བོད་ཀྱི་རི་ལུང་རྩྭ་ཐང་མང་པོ་ཉི་གློག་ཤེལ་ལེབ་ཀྱིས་བཀང་སྟེ་རོང་འབྲོག་མང་ཚོགས་ཁྲོད་སེམས་འཚབ་གནང་མཁན་ཇེ་མང་དུ་འགྲོ་ཡི་འདུག

རྒྱ་ནག་གཞུང་གིས་ཉི་འོད་གློག་ནུས་ལ་བརྟེན་ནས་འབྱོར་འབྲིང་སྤྱི་ཚོགས་འཛུགས་སྐྲུན་བྱེད་པར་ཁ་གཡར་ནས་བོད་ཁུལ་དུ་ཉི་གློག་ས་ཚིགས་ཧ་ཅང་མང་པོ་གསར་འཛུགས་བྱས་ཏེ་རི་ལུང་ཐང་གསུམ་འཕྲོ་བརླག་ཏུ་གཏོང་གི་ཡོད་པ་མ་ཟད་འབྲོག་ཁུལ་གྱི་སྒོ་ཕྱུགས་སེམས་ཅན་ལ་བཙན་གྱིས་གྲངས་ཚད་འཛིན་གྱི་ཡོད་འདུག

ཉེ་བའི་ལོ་ཤས་ནང་བོད་ཀྱི་ས་ཁུལ་མང་པོར་ཉི་གློག་ཤེལ་ལེབ་གཞི་རྒྱ་ཆེན་པོ་གསར་འཛུགས་བྱས་དང་བྱེད་བཞིན་འདུག དེའི་ཐད་བོད་ནང་གི་ཞིང་འབྲོག་མང་ཚོགས་དང་། ལྷག་པར་དུ་ཁོར་ཡུག་སྲུང་སྐྱོབ་ལ་དོ་འཁུར་ཅན་མང་པོས་བོད་ཀྱི་དག་གཙང་གི་རི་ལུང་དང་རྩྭ་ཐང་མང་པོ་ཤེལ་ལེབ་ཀྱིས་བཀང་སྟེ་རྩྭ་རྩི་ཤིང་སྐྱེ་མི་ཐུབ་པ་དང་། སྒོ་ཕྱུགས་སེམས་ཅན་རིགས་ཀྱི་འཚོ་གནས་ལ་གནོད་སྐྱོན་ཆེན་པོ་བཟོ་ཡི་ཡོད་པ་མ་ཟད། ས་གནས་སྲིད་གཞུང་གིས་རིམ་གྱིས་རོང་འབྲོག་གི་རྩྭ་ས་གཞི་རྒྱ་ཆེན་པོ་བདག་བཟུང་བྱེད་ཀྱི་ཡོད་སྟབས། མང་ཚོགས་ཀྱིས་གནས་སྐབས་ཀྱི་ས་རིན་ཙམ་ལ་བལྟས་ནས་རང་བྱུང་ཁོར་ཡུག་ལ་འབག་བཙོག་དང་རྩྭ་ས་ཡག་ཤོས་རྣམས་འཕྲོ་བརླག་ཏུ་གཏོང་མི་རུང་བའི་འབོད་སྐུལ་གནང་འདུག

ཉེ་སྔོན་རྒྱ་ནག་གི་གཞུང་འབྲེལ་དྲ་ལམ་དུ་བོད་ཉག་ཆུ་རྫོང་ཁོག་ལ་གྲོང་བརྡལ་དུ་འཛམ་གླིང་གི་ཉི་གློག་ས་ཚིགས་ཆེ་ཤོས་དེ་གསར་འཛུགས་བྱས་ཡོད་སྐོར་དང་། ཝ་ཌི་(watt) ཁྲི་ ༡༠༠ ལྷག་ཟིན་པའི་ཉི་གློག་ས་ཚིགས་དེས་ལོ་རེར་ཆ་སྙོམས་ཀྱིས་གློག་འདོན་ཚད་ནི་ཝ་ཌི་དུང་ཕྱུར ༢༠ ཟིན་གྱི་ཡོད་སྐོར་དང་། གློག་འདོན་ས་ཚིགས་དེས་རི་ལུང་རྩྭ་ཐང་ལྗང་བསྒྱུར་དང་བདེ་འཇགས་སོགས་ཀྱི་ནུས་པར་རོགས་འདེགས་བྱེད་ཀྱིན་ཡོད་ཚུལ་བསྒྲགས་སོང་། དེ་བཞིན་འདས་ལོའི་ཕྱི་ཟླ་ ༡༡ ནང་བོད་ལྗོངས་གསར་པའི་མ་འཇོག་ཚད་ཡོད་སྤྱི་་གཉེར་ཁང་དང་རྒྱ་ནག་གློག་ནུས་ལས་སྐྲུན་བློ་འདོན་སྤྱི་གཉེར་ཁང་ཀྲུང་ནན་གློག་ནུས་འཆར་འགོད་ཁང་ཟེར་བ་གཉིས་མཉམ་འབྲེལ་གྱིས། ས་འབབ་མཐོ་ཚད་རྨི་ ༤༤༠༠ ལྷག་ཡོད་པའི་བོད་མངའ་རིས་རུ་ཐོག་རྫོང་ཁུལ་དུ་ས་ཁོངས་ཁྱོན་རྨི་ ༥༦༦ ལྷག་ཡོད་པའི་ཉི་གློག་ས་ཚིགས་གསར་འཛུགས་གྲུབ་ནས་ལས་མགོ་བཙུགས་ཡོད་སྐོར་བསྒྲགས།

 འདི་གའི་གསར་འགོད་པར་འབྲེལ་ཡོད་བོད་མི་ཞིག་གིས། འདས་པའི་ལོ་ཤས་གོང་ནས་རུ་ཐོག་རྫོང་དང་རུ་ཐོག་མཐའ་སྲུང་དམག་དོན་ཚན་པ་གཉིས་མཉམ་འབྲེལ་གྱིས། ཁུལ་དེར་རྒྱ་ནག་རྒྱལ་སྟོན་དུས་ཆེན་ཟེར་བ་དང་། མཐའ་སྲུང་དམག་མིའི་ཉིན་མོ་སོགས་སྲུང་གཙི་བྱེད་དུ་བཅུག་ཡོད་ཅིང་། གཞུང་གིས་མཐའ་མཚམས་གྲོང་བརྡལ་དུ་ངོས་འཛིན་གྱི་ཕྱིའི་འཛུགས་སྐྲུན་ཁོངས་སུ་ཉི་གློག་ས་ཚིགས་གསར་རྒྱག་བྱས་ཡོད་སྐོར་བརྗོད་བྱུང་།

འདས་ལོར་བོད་ནང་གི་ལྷ་གཡག་ཚོང་རྟགས་ཀྱི་སྦྱིན་བདག་དང་ཁེ་ལས་བ་མི་འགྱུར་རྡོ་རྗེ་ལགས་ཀྱིས་བོད་ཀྱི་འབྲོག་པ་དང་རྩྭ་ཐང་སྲུང་སྐྱོབ་སྐོར་ལ་སྐར་མ་བཅུ་དྲུག་ལྷག་ཅན་གྱི་བརྙན་ཐུང་ཞིག་ཡོངས་ཁྱབ་ཏུ་སྤེལ་བའི་ནང་།  དེང་སང་བོད་ནང་གི་འབྲོག་པའི་ས་ཐོག་ཏུ་ཉི་གློག་འདི་གསར་རྒྱག་བྱེད་ཀྱིན་ཡོད་པ་རེད། རྒྱ་ནག་གཞུང་གིས་ཉི་གློག་དེ་ནུས་ཤུགས་གསར་པའི་ཁོངས་ཀྱི་ཚོང་ལས་གལ་ཆེན་ཞིག་ཏུ་ངོས་འཛིན་བྱེད་ཀྱིན་ཡོད་ལ། བོད་ནང་གི་རོང་འབྲོག་གི་ས་ཁུལ་མང་པོ་ཞིག་ཏུ་ཚོང་ལས་ཀྱི་ངོ་བོའི་ཐོག་ནས་ཉི་གློག་གསར་རྒྱག་བྱེད་མུས་ཡིན་པའི་ཁར། དེང་སྐབས་བོད་ནང་གི་ས་གནས་མང་ཆེ་བ་དང་ལྷག་པར་དུ་འབྲོག་པའི་རྩྭ་ཐང་སྟེང་ཉི་གློག་ས་ཚིགས་མང་པོ་ཞིག་གསར་རྒྱག་བྱེད་མུས་ཡིན་པ་རེད། ཅེས་དང་། བོད་ནང་གི་རོང་འབྲོག་མང་ཚོགས་དང་ལྷག་པར་དུ་འབྲོག་པ་ཚོ་ནི་མི་རབས་ནས་མི་རབས་བར་རྩྭ་ཐང་ཁོ་ན་ལ་བརྟེན་ཡོད་པས། འབྲོག་པའི་རིག་གནས་དང་འཚོ་བ་སྐྱེལ་སྟངས་མང་པོ་ཞིག་ཀྱང་རྩྭ་ཐང་གི་སྟེང་ནས་གྲུབ་ཡོང་བ་ཞིག་རེད། འབྲོག་པ་ཚོ་རྩྭ་ཐང་དང་བྲལ་ཚེ་བོད་པའི་ཡུལ་སྲོལ་གོམས་གཤིས་དང་འཚོ་གནས་ལས་ཁ་བྲལ་དུ་བཏང་བ་ཡིན། ཞེས་བརྗོད་འདུག

ཡང་ཁོང་གིས། སྐྱེས་ཁམས་ཁོར་ཡུག་གི་ཐད་ནས་ཀྱང་ཉི་གློག་གིས་རི་དང་རི་ཁེབས་པའི་འཛུགས་སྐྲུན་མང་པོ་ཞིག་བྱས་ཚེ། བར་ཞིག་ནས་འཆམ་མཐུན་ལྡན་པའི་སྣོད་བཅུད་དེ་འཆམ་མཐུན་མེད་པར་གྱུར་ནས། ཁུལ་དེར་འདབ་ཆགས་བྱ་སོགས་འབབ་ས་འཁོར་ས་མེད་པ་དང་། རི་དྭགས་གནས་ས་མེད་པ། རྟ་ནོར་ལུག་གསུམ་འཚོ་ས་མེད་དུས་རང་བྱུང་ཁམས་ཀྱི་སྣོད་བཅུད་ཀྱི་ནུས་པ་ཉམས་འགྲོ་ཡི་རེད་ལ། ཉི་གློག་ས་ཚིགས་མང་པོ་ཞིག་མུ་མཐུད་དུ་བོད་ཀྱི་རོང་འབྲོག་མང་ཚོགས་ཀྱི་རྩྭ་ཐང་དུ་འཛུགས་སྐྲུན་བྱས་ཚེ། སྐྱེས་ཁམས་ཁོར་ཡུག་ལའང་གནོད་འཚེ་དང་གོད་ཆག་འབྱུང་གི་ཡོད། ཅེས་བརྗོད་འདུག

 ཕྱི་ལོ་ ༢༠༡༡ ལོར་བོད་ཀྱི་རྒྱལ་ས་ལྷ་སའི་ནུབ་རྒྱུད་དུ་ཆགས་པའི་འདམ་གཞུང་རྫོང་གི་ཐུབ་བསྟན་ཡངས་པ་ཅན་གྲོང་བརྡལ་དུ་ཀེ་ལོ་ཝ་ཊི་ས་ཡ་ ༤༣༠(kwh)ཅན་གྱི་ཉི་གློག་ས་ཚིགས་ཆེན་པོ་ཞིག་གསར་འཛུགས་བྱས་ཡོད་པའི་གནས་ཚུལ་ཐོན་ཡོད་པ་དང་། ལོ་དེར་རྒྱ་ནག་གཞུང་གིས་བོད་ཁུལ་དུ་ཉུང་མཐར་ཡང་ཉི་གློག་ས་ཚིགས་ ༩ གསར་འཛུགས་བྱས་ཏེ་ལོ་དེའི་རྒྱ་ནག་རྒྱལ་ཡོངས་ཀྱི་ཉི་གློག་ས་ཚིགས་གསར་རྒྱག་གི་བརྒྱ་ཆ་དགུ་ལ་ཟིན་ཡོད་པར་བཤད།

ད་ལྟའི་ཆར་རྒྱ་ནག་ནི་འཛམ་གླིང་ཐོག་ཉི་འོད་གློག་ནུས་འདོན་མཁན་ཨང་དང་པོར་རྩི་བཞིན་ཡོད་འདུག་ལ། ཕྱི་ལོ་ ༡༩༨༠ ཙམ་ནས་བཟུང་བོད་ནང་དུ་ཤེལ་ལེབ་རང་བཞིན་ཅན་གྱི་ཉི་གློག་ས་ཚིགས་ཐོག་མར་འཛུགས་སྐྲུན་བྱེད་མགོ་བཙུགས་ཏེ་ད་ལྟའི་ཆར་བོད་མངའ་རིས་དང་སྙེ་མོ། གཞིས་ཀ་རྩེ། ཉིང་ཁྲི། སྣེ་གདོང་། མལ་གྲོ་གོང་དཀར། ནག་ཆུ། སྨར་ཁམས།  ཉག་ཆུ། དཀར་མཛེས་རྫོང་། ཁྱུང་མཆུ་རྫོང་སོགས་གཙོ་བོར་གྱུར་བའི་བོད་ནང་གི་ས་གནས་མང་པོ་ཞིག་ཏུ་ཉི་གློག་ཤེལ་ལེབ་གསར་འཛུགས་བྱས་དང་བྱེད་ཀྱིན་འདུག

གཞན་ཡང་། འདི་གའི་གསར་འགོད་པས་རྒྱུས་ལོན་བྱས་པ་བརྒྱུད། རྒྱ་ནག་གཞུང་གིས་འདས་པའི་ལོ་ཤས་གོང་ནས། བོད་མགོ་ལོག་དང་། རྔ་བ། ཁྱུང་མཆུ་རྫོང་སོགས་ཀྱིས་འབྲོག་མི་རྣམས་ཀྱི་སེམས་ཅན་ལ་རྣ་རྟགས་རྒྱག་པ་དང་། གཞུང་གིས་ཆེད་དུ་འབྲོག་པ་མང་ཚོགས་ཀྱི་སེམས་ཅན་ཇེ་ཉུང་དུ་གཏང་དགོས་པའི་བཙན་བཀའ་གཏོང་གིན་ཡོད་པ་ཤེས་རྟོགས་བྱུང་ཡོད་ལ།  འདི་གའི་གསར་འགོད་པར་འབྲེལ་ཡོད་བོད་མི་ཞིག་གིས།  ཕྱི་ལོ་ ༢༠༢༣ ལོའི་ལོ་མགོ་ཙམ་ནས་བཟུང་རྒྱ་ནག་གཞུང་གིས་བོད་རྔ་བ་རྫོང་དང་། ཁྱུང་མཆུ་རྫོང་། མགོ་ལོག་ཁུལ་སོགས་ཀྱི་འབྲོག་སྡེ་ཆེ་ཁུལ་དུ་མི་སྣ་གཉིས་རེ་ཆེད་གཏོང་གིས་ནོར་ཚང་མར་རྣ་རྟགས་བརྒྱབ་པ་དང་ནོར་རེ་རེར་ཕྱོགས་མི་འདྲ་བ་ནས་པར་མི་འདྲ་བ་བཅུ་ཙམ་རེ་བླངས་ཡོད་པ་དང་། དང་ཐོག་ནོར་ལ་རྣ་རྟགས་བརྒྱབ་རྗེས་ཤི་བ་དང་ཡང་ན་སྤྱང་ཀིས་བསད་ཚེ། ས་གནས་སྲིད་གཞུང་གི་མི་སྣ་ཡོང་སྟེ་རོ་དང་ལྷག་འཕྲོ་རྣམས་འཁྱེར་ཕྱིན་ནས་བདག་པོ་ལ་གུན་གསབ་དངུལ་ཞིག་སྤྲད་རྒྱུ་ཡིན་ལུགས་བཤད་ཡོད་ཀྱང་།  རྗེས་སུ་རྒྱལ་ཁབ་ཀྱི་ཁྲལ་ཡིན་ཟེར་ནས་འབྲོག་པའི་དུད་ཁྱིམ་རེ་རེ་ནས་རྒྱ་སྒོར་ཁྲི་ ༥ རེ་བླངས་ཡོད་པ་མ་ཟད།  འབྲོག་ཁུལ་མང་པོ་རུ་ཁྱིམ་ཚང་རེ་རེའི་མི་གཅིག་ལ་ནོར་བདུན་རེ་མ་གཏོགས་བདག་ཉར་མི་ཆོག་པའི་བཀའ་རྒྱ་བཏང་དང་གཏོང་བཞིན་ཡོད་སྐོར་དང་། ཕྱི་ལོ་ ༢༠༢༢ ཙམ་ནས་རྔ་བ་ཁུལ་གཙོས་བོད་ཀྱི་འབྲོག་པ་མང་ཚོགས་ཀྱི་འཚོ་བ་ཡར་རྒྱས་དང་། སེམས་ཅན་གྱི་ལྕི་བས་ཁོར་ཡུག་འབག་བཙོག་མི་བཟོ་བར་ཁ་གཡར་ཏེ། འབྲོག་ཁུལ་དུ་མཉམ་ལས་ཕྱུགས་ར་འཛུགས་སྐྲུན་དགོས་པའི་དྲིལ་བསྒྲགས་ཤུགས་ཆེན་བྱེད་ཀྱི་ཡོད་སྐོར་སོགས་བརྗོད་བྱུང་།

རྒྱ་གཞུང་གིས་འབྱོར་འབྲིང་སྤྱི་ཚོགས་འཛུགས་སྐྲུན་དང་རྣམ་པ་གསར་པའི་ཚོང་ལས་སོགས་ལ་ཁ་གཡར་ཏེ་བོད་ཀྱི་ཞིང་འབྲོག་མང་ཚོགས་ཀྱི་ས་ཆ་ལེགས་ཤོས་དང་འགྲོ་སྐྱོད་བདེ་ཤོས་རྣམས་བཙན་འཕྲོག་བྱས་ཏེ་ཆུ་རགས་དང་། ཉི་གློག་ས་ཚིགས། དེ་བཞིན་རྒྱལ་ཁབ་ཀྱི་སྤྱི་གླིང་ཟེར་བ་སོགས་འཛུགས་སྐྲུན་བྱེད་མུས་ཡིན་ལ། རྒྱ་ནག་རྒྱལ་ཁབ་རྩྭ་སའི་བདག་དབང་བཅའ་ཡིག་གི་ནང་དུ། རྩྭ་སའི་བདག་དབང་རྒྱལ་ཁབ་ལ་ཡོད། རྩྭ་སའི་བཀོལ་སྤྱོད་སྤྱི་མང་གི་ཡིན་སྐོར་གསལ་ཡོད་པ་ལྟར། སྲིད་གཞུང་གི་དགོས་མཁོ་ལྟར་རྒྱ་ཆེའི་རོང་འབྲོག་མང་ཚོགས་ཀྱི་རྩྭ་ས་ཁེ་ལས་བའི་འཛུགས་སྐྲུན་ལྟེ་བ་དང་ཚོང་ལས་གཉེར་ས་ཞིག་ཏུ་འགྱུར་བཞིན་ཡོད་པ་རེད།

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།