་ཡིད་ཆེས་འོས་ཤོག་ཐོབ་པར་འཚམས་འདྲི་ཞུ། མའེ་ཁི་ནི་ཚོགས་གཙོ་རླབས་ཆེན་ཞིག་ཡིན་པས། ང་ཚོའི་རྒྱལ་ཁབ་ལ་ཁེ་ཕན་ཡོང་གི་རེད། ཨ་རིའི་མི་མང་གིས་འདས་པའི་ལོ་ངོ་བཞིའི་རིང་མགོ་ཁྲིད་དང་སྟོབས་ཤུགས། སྤྱི་མཐུན་གྱི་ཚོར་ཤེས་སོགས་ལ་རེ་སྒུག་བྱས་ཏེ། ད་ལྟ་གཞི་ནས་ཁོང་ཚོས་ཤེས་རྟོགས་ཐུབ་ཡོད་པ་ནི། མི་རིང་བར་ཨ་རི་སྔར་ལས་ལྷག་པའི་རླབས་ཆེན་རྒྱལ་ཁབ་ཅིག་ཆགས་རྒྱུ་ཡིན་པ་དེ་ཡིན། ཞེས་བརྗོད་འདུག
ད་ལན་ནི་སྐུ་ཞབས་མའེ་ཁི་ཇོན་སོན་ (Mike Johnson) མཆོག་ཨ་རིའི་གྲོས་ཚོགས་འོག་མའི་ཚོགས་གཙོར་བདམས་ཐོན་བྱུང་བ་ཐེངས་གཉིས་པ་དེ་ཡིན་ཞིང་། ཕྱི་ལོ་ ༢༠༢༣ ཟླ་ ༡༠ ཚེས་ ༢༥ ཉིན་ཨ་རིའི་གྲོས་ཚོགས་འོག་མའི་ཚོགས་གཙོ་ཀེ་བིན་ (Kevin Owen McCarthy) གྲོས་ཚོགས་ནང་འོས་བསྡུ་བྱས་ཏེ་ཕྱིར་ཕུད་བཏང་རྗེས། ཟླ་དེའི་ཕྱི་ཚེས་ ༢༧ ཉིན་སྐུ་ཞབས་མའེ་ཁི་ཇོན་སོན་མཆོག་གྲོས་ཚོགས་འོག་མའི་ཚོགས་གཙོར་ཐེངས་དང་པོ་བདམས། ཕྱི་ལོ་ ༢༠༡༥ ནས་ ༢༠༡༧ བར་ཨ་རིའི་མངའ་སྡེ་ལོའུ་ཟེན་ནཱའི་(Louisiana) གྲོས་ཚོགས་འོག་མའི་འཐུས་མི་གནང་། ཕྱི་ལོ་ ༢༠༡༧ ལོ་ནས་ལོའུ་ཟེན་ནཱའི་གྲོས་ཚོགས་གོང་མའི་འཐུས་མིར་གྱུར་བ་ནས། ད་སྔ་མུ་མཐུད་ཨ་རིའི་གྲོས་ཚོགས་སུ་སྤྱི་མཐུན་ཚོགས་པའི་འཐུས་མིའི་ངོ་བོའི་ཐོག་ནས་གྲོས་ཚོགས་མའི་ཚོགས་གཙོ་གནང་བཞིན་པ་ཡིན་ལ། ཟླ་འདིའི་ཕྱི་ཚེས་ ༣ ཉིན་ཁོང་གིས་ཚོགས་གཙོའི་དམ་བཅའ་ཕུལ་བ་དང་ལྷན། ཨ་རིའི་གྲོས་ཚོགས་སྐབས་ ༡༡༩ བའི་འཐུས་མི་ཡོངས་ནས་དམ་འབུལ་ཞུས་ཡོད། ཁོང་ད་ལྟ་དགུང་ལོ་ ༥༢ དང་ཨ་རིའི་གྲོས་ཚོགས་སྐབས་ ༡༡༩ པའི་ཚོགས་གཙོ་བཅས་ཡིན་འདུག
གསར་འགོད་པ། སྐལ་བཟང་སྦྱིན་པ།
