ཡུ་རོབ་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པ་སླར་གསོ་གནང་།

དེ་རིང་ཕྱི་ཚེས་ ༣༠ ཉིན་ཡུ་རོབ་གྲོས་ཚོགས་སུ་ཡུ་རོབ་གྲོས་ཚོགས་འཐུས་མི་སྐུ་ཞབས་ཌེ་ནི་ཡ་སི་ (Dainius Zalimas) ལགས་ཀྱི་སྣེ་ཁྲིད་འོག ཡུ་རོབ་གྲོས་ཚོགས་ཀྱི་ཆབ་སྲིད་ཚོགས་པ་ཆེ་ཁག་གི་གྲོས་ཚོགས་འཐུས་མི་ ༢༠ ལྷག་གི་རྒྱབ་སྐྱོར་ཐོབ་འོག་ཡུ་རོབ་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པ་དངོས་སུ་སླར་གསོ་གནང་ཡོད་འདུག

དེ་འབྲེལ་བོད་མིའི་སྒྲིག་འཛུགས་ཀྱི་དབྱིན་ཡིག་དྲ་བར། སྦེལ་ཇམ་གྱི་རྒྱལ་ས་སྦར་སིལ་ (Brussels) དུ་ཡོད་པའི་ཡུ་རོབ་གྲོས་ཚོགས་སུ་ཡུ་རོབ་མཐུན་ཚོགས་ཀྱི་ཚོགས་མི་རྒྱལ་ཁབ་ ༡༢ ཀྱི་འཐུས་མི་ལས་དྲུང་དང་ཡུ་རོབ་གྲོས་ཚོགས་འཐུས་མི་བདུན་བཅས་མཉམ་ཞུགས་ཐོག་བོད་དོན་རྒྱབ་སྐྱོར་ཚོགས་པ་སླར་གསོའི་དབུ་འབྱེད་ཀྱི་མཛད་སྒོ་འཚོགས་ཡོད་ཅིང་། སྐབས་དེར་ཡུན་རིང་བོད་དོན་རྒྱབ་སྐྱོར་གནང་མཁན་ལི་ཐུ་ནི་ཡའི་ཡུ་རོབ་གྲོས་ཚོགས་འཐུས་མི་སྐུ་ཞབས་ཌེ་ནི་ཡ་སི་ (Dainius Zalimas) ལགས་ཀྱིས་ཡུ་རོབ་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་དམིགས་ཡུལ་དང་ལས་འགན་ངོ་སྤྲོད་གནང་བ་མ་ཟད། རྒྱལ་སྤྱིའི་སྟེང་བོད་མིའི་གནས་སྟངས་ངོ་སྤྲོད་དང་། གཞི་རྩའི་ཐོབ་ཐང་རྩོད་ལེན་ཐད་མུ་མཐུད་ནས་འབད་བརྩོན་གནང་རྒྱུའི་ཁས་ལེན་གནང་ཡོད་འདུག

ཡུ་རོབ་གྲོས་ཚོགས་འཐུས་མི་སྐུ་ཞབས་ཌེ་ནི་ཡ་སི་ལགས་ཀྱིས། ང་ཚོས་བོད་དོན་ཐོག་རྒྱབ་སྐྱོར་མུ་མཐུད་དུ་བྱ་རྒྱུའི་ཆེད་དུ་ཡུ་རོབ་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པ་གསར་འཛུགས་བྱས་པ་རེད། ང་ཚོ་ཚང་མ་བོད་མིའི་ཐོབ་ཐང་དང་། རང་དབང་། དེ་བཞིན་ཡུ་རོབ་གྲོས་ཚོགས་ནང་བོད་མིའི་གནས་སྟངས་གསལ་སྟོན་བྱ་རྒྱུའི་ཆེད་དུ་མཉམ་རུབ་ཀྱིས་ལས་འགུལ་སྤེལ་རྒྱུའི་དམ་བཅའ་བརྟན་པོ་ཡོད། ཅེས་གསུངས།

སྦར་སིལ་སྐུ་ཚབ་དོན་གཅོད་འགན་ཁང་རིག་འཛིན་ཆོས་སྒྲོན་ལགས་ཀྱིས། མཛད་སྒོར་ཕེབས་མཁན་རྣམས་ལ་ཐུགས་རྗེ་ཆེ་ཞུས་པ་དང་སྦྲགས། ཡུ་རོབ་གྲོས་ཚོགས་སུ་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པ་འཛུགས་ཐུབ་ཡོད་སྟབས། ཉིན་མོ་དེ་ནི་བོད་ལ་མཚོན་ན་ཧ་ཅང་གལ་ཆེ་བའི་ཉིན་ཞིག་ཡིན། ཉེ་ཆར་བོད་ནང་ས་ཡོམ་བྱུང་བའི་གནད་དོན་ཚུད་པའི་བོད་ནང་གི་གནས་སྟངས་ཇེ་སྡུག་ཏུ་འགྲོ་བཞིན་པའི་སྐོར་ངོ་སྤྲོད་དང་། བོད་མིའི་སྒྲིག་འཛུགས་ཀྱིས་༧གོང་ས་རྒྱལ་བ་རིན་པོ་ཆེ་མཆོག་དགུང་གྲངས་ ༩༠ ལ་ཕེབས་པའི་༧སྐུའི་འཁྲུངས་སྐར་དུས་ཆེན་དེ་བྱམས་བརྩེའི་ལོར་སྲུང་གཙི་ཞུ་བཞིན་པ་སོགས་ངོ་སྤྲོད་གནང་ཡོད་འདུག ད་དུང་ཁོང་མོས། ཕྱི་ཟླ་ ༦ པའི་ནང་ཊོག་ཡོ་ (Tokyo) རུ་རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་ཆེན་ཐེངས་དགུ་པ་ (9^th World Parliamentarians’ Convention on Tibet) འཚོག་གཏན་འཁེལ་བའི་སྐོར་ངོ་སྤྲོད་དང་། ཡུ་རོབ་གྲོས་ཚོགས་འཐུས་མི་རྣམས་ཚོགས་ཆེན་དེའི་སྟེང་མཉམ་ཞུགས་གནང་བའི་འབོད་སྐུལ་སོགས་ཞུས་འདུག

ཚོགས་འདུའི་སྟེང་མཉམ་ཞུགས་གནང་མཁན་ཡུ་རོབ་གྲོས་ཚོགས་འཐུས་མི་གཞན་རྣམས་ནས། ཚོགས་པའི་ཚོགས་གཙོ་དང་སྦར་སིལ་སྐུ་ཚབ་དོན་ཁང་གཉིས་ནས་ཡུ་རོབ་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པ་དབུ་འཛུགས་ཀྱི་མཛད་སྒོར་གདན་ཞུ་གནང་བར་ཐུགས་རྗེ་ཆེ་ཞུས་ཤིང་། ཡུ་རོབ་གྲོས་ཚོགས་ནང་བོད་དོན་གླེང་སློང་ཡོང་སླད་མཐུན་འགྱུར་རོགས་རམ་གནང་རྒྱུར་གྲ་སྒྲིག་ཨང་གསར་ཡིན་སྐོར་སོགས་གསུངས་འདུག

ཡུ་རོབ་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པ་དབུ་འཛུགས་གནང་བ་དེ་ནི་མདུན་སྐྱོད་ཀྱི་གོམ་སྟབས་གལ་ཆེན་ཞིག་ཡིན་པ་དང་། ལས་དོན་དབུ་འཛུགས་གནང་བ་དང་བསྟུན་ཡུ་རོབ་གྲོས་ཚོགས་ནང་བོད་ཀྱི་ཐུན་མོང་མ་ཡིན་པའི་རིག་གཞུང་དང་། ངོ་བོ་སྲུང་སྐྱོབ། དེ་བཞིན་ཞི་བདེ་དང་། འགྲོ་བ་མིའི་ཐོབ་ཐང་གོང་འཕེལ་སོགས་ཀྱི་སྐོར་གླེང་སློང་བྱེད་པར་གལ་ཆེའི་ནུས་པ་འདོན་ཐུབ་ཀྱི་ཡོད་འདུག

གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། སྐལ་བཟང་སྦྱིན་པ།