རྒྱ་ནག་གི་བཅོས་མའི་རིག་ནུས་ཀྱིས་བོད་ཀྱི་ལོ་རྒྱུས་འགྲེལ་ལོག་བྱེད་ཀྱིན་འདུག

རྒྱ་ནག་གི་ཌིབ་སིག་བཅོས་མའི་རིག་ནུས་གསར་པ་དེས་ཨ་རིའི་འཕྲུལ་རིག་ཁྲོམ་རར་གཡོ་འགུལ་ཐེབས་བཅུག་ཡོད་པ་མ་ཟད། བོད་གཙོས་རྒྱ་ནག་གིས་བཙན་བཟུང་བྱས་པའི་གྲངས་ཉུང་མི་རིགས་སོགས་ཀྱི་གནད་དོན་ཐད་ལན་འདེབས་གང་ཡང་བྱེད་ཀྱིན་མེད་པའི་གནས་ཚུལ་འཐོན་མུས་ཡིན་འདུག

Deepseek logo and the Chinese flag are seen in this illustration taken January 27, 2025. REUTERS/Dado Ruvic/Illustration

ཟླ་འདིའི་ཕྱི་ཚེས་ ༢༠ ཉིན་ཨ་རིའི་སྲིད་འཛིན་སྐུ་ཞབས་ཊོམ་ཕུ་མཆོག་གིས་ཨ་རིའི་བཅོས་མའི་རིག་ནུས་དང་འཕྲུལ་རིག་ཡར་སྐྱེད་ཀྱི་སླད་ཨ་སྒོར་ཐེར་འབུམ་ ༥༠༠ ཡི་མ་འཇོག་བྱ་རྒྱུའི་ཡོངས་གྲགས་གསལ་བསྒྲགས་བྱས་ཡོད་ཀྱང་། ཁ་སང་ཕྱི་ཚེས་ ༢༨ ཉིན་རྒྱ་ནག་གིས་ཌིབ་སིག་ (DeepSeek) ཟེར་བའི་བཅོས་མའི་རིག་ནུས་ཤིག་གསར་བསྐྲུན་གྱིས་རྒྱལ་སྤྱིའི་ཚོང་རར་བཀྲམ་རྗེས། དེ་བཀོལ་སྤྱོད་དང་ཕབ་ལེན་བྱེད་མཁན་ཧ་ཅང་མང་པོ་ཞིག་བྱུང་སྟེ། ཨ་རིའི་འཕྲུལ་རིག་ཁྲོམ་རའི་མ་རྐང་ལ་ཨ་སྒོར་ཐེར་འབུམ་ ༡༠༠ ལྷག་གི་གྱོང་གུད་ཐེབས་ཡོད་ཅིང་། རྒྱ་ནག་གི་འཕྲུལ་རིག་མཉེན་ཆས་དེའི་ཁྲོད་རྒྱ་ནག་གཞུང་གི་ལྟ་བ་ལངས་ཕྱོགས་དྲིལ་བསྒྲགས་བྱེད་པ་ལས། དམར་ཤོག་རིང་ལུགས་ཀྱི་ལངས་ཕྱོགས་དང་འགལ་བའི་གནད་དོན་རིགས་གསལ་ཁ་མེད་པ་རེད།

གནད་དོན་དེའི་ཐད་ཨ་རིའི་སྲིད་འཛིན་སྐུ་ཞབས་ཊོམ་ཕུ་མཆོག་གིས། རྒྱ་ནག་གི་ལས་ཁུངས་ཤིག་གིས་ཌིབ་སིག་བཅོས་མའི་རིག་ནུས་ཤིག་གསར་འགྲེམས་བྱས་པ་དེས། ཨ་རིའི་བཅོས་རིག་དང་འབྲེལ་བའི་ཚོང་དོན་ལྟེ་གནས་ཁང་དག་རྨོངས་གཉིད་ལས་སད་དེ་རྣམ་པར་རྒྱལ་དགོས་པའི་ཅོང་བརྡ་བཏང་བ་རེད། བཅོས་རིག་གསར་བསྐྲུན་ཐད་དངུལ་སྒོར་ཐེར་འབུམ་དང་ཐེར་འབུམ་གཏོང་མི་དགོས་པར། འགྲོ་གྲོན་ཉུང་ཤས་ཤིག་གིས་གྲུབ་འབྲས་གཅིག་མཚུངས་ཐོབ་ན། དེ་ནི་བཟང་ཕྱོགས་ཤིག་རེད། ཅེས་གསུངས་འདུག ཌིབ་སིག་བཅོས་མའི་རིག་ནུས་ཀྱི་མཉེན་ཆས་བཟོ་སྐྲུན་སླད་ཨ་སྒོར་ས་ཡ་དྲུག་ལས་བཏང་མེད་ཀྱང་། འདས་པའི་ཉིན་ཤས་རིང་ཌེབ་སིག་ནི་ཕྱི་ལོ་ ༢༠༢༢ ལོར་ཨ་རིའི་བཟོ་སྐྲུན་བྱས་པའི་ཅ་ཊི་ཇི་པེ་ཊི་(ChatGPT) ལས་ཨ་རིའི་ནང་བཀོལ་སྤྱོད་བྱེད་མཁན་ཆེས་མང་བའི་མཉེན་ཆས་ཤིག་ཏུ་གྱུར་ནས། ཨ་རིའི་བཅོས་མའི་རིག་ནུས་ཀྱི་མ་རྐང་ཁྲོམ་རར་སྔར་མེད་ཀྱི་འགུལ་ཤུགས་ཤིག་ཐེབས་འདུག

དེ་བཞིན་བཅོས་མའི་རིག་ནུས་ཀྱི་མཉེན་ཆས་འདིས་རྒྱ་ནག་དམར་ཤོག་རིང་ལུགས་ཀྱི་ལྟ་བ་དང་དྲིལ་བསྒྲགས་ཇི་བཞིན་འགྲེལ་བཤད་རྒྱག་པ་དང་། བོད་གཙོས་རྒྱ་ནག་གཞུང་གིས་བཙན་བཟུང་བྱས་པའི་གྲངས་ཉུང་མི་རིགས་རྣམས་ཀྱི་གནད་དོན། དེ་བཞིན་རྒྱ་ནག་དམར་ཤོག་གི་ལངས་ཕྱོགས་དང་འགལ་བའི་གནད་དོན་རིགས། ཆབ་སྲིད་ཀྱི་ཚོར་སྣང་སྐྱེན་པའི་གནད་དོན་སོགས་བཀག་སྡོམ་བྱས་ཡོད་སྟབས ང་ཚོས་གནད་དོན་འདི་དག་གི་ཐད་དྲི་བ་དྲིས་ཚེ་གསལ་བཤད་གང་ཡང་མི་བྱེད་པར། “དགོངས་པ་མ་ཚོམས། གནད་དོན་དེར་ངས་ཤེས་རྟོགས་མེད། གནད་དོན་གཞན་ཞིག་ཤོད། “ ཅེས་ལན་ཤར་ཡོང་བ་ལས། དྲང་ལྡོག་གཉིས་ཀའི་ཆ་ནས་བརྡ་ལན་གང་ཡང་མི་སྟེར་བས། གནད་དོན་དབྱེ་ཞིབ་པ་ཁག་ཅིག་གིས། ཌིབ་སིག་ནི་རྒྱལ་སྤྱིའི་སྤྱི་ཚོགས་སུ་རྒྱ་ནག་གཞུང་གི་ལྟ་བ་ལངས་ཕྱོགས་དྲིལ་བསྒྲགས་བྱེད་པ་དང་བོད་གཙོས་གྲངས་ཉུང་མི་རིགས་ཀྱི་གནས་ཚུལ་ལོག་འགྲེལ་བྱེད་ཆེད་ཀྱི་ལག་ཆ་ཡག་ཤོས་ཤིག་ཏུ་འགྱུར་ཉེན་ཡོད་པ་མ་ཟད། རྒྱལ་སྤྱིའི་དྲ་ལམ་སོ་སོར་རྒྱ་ནག་གིས་སླར་ཡང་གནས་ཚུལ་ལོག་འགྲེལ་བྱེད་སའི་ལམ་ཁ་གསར་པ་ཞིག་བདམས་ཡོད་པའི་ཚོད་དཔག་བྱེད་ཀྱིན་འདུག

འཛམ་གླིང་ཁྱོན་ཡོངས་སུ་འཕྲུལ་རིག་དར་ཁྱབ་ཆེན་པོ་ཕྱིན་པ་དང་བསྟུན། འཛམ་གླིང་རྒྱལ་ཁབ་མང་པོས་གཅིག་རྗེས་གཉིས་མཐུད་ཀྱིས་འཕྲུལ་རིག་དར་རྒྱས་གོང་འཕེལ་དུ་གཏོང་བའི་ལས་ལ་གཞོལ་ནས། འདས་པའི་མི་ལོ་ཉི་ཤུའི་རིང་འཕྲུལ་རིག་ཕྱོགས་ཡོངས་ནས་འཕེལ་རྒྱས་ཆེན་པོ་ཕྱིན་ཡོད་པའི་མུར། འཛམ་གླིང་ཡོངས་སུ་བཅོས་མའི་རིག་ནུས་འཕེལ་རྒྱས་གཏོང་སླད། ཕྱི་ལོ་ ༢༠༢༤ ལོར་ཨ་རི་དང་། རྒྱ་ནག དབྱིན་ཡུལ། ཁེ་ན་ཌ། ཉི་ཧོང་སོགས་ཀྱིས་མ་འཇོག་ཆེན་པོ་བྱས་ཏེ། ད་ལྟ་བར་ཨ་རི་ནི་འཛམ་གླིང་གི་འཕྲུལ་རིག་དང་། ལྷག་པར་བཅོས་མའི་རིག་ནུས་སོགས་ཀྱི་ཐད་ནས་ཡང་རྩེར་སོན་པའི་ངོས་འཛིན་བྱེད་ཀྱིན་ཡོད་ཀྱང་། རྒྱ་ནག་གིས་གློ་བུར་དུ་འཛམ་གླིང་ཡོངས་སུ་རིན་འབབ་ཆུང་བའི་ཚད་མཐོའི་བཅོས་མའི་རིག་ནུས་ཤིག་བཀྲམ་པས། ད་ལྟ་ཨ་རི་དང་། ཨོ་གླིང་། དབྱིན་ཡུལ་གྱི་བཅོས་རིག་གི་མ་རྐང་ཁྲོམ་རར་གྱོང་གུད་ཐེབས་མུས་ཡིན་སྟབས། འཕྲུལ་རིག་ཆེད་མཁས་པ་ཁག་ཅིག་གིས། རྒྱ་ནག་གི་མ་འཇོག་ཉུང་ཉུང་ཞིག་གི་ཐོག་ནས་ཨ་རིས་བཟོས་པའི་བཅོས་རིག་སོགས་དང་འདྲ་བ་ཞིག་བཟོས་ནས་འཕེལ་རྒྱས་སུ་འགྲོ་བ་དེས། ད་ལྟ་ཨ་རི་ནི་འཛམ་གླིང་གི་འཕྲུལ་རིག་དང་བཅོས་མའི་རིག་ནུས་ཀྱི་ཐད་ལ་ནུས་པ་མཐོ་ཤོས་འདོན་མཁན་ཡིན་པའི་འདུ་ཤེས་དང་ཚོང་དོན་ལའང་དོ་ཕོག་གཏོང་ཉེན་ཡོད་པའི་ཚོད་དཔག་ཀྱང་བྱས་འདུག

དེང་སྐབས་འཛམ་གླིང་ཁྱོན་ཡོངས་སུ་དར་ཁྱབ་ཆེ་ཆེར་འགྲོ་མུས་ཡིན་པའི་བཅོས་མའི་རིག་ནུས་ནི། འཕྲུལ་རིག་ཆེད་མཁས་པ་དག་གིས་འཕྲུལ་རིག་གི་ཀླད་པར་ཡིག་མཛོད་དང་ཤེས་རིག་སྣ་མང་གི་རྒྱུ་ཆ་བླུགས་ཏེ། མིའི་རིགས་ཀྱི་བསམ་བློའི་འཆར་སྒོ་བཞིན་འཕྲུལ་རིག་གི་ཀླད་པས་ཡི་གེ་འབྲི་རོགས་དང་། བསམ་འཆར་བཤད་རོགས། དེ་བཞིན་ལྐོག་གྱུར་གྱི་གནད་དོན་མང་པོ་ཞིག་གི་ཐད་ལ་ཕྱོགས་མང་པོ་ནས་བསམ་ཚུལ་སྤུངས་རོགས་སོགས་བྱེད་ཀྱིན་ཡོད་པ་རེད། རྒྱ་ནག་ནས་བཏོན་པའི་ཌིབ་སིག་ནི་ད་ལྟ་རང་ལོ་བཞི་བཅུ་ཡིན་པའི་ལིང་ཝན་ཧྥང་(Liang Wenfeng ) ཟེར་བ་ཞིག་གིས། ཕྱི་ལོ་ ༢༠༢༣ ལོར་རྒྱ་ནག་ལྷོ་རྒྱུད་ཀྱི་ཧང་ཀྲུ་གྲོང་ཁྱེར་དུ་གསར་འཛུགས་བྱས་པའི་ཌིབ་སིག་འཕྲུལ་རིག་བཟོ་ཚོང་ཁང་གིས་བཟོ་སྐྲུན་བྱས་པ་ཞིག་ཡིན་ཞིང་། ཉེ་ལམ་ལིང་ཟེར་བས་རྒྱ་ནག་གི་སྲིད་བློན་ལི་ཆང་དང་འཕྲུལ་ལས་ཆེད་མཁས་མི་སྣ་མང་དག་དང་ལྷན་འཕྲུལ་རིག་ཚོགས་འདུ་ཞིག་ཏུའང་མཉམ་ཞུགས་བྱས་འདུག