ཨ་རིའི་གློག་བརྙན་འཁྲབ་སྟོན་པ་གྲགས་ཅན་རི་ཆར་ཌི་གྷེར་ལགས་སུ་སི་པན་གྱི་ཆེས་མཐོའི་གློག་བརྙན་གཟེངས་རྟགས་ཐོབ།

བོད་ཀྱི་གྲོགས་པོ་སྐུ་ཞབས་རི་ཆར་ཌི་གྷེར་ལགས་ཀྱིས་འགྲོ་མིའི་བདེ་རྩར་རོགས་འདེགས་དང་གློག་བརྙན་སྒྱུ་རྩལ་ལ་ཞབས་འདེགས་རླབས་ཆེན་ཞུས་པར་ངོས་འཛིན་གྱིས་སི་པན་གྱི་ཆེས་མཐོའི་གློག་བརྙན་གཟེངས་རྟགས་ཤིག་འབུལ་རྒྱུ་ཡིན་འདུག

དེ་རིང་རྒྱལ་སྤྱིའི་གསར་འགྱུར་བརྒྱུད་ལམ་ཁག་གིས་གནས་ཚུལ་སྤེལ་བ་ལྟར་ན། དུས་ཡུན་རིང་པོར་བོད་དོན་ལ་རྒྱབ་སྐྱོར་གནང་མཁན་དང་ཨ་རིའི་གློག་བརྙན་འཁྲབ་སྟོན་པ་གྲགས་ཅན་རི་ཆར་ཌི་གྷེར་ (Richard  Gere)  ལགས་སུ་ཡུ་རོབ་རྒྱལ་ཁབ་སི་པན་གྱི་རྒྱལ་ཡོངས་ཆེས་མཐོའི་གློག་བརྙན་གཟེངས་རྟགས་ (International Goya Award) འབུལ་གཏན་ཁེལ་བ་ཡོངས་བསྒྲགས་བྱས་འདུག་པ་དང་། གཟེངས་རྟགས་དེ་ནི་རི་ཆར་ཌི་གྷེར་ལགས་ཀྱིས་འགྲོ་མིའི་བདེ་རྩར་རོགས་སྐྱོར་དང་གློག་བརྙན་སྒྱུ་རྩལ་ལ་ཞབས་འདེགས་ཞུས་པར་ངོས་འཛིན་བྱས་པ་ཞིག་ཡིན་འདུག

དེ་འབྲེལ་སི་པན་གྱི་ཆེས་མཐོའི་གློག་བརྙན་མཐུན་ཚོགས་ཀྱིས། ཟླ་འདིའི་ཕྱི་ཚེས་  ༨ ཉིན་སི་པན་གྱི་ལྷོ་ཕྱོགས་གྲོང་ཁྱེར་ (Granada) ནང་གློག་བརྙན་འཁྲབ་སྟོན་པ་རི་ཆར་ཌི་གྷེར་ལགས་སུ་རྒྱལ་སྤྱིའི་གྷོ་ཡ་ (International Goya) གློག་བརྙན་གཟེངས་རྟགས་ཕུལ་རྒྱུ་ཡིན། ཁོང་གིས་འཁྲབ་སྟོན་གནང་བའི་གློག་བརྙན་སྒེག་ཉམས་ལྡན་པའི་མཛངས་མ་དང་(American Gigolo) སོགས་ཀྱིས་གློག་བརྙན་སྒྱུ་རྩལ་གྱི་ལོ་རྒྱུས་ཁྲོད་གློག་བརྙན་བཟོ་སྐྲུན་དང་འཁྲབ་སྟོན་ཐད་ཞབས་འདེགས་རླབས་ཆེན་བསྒྲུབས་ཡོད། ཅེས་བརྗོད་འདུག

དམིགས་བསལ་ཐེངས་འདིའི་གློག་བརྙན་གཟེངས་རྟགས་འབུལ་དོན་ངོས་འཛིན་གྱི་ཁྲོད། སྐུ་ཞབས་རི་ཆར་ཌི་གྷེར་ལགས་ནས་བོད་ལ་མིང་དོན་མཚུངས་པའི་རང་སྲིད་རང་སྐྱོང་གཞིར་བཞག་ཐོག་བོད་དོན་ལས་འགུལ་ལ་ཡུན་རིང་རྒྱབ་སྐྱོར་གནང་ཞིང་། བོད་ཀྱི་ཆོས་དང་རིག་གཞུང་ཉར་ཚགས་བྱེད་པར་རྒྱབ་སྐྱོར་གནང་བ། དེ་བཞིན། འཛམ་གླིང་ནང་སྐྱབས་བཅོལ་བ་དང་གནས་ཡུལ་མེད་པའི་མི་མང་པོར་རོགས་སྐྱོར་གནང་བ་སོགས་གཙོ་འདོན་བྱས་འདུག

གློག་བརྙན་འཁྲབ་སྟོན་པ་སྐུ་ཞབས་རི་ཆར་ཌི་གྷེར་ལགས་ནི། བོད་བརྒྱུད་ནང་བསྟན་ལ་དད་མོས་བྱེད་མཁན་ཞིག་དང་དུས་རྟག་ཏུ་༸གོང་ས་མཆོག་ལ་རྒྱབ་སྐྱོར་གནང་མཁན་གྱི་མི་སྣ་ཞིག་ཡིན་པར་མ་ཟད། ཕྱི་ལོ་ ༢༠༠༨ ལོར་རྒྱ་ནག་ནང་ཨོ་རྩེད་འགྲན་ཚོགས་མ་ཚོགས་པའི་ཡར་སྔོན་ཏུ་རྒྱ་ནག་གཞུང་གིས་བོད་ནང་དྲག་གནོན་མཚམས་འཇོག་དང་བོད་ལ་རང་བཙན་སྤྲོད་དགོས་པའི་ཐད་རྒྱལ་སྤྱིའི་སྤྱི་ཚོགས་ལ་འབོད་སྐུལ་གནང་བ་དང་།  ལོ་དེར་བོད་དོན་དྲིལ་བསྒྲགས་ཀྱི་ལས་འགུལ་ཐེངས་མང་སྤེལ་ཡོད་ལ། བོད་ཀྱི་འགྲོ་བ་མིའི་ཐོབ་ཐང་ལ་དོ་སྣང་དང་མཉམ་འབྲེལ་རྒྱལ་ཚོགས་སོགས་སུ་སྐད་གསེང་མཐོན་པོས་བོད་ཀྱི་བདེན་དོན་གླེང་སློང་གནང་བ་ཉུང་ཉུང་མིན་ལ། དམིགས་བསལ་འདས་པའི་ལོ་ངོ་མང་པོའི་རིང་རྒྱལ་སྤྱིའི་བོད་དོན་ལས་འགུལ་ཁང་དུ་ཕྱག་ལས་གནང་སྟེ། བོད་ནང་འགྲོ་འོང་འདྲ་མཉམ་དང་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་འཆར་སོགས་ལ་དངོས་ཤུགས་བརྒྱུད་གསུམ་ཐོག་ནས་རྒྱབ་སྐྱོར་ཤུགས་ཆེན་ཡོད། ད་ལྟ་དགུང་ལོ་ ༧༦ ཡིན་པའི་སྐུ་ཞབས་རི་ཆར་ཌི་གྷེར་དང་ཁོང་གི་བཟའ་ཟླ་ (Alejandra Silva)གཉིས་ལ་བུ་གཉིས་ཅིང་། འདས་ལོར་ཨ་རི་ནས་རང་ཉིད་ཀྱི་བཟའ་ཟླའི་རྒྱལ་ཁབ་སི་པན་དུ་གནས་སྤོར་བྱས་ཡོད།

གསར་འགོད་པ། སྐལ་བཟང་སྦྱིན་པ།