རྩོམ་ཁུངས། བོད་ཀྱི་དུས་བབ།
རྩོམ་པ་པོ། ཨ་འདུས།
ཉེ་ལམ་དིང་རིར་ས་འགུལ་བྱུང་སྟེ། བོད་མི་བརྒྱ་ཕྲག་འགའི་ཚེ་སྲོག་ཤོར་ཞིང་། མི་ཧ་ཅང་མང་པོ་ནད་པ་བཟོས་པར་མ་ཟད། དུད་ཁྱིམ་མང་པོར་བསམ་ཡུལ་འདས་པའི་གས་ཆག་ཆེན་པོ་བྱུང་སྟེ་ཕལ་ཆེར་མི་ཤི་ཁྱིམ་སྟོང་གིས་བེད་མེད་ལྟ་བུར་གྱུར་ཞིང་། འཐོར་ཞིག་ཏུ་སོང་བའི་ཁང་ཤུལ་ནས་བྱིས་པ་དང་བུད་མེད་ཀྱི་ངུ་སྐད་གང་སར་ཁྱབ་པའི་སྣང་བརྙན་མིག་ལ་མངོན་ཚེ་བརྗོད་མི་ནུས་པའི་ན་ཟུག་ཅིག་གིས་སྙིང་ཁམས་ཧྲིལ་པོ་དབང་མེད་དུ་གཟེར་འོང་།
རྒྱ་གཞུང་གིས་བོད་ཁམས་ཧྲིལ་པོའི་འཚོ་བ་དེང་རབས་ཅན་དུ་བསྒྱུར་ཏེ་སྔར་ནས་འབྱོར་འབྲིང་གི་ལམ་བུར་ཆས་ཟིན་ཞེས་ལོ་མང་པོའི་རིང་འུར་སྒྲོག་ཇི་ཙམ་བྱས་ཀྱང་། བོད་ཀྱི་དངོས་ཡོད་གནས་སྟངས་ལ་ཉམས་ཞིབ་བྱེད་མཁན་གྱི་རྒྱལ་སྤྱིའི་སྤྱི་ཚོགས་དང་། བཙན་བྱོལ་བོད་མི་ཚོས་ཡིད་ཆེས་མི་བྱེད་པར་ཁག་གཏན་ནས་མེད་དེ། ཕྱི་ལོ་ ༢༠༡༠ ལོར་སྐྱེ་རྒུར་བྱུང་བའི་ས་འགུལ་གྱི་གནས་སྟངས་དང་། ཉེ་ལམ་བྱུང་མ་ཐག་པའི་དིང་རིའི་ས་འགུལ་སྐབས་ཀྱི་བོད་མིའི་སྡོད་ཁང་འཛུགས་སྐྲུན་གྱི་གནས་སྟངས་སྐྱོ་ལྷང་ངེ་བ་དེས་ད་ནི་རྒྱ་ནང་རང་གི་དྲང་བདེན་ཅན་ཚོ་ཡང་ཅུང་ངོ་ཚ་དགོས་པའི་ཚད་དུ་བསྐྱལ་ཡོད་ཤག་ཡིན།
རྒྱ་ནག་ནང་དཔལ་འབྱོར་ལྟོས་བཅས་ཀྱིས་ཡར་རྒྱས་སུ་འགྲོ་བཞིན་པར་རྩོད་པ་བྱེད་མ་དགོས་ཀྱང་། བོད་ཁུལ་ནས་ལྷ་ས་དང་། ཟི་ལིང་སོགས་གྲོང་ཁྱེར་འགའ་རེའི་ཁང་པའི་འཛུགས་སྐྲུན་ཕུད། བོད་ཀྱི་གྲོང་གསེབ་སྤྱིའི་སྡོད་ཁང་བཟོ་སྐྲུན་གྱི་མཐུན་རྐྱེན་ལ་མཚོན་ན། ཁང་པའི་ནང་མོའུ་ཙེ་ཏུང་གི་པར་དང་། ནང་བརྙན་འཕྲིན། འཁྱག་སྒམ་ཙམ་ཡོད་པ་ལས་གཞན། ཁང་པའི་ནང་གི་ཀ་བ་དང་། རྩིག་གྱང་སོགས་ལ་ས་ཡོམ་སྔོན་འགོག་ལ་ནུས་པ་ལྡན་པའི་དེང་རབས་ཀྱི་རྣམ་པ་ཅི་ཡང་མཐོང་རྒྱུ་མེད་པ་ནི་ཉེ་ལམ་གྱི་ས་འགུལ་གྱིས་གསལ་པོར་བསྟན་ཡོད།
རྒྱ་ནག་གིས་གཞུང་ལམ་དང་། ལྕགས་ལམ། གནམ་ཐང་སོགས་འཛུགས་སྐྲུན་ཤུགས་ཆེར་བྱས་ཡོད་པ་བདེན་ཡང་། དེ་དག་ནི་དིང་རི་ལྟ་བུའི་བོད་ཀྱི་མང་ཚོགས་ཕལ་བའི་འཚོ་བ་དང་འབྲེལ་མེད་ལྟ་བུ་ཡིན་ཏེ། དེ་དག་ཕལ་མོ་ཆེ་ནི་སྐམ་སའི་མི་རྣམས་བོད་ནང་ཡུལ་སྐོར་བྱེད་པའི་མཐུན་རྐྱེན་དང་སྐྱེལ་འདྲེན་གྱི་ཚོང་ལམ་ལྟ་བུར་གྱུར་ཡོད་ཅིང་། ཞོར་ལ་རྒྱ་ནག་གི་མི་འབོར་བོད་དུ་གནས་སྤོ་བྱེད་པ་དང་། ཛ་དྲག་བྱུང་ཚེ་དམག་མི་དང་། གོ་མཚོན་འབོར་ཆེན་བོད་ནང་སྐྱེལ་འདྲེན་བྱ་སའི་དམིགས་འབེན་ཡང་ཡིན་སྲིད།
མདོར་ན། ད་ལན་གྱི་དིང་རིའི་ས་འགུལ་སྐབས་ང་ཚོས་གསལ་པོར་མཐོང་ཐུབ་པ་ནི། རྒྱ་ནག་གིས་བོད་དབང་སྒྱུར་བྱས་ཏེ་མི་ལོ་བདུན་ཅུ་ཟིན་ལ་ཉེ་ནའང་། དིང་རི་དང་དིང་རི་ལྟ་བུའི་བོད་ཀྱི་མང་ཚོགས་ཕལ་བའི་འཚོ་བ་སྔར་བཞིན་རྗེས་ལུས་ཡིན་པ་དང་། དེ་དག་ལ་དུས་དང་དུས་སུ་བཟའ་བཏུང་ཕྲན་བུ་རེས་ཁ་བཀག་སྟེ་སྲིད་གཞུང་བཟང་ཚུལ་དང་། འཇོན་རབས་བཤད་བཅུག་ནས་ཉི་མ་སྐྱེལ་བཞིན་པ་དེ་ཡིན།
དེ་ལྟ་ནའང་བོད་མི་ཚོའི་སེམས་ངོགས་སུ་སྟོད་ལ་དྭགས་ནས་སྨད་རྒྱ་རོང་བར་གྱི་བཙན་པོའི་ཡུལ་ཁག་གང་ཞིག་ལ་རང་བྱུང་གོད་ཆག་ལྟ་བུའི་དཀའ་ངལ་བྱུང་ཚེ་བོད་མི་ཧྲིལ་པོ་ལུས་དང་སེམས་པ་གཅིག་ཡིན་པའི་ངོས་འཛིན་དེ། མིང་སྟོང་ཙམ་དུ་མ་གྱུར་པར། ལག་ལེན་ཐོག་མདུན་སྐྱོད་ཀྱིས་དཀའ་སྡུག་མཉམ་མྱོང་བྱས་དང་བྱེད་བཞིན་པ་ནི། ཕྱོགས་གཅིག་ནས་འུ་ཅག་ལ་རྒྱལ་སྤྱིའི་སྤྱི་ཚོགས་ཀྱིས་ངོས་འཛིན་ཐོབ་པའི་འཚེ་མེད་ཞི་བའི་དབུ་ཁྲིད་རླབས་ཆེན་ཞིག་ཡོད་པས་ཡིན་ལ། ཕྱོགས་གཅིག་ནས་རང་རེར་ནང་བསྟན་ཆོས་ལུགས་ཀྱི་ཉིང་བཅུད་རང་ལས་གཞན་གཅེས་ཀྱི་རིག་གནས་ཟབ་མོ་ཞིག་རྒྱུན་འབྱམས་སུ་ཡོད་པས་ཀྱང་ཡིན་སྙམ།
དེའི་ཐད་བསམ་གཞིགས་གཏོང་རིན་ཡོད་པའི་དཔེ་མཚོན་འགའ་བཀོད་ན། བོད་ཕྱི་ནང་གཉིས་ཀྱི་བླ་ཆེན་ཚོས་ཤི་བོར་བསྔོ་སྨོན་དང་། ཤུལ་ལུས་དད་ལྡན་མང་ཚོགས་ལ་ཐུགས་གསོའི་གསུང་འཕྲིན་གཅིག་རྗེས་གཉིས་མཐུད་ཀྱིས་སྩལ་བ་དང་། བོད་ཀྱི་རིག་གནས་ཀྱི་ལྟེ་བ་དགོན་སྡེ་ཁག་གི་གྲྭ་བཙུན་ཚོིས་ཀྱང་བསམ་ཡུལ་ལས་འདས་པའི་ཞལ་འདེབས་འཚང་ཁ་ཤིག་ཤིག་གིས་གནང་བ་དང་། གླུ་གཞས་སྒྱུ་སྩལ་བ་ཚོས་གདུང་སེམས་མཉམ་བསྐྱེད་ཀྱི་སྐྱོ་གླུ་འཐེན་པ་དང་། དྲཱ་ཐོག་གི་ཚོང་དཔོན་ཁག་དང་། ཐ་ན་མི་མང་དཀྱུས་མ་ཚུན་ཆད་ཀྱིས་དིང་རིའི་མིག་ཆུ་ནི། བོད་སྤྱིའི་ན་ཟུག་ཅིག་ཏུ་བརྩིས་ཏེ་རང་གི་ལྷག་བསམ་མཚོན་པའི་ཅ་དངོས་འདྲ་མིན་དངོས་དང་བརྒྱུད་ནས་གནོད་ཐེབས་ས་ཁུལ་དུ་ཞལ་འདེབས་སུ་འབུལ་བཞིན་པའི་ངང་ཚུལ་མཛེས་པོ་འདི་འདྲ་ནི། ཆོས་ལྡན་གངས་ཅན་པ་ཁོ་ན་ལས་མི་རིགས་གཞན་ལ་མཐོང་དཀོན་པའི་བཟང་སྤྱོད་ཅིག་ཡིན།
ད་ནི་བསམ་ཞིང་བསམ་ན་འདི་ལྟར་དྲན་འོང་སྟེ། ཉེ་ལམ་བོད་ཁུལ་གཙོས་པའི་རྒྱ་ནག་གི་སྙིང་རྗེ་ཅན་ཚོས་ཀྱང་དིང་རིའི་ཆེད་དུ་རྒྱུ་འབྱོར་གྱི་ཞལ་འདེབས་མང་པོ་གནང་བ་དེ་དག གནོད་ཐེབས་མང་ཚོགས་ཀྱི་ལག་ཏུ་ཏག་ཏག་ཅིག་འཕྲོད་ཐུབ་བམ། གལ་སྲིད་ཐུབ་ན། ཆ་བགོས་ལེགས་པོ་ཞིག་བྱས་ཏེ། དགུན་གཞུང་གི་གྲང་ངར་ལས་སྐྱོབ་ནུས་ཤིང་། བོད་མིའི་ཁྱད་ཆོས་མ་བོར་བའི་ཐོག་ནས་ས་ཡོམ་ལ་ཁ་གཏད་གཅོག་ཐུབ་པའི་དེང་རབས་ཅན་གྱི་སྡོད་ཁང་སྲ་བརྟན་རེ་བཟོས་ན་དགའ་བ་ལའང་སྙམ་མོ། །
ཞེས་རྡོར་གདན་ནས་ཚིག་ཇ་འཐུང་ཞོར་བྲིས་སོ། །
