ཨ་རིའི་བོད་དོན་དམིགས་བསལ་འབྲེལ་མཐུད་པ་སྐབས་བདུན་པ་ལྕམ་སྐུ་ཨ་ཛུ་ར་ཛེ་ཡ་མཆོག་གི་ལས་ཡུན་རྫོགས་པ་དང་བསྟུན་སྲིད་སྐྱོང་སྤེན་པ་ཚེ་རིང་མཆོག་གིས་བོད་མི་སྤྱིའི་བདེ་དོན་སླད་ཕྱག་ལས་གནང་བར་ཐུགས་རྗེ་ཆེ་ཞུས་འདུག
ཕྱི་ལོ་ ༢༠༢༥ ཟླ་བ་ ༠༡ ཚེས་ ༠༨ ཉིན་ལྕམ་སྐུ་ཨ་ཛི་རཱ་ཛེ་ཡ་མཆོག་གིས་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ལ་ཕྱག་བྲིས་ཤིག་ཕུལ་ཏེ། ད་ལྟའི་སྲིད་གཞུང་གི་ལས་ཡུན་རིང་ཨ་རིའི་བོད་དོན་ཐོག་སྲིད་བྱུས་ལག་བསྟར་བྱེད་པ་དང་། བོད་དོན་ལ་རྒྱལ་སྤྱིའི་རྒྱབ་སྐྱོར་ཤུགས་ཆེ་རུ་གཏོང་བ། རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་འགྲོ་བ་མིའི་ཐོབ་ཐང་རྡོག་རོལ་གཏོང་བར་འགན་འཁྲི་བཟོ་བ་བཅས་བོད་མིའི་སྒྲིག་འཛུགས་དང་ཨ་རིའི་བོད་དོན་སྲིད་བྱུས་གཉིས་ཀྱི་མཉམ་ལས་ཀྱི་གྲུབ་འབྲས་ཡིན། ཞེས་དང་། ཨ་རིའི་ཕྱི་སྲིད་ལས་ཁུངས་ནས་བྱམས་བརྩེའི་ལོ་འཁོར་ནང་༸གོང་ས་མཆོག་གི་མཛད་རྗེས་དང་། དེས་འགྲོ་བ་མིར་ཕན་ཐོགས་གང་བྱུང་བ་སོགས་གསལ་སྟོན་ཆེད་ཁྱེད་ཚོའི་སྒྲིག་འཛུགས་དང་མུ་མཐུད་མཉམ་ལས་བྱ་རྒྱུར་རེ་བ་ཞུ་བཞིན་ཡོད། ཅེས་གསུངས་འདུག
བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་ལྕམ་སྐུ་མཆོག་ལ་ཐུགས་རྗེ་ཆེ་ཞུའི་འཕྲིན་ཡིག་ཅིག་གནང་བའི་ནང་། ལྕམ་སྐུ་ཨ་ཛ་ར་ཛེ་ཡ་མཆོག་གིས་བོད་དོན་དམིགས་བསལ་འབྲེལ་མཐུད་པའི་ཐུགས་འགན་བཞེས་པའི་སྐབས་སུ་བོད་མིའི་རྩ་དོན་ཆེད་ལྷག་བསམ་རྣམ་དག་གིས་ཞབས་འདེགས་བསྒྲུབས་པ་དང་། མ་འོངས་པར་ཡང་མུ་མཐུད་ལས་དོན་གཉེར་རྒྱུར་ཁས་ལེན་གནང་བར་སྙིང་ཐག་པ་ནས་ཐུགས་རྗེ་ཆེ་ཞུ། ཁྱེད་ཀྱིས་༧གོང་ས་རྒྱལ་བ་རིན་པོ་ཆེ་མཆོག་དང་། བཙན་བྱོལ་བོད་མིའི་སྒྲིག་འཛུགས་ཀྱི་དབུ་ཁྲིད། བོད་མིའི་སྤྱི་ཚོགས་བཅས་ལ་ཐུགས་སྣང་ཆེན་པོས་རྟག་ཏུ་འབྲེལ་ལམ་གནང་བ་དང་། དེ་བཞིན་དྷ་སར་གཟིགས་སྐོར་གལ་ཆེན་གནང་བ་སོགས་ཀྱིས་རྒྱ་ནག་དང་བོད་ཀྱི་དཀའ་རྙོག་ཞི་བའི་ལམ་ནས་སེལ་ཐབས་སུ་རེ་བ་ཆེ་རུ་བཏང་ཡོད། ཁྱེད་ཀྱིས་དཀའ་ངལ་གང་འདྲ་ཞིག་འཕྲད་ཀྱང་མདུན་སྐྱོད་དང་བློ་སེམས་བརྟན་པོའི་ཐོག་ནས་ལས་དོན་བསྒྲུབས་པར་ཐུགས་རྗེ་ཆེ་ཞུ། བོད་ཕྱི་ནང་གཉིས་ཀྱི་བོད་མི་ཚོས་ཨ་རིའི་གཞུང་གི་བོད་དོན་ལ་རྒྱབ་སྐྱོར་སྲ་བརྟན་ཡོད་པ་ཚོར་གྱི་ཡོད་ལ། ཁྱེད་ཀྱིས་མུ་མཐུད་རྒྱབ་སྐྱོར་དང་ལམ་སྟོན་གནང་བའི་རེ་བ་ཡོད། དེ་བཞིན་ཨ་རིའི་སྲིད་འཛིན་སྐུ་ཞབས་བྷའེ་ཌིན་མཆོག་གིས་མཚན་རྟགས་བསྐྱོན་པའི་བོད་དོན་ཐད་ཀྱི་ཨ་རིའི་དམིགས་བསལ་ཁྲིམས་འཆར་དེ། ཨ་རིའི་གཞུང་འཛིན་སྐབས་རྗེས་མས་ལག་བསྟར་གནང་འགྱུར་རེ་བ་ཡོད། ཅེས་གསུངས་འདུག
ཟླ་འདིའི་ཕྱི་ཚེས་ ༡༡ ཉིན་ལྕམ་སྐུ་ཨ་ཛུ་ར་ཛེ་ཡ་མཆོག་གིས་བརྙན་ལམ་ནས་བསྒྲགས་གཏམ་ཞིག་སྤེལ་བའི་ནང་། ཕྱི་ལོ་ ༢༠༢༡ ལོ་ནས་བཟུང་ང་ལ་ཨ་རིའི་བོད་དོན་དམིགས་བསལ་འབྲེལ་མཐུད་པའི་ལས་ཀ་འདི་གཉེར་རྒྱུའི་གོ་སྐབས་བྱུང་། དེང་སྐབས་ཨ་རི་དང་རྒྱལ་སྤྱིའི་སྤྱི་ཚོགས་ཀྱིས་བོད་དོན་འགངས་ཆེན་དུ་བརྩིས་ནས་རྒྱབ་སྐྱོར་སྔར་ལྷག་གནང་མུས་རེད། འདས་པའི་མི་ལོ ༤ ལ་ཕྱིར་མིག་ཅིག་བལྟས་ན། ང་ཚོས་མཉམ་རུབ་ཀྱི་ཐོག་ནས་བོད་ནང་གི་འགྲོ་བ་མིའི་ཐོབ་ཐང་གོང་འཕེལ་དང་། བོད་མིའི་ངོ་བོ་སྲུང་སྐྱོབ། སྐད་ཡིག་སྲུང་སྐྱོབ་སོགས་ཚུད་པའི་བོད་དོན་ཐད་ལ་གྲུབ་འབྲས་མི་དམན་པ་ཞིག་བླངས་ཡོད། ཅེས་དང་། འདས་པའི་མི་ལོ ༡༤ ལྷག་གི་རིང་ལ་༧གོང་ས་རྒྱལ་བ་རིན་པོ་ཆེ་མཆོག་གི་སྐུ་ཚབ་དང་རྒྱ་ནག་བར་གྱི་ཞི་མོལ་ཆད་ཡོད་ཅིང་། ང་ཚོས་བོད་རྒྱ་ཞི་མོལ་བྱ་རྒྱུ་ནི་བོད་ནང་བརྟན་བརླིང་ཡོང་རྒྱུའི་ཐབས་ལམ་ཡག་ཤོས་ཤིག་ཏུ་མཐོང་གིན་འདུག་པས། ང་ཚོས་རྒྱ་ནག་གཞུང་གིས་༧གོང་ས་རྒྱལ་བ་རིན་པོ་ཆེ་མཆོག་གམ་ཁོང་གི་སྐུ་ཚབ་དང་ལྷན་དུ་ཆ་རྐྱེན་གང་ཡང་མེད་པའི་ཐོག་ནས་བོད་རྒྱས་ཞི་མོལ་བྱ་རྒྱུར་རེ་སྐུལ་ཞུས་ཡོད། ཅེས་གསུངས་འདུག
ལྕམ་སྐུ་ཨ་ཛུ་ར་ཛེ་ཡ་མཆོག་ནི་ཨ་རིའི་ཨེ་ཤ་ཡའི་མི་ཞིག་ཕྱི་སྲིད་ལྷན་ཁང་གི་དྲུང་ལས་སུ་བསྐོས་པ་ཐོག་མ་དང་། ཨ་རིའི་བོད་དོན་དམིགས་བསལ་འབྲེལ་མཐུད་པ་སྐབས་བདུན་པ་ཡིན་ཞིང་། ཁོང་གི་སྐྱེ་ཁུངས་རྒྱ་གར་གྱི་མངའ་སྡེ་བྷི་ཧར་ཡིན་འདུག ཕྱི་ལོ་ ༢༠༠༢ ལོའི་ཨ་རིའི་བོད་དོན་རྒྱབ་སྐྱོར་གྱི་སྲིད་བྱུས་དགོངས་དོན་ལྟར། ཕྱི་ལོ ༢༠༢༡ ཟླ་ ༡༢ ཚེས་ ༢༠ ཉིན་ཨ་རིའི་ཕྱི་སྲིད་ལྷན་ཁང་གི་སྤྱི་དམངས་བདེ་འཇགས་དང་དམངས་གཙོ། འགྲོ་བ་མིའི་ཐོབ་ཐང་ཚན་པའི་དྲུང་ལས་ཀྱི་ཐོག་ནས་བོད་དོན་དམིགས་བསལ་འབྲེལ་མཐུད་པར་བསྐོ་གཞག་བྱུང་བ་ཞིག་ཡིན་འདུག
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།
