ཨ་རིའི་རོགས་དངུལ་ཟླ་གསུམ་རིང་བཀག་འགོག་བྱ་རྒྱུ་ཡིན་པའི་གནས་ཚུལ་ཐོན།

ཨ་རིའི་གཞུང་གིས་ཕྱི་འབྲེལ་སྲིད་ཇུས་དང་མཐུན་མིན་བསྐྱར་ཞིབ་སླད་ཉིན་གྲངས་ ༩༠ རིང་ཕྱིའི་རྒྱལ་ཁབ་ཁག་ལ་རོགས་དངུལ་གཏོང་མཚམས་འཇོག་རྒྱུ་ཡིན་ཞིང་། དེ་ལ་བརྟེན་ནས་འཛམ་གླིང་གི་མི་མང་པོ་ཞིག་ལ་དཀའ་ངལ་འཕྲད་དེ་སྲོག་ཉེན་ཡོད་སྐོར་བརྗོད་འདུག

The Donald Trump Administration Has Framed The US Freeze As Part Of A Broader Effort To Realign Foreign Assistance With American Interests. | File Photo

རོའུ་ཊར་གསར་ཁང་གིས་གནས་ཚུལ་སྤེལ་བ་ལྟར་ན། དེ་རིང་ནས་བཟུང་འབྱུང་འགྱུར་ཟླ་གསུམ་མམ་ཉིན་གྲངས་ ༩༠ རིང་ཨ་རིས་ཕྱིའི་རྒྱལ་ཁབ་ཁག་ཏུ་རོགས་དངུལ་གཏོང་བཞིན་པའི་ལས་དོན་དང་རོགས་དངུལ་གསར་པ་གཏོང་རྒྱུ་སོགས་མཚམས་འཇོག་བྱས་ཏེ། ད་སྔ་བར་ཨ་རིས་ཕྱིའི་ེརྒྱལ་ཁབ་ཁག་ཏུ་གཏོང་བཞིན་པའི་རོགས་དངུལ་དག་ཨ་རིའི་སྲིད་འཛིན་ཌོ་ནལ་ཊོམ་ཕུ་ (Donald Trump) མཆོག་གི་ཕྱི་འབྲེལ་སྲིད་ཇུས་དང་མཐུན་མིན་བསྐྱར་ཞིབ་བྱ་རྒྱུ་ཡིན་པའི་བཀའ་རྒྱ་བཏང་ཡོད་འདུག བྷི་བྷི་སི་སོགས་རྒྱལ་སྤྱིའི་གསར་ཁང་གཞན་མང་པོ་ཞིག་གིས་ཊོམ་ཕུའི་བཀའ་རྒྱ་དེ་རིང་ཕྱི་ཚེས་ ༢༧ ཉིན་ཕྱིར་ཤོར་བའི་གནས་ཚུལ་ཞིག་ཡིན་སྐོར་བརྗོད་འདུག

དེ་འབྲེལ་གནས་ཚུལ་ནང་། ཨ་རིའི་ཕྱི་སྲིད་ལས་ཁུངས་ཀྱིས་རོགས་དངུལ་གཏོང་ཕྱོགས་དེ་ཕྱི་འབྲེལ་སྲིད་ཇུས་དང་མཐུན་གྱི་ཡོད་མེད་བསྐྱར་ཞིབ་ཀྱི་ཆེད་དུ་ཉིན་གྲངས་ ༩༠ རིང་ཕྱིའི་རྒྱལ་ཁབ་ལ་རོགས་དངུལ་གསར་པ་སྤྲོད་མཚམས་འཇོག་པ་དང་། རོགས་དངུལ་སྤྲད་ཟིན་པའི་ལས་དོན་རྣམས་མཚམས་འཇོག་དགོས་པའི་བཀའ་རྒྱ་བཏང་ཡོད་འདུག་ལ། ཨ་རིའི་ཕྱི་སྲིད་བློན་ཆེན་མཱར་ཁོ་རུ་བྷི་ཡོ་ (Marco Rubio) ལགས་ཀྱིས། ཨ་རིས་ཕྱི་ཕྱོགས་སུ་གཏོང་བཞིན་པའི་ཨ་སྒོར་རེ་རེ་ཡིས་ཨ་རི་སྟོབས་ཆེན་དང་བདེ་འཇགས་ཅན། དེ་བཞིན་ཡར་རྒྱས་ཅན་དུ་འགྲོ་བར་ངེས་པར་དུ་ཕན་ཐོགས་དགོས། ཞེས་བརྗོད་འདུག

ཨ་རིའི་རོགས་ཚོགས་ཀྱི་ལས་བྱེད་ཟུར་པ་ཞིག་གིས། ཨ་རིའི་རོགས་དངུལ་མཚམས་འཇོག་བྱས་པ་ལ་བརྟེན་ནས་རྒྱལ་སྤྱིའི་སྟེང་གི་ཚོགས་སྡེ་ཁག་མང་པོའི་ལས་དོན་ཡོངས་རྫོགས་མཚམས་འཇོག་དགོས་པ་དང་། དེ་ལ་བརྟེན་ནས་འཛམ་གླིང་ནང་འཕྲོད་བསྟེན་ཞབས་ཞུ་དང་གཉན་ནད་རེག་དུག ཟས་བཅུད། མངལ་སྤྲུམ་དང་ཕྲུ་གུའི་འཕྲོད་བསྟེན། དེ་བཞིན་ཞིང་ལས་དང་། ཤེས་ཡོན་སོགས་ལ་ཤུགས་རྐྱེན་ཐེབས་ཉེན་ཡོད་སྐོར་བརྗོད་འདུག ཨ་རིའི་རོགས་ཚོགས་ཀྱི་ལས་བྱེད་ཟུར་པ་དང་ད་ལྟའི་རྒྱལ་སྤྱིའི་སྐྱབས་བཅོལ་ཚོགས་པའི་ཚོགས་གཙོ་ཇེ་རི་མི་ (Jeremy Konyndyk) ལགས་ཀྱིས། དེ་ནི་བྱབ་ཆུང་གི་བྱ་སྤྱོད་ཅིག་རེད། ཨ་རིའི་གཞུང་གིས་ཐག་གཅོད་ལྟར་ལག་བསྟར་བྱས་ཚེ། མི་མང་པོའི་ཚེ་སྲོག་ཤོར་གྱི་རེད། ཅེས་དང་། ཕྱིའི་རྒྱལ་ཁབ་ལ་རོགས་དངུལ་གཏོང་ཕྱོགས་ཀྱི་ལས་གཞིར་བསྐྱར་ཞིབ་བྱེད་པ་དེ་ནི་དྲང་བདེན་ཞིག་ལ་ངོས་འཛིན་གྱི་མེད་ལ། དེས་གཏོར་བཤིག་གང་མང་གཏོང་གི་རེད། ཅེས་བརྗོད་འདུག

ད་དུང་། ཨ་རིའི་གྲོས་ཚོགས་སུ་སྲིད་འཛིན་ཊོམ་ཕུས་བཀའ་རྒྱ་བཏང་བ་དེ་ཁྲིམས་འགལ་རེད་ཅེས་གླེང་སློང་བྱས་ཡོད་འདུག་ལ། ཨ་རིའི་གཞུང་གིས་ཕྱིའི་རྒྱལ་ཁབ་ཁག་ལ་རོགས་དངུལ་གཏོང་མཚམས་འཇོག་རྒྱུ་ཡིན་པ་དེས། རྒྱལ་སྤྱིའི་ཚོགས་སྡེ་ཁག་གིས་ཨ་རིའི་ཁ་གཏད་ཀྱི་རྒྱལ་ཁབ་ཁག་ནས་རོགས་དངུལ་ལེན་ཐབས་བྱེད་སྲིད་པ་དང་། དེ་ལ་བརྟེན་ནས་ཨ་རི་འཛམ་གླིང་གི་སྣེ་ཁྲིད་རྒྱལ་ཁབ་ཅིག་ཡིན་པའི་གནས་བབ་དེ་མེད་པར་བཟོ་ཉེན་ཡོད་སྐོར་སོགས་བརྗོད་འདུག་ལ། རྒྱལ་སྤྱིའི་གཞུང་དང་ཚོགས་སྡེ་ཁག་མང་པོ་ཞིག་གིས་ཊོམ་ཕུའི་འཛིན་སྐྱོང་གི་ཐག་གཅོད་དེར་སྐྱོན་བརྗོད་ཀྱང་བྱེད་བཞིན་འདུག

ཨ་རིའི་སྲིད་འཛིན་ཊོམ་ཕུ་མཆོག་གིས། ཉིན་གྲངས་ ༩༠ ཡི་བསྐྱར་ཞིབ་དུས་ཡུན་བེད་སྤྱོད་བྱས་ཏེ་རོགས་དངུལ་གྱི་ལམ་ལུགས་ལ་བསྒྱུར་བཅོས་གཏོང་རྒྱུའི་བརྡ་ལན་སྤྲད་ཡོད་ཅིང་། མ་འོངས་པར་རོགས་དངུལ་སྤྲོད་ཕྱོགས་དེ་དག་ཨ་རི་ཨང་དང་པོ་ (America First) ཡིན་པའི་སྲིད་ཇུས་དང་མཐུན་པ་ཡོང་སླད། འཛིན་སྐྱོང་གི་ངོས་ནས་རོགས་དངུལ་སྤྲོད་ཕྱོགས་ཀྱི་ཚད་གཞི་དམ་དུ་གཏོང་འཆར་ཡོད་འདུག འོན་ཀྱང་། དཔྱད་ཞིབ་པ་ཁག་ཅིག་གིས། ཐབས་ཇུས་དེས་འཛམ་གླིང་ཁྱོན་ཡོངས་ཀྱི་མཉམ་ལས་ཀྱི་གནས་བབ་ཞན་དུ་གཏོང་བ་དང་། ཨ་རིའི་རྒྱབ་སྐྱོར་ལ་བརྟེན་ཡོད་པའི་ས་ཁུལ་ཁག་ལ་བརྟན་ལྷིང་མེད་པ་བཟོ་སྲིད་པའི་ཉེན་བརྡ་བཏང་ཡོད་འདུག

འཛམ་གླིང་ཁྱོན་ཡོངས་ནས་ཨ་རི་ནི་ཕྱིའི་རྒྱལ་ཁབ་ཁག་ལ་རོགས་དངུལ་སྤྲོད་མཁན་ཆེ་ཤོས་ཤིག་ཡིན་ཞིང་། ཕྱི་ལོ་ ༢༠༢༣ ལོར་ཨ་རིའི་གཞུང་གིས་ཕྱིའི་རྒྱལ་ཁབ་ཁག་ལ་ཨ་སྒོར་ཐེར་འབུམ་ ༧༢ ཀྱི་རོགས་དངུལ་བཏང་ཡོད་འདུག ད་ལན་ཨ་རིའི་ཕྱི་སྲིད་ལས་ཁུངས་ཀྱི་བཀའ་རྒྱ་དེས་ཕྱིའི་རྒྱལ་ཁབ་མང་པོ་ཞིག་ལ་ཤུགས་རྐྱེན་ཐེབས་ཀྱིན་ཡོད་ཀྱང་། ཨི་ཛི་རེལ་དང་ཨི་ཇིབ་ (Egypt) གཉིས་ལ་དམག་དོན་རོགས་དངུལ་མུ་མཐུད་དུ་སྤྲོད་རྒྱུ་ཡིན་འདུག དེ་ཡང་ལོ་ལྟར་ཨ་རིའི་གཞུང་གིས་ཨི་ཛི་རེལ་ལ་ཨ་སྒོར་ཐེར་འབུམ་ ༣།༣ ཙམ་དང་། ཨི་ཇིབ་ལ་ཨ་སྒོར་ཐེར་འབུམ་ ༡།༣ ཙམ་སྤྲོད་ཀྱི་ཡོད་པ་རེད། ད་ལན་ཨ་རིས་རོགས་དངུལ་མཚམས་འཇོག་བྱས་པའི་རྐྱེན་གྱིས་རྒྱལ་ཁབ་གཞན་ནས་རོགས་དངུལ་ལེན་ཐབས་བྱེད་སྲིད་པའི་ཚོད་དཔག་བྱེད་བཞིན་འདུག

གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། སྐལ་བཟང་སྦྱིན་པ།