སྙན་ངག་པ་དཔལ་མགོན་ལགས་ལྟ་སྲུང་འོག་ཡོད་ཀྱང་སྐུ་གཟུགས་བདེ་ཐང་ཡིན་འདུག

རྒྱ་ནག་གཞུང་གིས་འཛིན་བཟུང་བྱས་པའི་ན་གཞོན་སྙན་ངག་པ་དཔལ་མགོན་ལགས་མི་ལོ་གཉིས་ལྷག་གི་རྗེས་སུ་ཀློད་གྲོལ་བཏང་སྟེ་འཕྲོད་བསྟེན་ལ་དཀའ་ངལ་མེད་ཀྱང་མུ་མཐུད་ལྟ་རྟོག་བྱེད་མུས་ཡིན་འདུག 

ཉེ་ལམ་རྒྱ་ནག་གཞུང་གིས་ཕྱི་ལོ་ ༢༠༢༢ ལོར་གློ་བུར་དུ་འཛིན་བཟུང་བྱས་ཏེ། གར་སོང་ཆ་མེད་དུ་གྱུར་བའི་ན་གཞོན་སྙན་ངག་པ་དཔལ་མགོན་ལགས། ཕྱི་ལོ་ ༢༠༢༤ ལོའི་ལོ་མཇུག་ཙམ་ལ་ཀློད་གྲོལ་བཏང་སྟེ། ད་ལྟ་རང་ཁྱིམ་དུ་གནས་སྡོད་བྱེད་མུས་ཡིན་པའི་ཁར། སྐུ་གཟུགས་འཕྲོད་བསྟེན་གྱི་ཐད་ནས་དཀའ་ངལ་མེད་ཀྱང་། རྒྱ་ནག་གཞུང་གིས་མུ་མཐུད་དུ་སོ་ཉུལ་དང་ལྟ་ཞིབ་བྱེད་མུས་ཡིན་འདུག 

 ཉེ་ལམ་ཁོང་ཉིད་ཀློད་གྲོལ་བཏང་རྗེས་སྒེར་གྱི་སྤྱི་ཚོགས་དྲ་ལམ་སྟེང་། གློ་རྡེག་ཏུ་ལོ་འགར་སྦལ་དུ་ལྷུངས་པས་སེམས་ཁུར་གནང་མཁན་ཚོར་བཟོད་གསོལ་ཞུ།   ང་ནི་དཔྲལ་སྒོ་ཡོད་པ་དང་བསམ་བློ་ཟབ་པ་རང་ཚུགས་བརྟན་པ་སོགས་སྐྱེས་བུ་དམ་པ་ཚོར་ཡོད་དགོས་པའི་རིན་པོ་ཆེ་ལྟ་བུའི་ནང་རྡིག་གཅིག་ཀྱང་མེད་པས་ཚང་མར་དགོངས་དྭངས།   ད་སྐབས་ཀྱི་དུས་རབས་འདི་ནི་སློབ་དཔོན་ཆོས་གྲགས་ཀྱིས་གསུངས་པ་ལྟར་<སྐྱེ་བོ་ཕལ་ཆེར་ཕལ་ལ་ཆགས་ཤིང་ཤེས་རབ་རྩལ་མེད་པས་ན་ལེགས་བཤད་རྣམས།  དོན་དུ་མི་གཉེར་ཁོ་ནར་མ་ཟད་ཕྲག་དོག་དྲི་མ་དག་གིས་སྡང་བར་བྱེད>ཅེས་ཡང་ཡང་གསུངས་པ་ལྟར་གྱུར་འདུག་པས། སློབ་སྦྱོང་རེ་མ་བྱས་ན་རྗེ་རིན་པོ་ཆེས་ཀྱང<ཅི་ཡང་མ་བསླབ་གང་ཡང་མི་ཤེས>ཞེས་གོ་རྒྱུ་ཅན་གྱི་གསུང་བཤད་གནངས་ཡོད་པ་མ་ཡིན་ནམ།  དེ་བས་འགྲེང་ནས་འགྲོ་མཁན་གྱི་མི་རྣམས་གོག་ནས་འགྲོ་མཁན་ཞིག་ཏུ་མི་འགྱུར་པར་འབད་གནང་ཞུ།  ད་ནི་འུ་ཅག་ཚང་མ་རང་ཉིད་རང་ལ་རྟོན་པ་དང་།  རང་ཉིད་རང་ལ་བརྟེན་པ། རང་གི་བྱེད་པོ་རང་ཉིད་བྱ་རྒྱུ་སོགས་གཙོ་གནད་དུ་གཟུང་ཐུབ་པར་སྨོན། ཞེས་བརྗོད་འདུག 

འདི་གའི་གསར་འགོད་པར་གནས་ཚུལ་མཁོ་སྤྲོད་པས། ན་གཞོན་ཤེས་ཡོན་པ་དང་སྙན་ངག་པ་དཔལ་མགོན་ལགས་ཀློད་གྲོལ་བཏང་ནས་རང་ཁྱིམ་དུ་བདེ་བླག་ངང་འབྱོར་ཡོད་ཀྱང་། དམ་དྲག་དང་གསང་བ་བྱས་པའི་དབང་གིས་ཁོང་ཉིད་ནམ་ཞིག་ཀློད་གྲོལ་བཏང་ཡོད་མེད་ཤེས་རྟོགས་བྱུང་མེད་ནའང་། ད་ལྟ་སྐུ་གཟུགས་འཕྲོད་བསྟེན་སོགས་ཀྱི་ཐད་ནས་དཀའ་ངལ་གང་ཡང་མེད་སྐོར་བརྗོད་བྱུང་། 

ཡང་འབྲེལ་ཡོད་བོད་མི་ཞིག་གིས། རྒྱ་ནག་གཞུང་གིས་བཀག་ཉར་གྱི་འོག་ཁོང་ལ་དཔེ་ཀློག་དང་རྩོམ་ཡིག་སོགས་འབྲི་བའི་གོ་སྐབས་རག་མེད་སྟབས། ད་ལྟ་མུ་མཐུད་རང་ཁྱིམ་དུ་དཔེ་ཀློག་དང་རྩོམ་ཡིག་འབྲི་བའི་ལས་ལ་གཞོལ་མུས་ཡིན་ཡང་། དམ་དྲག་ཆེ་སྟབས་ཁོང་གི་རྩོམ་གྲོགས་སོགས་ཀྱིས་སྒེར་འབྲེལ་ལྟ་ཅི། ཐ་ན་ཁོང་གི་སྐད་འཕྲིན་གྱི་རྒྱབ་ལྗོངས་སུ་སྤེལ་བ་དག་ལ་དགའ་རྟགས་བརྒྱག་རྒྱུར་དོགས་ཟོན་བྱེད་མུས་ཡིན་སྐོར་དང་། སྤྱིར་ཁོང་གིས་ཕྱི་ཕྱོགས་ལ་འབྲེལ་བ་བྱས་པའི་དབང་གིས་འཛིན་བཟུང་བྱས་པ་ཡིན་པའི་ཚོད་དཔག་བྱེད་ཀྱིན་ཡོད་ཀྱང་། ད་ལྟའང་ཁོང་ཉིད་འཛིན་བཟུང་བྱས་པའི་རྒྱུ་མཚན་ཁ་གསལ་མེད་སྐོར་བརྗོད་བྱུང་། 

ད་ལྟ་རང་ལོ་སུམ་ཅུ་ལྷག་ཡིན་པའི་ན་གཞོན་སྙན་ངག་པ་དཔལ་མགོན་ལགས་ནི་བོད་མགོ་ལོག་པདྨ་རྫོང་བདེ་ནང་ཡུལ་ཚོ་ནས་ཡིན་ཞིང་། དེ་སྔ་རཱ་རྒྱ་ཤེས་རིག་སློབ་གླིང་གི་སློབ་མ་ཞིག་ཡིན་པ་མ་ཟད། དེ་སྔ་སློབ་གྲྭ་དེར་ཡོད་སྐབས་{བོད་ཀྱི་སྲོལ་རྒྱུན་རྒྱན་གོས་ཞིབ་འཇུག་} ཅེས་པའི་དཔྱད་རྩོམ་དཔེ་དེབ་ཅིག་དང་། {ལོ་ཟླ་ཕྱིར་འོང་ཡོད་ན་བསམ།} ཞེས་པའི་ལྷུག་རྩོམ་རྐྱང་པའི་དཔེ་དེབ་ཅིག {དེ་བཞིན་བརྩེ་འདང་གི་རི་མོ།} ཞེས་པའི་པར་རིས་རྐྱང་པའི་དཔེ་དེབ་གསུམ་བཅས་རྩོམ་སྒྲིག་བྱས། ཁོང་གིས་ {ང་ཁྱེད་ཀྱི་འཇིག་རྟེན་དུ་ཆར་གཞའ་མཁན་ཞིག་ཏུ་སྐྱེ་ན།} ཞེས་པའི་དུང་བརྗོད་སྙན་ངག་གི་དཔེ་དེབ་ཅིག་དང་། རྩོམ་གྲོགས་འགའ་དང་ལྷན་དུ་བྲིས་པའི་{ཆང་གི་ཕབས་རྟ།} ཞེས་པའི་སྙན་དེབ་སོགས་སྤྱི་ཚོགས་སུ་བཀྲམ་འདུག དེ་བཞིན་ཕྱི་ལོ་ ༢༠༡༧ ཕྱི་ཟླ་ ༦ ཚེས་ ༧ ཉིན་རཱ་རྒྱ་ཤེས་རིག་སློབ་གླིང་གི་གསེར་གྱི་གླེགས་བམ་དཔེ་ཀློག་རྩོམ་སྒྲིག་འགྲན་སྡུར་ཁྲོད་ཨང་དང་པོའི་བྱ་དགའ་ཐོབ། རྒྱུན་དུ་སྙན་ངག་འབྲི་སྐབས་སྨྱུག་མིང་དུ་དགུ་ཟུར་མ་དང་། ཐོ། རྨི་འཕྲུལ། གཞི་བདག་སོགས་བཀོལ་སྤྱོད་བྱེད་ཀྱིན་འདུག 

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། སྐལ་བཟང་སྦྱིན་པ།