༧གོང་ས་རྒྱལ་བ་རིན་པོ་ཆེ་མཆོག་གི་དབུས་བོད་གཞུང་མང་གཉིས་ནས་འཛམ་གླིང་ཡུལ་གྲུ་གང་སར་༧སྐུའི་གཅེན་པོ་རྒྱ་ལོ་དོན་གྲུབ་མཆོག་དགོངས་པ་རྫོགས་པར་མཆོད་འབུལ་སྨོན་ལམ་ཚོགས་ཀྱིན་འདུག
ཁ་སང་ཕྱི་ཚེས་ ༩ ཉིན་༧གོང་ས་རྒྱལ་བ་རིན་པོ་ཆེ་མཆོག་ཆོས་སྡེ་ཆེན་པོ་བཀྲ་ཤིས་ལྷུན་པོའི་ཆོས་གྲྭའི་ནང་༧སྐུའི་གཅེན་པོ་རྒྱ་ལོ་དོན་གྲུབ་མཆོག་གི་འདས་མཆོད་ལ་དབུ་བཞུགས་ཀྱིས་བཀའ་སློབ་སྩལ་བའི་ནང་། ངོས་ཀྱི་གཅེན་པོ་རྒྱ་ལོ་དོན་གྲུབ་འདས་གྲོངས་སུ་ཕྱིན་པ་རེད། དེའི་འདས་མཆོད་དུ་འདིར་ཚོགས་ཞུགས་ཀྱི་དགེ་འདུན་པ་རྣམས་ལ་བསྙེན་བཀུར་བྱས་ནས་དམིགས་ཡུལ་གཙོ་བོ་དེ། ངོས་ཀྱི་གཅེན་པོ་རྒྱ་ལོ་དོན་གྲུབ་ཀྱིས་ཧུར་ཐག་འབད་ཐག་བྱས་པ་རེད། སྙིང་རྗེ། ཧ་ལས་པའི་སེམས་ཤུགས་དང་སྙིང་སྟོབས་ཆེན་པོ་རེད། དེ་རིང་འདིར་འདས་མཆོད་བསྙེན་བཀུར་བྱས་ཏེ་ངོས་ཀྱི་གཅེན་པོ་རྒྱལ་ལོ་དོན་གྲུབ་རིམ་བཞིན་སྐྱེ་གནས་བཟང་པོ་ཞིག་དང་། བོད་རིགས་རང་དུ་སྐྱེ་བ་དང་། དེའི་ནང་ནས་བོད་ཀྱི་བསྟན་པ་ཆབ་སྲིད་ལ་ཞབས་འདེགས་སྒྲུབ་མཁན་ཞིག་རྒྱུན་མཐུད་ནས་ཡོང་ཐུབ་པར་ཁོང་གིས་སྨོན་ལམ་བརྒྱབ་པ་དང་འདོད་པ་ཡོད་པ་རེད། ངོས་ཀྱི་ངོས་ནས་ཀྱང་སྨོན་ལམ་དེ་རྒྱག་གི་ཡོད། ཁོང་ལ་ཚེ་རབས་མང་པོར་༧རྒྱལ་བ་རིན་པོ་ཆེའི་འཁྲིས་ལ་བསྡད་དེ་ཞབས་འདེགས་སྒྲུབ་པའི་སྨོན་ལམ་དང་སེམས་ཤུགས་ཡོད་པ་རེད། དེར་བརྟེན། དེ་ལྟ་བུའི་སྨོན་ལམ་སྟོབས་ཆེན་པོ་དེ་འགྲུབ་པར་ཚང་མས་སྐྱབས་འཇུག་གནང་རོགས་ཞུ་རྒྱུ་ཡིན། ཞེས་གསུངས།
དེ་རིང་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས། བོད་མིའི་སྒྲིག་འཛུགས་དང་བོད་མི་ཡོངས་ཀྱི་ཚབ་ཞུས་ཏེ་༧སྐུའི་གཅེན་པོ་རྒྱ་ལོ་དོན་གྲུབ་མཆོག་དགོངས་པ་རྫོགས་པར་གདུང་སེམས་མཉམ་སྐྱེད་ཞུ་རྒྱུ་དང་། ཁོང་ནི་བོད་མི་རིགས་ཀྱི་ལོ་རྒྱས་དང་བོད་དོན་ཐོག་མཛད་རྗེས་རླབས་ཆེན་འཇོག་མཁན་ཞིག་ཡིན་ལ། ཁོང་གི་མཛད་རྗེས་ཀྱིས་མ་འོངས་པའི་མི་རབས་རྣམས་ལ་སེམས་ཤུགས་སྤར་ངེས་རེད། ཁོང་ཉིད་མྱུར་དུ་སྐྱེ་བ་བླངས་ཏེ་མཛད་རྗེས་རྒྱུན་སྐྱོང་ཡོང་བའི་སྨོན་འདུན་ཞུ་རྒྱུ་ཡིན། ཞེས་གསུངས་འདུག ཟླ་འདིའི་ཕྱི་ཚེས་ ༨ ཉིན་བཀའ་བློན་ཁྲི་ཟུར་རྒྱ་ལོ་དོན་གྲུབ་མཆོག་སྐུ་ཚེའི་འཕེན་པ་རྫོགས་པ་དང་། བོད་མིའི་སྒྲིག་འཛུགས་ཀྱི་བདེ་སྲུང་བཀའ་བློན་རྒྱ་རི་སྒྲོལ་མ་མཆོག་ས་གནས་སུ་ཕེབས་ཏེ་གདུང་སེམས་མཉམ་སྐྱེད་ཞུས་པ་མ་ཟད། ཕྱི་ཚེས་ ༩ ཉིན་བོད་མིའི་སྒྲིག་འཛུགས་ཀྱི་སྐུ་ཚབ་བདེ་སྲུང་བཀའ་བློན་རྒྱ་རི་སྒྲོལ་མ་མཆོག་གིས་ཞིང་གཤེགས་བཀའ་ཁྲི་ཟུར་མཆོག་གི་སྐུ་ཕུང་ལ་བོད་ཀྱི་རྒྱལ་དར་སྒྲོན་གནང་འདུག
བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས། ༧གོང་ས་རྒྱལ་བ་རིན་པོ་ཆེ་མཆོག་གི་གཅེན་པོ་རྒྱ་ལོ་དོན་གྲུབ་མཆོག་སྐུ་ཚེ་མ་ཟིན་པའི་གནས་ཚུལ་ཐོས་པར་གདུང་སེམས་མཉམ་སྐྱེད་ཞུ་ཡི་ཡོད། ཁོང་གི་སྐུ་ཚེ་ཧྲིལ་པོར་བོད་དོན་འཐབ་རྩོད་ཆེད་དུ་བཏང་བར་བཀའ་དྲིན་རྗེས་དྲན་ཞུ་རྒྱུ་དང་། ཁོང་གི་མཛད་རྗེས་དེས་བོད་ཀྱི་བདེན་མཐའ་གསལ་སླད་ང་ཚོར་དྲང་བདེན་དང་རང་དབང་གི་འཐབ་རྩོད་བྱེད་པར་མུ་མཐུད་དུ་སེམས་ཤུགས་སྤེལ་ངེས་རེད། དམ་པ་ཁོང་གི་རྣམ་ཤེས་ལ་བར་ཆད་མི་ཡོང་བའི་སྨོན་ལམ་ཡོད། ཅེས་གསུངས་འདུག
དེ་བཞིན། དེ་རིང་ཕྱི་ཚེས་ ༡༠ ཉིན་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་སྐྱབས་གནས་དགེ་འདུན་གྱི་སྡེ་དབུ་བཞུགས་ཐོག་བཀའ་ཟུར་རྒྱ་ལོ་དོན་གྲུབ་མཆོག་གི་ཆེད་དུ་མཆོད་འབུལ་སྨོན་ལམ་ཚོགས་ཀྱིན་འདུག་ལ། ཉིན་རྒྱབ་ཏུ་བོད་མིའི་སྒྲིག་འཛུགས་ཀྱི་སྲི་ཞུའི་ལས་བྱེད་ཡོངས་ནས་མཆོད་འབུལ་སྨོན་ལམ་འཚོགས་རྗེས། དམ་པ་ཁོང་ལ་མྱ་ངན་མཚོན་ཆེད་བོད་མིའི་སྒྲིག་འཛུགས་ཀྱིས་ཉིན་ཕྱེད་རིང་ལས་མཚམས་འཇོག་རྒྱུ་བྱས་འདུག འཛམ་གླིང་ཡུལ་གྲུ་གང་སར་གནས་པའི་བོད་མི་རྣམས་དང་ལྷག་པར་དུ་བོད་ནང་གི་བོད་མི་ཚོས་ཀྱང་རང་རང་གི་སྤྱི་ཚོགས་བརྒྱུད་ལམ་ཁག་ཏུ་དམ་པོ་ཁོང་ལ་མྱ་ངན་རྗེས་དྲན་གྱི་ཞུ་ཚིག་སོགས་བྲིས་ནས་སེམས་ཚོར་གནང་མཁན་མང་པོ་འདུག
༧སྐུའི་གཅེན་པོ་རྒྱ་ལོ་དོན་གྲུབ་མཆོག་ནི་ཕྱི་ལོ་ ༡༩༢༨ ལོར་མདོ་སྨད་སྟག་འཚེར་དུ་སྐུ་འཁྲུངས་ཤིང་། སྐུ་ན་ཆུང་བའི་དུས་ནས་རྒྱ་ནག་ནང་སློབ་གཉེར་གནང་བར་ཕེབས། རྒྱ་དམག་གིས་བོད་ཤར་ཕྱོགས་ནས་བཙན་འཛུལ་བྱེད་མགོ་བཙུགས་རྗེས། རྒྱུ་རྐྱེན་འདྲ་མིན་གྱི་ཐོག་ནས་ཁོང་བོད་དུ་ཕྱིར་ཕེབས་མ་ཐུབ་པར་རྒྱ་གར་དུ་ཕེབས་དགོས་བྱུང་། རྒྱ་གར་དུ་བཞུགས་སྐབས་ཨ་རིའི་དབུས་གསང་བའི་ལས་ཁུངས་ལ་ཐོག་མར་འབྲེལ་བ་བྱུང་ཞིང་། དེའི་རྗེས་ལོ་རབས་ལྔ་བཅུའི་མགོ་སྟོད་དུ་ཨ་རིའི་དབུས་གསང་བའི་ལས་ཁུངས་ཀྱིས་བོད་མི་འཐབ་རྒོལ་བ་བརྒྱ་ཕྲག་ལ་གསང་བའི་ཐོག་ནས་སྦྱོང་བརྡར་སྤྲད།
ཕྱི་ལོ་ ༡༩༥༩ ལོར་༧གོང་ས་རྒྱལ་བ་རིན་པོ་ཆེ་མཆོག་བོད་ནས་རྒྱ་གར་དུ་བཙན་བྱོལ་དུ་མ་ཕེབས་གོང་ནས་༧སྐུའི་གཅེན་པོ་རྒྱལ་ལོ་དོན་གྲུབ་མཆོག་དང་རྒྱ་གར་གཞུང་དབར་འབྲེལ་བ་ཡོད་ལ། ༧གོང་ས་མཆོག་རྒྱ་གར་དུ་ཞབས་སོར་འཁོད་སྐབས་རྒྱ་གར་གྱི་སྲིད་བློན་ནེ་རུ་མཆོག་གི་དབུས་རྒྱ་གར་དབུས་གཞུང་གི་དཔོན་རིགས་རྣམས་དང་འབྲེལ་བ་ཞུ་རྒྱུའི་ཐུགས་འགན་གཙོ་བོ་བཞེས། དེ་བཞིན་ལོ་རབས་ལྔ་བཅུའི་མཇུག་དང་དྲུག་ཅུའི་ནང་འཛམ་གླིང་མཉམ་འབྲེལ་རྒྱལ་ཚོགས་ཀྱི་ནང་བོད་དོན་ཞུ་གཏུག་གནང་རྒྱུའི་ཕྱག་ལས་ཤུགས་ཆེ་གནང་ཞིང་། ཨ་རིའི་གཞུང་གིས་ཀྱང་རྒྱབ་སྐྱོར་ཤུགས་ཆེན་གནང་ཡོད་ལ། བོད་དོན་ཐད་འཛམ་གླིང་མཉམ་འབྲེལ་རྒྱལ་ཚོགས་ནང་ལོ་རྒྱུས་རང་བཞིན་ལྡན་པའི་གྲོས་ཆོད་ཁག་གསུམ་བཞག
ཕྱི་ལོ་ ༡༩༧༦ ལོར་མའོ་ཙེ་ཏུང་འདས་གྲོངས་སུ་ཕྱིན་རྗེས་རྒྱ་ནག་ནང་མགོ་ཁྲིད་ལ་འགྱུར་བ་ཆེན་པོ་ཞིག་ཕྱིན་ཏེ། ཏིང་ཞའོ་ཕིང་གིས་ཧོང་ཀོང་ནང་ཡོད་པའི་རྒྱ་ནག་གཞུང་འབྲེལ་ཤིན་ཧྭ་གསར་ཁང་བརྒྱུད་༧སྐུའི་གཅེན་པོ་རྒྱ་ལོ་དོན་གྲུབ་མཆོག་ལ་འབྲེལ་བ་ཞུས་ཤིང་། ༧གོང་ས་རྒྱལ་བ་རིན་པོ་ཆེ་མཆོག་གི་བཀའ་འཁྲོལ་འོག་ཕྱི་ལོ་ ༡༩༧༩ ལོར་རྒྱ་ནག་གི་རྒྱལ་ས་པེ་ཅིན་དུ་ཆེད་ཕེབས་ཀྱིས་ཏིང་ཞའོ་ཕིང་དང་མཇལ་འཕྲད་ཐོག་མ་དེ་གནང་ཡོད། ཕྱི་ལོ་ ༡༩༩༡ ལོར་༧གོང་ས་མཆོག་གིས་བཙན་བྱོལ་བོད་མིའི་བཅའ་ཁྲིམས་ལ་བསྐྱར་བཅོས་གནང་རྗེས། ༧སྐུའི་གཅེན་པོ་རྒྱ་ལོ་དོན་གྲུབ་མཆོག་གིས་བོད་མིའི་སྒྲིག་འཛུགས་ཀྱི་བཀའ་བློན་ཁྲི་པའི་མཛད་འགན་བཞེས། ཕྱི་ལོ་ ༡༩༩༣ ནས་ ༡༩༩༦ བར་བདེ་སྲུང་བཀའ་བློན་གྱི་མཛད་འགན་བཞེས།
གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
