དབུ་མའི་ལམ་གྱི་སྲིད་བྱུས་ཞེས་པའི་དེབ་སྤྱི་ཚོགས་ནང་དངོས་སུ་བཀྲམ།

སྤྱི་ཟུར་བློ་བཟང་ཆོས་འབྱོར་ལགས་ཀྱིས་ཁྲིམས་ཀྱི་དབང་བསྒྱུར་དུ་འཁྲིད་རིམ་སྙིང་བསྡུས་ནི་ཁྲིམས་བཟོའི་འཐུས་མི་བྱས་པའི་འབུམ་རམས་པའི་ཆེད་དེབ་ཡིན་ཞེས་བརྗོད་འདུག

ཟླ་འདིའི་ཕྱི་ཚེས་ ༡ ཉིན་སྤྱི་ཟུར་བློ་བཟང་ཆོས་འབྱོར་ལགས་ཀྱིས་བརྩམས་པའི་དབུ་མའི་ལམ་གྱི་སྲིད་ཇུས་ཞེས་པའི་དཔེ་དེབ་གསར་པ་ཞིག་པར་སྐྲུན་གྲུབ་སྟེ། དེ་རིང་ནས་དངོས་སུ་སྤྱི་ཚོགས་ནང་འགྲེམས་སྤེལ་བྱེད་མགོ་བཙུགས་འདུག་ལ། དབུ་མའི་ལམ་གྱི་ཡིག་ཚང་དུ་སྒྲིག་བཞིན་པའི་དཔེ་དེབ་རྒྱས་པ་ཞིག་ཀྱང་རིམ་གྱིས་ཀློག་པ་པོ་དག་གི་སྤྱན་ལམ་དུ་གཟིགས་འབུལ་ཞུ་རྒྱུ་ཡིན་འདུག

དེ་རིང་འདི་གའི་གསར་འགོད་པས་རྩོམ་པ་པོ་སྤྱི་ཟུར་བློ་བཟང་ཆོས་འབྱོར་ལགས་སུ་དེབ་དེའི་སྐོར་ནས་བཀའ་འདྲི་ཞུས་སྐབས།  དེབ་འདིའི་ནང་ཡོད་པ་དག་ཁ་སྣོན་ཙམ་མིན་པར། སྲིད་བྱུས་འདིའི་གཞི་སྒྲོམ་སྤྱི་ཚོགས་ཀྱི་དགོས་མཁོ་དང་འཚམས་པར་ཕྱོགས་ཡོངས་ནས་ཚིག་ཉུང་ངུས་གོ་བདེར་ཤེས་ཆེད་དུ་བྲིས་ཡོད་ལ། དབུ་མའི་ལམ་གྱི་སྲིད་བྱུས་ཀྱི་བྱུང་རིམ་དང་དབུ་མའི་ལམ་དང་བོད་ཀྱི་ལོ་རྒྱུས། ད་དུང་དབུ་མའི་ལམ་གྱི་ཐོག་ནས་བོད་རྒྱ་འབྲེལ་མོལ་ལ་རྒྱ་གཞུང་ནས་ལྟ་ཕྱོགས་འགྱུར་བ་གཏོང་དགོས་ཇི་ཡོད་ཀྱང་བྱུང་རབས་དང་སྦྲེལ་ཏེ་བྲིས་ཡོད། ཅེས་བརྗོད་བྱུང་།

དཔེ་དེབ་འདིའི་ཆེད་བརྗོད་༧སྐུའི་གསུང་བསྒྱུར་ལྷ་རམས་པ་ཐུབ་བསྟན་སྦྱིན་པ་ལགས་ཀྱིས་བྲིས་གནང་ཞིང་། ཁོང་གིས། བོད་རང་བཙན་དང་དབུ་མའི་ལམ་གྱི་སྲིད་བྱུས་འཛིན་མཁན་སུ་ཡིན་རུང་། གཅིག་མཚུངས་སུ་བོད་རྒྱལ་ཁབ་དང་མི་རིགས་ལ་ལར་ཞེན་ཡོད་པ་འདྲ་མཉམ་ཡིན་པ་བརྗོད་མི་དགོས་མོད། ༧གོང་ས་མཆོག་ནས་དབུ་མའི་ལམ་གྱི་སྟེང་ནས་བོད་ཀྱི་བདེ་དོན་འཐབ་རྩོད་བྱ་འོས་པར་དགོངས་པ་ནི། རྙོག་འཛིང་ཅན་གྱི་ལོ་རྒྱུས་དང་དུས་རབས་ཉུ་ཤུ་བའི་སྨད་ཀྱི་འཛམ་གླིང་སྤྱིའི་ཆབ་སྲིད་གནས་བབ། རྒྱལ་སྤྱིའི་ནང་བོད་དོན་རྒྱབ་སྐྱོར་གྱི་ལས་འགུལ་སྤེལ་ཐབས། ལྷག་པར་བོད་ནང་གི་ཛ་དྲག་གི་གནས་ཚུལ་སོགས་ཕྱོགས་མང་པོ་ཞིག་ལ་གཟིགས་ཏེ། བོད་ཀྱི་བདེ་དོན་འཐབ་རྩོད་དེ་བོད་མིའི་རྩ་བའི་འདོད་འདུན་མ་འགྲུབ་བར་དུ་ནུས་ཤུགས་མི་ཉམས་པར་གནས་ཐུབ་པར་དགོངས་ཏེ་གཏན་འབེབས་གནང་བ་ཞིག་ཆགས་ཡོད་ཅེས་གསུངས་པ་དང་སྦྲགས། དཔེ་དེབ་འདིའི་མ་འོངས་པར་བོད་དོན་འཐབ་རྩོད་ཀྱི་ལམ་ཕྱོགས་གང་འདྲ་ཞིག་ཏུ་འགྲོ་དགོས་མིན་གྱི་གནས་ཚུལ་ཤེས་རྟོགས་འོང་རྒྱུར་ཕན་ཐོགས་ཆེན་པོ་ཡོང་བའི་རེ་བ་ཡོད་ཅེས་གསུངས་འདུག

ཤོག་ངོས་ ༣༦ ལྡན་པའི་དཔེ་དེབ་ཀྱི་སྔོན་གླེང་དུ་སྤྱི་ཟུར་བློ་བཟང་ཆོས་འབྱོར་ལགས་ཀྱིས། ངས་རྩེད་མཚར་དང་སྦྲགས་ཏེ་གྲོགས་པོ་ཚོར་ག་རེ་ཞུས་མྱོང་ཟེར་ན། ང་ཚོ་གཞུང་གི་སྲི་ཞུ་བ་བྱས། ༧རྒྱལ་བ་རིན་པོ་ཆེས་གསར་བསྐྲུན་གནང་བའི་རྐུབ་སྟེགས་སྟེང་བསྡད།་གོ་གནས་བཟུང་། གླ་ཕོགས་བླངས། མི་མང་གི་སྐུ་ཚབ་བྱེད་རྒྱུའི་སྐལ་བཟང་བྱུང་། ཁྱིམ་ཚང་དཀྱུས་མའི་མི་ཞིག་མང་གཙོའི་ལམ་ནས་བདམས་ཐོན་བྱུང་བ་ཡིན་པས། ཕྱོགས་གཅིག་ནས་ལོ་རྒྱུས་ནང་བཀོད་རྒྱུའི་གནས་ཚུལ་ཡིན་མོད། འོན་ཀྱང་། གཙོ་བོ་ལས་འགན་དེ་དག་འདི་དང་ཕྱི་མར་འཁྱེར་རྒྱུ་ཡོད་པ་བྱེད་དགོས་སྟབས། ཁྲིམས་ཀྱི་དབང་བསྒྱུར་དུ་འཁྲིད་རིམ་སྙིང་བསྡུས་ནི་ཁྲིམས་བཟོའི་འཐུས་མི་བྱས་པའི་འབུམ་རམས་པའི་ཆེད་དེབ་ཡིན་ཞེས་ལབ་ཀྱི་ཡོད། ཅེས་བརྗོད་འདུག

དཔེ་དེབ་དེར་ནང་གསེས་དོན་ཚན་དགུ་འདུག་ཅིང་། དེ་དག་ནི་དབུ་མའི་ལམ་གྱི་ས་བོན་དང་སྙིང་དོན། དབུ་མའི་ལམ་གྱི་ནང་དོན་ཞིབ་པ། དབུ་མའི་ལམ་དང་བོད་ཀྱི་ལོ་རྒྱུས། དབུ་མའི་ལམ་གྱི་འབྲེལ་མོལ་དང་གྲུབ་འབྲས། དབུ་མའི་ལམ་གྱི་བདེན་རྒྱབ་དང་ཆོད་སེམས། དབུ་མའི་ལམ་གྱི་ལས་འགུལ་སྤེལ་ཕྱོགས་བཅས་རེད་འདུག

གསར་འགོད་པ། སྐལ་བཟང་སྦྱིན་པ།