༧གོང་ས་མཆོག་ནས་ངོས་རང་ལོ་བརྒྱ་དང་བཅུ་གྲངས་ཤིག་བསྡད་ཀྱི་ཡིན། ངོས་ནས་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་ཉམས་ལེན་བྱེད་པའི་ཉམས་མྱོང་ཇེ་ཟབ་ནས་ཇེ་ཟབ་ཏུ་འགྲོ་ཡི་འདུག་ཅེས་གསུངས།
དེ་རིང་༧གོང་ས་རྒྱལ་བ་རིན་པོ་ཆེ་མཆོག་གིས། རྒྱ་གར་ལྷོ་ཕྱོགས་སྦེལ་ཀོབ་གཞིས་ཆགས་ཀྱི་ཁོངས་གཏོགས་བྱེས་ཀྱི་གདན་ས་ཆེན་མོ་བཀྲ་ཤིས་ལྷུན་པོ་དགོན་དུ། སེར་ར་བྱེས་སྨད་གཉིས་ཀྱི་གནས་བརྟན་བགྲེས་པ་རྣམས་དང་། སྦེལ་ཀོབ་ལུགས་བསམ་དང་བདེ་སྐྱིད་སླར་གསོ་གཉིས། མོན་གྷོ་ཌི། ཧོང་སོར། ཀོ་ལི་གྷལ་སོགས་ནས་ཕེབས་པའི་དགུང་གྲངས་ ༨༠ ཡན་གྱི་བོད་མི་བགྲེས་སོང་ ༤༠༠ ལྷག་ལ་མཇལ་ཁ་བསྩལ།
སྐབས་དེར་༧མགོན་པོ་གང་ཉིད་མཆོག་གིས། ངོས་རང་ལོ་བརྒྱ་དང་བཅུ་གྲངས་ཤིག་བསྡད་ཀྱི་ཡིན། ངོས་ནས་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་ཉམས་ལེན་བྱེད་པའི་ཉམས་མྱོང་གཏིང་ཇེ་ཟབ་ནས་ཇེ་ཟབ་ཏུ་འགྲོ་ཡི་འདུག ཅེས་གསུངས། དེ་རིང་གི་མཇལ་ཁའི་ཁྲོད་དུ་སེར་ར་སྤྱི་དང་སེར་སྨད་གཉིས་ཀྱི་དགེ་འདུན་པ་ཁྱོན་ ༤༧ དང་། སྦེལ་ཀོབ་ལུགས་བསམ་གཞིས་ཆགས་ཀྱི་ལུས་སེམས་གཉིས་ལ་དཀའ་ངལ་ལྡན་པའི་མི་གྲངས་ ༥༢། དེ་བཞིན། ཧོང་སོར་གཞིས་ཆགས་ནས་དགུང་ལོ་ ༨༠ ཡན་གྱི་བོད་མི་རྒན་པ་ ༡༠༣ དང་། ཧོང་སོར་རྒས་གསོ་ཁང་གི་བོད་མི་རྒན་པ་ ༡༢ དང་ལུས་སེམས་ལ་དཀའ་ངལ་ལྡན་པའི་མི་གྲངས་ ༡༧ བཅས་ཀྱི་སྟེང་དུ། བོད་མི་རྒན་པ་རྣམས་ལ་རོགས་སྐྱོར་གནང་མཁན་དང་དེ་མིན་གྱི་མཇལ་ཁ་ཞུ་མཁན་བཅས་ཁྱོད་མི་གྲངས་ ༤༠༠ ཙམ་ཡོད་འདུག
ཟླ་འདིའི་ཕྱི་ཚེས་ ༨ རེས་གཟའ་ལྷག་པའི་ཉིན་ནས་བཟུང་བདུན་རེའི་རེས་གཟའ་ཟླ་བ་དང་ལྷག་པ། པ་སངས་འཆར་ཅན་དུ་རྒྱ་གར་ལྷོ་ཕྱོགས་ཀྱི་བོད་མིའི་དགོན་སྡེ་ཁག་དང་གཞིས་ཆགས་ཁག་གི་བོད་མི་དགུང་གྲངས་ ༨༠ ཡན་དང་དམིགས་བསལ་དཀའ་ཁག་ཅན། དེ་མིན་རྒྱ་གར་དང་ཕྱི་རྒྱལ་བ། ས་ཕྱོགས་གཞན་ནས་ཕེབས་པའི་བོད་རིགས་བཅས་ལ་རིམ་བཞིན་མཇལ་ཁ་སྩལ་རྒྱུ་ཡིན་པ་དགའ་ལྡན་ཕོ་བྲང་གི་གསལ་བསྒྲགས་སྔོན་སོང་ལྟར་མཛད་རིམ་འགྲོ་མུས་ཡིན་པ་རེད།
སྤྱིར་ད་སྔ་བར་དགའ་ལྡན་ཕོ་བྲང་གི་དྲ་རྒྱའི་སྟེང་༧གོང་ས་མཆོག་གི་མཛད་འཆར་སྐོར་གསལ་སྟོན་བྱས་མེད་ནའང་། དེ་སྔ་འདི་གའི་གསར་ཁང་ལ་ས་གནས་ཀྱི་འབྲེལ་ཡོད་ཁག་ཅིག་གིས་༧རྒྱལ་བ་རིན་པོ་ཆེ་ཟླ་གཅིག་ཙམ་རིང་ལྷོ་ཕྱོགས་སུ་ལྷོད་བཞུགས་མཛད་རྒྱུ་ཡིན་སྐོར་བརྗོད་བྱུང་ལ། ད་ལྟ་གནས་ཚུལ་འབྱོར་གསལ་ལ་མི་རིང་བར་༧མགོན་པོ་གང་ཉིད་མཆོག་སེར་ར་དགོན་པར་ཕེབས་བསུའི་ཆེད་གྲ་སྒྲིག་བྱེེད་བཞིན་འདུག་ཅེས་ས་གནས་ཀྱི་འབྲེལ་ཡོད་ཅིག་གིས་བརྗོད་བྱུང་།
གསར་འགོད་པ། སྐལ་བཟང་སྦྱིན་པ།
